ವಾಷಿಂಗ್ಟನ್: ರಷ್ಯಾದಿಂದ ಕಚ್ಚಾ ತೈಲ ಮತ್ತು ನೈಸರ್ಗಿಕ ಅನಿಲವನ್ನು ಅತಿ ಹೆಚ್ಚಿನ ಪ್ರಮಾಣದಲ್ಲಿ ಆಮದು ಮಾಡಿಕೊಳ್ಳುತ್ತಿರುವ ಭಾರತ, ಚೀನಾ ಸೇರಿದಂತೆ ಪ್ರಮುಖ ದೇಶಗಳ ವಿರುದ್ಧ ಅಮೆರಿಕ ಕೊನೆಗೂ ಸುಂಕಾಸ್ತ್ರ ಪ್ರಹಾರ ಮಾಡಿದೆ. ಉಕ್ರೇನ್ ವಿರುದ್ಧದ ಯುದ್ಧ ಐದನೇ ವರ್ಷಕ್ಕೆ ಕಾಲಿಟ್ಟಿರುವಂತೆಯೇ, ರಷ್ಯಾದ ಆರ್ಥಿಕ ಸಂಪನ್ಮೂಲಕ್ಕೆ ತಡೆಯೊಡ್ಡಲು ಅಮೆರಿಕ ಸಂಸತ್ ಭಾರಿ ಬೆಂಬಲದೊಂದಿಗೆ ಹೊಸ ನಿರ್ಬಂಧಗಳ ಮಸೂದೆಯನ್ನು ಅನುಮೋದಿಸಿದೆ. 86-11 ಮತಗಳ ಬಹುಮತದೊಂದಿಗೆ ಅಂಗೀಕಾರಗೊಂಡಿರುವ ಈ ಮಸೂದೆಯು, ರಷ್ಯಾದಿಂದ ಇಂಧನ ಖರೀದಿಸುವ ದೇಶಗಳ ಮೇಲೆ ಶೇ.100ರಷ್ಟು ಆಮದು ಸುಂಕ ವಿಧಿಸಲು ಅಮೆರಿಕ ಅಧ್ಯಕ್ಷರಿಗೆ ಅಧಿಕಾರ ನೀಡುತ್ತದೆ.
ಅಗಲಿದ ಸೆನೆಟರ್ ಲಿಂಡ್ಸೆ ಗ್ರಹಾಂ ಗೌರವಾರ್ಥ ಮಸೂದೆ
ಉಕ್ರೇನ್‌ನ ಪ್ರಬಲ ಬೆಂಬಲಿಗರಾಗಿದ್ದ ಹಾಗೂ ಇತ್ತೀಚೆಗೆ ನಿಧನರಾದ ರಿಪಬ್ಲಿಕನ್ ಸೆನೆಟರ್ ಲಿಂಡ್ಸೆ ಗ್ರಹಾಂ ಅವರ ಸ್ಮರಣಾರ್ಥ ಈ ಮಸೂದೆಗೆ ಅವರ ಹೆಸರನ್ನಿಡಲಾಗಿದೆ. ಈ ಮಸೂದೆಯು ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಅವರ ಯುದ್ಧ ನಿಧಿಯ ಮೇಲೆಯೇ ನೇರ ಪ್ರಹಾರ ಮಾಡಲಿದೆ ಎಂದು ಅಮೆರಿಕದ ಸಂಸದರು ಅಭಿಪ್ರಾಯಪಟ್ಟಿದ್ದಾರೆ. ಸೆನೆಟ್‌ನಲ್ಲಿ ಜಂಟಿಯಾಗಿ ಈ ಕರಡನ್ನು ಸಿದ್ಧಪಡಿಸಿದ್ದ ಡೆಮಾಕ್ರಟಿಕ್ ನಾಯಕ ರಿಚರ್ಡ್ ಬ್ಲುಮೆಂಥಾಲ್, ಅಮೆರಿಕವು ಉಕ್ರೇನ್ ಜೊತೆ ಗಟ್ಟಿಯಾಗಿ ನಿಲ್ಲಲಿದೆ ಎಂಬ ಸ್ಪಷ್ಟ ಸಂದೇಶವನ್ನು ಮಾಸ್ಕೋಗೆ ರವಾನಿಸಲಾಗಿದೆ ಎಂದು ತಿಳಿಸಿದ್ದಾರೆ.
ಮಸೂದೆಯಲ್ಲೇನಿದೆ?
ಈ ನೂತನ ಕಾಯ್ದೆಯು ರಷ್ಯಾದಿಂದ ಅತಿ ಹೆಚ್ಚು ತೈಲ ಮತ್ತು ಅನಿಲ ಖರೀದಿಸುವ ವಿಶ್ವದ ಐದು ಪ್ರಮುಖ ದೇಶಗಳನ್ನು ಗುರಿಯಾಗಿಸಿಕೊಂಡಿದೆ. ಪ್ರಸ್ತುತ ಭಾರತ, ಚೀನಾ, ಅಜರ್ಬೈಜಾನ್, ಹಂಗೇರಿ ಮತ್ತು ಸ್ಲೊವಾಕಿಯಾ ದೇಶಗಳು ಈ ಪಟ್ಟಿಯಲ್ಲಿ ಮುಂಚೂಣಿಯಲ್ಲಿವೆ. ಆದಾಗ್ಯೂ, ರಷ್ಯಾದಿಂದ ಶೇಕಡಾ 15 ಕ್ಕಿಂತ ಕಡಿಮೆ ನೈಸರ್ಗಿಕ ಅನಿಲ ಆಮದು ಮಾಡಿಕೊಳ್ಳುವ ಹಾಗೂ ಆಮದನ್ನು ಕಡಿಮೆ ಮಾಡಲು ಸಕ್ರಿಯವಾಗಿ ಶ್ರಮಿಸುತ್ತಿರುವ ದೇಶಗಳಿಗೆ ಕೆಲ ವಿನಾಯಿತಿಗಳನ್ನು ನೀಡಲಾಗಿದೆ. ಜೊತೆಗೆ, ಅಮೆರಿಕದ ರಾಷ್ಟ್ರೀಯ ಹಿತಾಸಕ್ತಿಯನ್ನು ಪರಿಗಣಿಸಿ ಅಗತ್ಯ ಬಿದ್ದಾಗ ಈ ನಿರ್ಬಂಧಗಳನ್ನು ರದ್ದುಗೊಳಿಸುವ ಅಥವಾ ಸಡಿಲಗೊಳಿಸುವ ವಿಶೇಷ ಅಧಿಕಾರವನ್ನು ಶ್ವೇತಭವನಕ್ಕೆ ನೀಡಲಾಗಿದೆ.
ತೈಲ ಟ್ಯಾಂಕರ್‌ಗಳ ಮೇಲೂ ಕಣ್ಣು
ಅಮೆರಿಕದ ಅಸ್ತಿತ್ವದಲ್ಲಿರುವ ನಿರ್ಬಂಧಗಳನ್ನು ತಪ್ಪಿಸಲು ರಷ್ಯಾ ಬಳಸುತ್ತಿರುವ ಹಳೆಯ ಮತ್ತು ಮರು-ನೋಂದಾಯಿತ ತೈಲ ಟ್ಯಾಂಕರ್‌ಗಳ ಮೇಲೆಯೂ ಈ ಮಸೂದೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಿದೆ. ಇದರ ಜೊತೆಗೆ, ಪುಟಿನ್ ಸೇರಿದಂತೆ ರಷ್ಯಾದ ಹಿರಿಯ ರಾಜಕೀಯ ಮತ್ತು ಮಿಲಿಟರಿ ನಾಯಕರು, ಹಣಕಾಸು ಸಂಸ್ಥೆಗಳು ಹಾಗೂ ಇಂಧನ ಯೋಜನೆಗಳ ಮೇಲೆ ನೇರ ನಿರ್ಬಂಧ ಹೇರಲು ಇದು ದಾರಿ ಮಾಡಿಕೊಡುತ್ತದೆ. ಮತ್ತೊಂದೆಡೆ, ಇರಾನ್‌ನ ಇಂಧನ ವಲಯದಲ್ಲಿ ಹೂಡಿಕೆ ಮಾಡುವ ಕಂಪನಿಗಳಿಗೆ ದಂಡ ವಿಧಿಸುವ 1996 ರ ಇರಾನ್ ನಿರ್ಬಂಧ ಕಾಯ್ದೆಯ ಅವಧಿಯನ್ನು 2031ರವರೆಗೆ ವಿಸ್ತರಿಸುವ ನಿಬಂಧನೆಯನ್ನೂ ಇದರಲ್ಲಿ ಸೇರಿಸಲಾಗಿದೆ. ಪ್ರಸ್ತುತ ಸೆನೆಟ್‌ನಲ್ಲಿ ಅಂಗೀಕಾರಗೊಂಡಿರುವ ಈ ಮಸೂದೆಯು ಆಗಸ್ಟ್ 31 ರಂದು ಯುಎಸ್ ಹೌಸ್ ಆಫ್ ರಿಪ್ರೆಸೆಂಟೇಟಿವ್ಸ್ ಮರುಸಭೆ ಸೇರಿದಾಗ ಅಂತಿಮ ಒಪ್ಪಿಗೆಗಾಗಿ ಸಭೆಯ ಮುಂದೆ ಬರಲಿದೆ.
