ಬೆಂಗಳೂರು : ಜಪಾನ್ ಮೂಲದ ದೈತ್ಯ ವಾಹನ ತಯಾರಕ ಕಂಪನಿ ಟೊಯೋಟಾ ಭಾರತೀಯ ಮಾರುಕಟ್ಟೆಯಲ್ಲಿ ಅಚ್ಚರಿಯ ಹಾಗೂ ಅನಿರೀಕ್ಷಿತ ನಿರ್ಧಾರವೊಂದನ್ನು ತೆಗೆದುಕೊಂಡಿದೆ. ತನ್ನ ಮೊಟ್ಟಮೊದಲ ಎಲೆಕ್ಟ್ರಿಕ್ ಕಾರು ‘ಎಬೆಲ್ಲಾ’ (Ebella) ಎಸ್ಯುವಿಯ ಬಿಡುಗಡೆಯನ್ನು ಕಂಪನಿಯು ರದ್ದುಗೊಳಿಸಿದೆ ಎಂಬ ಮಾಹಿತಿ ಆಟೋಮೊಬೈಲ್ ವಲಯದಲ್ಲಿ ಭಾರಿ ಸಂಚಲನ ಮೂಡಿಸಿದೆ.
ಪ್ರಸಕ್ತ ವರ್ಷದ ಜನವರಿ 20ರಂದು ಭಾರತದಲ್ಲಿ ಈ ಎಲೆಕ್ಟ್ರಿಕ್ ಕಾರನ್ನು ಬಹಳ ಅದ್ದೂರಿಯಾಗಿ ಅನಾವರಣಗೊಳಿಸಲಾಗಿತ್ತು. ಈ ವರ್ಷದ ದ್ವಿತೀಯಾರ್ಧದಲ್ಲಿ ಮಾರುಕಟ್ಟೆಗೆ ಪ್ರವೇಶಿಸುವ ನಿರೀಕ್ಷೆಯಿದ್ದ ಈ ಕಾರಿನ ಬಿಡುಗಡೆಯನ್ನು ಇದೀಗ ಕೈಬಿಡಲಾಗಿದೆ ಎಂದು ವರದಿಯಾಗಿದೆ. ಈ ಬಗ್ಗೆ ಕಂಪನಿಯ ಕಡೆಯಿಂದ ಅಧಿಕೃತ ಪ್ರಕಟಣೆ ಹೊರಬಿದ್ದಿಲ್ಲವಾದರೂ, ಡೀಲರ್ಶಿಪ್ಗಳಿಗೆ ನೀಡಿರುವ ಸೂಚನೆಗಳು ಈ ಸುದ್ದಿಯನ್ನು ಪುಷ್ಟೀಕರಿಸುತ್ತಿವೆ.
ಹಣ ಮರುಪಾವತಿಗೆ ಕಟ್ಟುನಿಟ್ಟಿನ ಸೂಚನೆ
ಟೊಯೋಟಾ ಎಬೆಲ್ಲಾ ಅನಾವರಣಗೊಂಡ ಬೆನ್ನಲ್ಲೇ ಕಂಪನಿಯು ವಾಹನದ ಬುಕ್ಕಿಂಗ್ ಪ್ರಕ್ರಿಯೆಯನ್ನು ಆರಂಭಿಸಿತ್ತು. ಇದೀಗ ಬಿಡುಗಡೆಯನ್ನು ರದ್ದುಗೊಳಿಸಿರುವ ಹಿನ್ನೆಲೆಯಲ್ಲಿ, ಗ್ರಾಹಕರಿಂದ ಪಡೆದುಕೊಂಡಿರುವ ಬುಕ್ಕಿಂಗ್ ಮೊತ್ತವನ್ನು ಬಡ್ಡಿ ಸಮೇತ ಹಿಂದಿರುಗಿಸುವಂತೆ ದೇಶಾದ್ಯಂತ ಇರುವ ತನ್ನ ಡೀಲರ್ಶಿಪ್ಗಳಿಗೆ ಟೊಯೋಟಾ ಸೂಚನೆ ನೀಡಿದೆ ಎನ್ನಲಾಗಿದೆ. ವಾಹನ ಮಾರಾಟ, ಚಾರ್ಜಿಂಗ್ ಸ್ಟೇಷನ್ ಸ್ಥಾಪನೆ ಹಾಗೂ ಸರ್ವೀಸಿಂಗ್ಗಾಗಿ ಡೀಲರ್ಗಳು ಮಾಡಿರುವ ಹೂಡಿಕೆಯನ್ನೂ ಭರಿಸಲು ಕಂಪನಿ ನಿರ್ಧರಿಸಿದೆ. ಅಲ್ಲದೆ, ಈಗಾಗಲೇ ತಯಾರಾಗಿರುವ ಎಬೆಲ್ಲಾ ಕಾರುಗಳ ದಾಸ್ತಾನನ್ನು (Inventory) ಡೀಲರ್ಗಳು ಖರೀದಿಸಲು ಅವಕಾಶ ನೀಡಲಾಗಿದ್ದರೂ, ಅವುಗಳನ್ನು ಯಾವುದೇ ಕಾರಣಕ್ಕೂ ಗ್ರಾಹಕರಿಗೆ ಮರು ಮಾರಾಟ ಮಾಡುವಂತಿಲ್ಲ ಎಂಬ ಷರತ್ತು ವಿಧಿಸಲಾಗಿದೆ.
ಮಾರಾಟದಲ್ಲಿನ ನೀರಸ ಪ್ರತಿಕ್ರಿಯೆಯೇ ನಿರ್ಧಾರಕ್ಕೆ ಕಾರಣ?
ಟೊಯೋಟಾದ ಈ ದಿಢೀರ್ ನಿರ್ಧಾರದ ಹಿಂದೆ ಮಾರುಕಟ್ಟೆಯ ಕಟು ವಾಸ್ತವಗಳಿರುವುದು ಸ್ಪಷ್ಟವಾಗಿದೆ. ಟೊಯೋಟಾ ಎಬೆಲ್ಲಾ ಕಾರು ಮೂಲತಃ ಮಾರುತಿ ಸುಜುಕಿಯ ‘ಇ-ವಿಟಾರಾ’ (e Vitara) ಮಾದರಿಯನ್ನೇ ಆಧರಿಸಿದ ವಾಹನವಾಗಿದೆ. ಪ್ರಸ್ತುತ ಮಾರುಕಟ್ಟೆಯಲ್ಲಿ ಇ-ವಿಟಾರಾ ವಾಹನವು ಗ್ರಾಹಕರನ್ನು ಸೆಳೆಯುವಲ್ಲಿ ಹಿನ್ನಡೆ ಅನುಭವಿಸಿದೆ. ಫೆಬ್ರವರಿಯಲ್ಲಿ ಇ-ವಿಟಾರಾ ವಿತರಣೆ ಆರಂಭವಾದಾಗ ಕೇವಲ 230 ಯೂನಿಟ್ಗಳು ಮಾರಾಟವಾಗಿದ್ದರೆ, ಮಾರ್ಚ್ ಹಾಗೂ ಏಪ್ರಿಲ್ ತಿಂಗಳಿನಲ್ಲಿ ಕ್ರಮವಾಗಿ ಕೇವಲ 1,200 ಹಾಗೂ 1,231 ವಾಹನಗಳಷ್ಟೇ ಮಾರಾಟವಾಗಿವೆ. ಇ-ವಿಟಾರಾದ ಈ ಕಳಪೆ ಪ್ರದರ್ಶನವನ್ನು ಗಮನಿಸಿರುವ ಟೊಯೋಟಾ, ಎಬೆಲ್ಲಾ ಬಿಡುಗಡೆಯಾದರೂ ಅದು ನಿರೀಕ್ಷಿತ ಮಟ್ಟದಲ್ಲಿ ಯಶಸ್ಸು ಸಾಧಿಸುವುದಿಲ್ಲ ಎಂಬ ಕಠಿಣ ನಿರ್ಧಾರಕ್ಕೆ ಬಂದಿದೆ ಎನ್ನಲಾಗಿದೆ.
ತೀವ್ರ ಪೈಪೋಟಿ ಮತ್ತು ಬೆಲೆ ಏರಿಕೆಯ ಭೀತಿ
ಭಾರತದ ಎಲೆಕ್ಟ್ರಿಕ್ ಎಸ್ಯುವಿ ಮಾರುಕಟ್ಟೆ ಪ್ರಸ್ತುತ ತೀವ್ರ ಪೈಪೋಟಿಯಿಂದ ಕೂಡಿದೆ. ಮಹೀಂದ್ರಾ ಬಿಇ 6 (Mahindra BE 6), ಟಾಟಾ ಕರ್ವ್ ಇವಿ (Tata Curvv.ev), ಹ್ಯುಂಡೈ ಕ್ರೆಟಾ ಎಲೆಕ್ಟ್ರಿಕ್ ಹಾಗೂ ಎಂಜಿ ವಿಂಡ್ಸರ್ನಂತಹ ಅತ್ಯಾಧುನಿಕ ವಾಹನಗಳು ಮಾರುಕಟ್ಟೆಯಲ್ಲಿ ಪ್ರಾಬಲ್ಯ ಸಾಧಿಸಿವೆ. ಇವುಗಳ ಎದುರು ಇ-ವಿಟಾರಾ ಮಂಕಾಗಿರುವಾಗ, ಅದೇ ಮಾದರಿಯನ್ನು ಆಧರಿಸಿದ ಎಬೆಲ್ಲಾಗೆ ಮಾರುಕಟ್ಟೆಯಲ್ಲಿ ನೆಲೆ ಕಂಡುಕೊಳ್ಳುವುದು ಸವಾಲಾಗಿ ಪರಿಣಮಿಸುತಿತ್ತು.
ಜೊತೆಗೆ, ಗುಜರಾತ್ನ ಹಂಸಲ್ಪುರದಲ್ಲಿರುವ ಮಾರುತಿ ಸುಜುಕಿ ಘಟಕದಲ್ಲೇ ಎಬೆಲ್ಲಾ ಉತ್ಪಾದನೆಯಾಗಬೇಕಿರುವುದರಿಂದ, ಟೊಯೋಟಾ ತನ್ನ ಬ್ರ್ಯಾಂಡ್ ಮೌಲ್ಯಕ್ಕೆ ತಕ್ಕಂತೆ ಇ-ವಿಟಾರಾಗಿಂತ ಹೆಚ್ಚಿನ ಬೆಲೆ ನಿಗದಿಪಡಿಸುವುದು ಅನಿವಾರ್ಯವಾಗಿತ್ತು. ಈಗಿರುವ ತೀವ್ರ ಪೈಪೋಟಿಯ ನಡುವೆ ದುಬಾರಿ ಬೆಲೆಯ ಎಬೆಲ್ಲಾ ಬಿಡುಗಡೆ ಮಾಡುವುದು ಆರ್ಥಿಕವಾಗಿ ಲಾಭದಾಯಕವಲ್ಲ ಎಂಬ ಲೆಕ್ಕಾಚಾರವೇ ಈ ರದ್ದತಿ ನಿರ್ಧಾರಕ್ಕೆ ಪ್ರಮುಖ ಕಾರಣವಾಗಿದೆ ಎಂದು ಆಟೋಮೊಬೈಲ್ ತಜ್ಞರು ವಿಶ್ಲೇಷಿಸಿದ್ದಾರೆ.
ಇದನ್ನೂ ಓದಿ : ಜಿಯೋ ಗ್ರಾಹಕರಿಗೆ ಭರ್ಜರಿ ಗುಡ್ ನ್ಯೂಸ್ : 200 ರೂಪಾಯಿಗೆ 15 ಒಟಿಟಿಗಳ ಬಂಪರ್ ಕೊಡುಗೆ
