ವಾಷಿಂಗ್ಟನ್ : ಅಮೆರಿಕ ಮತ್ತು ಇರಾನ್ ನಡುವಿನ ಸಮರ ಈಗ ಸೈಬರ್ ಲೋಕಕ್ಕೆ ವ್ಯಾಪಿಸಿದೆ. ಪರ್ಷಿಯನ್ ಗಲ್ಫ್ನಲ್ಲಿ ನಿಯೋಜನೆಗೊಂಡಿರುವ ಸುಮಾರು 2,379 ಅಮೆರಿಕನ್ ಯೋಧರ ವೈಯಕ್ತಿಕ ಮಾಹಿತಿಗಳನ್ನು ಇರಾನ್ ಮೂಲದ ಹ್ಯಾಕರ್ಗಳ ಗುಂಪು ಸೋರಿಕೆ ಮಾಡಿದೆ. ಈ ಬೆಳವಣಿಗೆಯಿಂದಾಗಿ ಅಮೆರಿಕದ ರಕ್ಷಣಾ ಇಲಾಖೆಯಾದ ಪೆಂಟಗನ್ನಲ್ಲಿ ತಲ್ಲಣ ಸೃಷ್ಟಿಯಾಗಿದ್ದು, ಯೋಧರ ಸುರಕ್ಷತೆಯ ಬಗ್ಗೆ ಆತಂಕ ವ್ಯಕ್ತವಾಗಿದೆ.
ಟೆಲಿಗ್ರಾಮ್ನಲ್ಲಿ ಹರಿದಾಡಿದ ಯೋಧರ ರಹಸ್ಯ ಮಾಹಿತಿ
‘ಹಂಡಾಲಾ’ ಎಂಬ ಸೈಬರ್ ಕ್ರಿಮಿನಲ್ ಗುಂಪು ತನ್ನ ಟೆಲಿಗ್ರಾಮ್ ಚಾನೆಲ್ನಲ್ಲಿ ಈ ದತ್ತಾಂಶಗಳನ್ನು ಹಂಚಿಕೊಂಡಿದೆ. ಹ್ಯಾಕರ್ಸ್ ಕೇವಲ ಹೆಸರುಗಳನ್ನಷ್ಟೇ ಅಲ್ಲದೆ, ಯೋಧರ ಮನೆ ವಿಳಾಸಗಳು, ಕುಟುಂಬದ ವಿವರಗಳು, ಅವರ ದೈನಂದಿನ ಚಟುವಟಿಕೆಗಳು ಮತ್ತು ಸೇನಾ ತುಕಡಿಗಳ ಸಂಚಾರದ ಮಾಹಿತಿಯನ್ನು ಕೂಡ ಕಲೆಹಾಕಿರುವುದಾಗಿ ಪ್ರತಿಪಾದಿಸಿದೆ.
ತಮ್ಮ ‘ನಿಗಾ ಸಾಮರ್ಥ್ಯ’ವನ್ನು ಪ್ರದರ್ಶಿಸುವ ಸಲುವಾಗಿಯೇ ಈ ಮಾಹಿತಿಯನ್ನು ಸೋರಿಕೆ ಮಾಡಿರುವುದಾಗಿ ಹ್ಯಾಕರ್ಸ್ ಗುಂಪು ಹೇಳಿಕೊಂಡಿದೆ. ಇದರ ಬೆನ್ನಲ್ಲೇ ಈ ಪ್ರದೇಶದಲ್ಲಿರುವ ಅಮೆರಿಕದ ಸಿಬ್ಬಂದಿಗಳಿಗೆ ವಾಟ್ಸ್ ಆ್ಯಪ್ ಮೂಲಕ ಬೆದರಿಕೆ ಸಂದೇಶಗಳು ಬರುತ್ತಿದ್ದು, “ನೀವು ನಮ್ಮ ಕಣ್ಗಾವಲಿನಲ್ಲಿ ಇದ್ದೀರಿ. ನಿಮ್ಮ ಮೇಲೆ ಯಾವಾಗ ಬೇಕಿದ್ದರೂ ದಾಳಿ ನಡೆಯಬಹುದು” ಎಂದು ಎಚ್ಚರಿಸಲಾಗುತ್ತಿದೆ ಎಂದು ವರದಿಯಾಗಿದೆ.
ಎಫ್ಬಿಐ ಮುಖ್ಯಸ್ಥರಿಗೂ ಬಿಡದ ಹ್ಯಾಕರ್ಸ್ ಕಾಟ
ವಿಶೇಷವೆಂದರೆ, ಇದೇ ಹಂಡಾಲಾ ಹ್ಯಾಕರ್ಸ್ ಗುಂಪು ಕಳೆದ ತಿಂಗಳು ಎಫ್ಬಿಐ (FBI) ನಿರ್ದೇಶಕ ಕಾಶ್ ಪಟೇಲ್ ಅವರ ವೈಯಕ್ತಿಕ ಇಮೇಲ್ ಖಾತೆಯನ್ನು ಸಹ ಹ್ಯಾಕ್ ಮಾಡಿತ್ತು. ಪಟೇಲ್ ಅವರ ಖಾಸಗಿ ಫೋಟೋಗಳು ಮತ್ತು ಬಯೋಡೇಟಾವನ್ನು ಅಂತರ್ಜಾಲದಲ್ಲಿ ಹರಿಬಿಡುವ ಮೂಲಕ ಅಮೆರಿಕದ ಉನ್ನತ ತನಿಖಾ ಸಂಸ್ಥೆಯ ಭದ್ರತಾ ವ್ಯವಸ್ಥೆಗೇ ಸವಾಲು ಹಾಕಿತ್ತು. ಈಗ ಯೋಧರ ಮಾಹಿತಿ ಸೋರಿಕೆ ಮಾಡುವ ಮೂಲಕ ಹ್ಯಾಕರ್ಸ್ ತಮ್ಮ ದಾಳಿಯ ವ್ಯಾಪ್ತಿಯನ್ನು ವಿಸ್ತರಿಸಿದ್ದಾರೆ.
ವಾಷಿಂಗ್ಟನ್ ಮತ್ತು ಟೆಹ್ರಾನ್ ನಡುವಿನ ರಾಜತಾಂತ್ರಿಕ ಸಂಬಂಧಗಳು ತಳಮಟ್ಟಕ್ಕೆ ಕುಸಿದಿರುವ ಸಮಯದಲ್ಲೇ ಈ ಸೈಬರ್ ದಾಳಿ ನಡೆದಿದೆ. ಇತ್ತೀಚೆಗಷ್ಟೇ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು, ಇರಾನ್ ಆರ್ಥಿಕವಾಗಿ ಕುಸಿಯುತ್ತಿದೆ ಮತ್ತು ಹೊರ್ಮುಜ್ ಜಲಸಂಧಿಯನ್ನು ತೆರೆಯುವಂತೆ ಬೇಡಿಕೆ ಇಡುತ್ತಿದೆ ಎಂದು ಹೇಳಿಕೆ ನೀಡಿದ್ದರು.
ಪೆಂಟಗನ್ ತನಿಖೆ ಆರಂಭ
ಯೋಧರ ಮನೆ ವಿಳಾಸ ಮತ್ತು ವೈಯಕ್ತಿಕ ವಿವರಗಳು ಬಹಿರಂಗವಾಗಿರುವುದು ಅವರ ಕುಟುಂಬಸ್ಥರ ಸುರಕ್ಷತೆಗೂ ಕುತ್ತು ತಂದಿದೆ. ಈ ಭದ್ರತಾ ಲೋಪವು ಹೇಗೆ ಸಂಭವಿಸಿತು ಮತ್ತು ಬೇರೆ ಯಾವ ವ್ಯವಸ್ಥೆಗಳು ಹ್ಯಾಕ್ ಆಗಿವೆ ಎಂಬುದರ ಕುರಿತು ಪೆಂಟಗನ್ ತೀವ್ರ ತನಿಖೆ ಕೈಗೊಂಡಿದೆ. ಸಾಂಪ್ರದಾಯಿಕ ಯುದ್ಧಭೂಮಿಗಿಂತ ಹೆಚ್ಚಾಗಿ ಡಿಜಿಟಲ್ ವೇದಿಕೆಗಳಲ್ಲಿ ನಡೆಯುತ್ತಿರುವ ಇಂತಹ ದಾಳಿಗಳು ದೊಡ್ಡ ಮಟ್ಟದ ಅಪಾಯವನ್ನು ತಂದೊಡ್ಡುವ ಸಾಧ್ಯತೆ ಇದೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.
ಇದನ್ನೂ ಓದಿ : ಭೀಕರ ರಸ್ತೆ ಅಪಘಾತ ; ಕೆಲವೇ ದಿನದಲ್ಲಿ ಹಸೆಮಣೆ ಏರಬೇಕಿದ್ದ ವರ ದಾರುಣ ಸಾವು!
