ವಾಷಿಂಗ್ಟನ್/ನ್ಯೂಯಾರ್ಕ್ : ಅಮೆರಿಕದ ಕೊಲೊರಾಡೋದಲ್ಲಿರುವ ಕಾಯ್ದಿರಿಸಿದ ಸೇನಾನೆಲೆಯೊಂದರ ಮೇಲ್ಭಾಗದಲ್ಲಿ ಸುಮಾರು 100 ಅಡಿ ಅಗಲದ ರಹಸ್ಯ ತ್ರಿಕೋನಾಕಾರದ ಹಾರುವ ತಟ್ಟೆಯೊಂದು (UFO) ಹಾದುಹೋಗಿರುವ ಆಘಾತಕಾರಿ ವಿಡಿಯೋಗಳ ಕುರಿತು ಅಮೆರಿಕ ರಕ್ಷಣಾ ಇಲಾಖೆ ತನಿಖೆ ಆರಂಭಿಸಿದೆ. ‘ನ್ಯೂಯಾರ್ಕ್ ಪೋಸ್ಟ್’ ಪ್ರಕಟಿಸಿದ ಈ ನಿಗೂಢ ವರದಿಯ ಬೆನ್ನಲ್ಲೇ, ಅಮೆರಿಕ ಸರ್ಕಾರವು ಈ ಕುರಿತು ಸಮಗ್ರ ಪರಿಶೀಲನೆ ನಡೆಸುತ್ತಿರುವುದಾಗಿ ತಿಳಿಸಿದೆ.
ಈ ಕುರಿತು ಪ್ರತಿಕ್ರಿಯಿಸಿರುವ ರಕ್ಷಣಾ ಇಲಾಖೆಯ ಉಸ್ತುವಾರಿ ಮಾಧ್ಯಮ ಕಾರ್ಯದರ್ಶಿ ಜೋಯಲ್ ವಾಲ್ಡೆಜ್, ಇಲಾಖೆಯ ತಜ್ಞರ ತಂಡವು ಈ ವರದಿ ಮತ್ತು ವಿಡಿಯೋಗಳಿಗೆ ಸಂಬಂಧಿಸಿದ ಮಾಹಿತಿಗಳನ್ನು ಪರಿಶೀಲಿಸುತ್ತಿದೆ ಎಂದು ಸಾಮಾಜಿಕ ಜಾಲತಾಣದಲ್ಲಿ ಸ್ಪಷ್ಟಪಡಿಸಿದ್ದಾರೆ. ತನಿಖೆಯಲ್ಲಿ ಯಾವುದೇ ಮಹತ್ವದ ಪುರಾವೆಗಳು ಲಭ್ಯವಾದರೆ, ಅಪರಿಚಿತ ಹಾರುವ ತಟ್ಟೆ (UFO) ಮತ್ತು ರಹಸ್ಯ ಬಾಹ್ಯಾಕಾಶ ವಿದ್ಯಮಾನಗಳ ಕುರಿತು ಮಾಹಿತಿ ಹಂಚಿಕೊಳ್ಳುವ ಸರ್ಕಾರದ ‘ಪರ್ಸ್ಯೂ’ (PURSUE) ಯೋಜನೆಯ ಮೂಲಕ ಸಾರ್ವಜನಿಕರಿಗೆ ಬಹಿರಂಗಪಡಿಸಲಾಗುವುದು ಎಂದು ಅವರು ಸೂಚಿಸಿದ್ದಾರೆ.
ರಾತ್ರಿ ವೇಳೆ ಮಿಲಿಟರಿ ಕ್ಯಾಂಪ್ ಬಳಿ ಕಂಡಿದ್ದೇನು?
ವರದಿಗಳ ಪ್ರಕಾರ, 2023ರಲ್ಲಿ ಕೊಲೊರಾಡೋದ ಸೇನಾ ನೆಲೆಯೊಂದರಲ್ಲಿ ಕರ್ತವ್ಯದಲ್ಲಿದ್ದ ಯೋಧರೊಬ್ಬರು ತಮ್ಮ ವೈಯಕ್ತಿಕ ಮೊಬೈಲ್ ಫೋನ್ನಲ್ಲಿ ಸತತ ಎರಡು ರಾತ್ರಿಗಳಲ್ಲಿ ಈ ದೃಶ್ಯಗಳನ್ನು ಸೆರೆಹಿಡಿದಿದ್ದರು. ಪರ್ವತ ಶ್ರೇಣಿಗಳ ಮೇಲ್ಭಾಗದಲ್ಲಿ ಸುಮಾರು 100 ಅಡಿ ಅಗಲದ, ಕಡು ಕಪ್ಪು ಬಣ್ಣದ ಬೃಹತ್ ತ್ರಿಕೋನಾಕಾರದ ವಸ್ತುವೊಂದು ಅತ್ಯಂತ ನಿಗೂಢವಾಗಿ ಚಲಿಸುತ್ತಿದ್ದುದ್ದು ಈ ವಿಡಿಯೋದಲ್ಲಿದೆ ಎನ್ನಲಾಗಿದೆ. ಒಂದಷ್ಟು ಸಮಯ ಬಾನಂಗಳದಲ್ಲಿ ಸುತ್ತಾಡಿದ ಈ ವಸ್ತು, ನಂತರ ಮೋಡಗಳ ಮರೆಯಲ್ಲಿ ಮಾಯವಾಗಿತ್ತು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ. ಪ್ರಸ್ತುತ ಈ ವಿಡಿಯೋಗಳು ಕೊಲೊರಾಡೋದಲ್ಲಿರುವ ಏರ್ ಫೋರ್ಸ್ ಆಫೀಸ್ ಆಫ್ ಸ್ಪೆಷಲ್ ಇನ್ವೆಸ್ಟಿಗೇಷನ್ ವಶದಲ್ಲಿವೆ ಎಂದು ಹೇಳಲಾಗಿದೆ.
ಅಧಿಕೃತ ದೃಢೀಕರಣಕ್ಕೆ ಕಾಯುತ್ತಿರುವ ಜಗತ್ತು
ಆದಾಗ್ಯೂ, ಈ ವಿಡಿಯೋ ತುಣುಕುಗಳು ಇನ್ನೂ ಸಾರ್ವಜನಿಕವಾಗಿ ಬಿಡುಗಡೆಯಾಗಿಲ್ಲ. ಇದರಿಂದಾಗಿ ಈ ಹಾರುವ ವಸ್ತುವಿನ ಗಾತ್ರ, ಸ್ವರೂಪ ಅಥವಾ ಚಲನವಲನಗಳನ್ನು ಸ್ವತಂತ್ರವಾಗಿ ಪರಿಶೀಲಿಸಲು ಸಾಧ್ಯವಾಗಿಲ್ಲ. ಅಮೆರಿಕ ರಕ್ಷಣಾ ಇಲಾಖೆಯು ತನಿಖೆ ನಡೆಸುತ್ತಿರುವುದಾಗಿ ಹೇಳಿದೆಯಾದರೂ, ಈ ವಸ್ತುವಿನ ಅಸ್ತಿತ್ವವನ್ನು ಅಥವಾ ಇದು ಅನ್ಯಗ್ರಹ ಜೀವಿಗಳಿಗೆ (Extraterrestrial) ಸಂಬಂಧಿಸಿದ್ದೇ ಎಂಬುದನ್ನು ಇನ್ನೂ ಅಧಿಕೃತವಾಗಿ ದೃಢಪಡಿಸಿಲ್ಲ.
ಇದನ್ನೂ ಓದಿ : ಕೆನಡಾದಲ್ಲಿ ಭಾರತೀಯ ಮೂಲದ ಯುವತಿ ಹತ್ಯೆ : 7 ತಿಂಗಳ ಬಳಿಕ ಪತಿಯ ಬಂಧನ!
