ಬೆಂಗಳೂರು: ಪ್ರಖ್ಯಾತ ಕಾರು ತಯಾರಕ ಕಂಪನಿಯಾದ ವೋಕ್ಸ್‌ವ್ಯಾಗನ್ ತನ್ನ ಜನಪ್ರಿಯ ಟೈಗುನ್ ಶ್ರೇಣಿಯಲ್ಲಿ ಇದೇ ಮೊದಲ ಬಾರಿಗೆ ಎಲೆಕ್ಟ್ರಿಕ್ ಆವೃತ್ತಿಯನ್ನು ಪರಿಚಯಿಸಿದೆ. ಯುರೋಪಿಯನ್ ಮಾರುಕಟ್ಟೆಗಾಗಿ ‘ವೋಕ್ಸ್‌ವ್ಯಾಗನ್ ಐಡಿ ಟೈಗುನ್’ ಎಲೆಕ್ಟ್ರಿಕ್ ಎಸ್‌ಯುವಿಯನ್ನು (eSUV) ಕಂಪನಿಯು ಅನಾವರಣಗೊಳಿಸಿದ್ದು, 2027ರ ವೇಳೆಗೆ ಇದು ಜಾಗತಿಕ ಮಾರುಕಟ್ಟೆಯಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ.ಐಡಿ.4 ಮತ್ತು ಐಡಿ.5 ಮಾದರಿಗಳ ಮುಂದಿನ ಆವೃತ್ತಿಯಾಗಿ ಬರುತ್ತಿರುವ ಈ ಹೊಸ ಎಲೆಕ್ಟ್ರಿಕ್ ಕಾರು, ಅತ್ಯಾಧುನಿಕ ತಂತ್ರಜ್ಞಾನ ಹಾಗೂ ಭರ್ಜರಿ ರೇಂಜ್‌ನೊಂದಿಗೆ ಗ್ರಾಹಕರನ್ನು ಆಕರ್ಷಿಸಲು ಸಜ್ಜಾಗಿದೆ. ಪ್ರಸ್ತುತ ಮಾರುಕಟ್ಟೆಯಲ್ಲಿರುವ ಪೆಟ್ರೋಲ್/ಡೀಸೆಲ್ ಚಾಲಿತ ಟೈಗುನ್ ಮಾದರಿಗಳ ಜೊತೆಯಲ್ಲೇ ಈ ಎಲೆಕ್ಟ್ರಿಕ್ ಕಾರು ಕೂಡ ಮಾರಾಟವಾಗಲಿದೆ.
ಆಕರ್ಷಕ ವಿನ್ಯಾಸ ಮತ್ತು ಎಸ್‌ಯುವಿ ಲುಕ್
ವೋಕ್ಸ್‌ವ್ಯಾಗನ್ ಕಂಪನಿಯ MEB+ ಪ್ಲಾಟ್‌ಫಾರ್ಮ್ ಅಡಿಯಲ್ಲಿ ನಿರ್ಮಾಣವಾಗಿರುವ ಹೊಸ ಐಡಿ ಟೈಗುನ್, ‘ಪ್ಯೂರ್ ಪಾಸಿಟಿವ್’ ವಿನ್ಯಾಸ ಶೈಲಿಯನ್ನು ಹೊಂದಿದೆ. ಐಡಿ.4 ಮತ್ತು ಐಡಿ.5 ಮಾದರಿಗಳು ಕ್ರಾಸ್ ಓವರ್ ಲುಕ್ ಹೊಂದಿದ್ದರೆ, ಈ ಹೊಸ ಕಾರಿಗೆ ಸಂಪೂರ್ಣವಾಗಿ ಎಸ್‌ಯುವಿ ಲುಕ್ ನೀಡಲಾಗಿದೆ ಎಂದು ಕಂಪನಿ ತಿಳಿಸಿದೆ. ಎಲ್ಇಡಿ ಹೆಡ್‌ಲ್ಯಾಂಪ್‌ಗಳು, ಡಿಆರ್‌ಎಲ್‌ಗಳು ಹಾಗೂ ಮಿನುಗುವ ಲೋಗೋ ಕಾರಿನ ಮುಂಭಾಗದ ಅಂದವನ್ನು ಹೆಚ್ಚಿಸಿವೆ. ಏರೋ-ಆಪ್ಟಿಮೈಸ್ಡ್ ಅಲಾಯ್ ವೀಲ್‌ಗಳು, ಆಕರ್ಷಕ ಟೈಲ್-ಲ್ಯಾಂಪ್‌ಗಳು ಮತ್ತು ಡ್ಯುಯಲ್-ಟೋನ್ ಫಿನಿಶ್‌ನ ಬಂಪರ್ ಕಾರಿನ ಹೊರ ವಿನ್ಯಾಸವನ್ನು ಅತ್ಯಂತ ಆಕರ್ಷಕವಾಗಿಸಿವೆ. ಈ ಎಸ್‌ಯುವಿಯು 534 ಲೀಟರ್‌ಗಳ ವಿಶಾಲವಾದ ಬೂಟ್ ಸ್ಪೇಸ್ ಹಾಗೂ 32 ಲೀಟರ್‌ಗಳ ಫ್ರಂಕ್ (ಮುಂಭಾಗದ ಸ್ಟೋರೇಜ್) ಹೊಂದಿದೆ.
ಐಷಾರಾಮಿ ಒಳಾಂಗಣ ಮತ್ತು ಅತ್ಯಾಧುನಿಕ ಫೀಚರ್ಸ್
ಕಾರಿನ ಒಳಾಂಗಣವು ಸಂಪೂರ್ಣ ಬ್ಲ್ಯಾಕ್ ಥೀಮ್‌ನಿಂದ ಕೂಡಿದ್ದು, ಸಿಲ್ವರ್ ಸ್ಪರ್ಶವನ್ನು ನೀಡಲಾಗಿದೆ. ಡ್ಯಾಶ್‌ಬೋರ್ಡ್‌ನಲ್ಲಿ ಮೂರು ಸ್ಕ್ರೀನ್‌ಗಳ ಸೆಟಪ್ ನೀಡಲಾಗಿದೆ. 15-ಇಂಚಿನ ಇನ್ಫೋಟೈನ್‌ಮೆಂಟ್ ಸಿಸ್ಟಮ್, 10-ಇಂಚಿನ ಡಿಜಿಟಲ್ ಡ್ರೈವರ್ಸ್ ಡಿಸ್‌ಪ್ಲೇ ಹಾಗೂ 12-ಇಂಚಿನ ಪ್ಯಾಸೆಂಜರ್ ಸ್ಕ್ರೀನ್ ಅನ್ನು ಕಾರು ಹೊಂದಿದೆ. ಇದರ ಜೊತೆಗೆ ಪ್ಯಾನೊರಮಿಕ್ ಸನ್‌ರೂಫ್, ಪವರ್ಡ್ ಮತ್ತು ವೆಂಟಿಲೇಟೆಡ್ ಫ್ರಂಟ್ ಸೀಟ್‌ಗಳು (ಮಸಾಜ್ ಫಂಕ್ಷನ್ ಸಹಿತ), ಹರ್ಮನ್ ಕಾರ್ಡನ್ ಸೌಂಡ್ ಸಿಸ್ಟಮ್, ವೈರ್‌ಲೆಸ್ ಫೋನ್ ಚಾರ್ಜರ್, ಅಡ್ವಾನ್ಸ್ಡ್ ಡ್ರೈವರ್ ಅಸಿಸ್ಟೆನ್ಸ್ ಸಿಸ್ಟಮ್ (ADAS) ನಂತಹ ಪ್ರೀಮಿಯಂ ಫೀಚರ್ಸ್‌ಗಳನ್ನು ಅಳವಡಿಸಲಾಗಿದೆ. ಟ್ರೆಂಡ್, ಲೈಫ್, ಸ್ಟೈಲ್ ಮತ್ತು ಆರ್-ಲೈನ್ ಎಂಬ ನಾಲ್ಕು ವೇರಿಯೆಂಟ್‌ಗಳಲ್ಲಿ ಈ ಕಾರು ಲಭ್ಯವಾಗಲಿದೆ.
ಬ್ಯಾಟರಿ ಸಾಮರ್ಥ್ಯ ಮತ್ತು ರೇಂಜ್
ವೋಕ್ಸ್‌ವ್ಯಾಗನ್ ಐಡಿ ಟೈಗುನ್ ಎರಡು ಬ್ಯಾಟರಿ ಆಯ್ಕೆಗಳಲ್ಲಿ ಲಭ್ಯವಿದೆ: 58kWh ಮತ್ತು 77kWh. 58kWh ಬ್ಯಾಟರಿ ಪ್ಯಾಕ್ ಹೊಂದಿರುವ ಕಾರು ರಿಯರ್-ವೀಲ್ ಡ್ರೈವ್ (RWD) ವ್ಯವಸ್ಥೆಯೊಂದಿಗೆ 190hp ಪವರ್ ಉತ್ಪಾದಿಸುತ್ತದೆ. ದೊಡ್ಡದಾದ 77kWh ಬ್ಯಾಟರಿ ಪ್ಯಾಕ್ ಹೊಂದಿರುವ ಮಾದರಿಯು ರಿಯರ್-ವೀಲ್ ಡ್ರೈವ್ (RWD) ಮತ್ತು ಆಲ್-ವೀಲ್ ಡ್ರೈವ್ (AWD) ಎರಡೂ ಆಯ್ಕೆಗಳಲ್ಲಿ ಲಭ್ಯವಿದ್ದು, ಕ್ರಮವಾಗಿ 286hp ಮತ್ತು 299hp ಪವರ್ ಅನ್ನು ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ. ಒಮ್ಮೆ ಪೂರ್ತಿ ಚಾರ್ಜ್ ಮಾಡಿದರೆ ಈ ಕಾರು ಬರೋಬ್ಬರಿ 600 ಕಿಲೋಮೀಟರ್‌ಗಳವರೆಗೆ (WLTP ರೇಂಜ್) ಚಲಿಸಬಲ್ಲದು ಎಂದು ವೋಕ್ಸ್‌ವ್ಯಾಗನ್ ಕಂಪನಿ ಹೇಳಿಕೊಂಡಿದೆ. ಬ್ಯಾಟರಿ ಆಯ್ಕೆಗೆ ಅನುಗುಣವಾಗಿ 2 ಟನ್‌ಗಳವರೆಗೆ ಎಳೆಯುವ (towing) ಸಾಮರ್ಥ್ಯವನ್ನೂ ಇದು ಹೊಂದಿದೆ.
ಇದನ್ನೂ ಓದಿ :249 ರನ್ ಬಾರಿಸಿದರೂ ವೆಸ್ಟ್ ಇಂಡೀಸ್ ಎದುರು ಶರಣಾದ ಭಾರತ : ಬೌಲಿಂಗ್ ಗುಣಮಟ್ಟದ ಬಗ್ಗೆ ಕಳವಳ ವ್ಯಕ್ತಪಡಿಸಿದ ಆರ್. ಅಶ್ವಿನ್
