ಬೆಂಗಳೂರು : ಭಾರತೀಯ ವಾಹನ ಮಾರುಕಟ್ಟೆಯಲ್ಲಿ ಹೊಸ ಸಂಚಲನ ಮೂಡಿಸಲು, ವಿಶ್ವಾದ್ಯಂತ ಖ್ಯಾತಿ ಗಳಿಸಿರುವ ಪ್ರಮುಖ ಆಟೋಮೊಬೈಲ್ ದಿಗ್ಗಜರಾದ ರೆನಾಲ್ಟ್ ಮತ್ತು ನಿಸ್ಸಾನ್ ಸಂಸ್ಥೆಗಳು ಜಂಟಿಯಾಗಿ ಭಾರಿ ಸಿದ್ಧತೆ ನಡೆಸಿವೆ. ಕಳೆದ ಕೆಲ ಸಮಯದಿಂದ ಭಾರತದಲ್ಲಿ ಕೊಂಚ ಸದ್ದು ತಗ್ಗಿಸಿದ್ದ ಈ ಎರಡೂ ಬ್ರ್ಯಾಂಡ್ಗಳು ಈಗ ಹೊಸ ಕಾರ್ಯತಂತ್ರದ ಮೂಲಕ ಕಮ್ಬ್ಯಾಕ್ ಮಾಡಲು ಮುಂದಾಗಿವೆ.
ತಮ್ಮ ಮಾರುಕಟ್ಟೆಯ ಸ್ಥಾನವನ್ನು ಬಲಪಡಿಸಿಕೊಳ್ಳುವ ಉದ್ದೇಶದಿಂದ, ಸಾಂಪ್ರದಾಯಿಕ ಇಂಧನ ಚಾಲಿತ (ICE) ವಾಹನಗಳ ಜೊತೆಗೆ ಭವಿಷ್ಯದ ಎಲೆಕ್ಟ್ರಿಕ್ ವಾಹನಗಳ (EV) ಕ್ಷೇತ್ರಕ್ಕೂ ಲಗ್ಗೆ ಇಡಲು ಈ ಉಭಯ ಕಂಪನಿಗಳು ಸಜ್ಜಾಗಿವೆ. ಮಾರುಕಟ್ಟೆ ತಜ್ಞರ ಪ್ರಕಾರ, ಭಾರತದಲ್ಲಿ, ಈ ಎರಡೂ ಬ್ರ್ಯಾಂಡ್ಗಳಿಂದ ಹೊರಬರುತ್ತಿರುವ ಮೊದಲ ಎಲೆಕ್ಟ್ರಿಕ್ ಕಾರುಗಳು ಕಾಂಪ್ಯಾಕ್ಟ್ ಎಸ್ಯುವಿ ವಿನ್ಯಾಸವನ್ನು ಹೊಂದಿರಲಿವೆ ಎಂಬುದು ಕುತೂಹಲಕಾರಿಯಾಗಿದೆ.
ಸ್ಮರ್ಧಾತ್ಮಕ ಮಾರುಕಟ್ಟೆ
ರೆನಾಲ್ಟ್ ಸಂಸ್ಥೆಯು ಇತ್ತೀಚೆಗಷ್ಟೇ ಭಾರತದಲ್ಲಿ ಹೆಚ್ಚು ಸ್ಪರ್ಧಾತ್ಮಕವಾಗಿರುವ ‘ಸಬ್-4-ಮೀಟರ್ ಎಸ್ಯುವಿ’ ವಿಭಾಗಕ್ಕೆ ಲಗ್ಗೆ ಇಡುವ ಮಹತ್ವಾಕಾಂಕ್ಷೆಯ ಯೋಜನೆಯನ್ನು ಹಂಚಿಕೊಂಡಿತ್ತು. ಇದಕ್ಕೆ ಬುನಾದಿಯಾಗಿ ಅವರು ‘ಬ್ರಿಡ್ಜರ್’ (Bridger) ಎಂಬ ಕಾನ್ಸೆಪ್ಟ್ ಮಾದರಿಯನ್ನು ಅನಾವರಣ ಮಾಡಿದ್ದರು. ಈ ‘ಬ್ರಿಡ್ಜರ್’ ಕಾನ್ಸೆಪ್ಟ್ನ ವಿಶೇಷತೆಯೆಂದರೆ, ಇದನ್ನು ಸಂಪೂರ್ಣವಾಗಿ ಭಾರತದಲ್ಲಿಯೇ ಇರುವ ರೆನಾಲ್ಟ್ನ ಸ್ಥಳೀಯ ತಂಡವು ಅಭಿವೃದ್ಧಿಪಡಿಸಿದೆ ಮತ್ತು ವಿನ್ಯಾಸಗೊಳಿಸಿದೆ.
ಇದೇ ಕಾನ್ಸೆಪ್ಟ್ ಆಧಾರಿತ ವಾಹನವು ಮುಂದಿನ ವರ್ಷದ ಹಬ್ಬದ ಋತುವಿನ ವೇಳೆಗೆ ಅಧಿಕೃತವಾಗಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ. ರೆನಾಲ್ಟ್ ಬ್ರಿಡ್ಜರ್ ಮಾರುಕಟ್ಟೆಗೆ ಬಂದ ಸ್ವಲ್ಪ ಸಮಯದ ನಂತರ ನಿಸ್ಸಾನ್ ಕಂಪನಿಯು ಇದೇ ಮಾದರಿಯ ತನ್ನದೇ ಅವತಾರವನ್ನು (Derivative) ಭಾರತದಲ್ಲಿ ಬಿಡುಗಡೆ ಮಾಡಲಿದೆ. ರೆನಾಲ್ಟ್ ಬ್ರಿಡ್ಜರ್ ವಾಹನವು ಅತ್ಯಾಧುನಿಕ ‘R-GMP’ ಪ್ಲಾಟ್ಫಾರ್ಮ್ ಮೇಲೆ ನಿರ್ಮಾಣವಾಗುತ್ತಿದ್ದು, ಇದು ಬಹು-ಇಂಧನ ಸಾಮರ್ಥ್ಯವನ್ನು (Multi-energy architecture) ಹೊಂದಿರಲಿದೆ ಎನ್ನುವುದು ಇದರ ಅತಿ ದೊಡ್ಡ ಪ್ಲಸ್ ಪಾಯಿಂಟ್, ಅಂದರೆ ಈ ಎಸ್ಯುವಿ ಪೆಟ್ರೋಲ್, ಹೈಬ್ರಿಡ್ ಹಾಗೂ ಪೂರ್ಣ ಪ್ರಮಾಣದ ಎಲೆಕ್ಟ್ರಿಕ್ (ಇವಿ) ರೂಪದಲ್ಲಿ ಲಭ್ಯವಾಗಲಿದೆ.
ಕೆಲವು ಬದಲಾವಣೆ ಮಾತ್ರ
ಈ ಹೊಸ ಇವಿ ಮಾದರಿಯ ಹೊರವಿನ್ಯಾಸವು ಬಹುತೇಕ ಇಂಧನ-ಚಾಲಿತ (ICE) ಮಾದರಿಯನ್ನೇ ಹೋಲಲಿದ್ದರೂ, ಎಲೆಕ್ಟ್ರಿಕ್ ಆವೃತ್ತಿಗೆ ತಕ್ಕಂತೆ ಮುಂಭಾಗದ ಗ್ರಿಲ್, ಬಂಪರ್ನ ವಿನ್ಯಾಸ ಹಾಗೂ ಅಲಾಯ್ ವೀಲ್ಗಳಲ್ಲಿ ಪ್ರಮುಖ ಬದಲಾವಣೆಗಳನ್ನು ನಿರೀಕ್ಷಿಸಲಾಗಿದೆ. ರೆನಾಲ್ಟ್ ಈ ಎಲೆಕ್ಟ್ರಿಕ್ ಎಸ್ಯುವಿಯ ತಾಂತ್ರಿಕ ವಿವರಗಳನ್ನು ಇನ್ನೂ ಅಧಿಕೃತವಾಗಿ ರಹಸ್ಯವಾಗಿಟ್ಟಿದೆ, ಆದರೂ ರೆನಾಲ್ಟ್ ಹಾಗೂ ಮುಂದಿನ ನಿಸ್ಸಾನ್ ಇವಿಗಳೆರಡೂ ಯಾಂತ್ರಿಕವಾಗಿ ಸಮಾನ ಗುಣಮಟ್ಟವನ್ನು ಹೊಂದಿರಲಿದ್ದು, ಹೊರವಿನ್ಯಾಸದಲ್ಲಿ ಮಾತ್ರ ಎರಡೂ ಬ್ರ್ಯಾಂಡ್ಗಳು ತಮ್ಮದೇ ಆದ ವಿಶಿಷ್ಟ ಲುಕ್ ಕಾಯ್ದುಕೊಳ್ಳಲಿವೆ.
ಭಾರತೀಯ ಮಾರುಕಟ್ಟೆಗೆ ರೆನಾಲ್ಟ್ ಬಿಡುಗಡೆ ಮಾಡಲಿರುವ ಈ ‘ಬ್ರಿಡ್ಜರ್ ಇವಿ’ ಸಂಸ್ಥೆಯ ಪಾಲಿಗೆ ಅತ್ಯಂತ ಮಹತ್ವದ ಮೈಲಿಗಲ್ಲಾಗಲಿದೆ. ಗುಣಮಟ್ಟ ಹಾಗೂ ಕೈಗೆಟುಕುವ ಬೆಲೆಯ ನಡುವಿನ ಅದ್ಭುತ ಸಮತೋಲನದೊಂದಿಗೆ ಇದನ್ನು ಗ್ರಾಹಕರಿಗೆ ಒದಗಿಸಲು ಕಂಪನಿ ಯೋಜನೆ ರೂಪಿಸುತ್ತಿದೆ. ಪ್ರಸ್ತುತ ಲಭ್ಯವಿರುವ ಮಾಹಿತಿಯ ಪ್ರಕಾರ, ಬ್ರಿಡ್ಜರ್ ಇವಿಯನ್ನು 35 kWh ಮತ್ತು 55 kWh ಸಾಮರ್ಥ್ಯದ ಎರಡು ಬ್ಯಾಟರಿ ಪ್ಯಾಕ್ ಆಯ್ಕೆಗಳಲ್ಲಿ ಮಾರುಕಟ್ಟೆಗೆ ತರುವ ಸಾಧ್ಯತೆಯಿದೆ. ಈ ಬ್ಯಾಟರಿಗಳು ಪೂರ್ಣ ಚಾರ್ಜ್ ಮಾಡಿದಲ್ಲಿ ನೈಜವಾಗಿ 400 ಕಿಲೋಮೀಟರ್ಗಳಿಗೂ ಅಧಿಕ ಮೈಲೇಜ್ (ರೇಂಜ್) ನೀಡಬಲ್ಲವು ಎಂದು ಅಂದಾಜಿಸಲಾಗಿದೆ.
ವಾಹನವು ಸ್ಥಳೀಯವಾಗಿ ಪೂರ್ಣ ಅಭಿವೃದ್ಧಿಗೊಂಡಿರುವುದರಿಂದ ಉತ್ಪಾದನಾ ವೆಚ್ಚ ಕಡಿಮೆಯಾಗಲಿದ್ದು, ಸ್ಪರ್ಧಾತ್ಮಕ ಬೆಲೆಯಲ್ಲಿ ಇದನ್ನು ಮಾರುಕಟ್ಟೆಗೆ ತರಲು ರೆನಾಲ್ಟ್ಗೆ ಸಾಧ್ಯವಾಗಲಿದೆ. ಬಾಕ್ಸಿ ಮತ್ತು ರಗಡ್ ಲುಕ್ ಹೊಂದಿರುವ, ಹೊರಗಿನಿಂದ ಕಾಂಪ್ಯಾಕ್ಟ್ ಆಗಿ ಕಂಡರೂ ಒಳಾಂಗಣದಲ್ಲಿ ವಿಶಾಲವಾದ ಸ್ಥಳಾವಕಾಶ ಹೊಂದಿರುವ ಈ ಕಾರು 2028 ರಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ. ರೆನಾಲ್ಟ್ ವಾಹನ ಮಾರುಕಟ್ಟೆಗೆ ಬಂದ ಆರು ತಿಂಗಳ ಬಳಿಕ ನಿಸ್ಸಾನ್ ಕಂಪನಿಯು ತನ್ನ ಎಲೆಕ್ಟ್ರಿಕ್ ಎಸ್ಯುವಿಯನ್ನು ಅದೇ ಫೀಚರ್ಗಳೊಂದಿಗೆ ಮತ್ತು ಸರಿಸುಮಾರು ಅದೇ ಬೆಲೆಯ ಶ್ರೇಣಿಯಲ್ಲಿ ಬಿಡುಗಡೆ ಮಾಡಲು ಸಿದ್ಧತೆ ನಡೆಸಿದೆ.
ಇದನ್ನೂ ಓದಿ : ವಿಂಡೋಸ್ 10 ಬಳಕೆದಾರರಿಗೆ ಮೈಕ್ರೋಸಾಫ್ಟ್ನಿಂದ ಗುಡ್ ನ್ಯೂಸ್!
