‘ಲಿಂಗ ಪರಿವರ್ತನೆ’ಗೆ ಆಕ್ರೋಶ : ಅತ್ತೆ-ಮಾವನಿಂದಲೇ ‘ನ್ಯೂಯಾರ್ಕ್ ಟೈಮ್ಸ್’ ಉನ್ನತಾಧಿಕಾರಿಯ ಹತ್ಯೆ!

ವಾಷಿಂಗ್ಟನ್ : ಅಮೆರಿಕದ ಖ್ಯಾತ ಮಾಧ್ಯಮ ಸಂಸ್ಥೆ ನ್ಯೂಯಾರ್ಕ್ ಟೈಮ್ಸ್ ಸಂಸ್ಥೆಯ ತಂತ್ರಜ್ಞಾನ ವಿಭಾಗದ ಉನ್ನತಾಧಿಕಾರಿ ಜೊನಾಥನ್ ಮೆಕಿನ್ಸೆ (40) ಅವರನ್ನು ಕ್ಯಾಲಿಫೋರ್ನಿಯಾದ ಕ್ರೀಡಾಂಗಣವೊಂದರ ಪಾರ್ಕಿಂಗ್ ಸ್ಥಳದಲ್ಲಿ ಗುಂಡಿಕ್ಕಿ ಭೀಕರವಾಗಿ ಹತ್ಯೆ ಮಾಡಲಾಗಿದೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅವರ ಅತ್ತೆ-ಮಾವನನ್ನು ಪೊಲೀಸರು ಬಂಧಿಸಿದ್ದು, ಲಿಂಗ ಪರಿವರ್ತನೆ (ಟ್ರಾನ್ಸ್‌ಜೆಂಡರ್) ಹಾಗೂ ಕೌಟುಂಬಿಕ ಕಲಹವೇ ಈ ಕೊಲೆಗೆ ಪ್ರಮುಖ ಕಾರಣ ಎಂಬ ಆಘಾತಕಾರಿ ಮಾಹಿತಿ ಬೆಳಕಿಗೆ ಬಂದಿದೆ.

ಖ್ಯಾತ ಮಾಧ್ಯಮ ಸಂಸ್ಥೆಯ ಹಿರಿಯ ತಂತ್ರಜ್ಞ

ನ್ಯೂಯಾರ್ಕ್ ಟೈಮ್ಸ್‌ನ ‘ಗೇಮ್ಸ್ ಪ್ಲೇಯರ್ ಎಕ್ಸ್‌ಪೀರಿಯನ್ಸ್’ ವಿಭಾಗದ ಹಿರಿಯ ಇಂಜಿನಿಯರಿಂಗ್ ಮುಖ್ಯಸ್ಥರಾಗಿ ಕಾರ್ಯನಿರ್ವಹಿಸುತ್ತಿದ್ದ ಜೊನಾಥನ್ ಮೆಕಿನ್ಸೆ, ಕಳೆದ ಎರಡು ದಶಕಗಳಿಂದ ಟೆಕ್ ಕ್ಷೇತ್ರದಲ್ಲಿ ಗುರುತಿಸಿಕೊಂಡಿದ್ದರು. ಶನಿವಾರ ಮಧ್ಯಾಹ್ನ ಡಬ್ಲಿನ್ ಸ್ಪೋರ್ಟ್ಸ್ ಗ್ರೌಂಡ್ಸ್‌ನ ಪಾರ್ಕಿಂಗ್ ಸ್ಥಳದಲ್ಲಿ ಅವರು ಶವವಾಗಿ ಪತ್ತೆಯಾಗಿದ್ದಾರೆ. ಈ ಹತ್ಯೆಯ ಆರೋಪದ ಮೇಲೆ ಅವರ ಅತ್ತೆ ಶೀಲಿ ಚೆನ್ (76) ಮತ್ತು ಮಾವ ಶೌಯಾಂಗ್ ಝಾಂಗ್ (76) ಅವರನ್ನು ಸ್ಥಳೀಯ ಪೊಲೀಸರು ಬಂಧಿಸಿದ್ದಾರೆ.

ಲಿಂಗ ಪರಿವರ್ತನೆ ಮತ್ತು ದೌರ್ಜನ್ಯದ ಆರೋಪ

ನ್ಯೂಯಾರ್ಕ್ ಟೈಮ್ಸ್ ವರದಿ ಹಾಗೂ ನ್ಯಾಯಾಲಯದ ದಾಖಲೆಗಳ ಪ್ರಕಾರ, ಜೊನಾಥನ್ ಮತ್ತು ಅವರ ಪತ್ನಿ ಕ್ಯಾಂಡಿಸ್ ಜಾಂಗ್ ನಡುವೆ ಕೌಟುಂಬಿಕ ಹಿಂಸಾಚಾರಕ್ಕೆ ಸಂಬಂಧಿಸಿದಂತೆ ಹಲವು ಪ್ರಕರಣಗಳು ದಾಖಲಾಗಿದ್ದವು. ಮೆಕಿನ್ಸೆ ಅವರು ಮಹಿಳೆಯಿಂದ ಪುರುಷನಾಗಿ ಲಿಂಗ ಪರಿವರ್ತನೆ ಮಾಡಿಕೊಳ್ಳುವ ಹಂತದಲ್ಲಿದ್ದಾಗ (2010), ಪತ್ನಿ ಮತ್ತು ಅವರ ಪೋಷಕರಿಂದ ತೀವ್ರ ದೌರ್ಜನ್ಯ ಎದುರಿಸಿದ್ದರೆಂದು ಕೋರ್ಟ್ ದಾಖಲೆಗಳು ತಿಳಿಸಿವೆ. ಸರ್ಜರಿಯಿಂದ ಚೇತರಿಸಿಕೊಳ್ಳುತ್ತಿದ್ದಾಗ ಮಾವ ಎದೆಗೆ ಹೊಡೆದಿದ್ದರೆಂದೂ, ಅತ್ತೆ ಅವರನ್ನು ಅತ್ಯಂತ ನಿಂದನೀಯ ಮಾತುಗಳಿಂದ ನಿಂದಿಸುತ್ತಿದ್ದರೆಂದು ಮೆಕಿನ್ಸೆ ಈ ಹಿಂದೆ ಆರೋಪಿಸಿದ್ದರು. ಅಲ್ಲದೆ, 2013ರಲ್ಲಿ ಅವರ ಮೇಲೆ ಪತ್ನಿ ಬಾಣಲೆಯಿಂದ ಹಲ್ಲೆ ನಡೆಸಿದ್ದರೆಂದೂ ಉಲ್ಲೇಖಿಸಲಾಗಿದೆ.

ಪರಸ್ಪರ ಗಂಭೀರ ಆರೋಪಗಳು

ಮತ್ತೊಂದೆಡೆ, ಪತ್ನಿ ಕ್ಯಾಂಡಿಸ್ ಜಾಂಗ್ ಕೂಡ ಮೆಕಿನ್ಸೆ ವಿರುದ್ಧ ಗಂಭೀರ ಕೌಟುಂಬಿಕ ಹಿಂಸಾಚಾರದ ಆರೋಪಗಳನ್ನು ಮಾಡಿದ್ದರು. ಮೆಕಿನ್ಸೆ ತಮ್ಮ ಮೇಲೆ ಹಲ್ಲೆ ನಡೆಸಿ ಬೆನ್ನುಮೂಳೆಗೆ ಹಾನಿ ಉಂಟು ಮಾಡಿದ್ದರೆಂದು ಮತ್ತು ಮಗುವಿನ ಮೇಲೆ ಹಲ್ಲೆ ನಡೆಸಿದ್ದರೆಂದು ಕಳೆದ ವರ್ಷ ಪೊಲೀಸರಿಗೆ ದೂರು ನೀಡಿದ್ದರು. ಈ ಪ್ರಕರಣದಲ್ಲಿ ಮೆಕಿನ್ಸೆ ಜೈಲಿಗೆ ಹೋಗಿ, ಜಾಮೀನಿನ ಮೇಲೆ ಹೊರಬಂದಿದ್ದರು. ಸುದೀರ್ಘ ಕಾಲದಿಂದ ನಡೆಯುತ್ತಿದ್ದ ಈ ಕುಟುಂಬದ ವೈಯಕ್ತಿಕ ವೈಷಮ್ಯ ಮತ್ತು ದ್ವೇಷವೇ ಅಂತಿಮವಾಗಿ ಇಬ್ಬರು ವೃದ್ಧ ಅತ್ತೆ-ಮಾವಂದಿರು ಮೆಕಿನ್ಸೆ ಅವರನ್ನು ಹತ್ಯೆ ಮಾಡಲು ಕಾರಣವಾಗಿದೆ ಎಂದು ಶಂಕಿಸಲಾಗಿದೆ. ಪ್ರಸ್ತುತ ಪೊಲೀಸರು ಘಟನೆಯ ಕುರಿತು ಹೆಚ್ಚಿನ ತನಿಖೆ ನಡೆಸುತ್ತಿದ್ದಾರೆ.

ಇದನ್ನೂ ಓದಿ : ಬಿ ಫಾರ್ಮ್, ಡಿ ಫಾರ್ಮ್ ಮುಗಿಸಿದವರಿಗೆ ಗುಡ್ ನ್ಯೂಸ್: HLL Lifecare ಕಂಪನಿಯಲ್ಲಿ ವಿವಿಧ ಹುದ್ದೆಗಳ ನೇಮಕ!