ಬೆಂಗಳೂರು : ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು (NHAI) ಕೋಟ್ಯಂತರ ವಾಹನ ಸವಾರರು ಹಾಗೂ ಮಾಲೀಕರಿಗೆ ಸಿಹಿ ಸುದ್ದಿ ನೀಡಿದೆ. ವಾಹನಗಳ ಫಾಸ್ಟ್ಯಾಗ್ ಗೆ ಕಡ್ಡಾಯವಾಗಿದ್ದ ನೋ ಯುವರ್ ವೆಹಿಕಲ್ (ಕೆವೈವಿ) ಪ್ರಕ್ರಿಯೆಯನ್ನು ಫೆಬ್ರವರಿ 1ರಿಂದ ಸ್ಥಗಿತಗೊಳಿಸುವುದಾಗಿ ಪ್ರಾಧಿಕಾರ ಘೋಷಣೆ ಮಾಡಿದೆ. ಇದರಿಂದಾಗಿ ಫೆಬ್ರವರಿ 1ರಿಂದ ವಾಹನ ಸವಾರರಿಗೆ ಕೆವೈವಿ ತಲೆನೋವು ಇರುವುದಿಲ್ಲ.
ಇದುವರೆಗೆ ಕೆವೈವಿ ಪ್ರಕ್ರಿಯೆ ಮುಗಿಸಿದರೆ ಮಾತ್ರ ವಾಹನಗಳಿಗೆ ಫಾಸ್ಟ್ಯಾಗ್ ನೀಡಲಾಗುತ್ತಿತ್ತು. ವಾಹನದ ನೋಂದಣಿ, ಫೋಟೋ ಪಡೆದುಕೊಂಡು ಅದರ ಫಾಸ್ಟ್ಯಾಗ್ ಮಾನ್ಯತೆಯನ್ನು ದೃಢಪಡಿಸಲಾಗುತ್ತಿತ್ತು. ಆದರೆ, ಕೆವೈವಿ ಪ್ರಕ್ರಿಯೆಯನ್ನೇ ಹೆದ್ದಾರಿ ಪ್ರಾಧಿಕಾರವು ರದ್ದುಗೊಳಿಸುವುದಾಗಿ ಘೋಷಣೆ ಮಾಡಿದೆ.
ಇನ್ನುಮುಂದೆ, ಫಾಸ್ಟ್ಯಾಗ್ ವಿತರಣೆ ಮಾಡುವ ಬ್ಯಾಂಕರ್ ಗಳೇ ವಾಹನಗಳ ಆರ್ ಸಿ ಮಾನ್ಯತೆ ಸೇರಿ ಹಲವು ದೃಢೀಕರಣ ಮಾಡಬೇಕು ಎಂದು ಕೂಡ ಹೆದ್ದಾರಿ ಪ್ರಾಧಿಕಾರವು ಸೂಚನೆ ನೀಡಿದೆ. ಅಂದರೆ, ಫಾಸ್ಟ್ಯಾಗ್ ನೀಡುವಾಗ ಆಯಾ ಸಂಸ್ಥೆಗಳೇ ವಾಹನಗಳ ನೋಂದಣಿ ಸೇರಿ ಹಲವು ದಾಖಲೆಗಳನ್ನು ಪರಿಶೀಲಿಸಬೇಕು ಎಂದು ತಿಳಿಸಿದೆ.
ಏನಿದು ಕೆವೈವಿ? ವಾಹನಗಳ ಮಾಲೀಕರಿಗೆ ಏಕೆ ತಲೆನೋವಾಗಿತ್ತು?
ಒನ್ ವೆಹಿಕಲ್, ಒನ್ ಫಾಸ್ಟ್ಯಾಗ್ ಎಂಬ ನಿಯಮದಿಂದಾಗಿ ಎಲ್ಲ ಫಾಸ್ಟ್ಯಾಗ್ ಬಳಕೆದಾರರು ನೋ ಯುವರ್ ವೆಹಿಕಲ್ (ಕೆವೈವಿ) ಪ್ರಕ್ರಿಯೆ ಅನುಸರಿಸಬೇಕಿತ್ತು. ವಾಹನದ ಮುಂಭಾಗದ ಫೋಟೋ ಹಾಗೂ ನೋಂದಣಿ ಪ್ರಮಾಣಪತ್ರಗಳನ್ನು (ಆರ್ ಸಿ) ಅಪ್ ಲೋಡ್ ಮಾಡಬೇಕಿತ್ತು. ಕೆಲವೊಮ್ಮೆ ಎಲ್ಲ ದಾಖಲೆಗಳು ಸರಿಯಾಗಿದ್ದರೂ ಕೆವೈವಿ ಪ್ರಕ್ರಿಯೆ ವಿಳಂಬವಾಗುತ್ತಿತ್ತು. ಇದರಿಂದ ಫಾಸ್ಟ್ಯಾಗ್ ಪಡೆಯುವುದೂ ವಿಳಂಬವಾಗುತ್ತಿತ್ತು.
ಇದನ್ನೂ ಓದಿ : ಬೆಂಗಳೂರು | ನಡುರಸ್ತೆಯಲ್ಲೇ ಏಕಾಏಕಿ ಹೊತ್ತಿ ಉರಿದ Benz ಕಾರು!
