ನವದೆಹಲಿ: ಆರ್ಎಸ್ಎಸ್ ವಿರುದ್ಧ ನಿರ್ಬಂಧಗಳನ್ನು ವಿಧಿಸುವಂತೆ ಅಮೆರಿಕ ಸರ್ಕಾರವನ್ನು ಆಗ್ರಹಿಸಿರುವ ‘ಅಂತಾರಾಷ್ಟ್ರೀಯ ಧಾರ್ಮಿಕ ಸ್ವಾತಂತ್ರ್ಯ ಕುರಿತ ಅಮೆರಿಕ ಆಯೋಗ’ದ (ಯುಎಸ್ಸಿಐಆರ್ಎಫ್) ನಡೆಗೆ ಭಾರತ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ. ಈ ಆಯೋಗವು ಪೂರ್ವಗ್ರಹ ಪೀಡಿತ ಸಂಸ್ಥೆಯಾಗಿದ್ದು, ಯಾವುದೇ ವಿಶ್ವಾಸಾರ್ಹತೆಯನ್ನು ಹೊಂದಿಲ್ಲ ಮತ್ತು ತನ್ನದೇ ಆದ ಸ್ವಂತ ಅಜೆಂಡಾವನ್ನು ಹೊಂದಿದೆ ಎಂದು ಭಾರತದ ವಿದೇಶಾಂಗ ಸಚಿವಾಲಯ ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿದೆ.
ಆಗಸ್ಟ್ 29ರಂದು ಆರ್ಎಸ್ಎಸ್ ಸರಸಂಘಚಾಲಕ ಮೋಹನ್ ಭಾಗವತ್ ಅವರು ನ್ಯೂಯಾರ್ಕ್ಗೆ ಭೇಟಿ ನೀಡಲಿದ್ದು, ಅಲ್ಲಿನ ಕೆಲವು ಕಾರ್ಯಕ್ರಮಗಳಲ್ಲಿ ಭಾಗಿಯಾಗಲಿದ್ದಾರೆ. ಆದರೆ ಅವರ ಈ ಪ್ರವಾಸಕ್ಕೆ ಯುಎಸ್ಸಿಐಆರ್ಎಫ್ ಅಧ್ಯಕ್ಷ ಆಸಿಫ್ ಮಹಮೂದ್ ವಿರೋಧ ವ್ಯಕ್ತಪಡಿಸಿದ್ದಾರೆ. ಪಾಕಿಸ್ತಾನ ಮೂಲದ ಅಮೆರಿಕನ್ ಪ್ರಜೆಯಾಗಿರುವ ಆಸಿಫ್ ಮಹಮೂದ್, ಭಾಗವತ್ ಅವರಿಗೆ ರಾಜತಾಂತ್ರಿಕ ಗೌರವಗಳನ್ನು ನೀಡಬಾರದು ಮತ್ತು ಆರ್ಎಸ್ಎಸ್ ಹಾಗೂ ಅದರ ಸಕ್ರಿಯ ಸದಸ್ಯರ ಮೇಲೆ ನಿರ್ಬಂಧಗಳನ್ನು ವಿಧಿಸಬೇಕು ಎಂದು ಅಮೆರಿಕ ಸರ್ಕಾರಕ್ಕೆ ಮನವಿ ಮಾಡಿದ್ದರು. ಭಾರತದಲ್ಲಿ ಧಾರ್ಮಿಕ ಅಲ್ಪಸಂಖ್ಯಾತರ ಹಕ್ಕುಗಳ ಉಲ್ಲಂಘನೆಯಾಗುತ್ತಿದೆ ಎಂಬ ಆರೋಪವನ್ನು ಈ ಆಯೋಗ ಹೊರಿಸಿದೆ.
ವಿದೇಶಾಂಗ ಸಚಿವಾಲಯದ ಖಡಕ್ ತಿರುಗೇಟು
ಯುಎಸ್ಸಿಐಆರ್ಎಫ್ ಹೇಳಿಕೆಗೆ ಪ್ರತಿಕ್ರಿಯಿಸಿದ ವಿದೇಶಾಂಗ ಸಚಿವಾಲಯದ ವಕ್ತಾರ ರಣಧೀರ್ ಜೈಸ್ವಾಲ್, “ಇಂತಹ ಸಂಸ್ಥೆಗಳು ಭಾರತದ ವಿರುದ್ಧ ಪ್ರಚೋದನಕಾರಿ ಮತ್ತು ನಿಂದನೀಯ ಹೇಳಿಕೆಗಳನ್ನು ನೀಡುತ್ತಿದ್ದು, ಇವುಗಳಿಂದ ದೂರವಿರುವುದೇ ಒಳಿತು. ಭಾರತದ ಬಹುತ್ವದ ಚೌಕಟ್ಟು ಮತ್ತು ವಿವಿಧ ಸಮುದಾಯಗಳ ನಡುವಿನ ಸೌಹಾರ್ದಯುತ ಸಹಬಾಳ್ವೆಯ ವಾಸ್ತವತೆಯನ್ನು ಗ್ರಹಿಸುವ ಸಾಮರ್ಥ್ಯ ಈ ಆಯೋಗಕ್ಕಿಲ್ಲ,” ಎಂದು ಖಾರವಾಗಿ ಹೇಳಿದ್ದಾರೆ.
ಅಮೆರಿಕದ ಹಿಂದೂ ಸಂಘಟನೆಗಳಿಂದಲೂ ಆಕ್ರೋಶ
ಇದೇ ವೇಳೆ ಅಮೆರಿಕ ಮೂಲದ ಹಿಂದೂಗಳ ಹಕ್ಕುಗಳ ಸಂಘಟನೆ ‘ಹಿಂದೂಪ್ಯಾಕ್ಟ್’ ಕೂಡ ಯುಎಸ್ಸಿಐಆರ್ಎಫ್ ನಡೆಯನ್ನು ತೀವ್ರವಾಗಿ ಖಂಡಿಸಿದೆ. ಆಯೋಗದ ಅಧ್ಯಕ್ಷರ ಹೇಳಿಕೆಗಳು ಒಬ್ಬ ಜವಾಬ್ದಾರಿಯುತ ಅಮೆರಿಕನ್ ಆಯೋಗದ ಮುಖ್ಯಸ್ಥನಂತೆ ಕಾಣದೆ, ಹಿಂದೂ ವಿರೋಧಿ ಶಕ್ತಿಗಳ ಏಜೆಂಟ್ನಂತೆ ಕೇಳಿಸುತ್ತಿವೆ ಎಂದು ‘ಹಿಂದೂಪ್ಯಾಕ್ಟ್’ ಸಂಸ್ಥಾಪಕ ಅಜಯ್ ಶಾ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಯುಎಸ್ಸಿಐಆರ್ಎಫ್ ತನ್ನ ಮೂಲ ಆಶಯವನ್ನೇ ಗಾಳಿಗೆ ತೂರಿ ರಾಜಕೀಯ ಪ್ರೇರಿತ ಹೇಳಿಕೆ ನೀಡುತ್ತಿದೆ ಎಂದು ಅವರು ಆರೋಪಿಸಿದ್ದಾರೆ.
