ಮಗುವಿನ ಪ್ರಾಣ ಉಳಿಸಲು ತನ್ನ ಜೀವವನ್ನೇ ತ್ಯಾಗ ಮಾಡಿದ ಫುಟ್ಬಾಲ್ ಆಟಗಾರನ ಪತ್ನಿ : ವೆನೆಜುವೆಲಾ ಭೂಕಂಪದ ಕಣ್ಣೀರ ಕಥೆ!

ಕರಾಕಸ್ : ವೆನೆಜುವೆಲಾದಲ್ಲಿ ಇತ್ತೀಚೆಗೆ ಸಂಭವಿಸಿದ ಭೀಕರ ಅವಳಿ ಭೂಕಂಪವು 1000ಕ್ಕೂ ಅಧಿಕ ಮಂದಿಯನ್ನು ಬಲಿಪಡೆದಿರುವಂತೆಯೇ, ಮಹಾ ದುರಂತದ ನಡುವೆ ತಾಯಿಯೊಬ್ಬಳ ನಿಸ್ವಾರ್ಥ ಪ್ರೀತಿ ಮತ್ತು ಧೈರ್ಯದ ಕರುಣಾಜನಕ ಕಥೆಯೊಂದು ಜಗತ್ತಿನಾದ್ಯಂತ ಭಾರೀ ಸುದ್ದಿಯಾಗುತ್ತಿದೆ. ವೆನೆಜುವೆಲಾದ ಪ್ರಸಿದ್ಧ ಫುಟ್ಬಾಲ್ ಕ್ಲಬ್ ‘ಮಾರ್ಟಿಮೊ ಡಿ ಲಾ ಗ್ವೈರಾ’ದ ಆಟಗಾರ ಹೆಕ್ಟರ್ ಬೆಲ್ಲೊ ಅವರ ಪತ್ನಿ ಆಂಡ್ರಿಯಾ ಬೆಲ್ಲೊ, ಕುಸಿದುಬಿದ್ದ ಕಟ್ಟಡದ ಅವಶೇಷಗಳ ನಡುವೆ ತನ್ನ ಒಂದು ವರ್ಷದ ಹೆಣ್ಣು ಮಗುವನ್ನು ರಕ್ಷಿಸಲು ಹರಸಾಹಸ ಮಾಡಿ, ದುರದೃಷ್ಟವಶಾತ್ ಕೊನೆಗೆ ತಾವೇ ಪ್ರಾಣ ಕಳೆದುಕೊಂಡಿದ್ದಾರೆ.

ಕೊನೆಯುಸಿರಿರುವವರೆಗೂ ಮಗುವನ್ನು ಬಿಡದ ತಾಯಿ

ಜೂನ್ 24ರ ಬುಧವಾರ ಸಂಭವಿಸಿದ ಪ್ರಬಲ ಭೂಕಂಪದ ವೇಳೆ ಹೆಕ್ಟರ್ ಮತ್ತು ಆಂಡ್ರಿಯಾ ವಾಸವಿದ್ದ ವಸತಿ ಕಟ್ಟಡವು ಏಕಾಏಕಿ ಸಂಪೂರ್ಣವಾಗಿ ಕುಸಿದುಬಿದ್ದಿತ್ತು. ಈ ವೇಳೆ ತನ್ನ ಒಂದು ವರ್ಷದ ಪುತ್ರಿ ಅಲಾನಾಳಿಗೆ ಯಾವುದೇ ಆಪತ್ತು ಬಾರದಂತೆ ಆಂಡ್ರಿಯಾ ತನ್ನ ದೇಹವನ್ನೇ ಗುರಾಣಿಯಾಗಿಸಿ ಮಗುವನ್ನು ಅಪ್ಪಿ ಹಿಡಿದಿದ್ದರು. ರಕ್ಷಣಾ ಸಿಬ್ಬಂದಿ ಅವಶೇಷಗಳನ್ನು ತೆರವುಗೊಳಿಸಿದಾಗ ಆಂಡ್ರಿಯಾ ಶವವಾಗಿ ಪತ್ತೆಯಾಗಿದ್ದಾರೆ. ಆದರೆ, ತಾಯಿಯ ಮಮತೆಯ ಆಸರೆಯಲ್ಲಿ ಸಣ್ಣ ಗಾಯಗಳೂ ಇಲ್ಲದೆ ಮಗು ಅಲಾನಾ ಪವಾಡಸದೃಶವಾಗಿ ಬದುಕುಳಿದಿದ್ದಾಳೆ.

ಭಾವನಾತ್ಮಕ ಪೋಸ್ಟ್ ಹಂಚಿಕೊಂಡ ಪತಿ

ತನ್ನ ಪ್ರೀತಿಯ ಪತ್ನಿಯ ಅಗಲಿಕೆಯ ಆಘಾತದಲ್ಲೂ ಹೆಕ್ಟರ್ ಬೆಲ್ಲೊ ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಂಡಿರುವ ನುಡಿನಮನ ಪ್ರತಿಯೊಬ್ಬರ ಕಣ್ಣನ್ನು ತೇವಗೊಳಿಸುವಂತಿದೆ. “ನೀನು ಯಾವಾಗಲೂ ನಮ್ಮ ನೆಚ್ಚಿನ ಹೀರೊ ಅಮ್ಮಾ. ನೀನು ಎಷ್ಟು ಅದ್ಭುತವಾಗಿದ್ದೆ, ಮಗಳನ್ನು ಎಷ್ಟು ಪ್ರೀತಿಸುತ್ತಿದ್ದೆ ಎಂಬುದನ್ನು ನಾನು ಅವಳಿಗೆ ಸದಾ ನೆನಪಿಸುತ್ತಲೇ ಇರುತ್ತೇನೆ. ನಮ್ಮ ಮಗಳಿಗಾಗಿ ನೀನು ನಿನ್ನ ಜೀವವನ್ನೇ ಮುಡಿಪಾಗಿಟ್ಟ ಕಥೆಯನ್ನು, ಕೊನೆಯುಸಿರಿರುವವರೆಗೂ ಅವಳನ್ನು ಕೈಬಿಡದ ನಿನ್ನ ಧೈರ್ಯವನ್ನು ಅವಳಿಗೆ ಹೆಮ್ಮೆಯಿಂದ ಹೇಳುತ್ತೇನೆ” ಎಂದು ಬರೆದುಕೊಂಡಿದ್ದಾರೆ. ಜೊತೆಗೆ ಮಗಳಿಗೆ ಧೈರ್ಯ ತುಂಬಿರುವ ಹೆಕ್ಟರ್, “ಇನ್ಮುಂದೆ ನೀನು ಮತ್ತು ನಾನು ಮಾತ್ರ, ನಮ್ಮನ್ನು ಅಮ್ಮ ಸ್ವರ್ಗದಿಂದ ನೋಡಿಕೊಳ್ಳುತ್ತಿರುತ್ತಾಳೆ” ಎಂದು ಭಾವುಕರಾಗಿ ನುಡಿದಿದ್ದಾರೆ.

ಕಂಬನಿ ಮಿಡಿದ ಕ್ರೀಡಾ ಲೋಕ

ಈ ದುರಂತದ ಹಿನ್ನೆಲೆಯಲ್ಲಿ ವೆನೆಜುವೆಲಾದ ಕ್ರೀಡಾ ಪ್ರಚಾರ ಸಂಸ್ಥೆಯಾದ ‘ಕುಮಾನ್ ಡಿ ಕ್ಯಾಂಪಿಯನ್ಸ್’ ಸೇರಿದಂತೆ ಸಮಸ್ತ ಫುಟ್ಬಾಲ್ ಸಮುದಾಯ ಮತ್ತು ಸುಕ್ರೆ ಪ್ರಾಂತ್ಯದ ನಾಗರಿಕರು ಹೆಕ್ಟರ್ ಕುಟುಂಬಕ್ಕೆ ತೀವ್ರ ಸಂತಾಪ ಸೂಚಿಸಿದ್ದಾರೆ. ಹೆಕ್ಟರ್ ಅವರ ಈ ದುಃಖದ ಸಮಯದಲ್ಲಿ ನಾವೆಲ್ಲರೂ ನಿಮ್ಮೊಂದಿಗಿದ್ದೇವೆ, ಆ ಭಗವಂತ ನಿಮಗೆ ಧೈರ್ಯ ಮತ್ತು ಶಾಂತಿ ಕರುಣಿಸಲಿ ಎಂದು ಕ್ರೀಡಾ ಲೋಕದ ಗಣ್ಯರು ಪ್ರಾರ್ಥಿಸಿದ್ದಾರೆ.

1,400 ದಾಟಿದ ಸಾವಿನ ಸಂಖ್ಯೆ

ವೆನೆಜುವೆಲಾ ಭೂಕಂಪವು ದೇಶದ ಇತಿಹಾಸದಲ್ಲೇ ಅತ್ಯಂತ ವಿನಾಶಕಾರಿ ದುರಂತಗಳಲ್ಲೊಂದಾಗಿದೆ. ಈ ಭೀಕರ ಭೂಕಂಪಕ್ಕೆ ಬಲಿಯಾದವರ ಸಂಖ್ಯೆ ಈಗಾಗಲೇ 1,430ಕ್ಕೆ ಏರಿಕೆಯಾಗಿದೆ. ಇದಲ್ಲದೆ, ಕಟ್ಟಡಗಳ ಅವಶೇಷಗಳ ಅಡಿಯಲ್ಲಿ ಸಿಲುಕಿ ಕನಿಷ್ಠ 68,900 ಕ್ಕೂ ಹೆಚ್ಚು ಜನರು ನಾಪತ್ತೆಯಾಗಿದ್ದಾರೆ ಎಂದು ಅವರ ಕುಟುಂಬಸ್ಥರು ಮತ್ತು ಸರ್ಕಾರ ಆತಂಕ ವ್ಯಕ್ತಪಡಿಸಿದೆ. ಪ್ರಸ್ತುತ ಸ್ಥಳದಲ್ಲಿ ರಕ್ಷಣಾ ಕಾರ್ಯಾಚರಣೆ ತೀವ್ರಗತಿಯಲ್ಲಿ ಸಾಗುತ್ತಿದೆ ಎಂದು ಸರ್ಕಾರ ಮಾಹಿತಿ ನೀಡಿದೆ.

ಇದನ್ನೂ ಓದಿ : ಮದುವೆ ಪ್ರಸ್ತಾಪ ನಿರಾಕರಿಸಿದ್ದಕ್ಕೆ ಯುವತಿಗೆ ಬೆಂಕಿ ಹಚ್ಚಿದ ಪ್ರೇಮಿ : ಒಡಿಶಾದಲ್ಲಿ ಭೀಕರ ಕೃತ್ಯ!