ಬೆಂಗಳೂರು: ದೇಶದಲ್ಲಿ ದಸರಾ ಹಾಗೂ ದೀಪಾವಳಿ ಹಬ್ಬಗಳ ಹಿನ್ನೆಲೆಯಲ್ಲಿ ಇ-ಕಾಮರ್ಸ್ ಕಂಪನಿಗಳು ಭರ್ಜರಿ ಡಿಸ್ಕೌಂಟ್ ಘೋಷಿಸಿವೆ. ಅದರಲ್ಲೂ, ಆನ್ ಲೈನ್ ಶಾಪಿಂಗ್ ಪ್ಲಾಟ್ ಫಾರ್ಮ್ ಗಳು ಗ್ಯಾಜೆಟ್ ಗಳು ಹಾಗೂ ಗೃಹೋಪಯೋಗಿ ವಸ್ತುಗಳನ್ನು ಖರೀದಿಸಲು ‘ನೋ-ಕಾಸ್ಟ್ ಇಎಂಐ’ (No-Cost EMI) ಸೌಲಭ್ಯವನ್ನು ಹೆಚ್ಚು ನೀಡುತ್ತಿವೆ. ಬಡ್ಡಿ ಇಲ್ಲದೆ ಕಂತುಗಳಲ್ಲಿ ಹಣ ಪಾವತಿಸಬಹುದು ಎಂಬ ಆಕರ್ಷಕ ಜಾಹೀರಾತುಗಳಿಗೆ ಜನ ಗ್ರಾಹಕರು ಮಾರುಹೋಗುತ್ತಾರೆ. ಆದರೆ, ಈ ‘ಶೂನ್ಯ ಬಡ್ಡಿ’ ಆಫರ್ ಗಳ ಹಿಂದೆ ಕೆಲವು ಗುಪ್ತ ವೆಚ್ಚಗಳಿರುತ್ತವೆ ಎಂಬುದನ್ನು ಖರೀದಿದಾರರು ತಿಳಿದುಕೊಳ್ಳುವುದು ಅತ್ಯಗತ್ಯ.
ಸಾಮಾನ್ಯವಾಗಿ ನೋ-ಕಾಸ್ಟ್ ಇಎಂಐ ಎರಡು ರೀತಿಯಲ್ಲಿ ಕೆಲಸ ಮಾಡುತ್ತದೆ. ಮೊದಲನೆಯದಾಗಿ, ವಸ್ತುವಿಗೆ ನೀಡಬೇಕಿದ್ದ ಮುಂಗಡ ರಿಯಾಯಿತಿಯನ್ನು ಕಡಿತಗೊಳಿಸಿ, ಆ ಹಣವನ್ನು ಬಡ್ಡಿಯ ಮೊತ್ತವಾಗಿ ಬ್ಯಾಂಕ್ ಅಥವಾ ಹಣಕಾಸು ಸಂಸ್ಥೆಗೆ ಪಾವತಿಸುವಂತೆ ಮಾಡಲಾಗುತ್ತದೆ. ಉದಾಹರಣೆಗೆ, 30 ಸಾವಿರ ರೂ. ಮೌಲ್ಯದ ಉತ್ಪನ್ನವು ಆಫರ್ ಮೂಲಕ 25,500 ರೂಪಾಯಿಗೆ ಸಿಕ್ಕರೂ, ನೋ-ಕಾಸ್ಟ್ ಇಎಂಐ ಆಯ್ಕೆ ಮಾಡಿದರೆ ಆ ರಿಯಾಯಿತಿ ಸಿಗುವುದಿಲ್ಲ. ಆಗ ನೀವು ಮೂಲ ಬೆಲೆಯನ್ನು ಕಂತುಗಳಲ್ಲಿ ಕಟ್ಟಬೇಕಾಗುತ್ತದೆ. ಎರಡನೆಯದಾಗಿ, ಬಡ್ಡಿಯ ಮೊತ್ತವನ್ನು ನೇರವಾಗಿ ವಸ್ತುವಿನ ಮಾರಾಟ ಬೆಲೆಗೆ ಸೇರಿಸಿರುತ್ತಾರೆ.
ಇದಲ್ಲದೆ, ನೋ-ಕಾಸ್ಟ್ ಇಎಂಐ ಆಯ್ಕೆ ಮಾಡುವಾಗ ಪ್ರೊಸೆಸಿಂಗ್ ಫೀಸ್ (Processing Fees), ಜಿಎಸ್ ಟಿ ಹಾಗೂ ಇತರೆ ಶುಲ್ಕಗಳು ನಿಮ್ಮ ಜೇಬಿಗೆ ಹೆಚ್ಚುವರಿ ಹೊರೆಯಾಗಬಹುದು. ಕ್ರೆಡಿಟ್ ಕಾರ್ಡ್ ಮೂಲಕ ಈ ಸೌಲಭ್ಯ ಪಡೆದಾಗ ನಿಮ್ಮ ಒಟ್ಟು ಕ್ರೆಡಿಟ್ ಮಿತಿ ಬ್ಲಾಕ್ ಆಗುತ್ತದೆ. ಜತೆಗೆ, ಸಮಯಕ್ಕೆ ಸರಿಯಾಗಿ ಇಎಂಐ ಪಾವತಿಸದಿದ್ದರೆ ನಿಮ್ಮ ಕ್ರೆಡಿಟ್ ಸ್ಕೋರ್ ಮೇಲೂ ದುಷ್ಪರಿಣಾಮ ಬೀರುತ್ತದೆ.
ಇನ್ನು ನೀವು ಬಡ್ಡಿ ಪಾವತಿಸಿ ಇಎಂಐ ಆಯ್ಕೆ ಮಾಡಿಕೊಂಡರೂ, ಅಲ್ಲಿ ಬಡ್ಡಿಯ ಮೇಲೆ ಶೇ.18ರಷ್ಟು ಜಿಎಸ್ ಟಿ ವಿಧಿಸಲಾಗುತ್ತದೆ. ಇದು ಕೂಡ ನಿಮ್ಮ ಮಾಸಿಕ ಇಎಂಐ ಮೊತ್ತವನ್ನು ಹೆಚ್ಚಿಸುತ್ತದೆ. ಆದ್ದರಿಂದ, ಯಾವುದೇ ಆನ್ ಲೈನ್ ವಸ್ತು ಖರೀದಿಸುವ ಮುನ್ನ ನೋ-ಕಾಸ್ಟ್ ಇಎಂಐ ನಿಯಮಗಳು ಹಾಗೂ ಷರತ್ತುಗಳನ್ನು ಸಂಪೂರ್ಣವಾಗಿ ಓದಿ, ಜಾಗರೂಕತೆಯಿಂದ ನಿರ್ಧಾರ ಕೈಗೊಳ್ಳುವುದು ಬುದ್ಧಿವಂತಿಕೆಯಾಗಿದೆ.
ಇದನ್ನೂ ಓದಿ:ಕೆಲವೇ ನಿಮಿಷಗಳಲ್ಲಿ ಆ್ಯಪ್ ಮೂಲಕ ಸಾಲ: ಅಪ್ಲೈ ಮಾಡೋ ಮೊದಲು ಇದೆಲ್ಲತಿಳಿದುಕೊಳ್ಳಿ!
