ಆ್ಯಪಲ್ ಏರ್‌ಟ್ಯಾಗ್, ನಕಲಿ ಕೀ ಬಳಸಿ ಹಿಂಬಾಲಿಸಿ ಭಾರತೀಯ ಮೂಲದ ಮಹಿಳೆಯ ಭೀಕರ ಹತ್ಯೆ

ಕ್ಯಾಲಿಫೋರ್ನಿಯಾ : ಸುಮಾರು ಒಂದು ವರ್ಷದಿಂದ ಕಿರುಕುಳ ನೀಡುತ್ತಿದ್ದ 22 ವರ್ಷದ ಯುವಕನೊಬ್ಬ, 38 ವರ್ಷದ ಭಾರತೀಯ ಮೂಲದ ಶಾಲಿನಿ ಠಾಕೂರ್ ಎಂಬ ಮಹಿಳೆಯನ್ನು ಸಾರ್ವಜನಿಕವಾಗಿ ಬೆನ್ನಟ್ಟಿ ಗುಂಡಿಕ್ಕಿ ಕೊಲೆ ಮಾಡಿದ ಭೀಕರ ಘಟನೆ ಅಮೆರಿಕದ ಕ್ಯಾಲಿಫೋರ್ನಿಯಾದ ಸ್ಯಾಕ್ರಮೆಂಟೋದಲ್ಲಿ ನಡೆದಿದೆ. ನ್ಯಾಯಾಲಯದಿಂದ ನಿಷೇಧಾಜ್ಞೆ (ರೆಸ್ಟ್ರೈನಿಂಗ್ ಆರ್ಡರ್) ಜಾರಿಯಲ್ಲಿದ್ದರೂ ಲೆಕ್ಕಿಸದೆ ಈ ಕೃತ್ಯ ಎಸಗಿದ ಆರೋಪಿ, ಬಳಿಕ ಪೊಲೀಸರು ಆತನನ್ನು ಸುತ್ತುವರಿದಾಗ ತನಗೆ ತಾನೇ ಗುಂಡಿಟ್ಟುಕೊಂಡು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ.

ಹಾಡಹಗಲೇ ನಡೆದ ಭೀಕರ ಕೃತ್ಯ

ಸ್ಯಾಕ್ರಮೆಂಟೋದ ಆರ್ಡೆನ್-ಆರ್ಕೇಡ್ ಪ್ರದೇಶದ ‘ಪನೇರಾ ಬ್ರೆಡ್’ ರೆಸ್ಟೋರೆಂಟ್ ಹೊರಭಾಗದಲ್ಲಿ ಈ ಘಟನೆ ನಡೆದಿದೆ. ಹಂತಕ ರೋಹಿತ್‌ನಿಂದ ತಪ್ಪಿಸಿಕೊಳ್ಳಲು ಶಾಲಿನಿ ಓಡಲು ಯತ್ನಿಸಿದರಾದರೂ, ಆತ ಆಕೆಯನ್ನು ಬೆನ್ನಟ್ಟಿ ಸಾರ್ವಜನಿಕರ ಎದುರಲ್ಲೇ ಹಲವು ಬಾರಿ ಗುಂಡು ಹಾರಿಸಿದ್ದಾನೆ. ಶಾಲಿನಿ ನೆಲಕ್ಕೆ ಬಿದ್ದ ನಂತರ, ಆತ ತೀರಾ ಹತ್ತಿರದಿಂದ ಆಕೆಯ ತಲೆಗೆ ಮತ್ತೊಮ್ಮೆ ಗುಂಡಿಕ್ಕಿ ಅತ್ಯಂತ ಕ್ರೂರವಾಗಿ ಹತ್ಯೆ ಮಾಡಿದ್ದಾನೆ. ಮಧ್ಯಾಹ್ನ ಸುಮಾರು 3 ಗಂಟೆಗೆ ಸ್ಥಳಕ್ಕೆ ಧಾವಿಸಿದ ಪೊಲೀಸರು ಮತ್ತು ವೈದ್ಯಕೀಯ ಸಿಬ್ಬಂದಿ ಶಾಲಿನಿ ಮೃತಪಟ್ಟಿರುವುದನ್ನು ದೃಢಪಡಿಸಿದರು.

ಆಪರೇಷನ್ ಹೈವೇ: ಆರೋಪಿಯ ಅಂತ್ಯ

ಘಟನೆಯ ನಂತರ ಪರಾರಿಯಾಗಿದ್ದ ಆರೋಪಿಯ ಕಾರನ್ನು ಪೊಲೀಸರು ಹೈವೇ 50ರಲ್ಲಿ ಪತ್ತೆಹಚ್ಚಿ ಬೆನ್ನಟ್ಟಿದರು. ಪೊಲೀಸರು ಕಾರನ್ನು ತಡೆಯಲು ಯತ್ನಿಸಿದಾಗ ಆರೋಪಿ ಹೈವೇ ಮಧ್ಯದಲ್ಲೇ ಹಠಾತ್ತಾಗಿ ಕಾರು ನಿಲ್ಲಿಸಿದ್ದ. ತಕ್ಷಣವೇ ಹೆದ್ದಾರಿಯ ಸಂಚಾರವನ್ನು ಬಂದ್ ಮಾಡಿದ ಪೊಲೀಸರು, ಶಸ್ತ್ರಸಜ್ಜಿತ ವಾಹನಗಳೊಂದಿಗೆ ಕಾರನ್ನು ಸುತ್ತುವರಿದರು. ಡ್ರೋನ್ ಮೂಲಕ ಕಾರಿನ ಒಳಗಿನ ಪರಿಸ್ಥಿತಿಯನ್ನು ಪರಿಶೀಲಿಸಿದಾಗ, ಆರೋಪಿ ರೋಹಿತ್ ತನಗೆ ತಾನೇ ಗುಂಡಿಟ್ಟುಕೊಂಡು ಚಾಲಕನ ಸೀಟಿನಲ್ಲಿ ಶವವಾಗಿ ಬಿದ್ದಿರುವುದು ಕಂಡುಬಂತು.

ಏರ್‌ಟ್ಯಾಗ್ ಹಾಗೂ ನಕಲಿ ಕೀ ಬಳಸಿ ಕಿರುಕುಳ

2025ರ ಸೆಪ್ಟೆಂಬರ್‌ನಿಂದಲೇ ರೋಹಿತ್, ಶಾಲಿನಿಗೆ ತೀವ್ರ ಕಿರುಕುಳ ನೀಡಲು ಪ್ರಾರಂಭಿಸಿದ್ದ. ಡೋರ್‌ಡ್ಯಾಶ್ ಪಿಕಪ್ ವೇಳೆ ಪರಿಚಯವಾಗಿದ್ದ ಈತ, ವಯಸ್ಸಿನ ವ್ಯತ್ಯಾಸದ ಕಾರಣಕ್ಕೆ ಶಾಲಿನಿ ತನ್ನ ಮದುವೆ ಪ್ರಸ್ತಾವನೆಯನ್ನು ತಿರಸ್ಕರಿಸಿದ್ದಕ್ಕೆ ಈ ರೀತಿ ಹಗಲು ರಾತ್ರಿ ಎನ್ನದೇ ಹಿಂಬಾಲಿಸುತ್ತಿದ್ದ. ಶಾಲಿನಿಯ ಕಾರಿನ ಟೈರ್‌ಗಳ ಗಾಳಿ ತೆಗೆಯುವುದು, ಆಕೆಯ ಚಲನವಲನಗಳ ಮೇಲೆ ಕಣ್ಣಿಡಲು ಕಾರಿನ ಕೆಳಭಾಗದಲ್ಲಿ ಆ್ಯಪಲ್ ಏರ್‌ಟ್ಯಾಗ್ ಅಳವಡಿಸುವುದು ಹಾಗೂ ಆಕೆಯ ಫ್ಲಾಟ್‌ನ ನಕಲಿ ಕೀ ತಯಾರಿಸಿ ಆಕೆ ನಿದ್ರಿಸುತ್ತಿದ್ದಾಗ ಮನೆಗೆ ಅಕ್ರಮವಾಗಿ ನುಗ್ಗುವಂತಹ ವಿಕೃತ ಕೃತ್ಯಗಳನ್ನು ಎಸಗಿದ್ದ ಎಂದು ಹೇಳಲಾಗಿದೆ.

ಮೇ 19ರಂದು ಕೋರ್ಟ್ ರೋಹಿತ್ ವಿರುದ್ಧ ಆದೇಶ ಹೊರಡಿಸಿದ್ದರೂ ಆತ ಕಾನೂನನ್ನು ಗಾಳಿಗೆ ತೂರಿದ್ದ. ಶಾಲಿನಿಯ ತಾಯಿ ಸುದೇಶ್ ಕುಮಾರಿ ತಮ್ಮ ಮಗಳ ಜೊತೆ ನಡದ ಕೊನೆಯ ಸಂಭಾಷಣೆಯನ್ನು ನೆನೆದು ಕಣ್ಣೀರಿಟ್ಟಿದ್ದಾರೆ. ಘಟನೆಗೆ ಸರಿಯಾಗಿ ಒಂದು ಗಂಟೆಯ ಮುಂಚೆ 1.58ಕ್ಕೆ ಮಗಳ ಜೊತೆ ಮಾತನಾಡಿದ್ದ ತಾಯಿಗೆ, 15 ನಿಮಿಷದಲ್ಲಿ ಮತ್ತೆ ಕರೆ ಮಾಡುವುದಾಗಿ ಹೇಳಿದ್ದ ಶಾಲಿನಿ ನಂತರ ಶವವಾಗಿ ಪತ್ತೆಯಾದಳು ಎಂದು ತಾಯಿ ಕಣ್ಣೀರು ಹಾಕಿದ್ದಾರೆ.

ಇದನ್ನೂ ಓದಿ : ಕೇಂದ್ರದ ಯುನೈಟೆಡ್ ಇಂಡಿಯಾ ವಿಮಾ ಕಂಪನಿಯಲ್ಲಿ 225 ಹುದ್ದೆಗಳ ನೇಮಕಾತಿ : ಹೀಗೆ ಅರ್ಜಿ ಸಲ್ಲಿಸಿ