ಜೆರುಸಲೇಮ್ : 2023ರ ಅಕ್ಟೋಬರ್ 7 ರಂದು ತನ್ನ ದೇಶದ ಮೇಲೆ ನಡೆದ ಭೀಕರ ಹಮಾಸ್ ಉಗ್ರರ ದಾಳಿಯ ನಂತರ, ಇಸ್ರೇಲ್ ತನ್ನ ಇತಿಹಾಸದಲ್ಲೇ ಅತ್ಯಂತ ದೊಡ್ಡ ಮತ್ತು ಅತ್ಯಂತ ರಹಸ್ಯವಾದ ಜಾಗತಿಕ ಬೇಟೆಯನ್ನು ಆರಂಭಿಸಿದೆ. ಸುಮಾರು 1,200 ನಾಗರಿಕರ ಸಾವಿಗೆ ಕಾರಣವಾದ ಮತ್ತು 250ಕ್ಕೂ ಹೆಚ್ಚು ಜನರನ್ನು ಒತ್ತೆಯಾಳಾಗಿ ಇರಿಸಿಕೊಂಡ ಈ ಘಟನೆಯಲ್ಲಿ ಭಾಗಿಯಾದ ಪ್ರತಿಯೊಬ್ಬ ಹಮಾಸ್ ಕಮಾಂಡರ್ನಿಂದ ಹಿಡಿದು ಸಾಮಾನ್ಯ ಉಗ್ರನನ್ನೂ ಹುಡುಕಿ ಕೊಲ್ಲಲು ಇಸ್ರೇಲ್ ಸುಧಾರಿತ ತಂತ್ರಜ್ಞಾನ ಆಧಾರಿತ ಆಪರೇಷನ್ ಕೈಗೆತ್ತಿಕೊಂಡಿದೆ.
ಇಸ್ರೇಲಿ ಗುಪ್ತಚರ ಸಂಸ್ಥೆಗಳು ಈ ಉದ್ದೇಶಕ್ಕಾಗಿಯೇ “ನಿಲಿ” (NILI – ಅಂದರೆ ಇಸ್ರೇಲ್ನ ಶಾಶ್ವತ ದೇವರು ಸುಳ್ಳು ಹೇಳುವುದಿಲ್ಲ) ಎಂಬ ವಿಶೇಷ ಕಾರ್ಯಪಡೆಯನ್ನು ರಚಿಸಿದ್ದು, ಕದನ ವಿರಾಮ ಮಾತುಕತೆಗಳ ನಡುವೆಯೂ ಈ ಹೈಟೆಕ್ ಸಂಹಾರ ಕಾರ್ಯಾಚರಣೆ ನಿರಂತರವಾಗಿ ಮುಂದುವರಿದಿದೆ ಎಂದು ‘ದಿ ವಾಲ್ ಸ್ಟ್ರೀಟ್ ಜರ್ನಲ್’ (WSJ) ವರದಿ ಮಾಡಿದೆ.
ದಾಳಿಕೋರರ ಪತ್ತೆಗೆ ಎಐ ಬಳಕೆ
ಅ.7ರಂದು ಹಮಾಸ್ ಉಗ್ರರು ಇಸ್ರೇಲ್ ಗಡಿಯೊಳಗೆ ನುಗ್ಗಿ ಸೇನಾ ನೆಲೆಗಳು, ವಸತಿ ಪ್ರದೇಶಗಳು ಮತ್ತು ಸಂಗೀತೋತ್ಸವದ ಮೇಲೆ ನಡೆಸಿದ ದಾಳಿಯ ವೇಳೆ ತಾವೇ ರೆಕಾರ್ಡ್ ಮಾಡಿಕೊಂಡಿದ್ದ ಗೋಪ್ರೋ (GoPro) ಮತ್ತು ಮೊಬೈಲ್ ವಿಡಿಯೋಗಳೇ ಈಗ ಅವರಿಗೆ ಕಾಲಪಾಶವಾಗಿ ಮಾರ್ಪಟ್ಟಿವೆ. ಇಸ್ರೇಲಿ ತನಿಖಾಧಿಕಾರಿಗಳು ಉಗ್ರರ ಸಾಮಾಜಿಕ ಜಾಲತಾಣದ ಪೋಸ್ಟ್ಗಳು, ಇಂಟರ್ಸೆಪ್ಟ್ ಮಾಡಿದ ಕರೆಗಳು, ಸೆಲ್ಫೋನ್ ಟವರ್ ಡೇಟಾ ಮತ್ತು ಸುಧಾರಿತ ಫೇಶಿಯಲ್ ರೆಕಗ್ನಿಷನ್ (ಮುಖ ಗುರುತಿಸುವಿಕೆ) ತಂತ್ರಜ್ಞಾನವನ್ನು ಬಳಸಿ ಪ್ರತಿಯೊಬ್ಬ ಆರೋಪಿಯನ್ನೂ ಗುರುತಿಸುತ್ತಿದ್ದಾರೆ. ಇಸ್ರೇಲ್ ನಿಯಮಗಳ ಪ್ರಕಾರ ಒಬ್ಬ ವ್ಯಕ್ತಿಯನ್ನು ಗುರಿಯಾಗಿಸುವ ಮುನ್ನ ಕನಿಷ್ಠ ಎರಡು ಬಲವಾದ ಡಿಜಿಟಲ್ ಪುರಾವೆಗಳನ್ನು ಕಡ್ಡಾಯಗೊಳಿಸಲಾಗಿದೆ. ಅ.7 ದು ಗಾಜಾ ಗಡಿಯ ಬೇಲಿಯನ್ನು ಟ್ರ್ಯಾಕ್ಟರ್ ಮೂಲಕ ಮುರಿದು ದಾರಿ ಮಾಡಿಕೊಟ್ಟಿದ್ದ ಒಬ್ಬ ಸಾಮಾನ್ಯ ವ್ಯಕ್ತಿಯನ್ನು ಕೂಡ ಇಸ್ರೇಲ್ ಇತ್ತೀಚೆಗೆ ಗಾಜಾದಲ್ಲಿ ನಡೆಸಿದ ವೈಮಾನಿಕ ದಾಳಿಯಲ್ಲಿ ಪತ್ತೆಹಚ್ಚಿ ಹತ್ಯೆ ಮಾಡಿದೆ.
ಗಾಜಾದಿಂದ ಬೇರೂತ್, ಟೆಹ್ರಾನ್ವರೆಗೆ ವಿಸ್ತರಿಸಿದ ಇಸ್ರೇಲ್ ಜಾಲ
ಇಸ್ರೇಲ್ನ ಈ ಪ್ರತೀಕಾರದ ಬೇಟೆ ಕೇವಲ ಗಾಜಾ ಪಟ್ಟಿಗೆ ಮಾತ್ರ ಸೀಮಿತವಾಗಿಲ್ಲ. ಬದಲಿಗೆ ಇಸ್ರೇಲಿ ರಹಸ್ಯ ಪಡೆಗಳು ಲೆಬನಾನ್ ಮತ್ತು ಇರಾನ್ ದೇಶಗಳ ಒಳಗೂ ನುಗ್ಗಿ ಹಮಾಸ್ನ ಉನ್ನತ ನಾಯಕರನ್ನು ಮಟ್ಟಹಾಕುತ್ತಿವೆ. ಈ ಕಾರ್ಯಾಚರಣೆಯ ಭಾಗವಾಗಿ ಜನವರಿ 2024ರಲ್ಲಿ ಬೇರೂತ್ನಲ್ಲಿ ಹಮಾಸ್ ನಾಯಕ ಸಲೇಹ್ ಅಲ್-ಅರೂರಿ, ತದನಂತರ ಟೆಹ್ರಾನ್ನಲ್ಲಿ ಹಮಾಸ್ ರಾಜಕೀಯ ಮುಖ್ಯಸ್ಥ ಇಸ್ಮಾಯಿಲ್ ಹನಿಯೆಹ್ ಮತ್ತು ಅಕ್ಟೋಬರ್ 7ರ ದಾಳಿಯ ಪ್ರಮುಖ ಸಂಚುಕೋರ ಎಜ್ಜುದ್ದೀನ್ ಅಲ್-ಹದ್ದಾದ್ನನ್ನು ಇಸ್ರೇಲ್ ಯಶಸ್ವಿಯಾಗಿ ಹತ್ಯೆ ಮಾಡಿದೆ.
ದಾಳಿಯ ಸಮಯದಲ್ಲಿ ಒತ್ತೆಯಾಳಾಗಿ ಕರೆದೊಯ್ಯಲಾಗಿದ್ದ ನೋವಾ ಅರ್ಗಾಮಾನಿ ಎಂಬ ಯುವತಿಯನ್ನು ನಂತರ ಇಸ್ರೇಲ್ ರಕ್ಷಿಸಿತ್ತು. ಆದರೆ ಆಕೆಯನ್ನು ಮೋಟಾರ್ ಸೈಕಲ್ನಲ್ಲಿ ಅಪಹರಿಸುತ್ತಿದ್ದ ವಿಡಿಯೋದಲ್ಲಿದ್ದ ಇಬ್ಬರು ಉಗ್ರರನ್ನು ಇಸ್ರೇಲಿ ಗುಪ್ತಚರ ಸಂಸ್ಥೆ ಬಿಡದೇ ಪತ್ತೆಹಚ್ಚಿ ಕೊಂದಿದೆ. ಈ ಮೂಲಕ ದಾಳಿಯಲ್ಲಿ ಭಾಗಿಯಾದವರ ಸಂಪೂರ್ಣ ನಿರ್ಮೂಲನೆಗೆ ನಾವು ತೀರಾ ಹತ್ತಿರದಲ್ಲಿದ್ದೇವೆ ಎಂದು ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಘೋಷಿಸಿದ್ದಾರೆ.
ಮ್ಯೂನಿಚ್ ಕ್ರಾಂತಿ ನೆನಪಿಸಿದ ಕಾರ್ಯಾಚರಣೆ
ಇಸ್ರೇಲ್ನ ಈ ಸರಣಿ ಹತ್ಯೆಗಳು 1972 ರ ಮ್ಯೂನಿಚ್ ಒಲಿಂಪಿಕ್ಸ್ ಹತ್ಯಾಕಾಂಡದ ನಂತರ ಇಸ್ರೇಲಿ ಮೊಸಾದ್ (Mossad) ಸಂಸ್ಥೆ ನಡೆಸಿದ ದಶಕಗಳ ಕಾಲದ ಪ್ರತೀಕಾರದ ಕಾರ್ಯಾಚರಣೆಯನ್ನು ನೆನಪಿಸಿದೆ. ಮೊಸಾದ್ ಮುಖ್ಯಸ್ಥ ಡೇವಿಡ್ ಬರ್ನಿಯಾ ಇತ್ತೀಚೆಗೆ ಮ್ಯೂನಿಚ್ ಇತಿಹಾಸವನ್ನು ಉಲ್ಲೇಖಿಸಿ, “ಇದಕ್ಕೆ ಸಮಯ ಹಿಡಿಯಬಹುದು, ಆದರೆ ನಮ್ಮ ಕೈಗಳು ಜಗತ್ತಿನ ಯಾವುದೇ ಮೂಲೆಯಲ್ಲಿದ್ದರೂ ಉಗ್ರರನ್ನು ತಲುಪಲಿವೆ” ಎಂದು ಎಚ್ಚರಿಸಿದ್ದಾರೆ. ಈ ಕಾರ್ಯಾಚರಣೆಯು ಅಂತಾರಾಷ್ಟ್ರೀಯ ಕಾನೂನು ವಲಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದ್ದು, ಯುದ್ಧದ ಸಮಯದಲ್ಲಿ ಸಕ್ರಿಯವಾಗಿ ಭಾಗವಹಿಸದವರನ್ನು ಕೊಲ್ಲುವುದು ಕಾನೂನುಬಾಹಿರ ಮತ್ತು ಇದು ನಾಗರಿಕರ ಸಾವಿಗೆ ಕಾರಣವಾಗುತ್ತದೆ ಎಂದು ಮಾನವ ಹಕ್ಕುಗಳ ಸಂಘಟನೆಗಳು ಟೀಕಿಸಿವೆ. ಆದರೆ, ಹಮಾಸ್ ದಾಳಿಯಿಂದ ತೀವ್ರ ಆಘಾತಕ್ಕೊಳಗಾಗಿರುವ ಇಸ್ರೇಲಿ ಸಾರ್ವಜನಿಕರಿಗೆ ಮತ್ತು ಮೃತರ ಕುಟುಂಬಸ್ಥರಿಗೆ ಈ ಹೈಟೆಕ್ ಬೇಟೆಯು ಕೇವಲ ಭದ್ರತೆಯ ವಿಷಯವಾಗಿರದೆ, ಆಂತರಿಕ ಮಾನಸಿಕ ನೆಮ್ಮದಿಯ ಔಷಧಿಯಾಗಿದೆ ಎಂದು ಇಸ್ರೇಲಿ ಗುಪ್ತಚರ ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.
ಇದನ್ನೂ ಓದಿ : ಕೇವಲ 5 ದಿನದಲ್ಲಿ 1 ಕೋಟಿ ಫಾಲೋವರ್ಸ್ : ಇನ್ಸ್ಟಾದಲ್ಲಿ ಬಿಜೆಪಿಯನ್ನು ಹಿಂದಿಕ್ಕಿದ ‘ಕಾಕ್ರೋಚ್ ಜನತಾ ಪಾರ್ಟಿ’!
