ಹಿಂದೂ ನಿಯೋಗ ಭೇಟಿ ವೇಳೆ ಮಹಿಳಾ ಸಿಬ್ಬಂದಿಗೆ ತಾರತಮ್ಯ ಆರೋಪ : ಪ್ಯಾರಿಸ್‌ನ ಐಫೆಲ್ ಟವರ್ ಬಂದ್

ಪ್ಯಾರಿಸ್ : ಫ್ರಾನ್ಸ್‌ನ ವಿಶ್ವಪ್ರಸಿದ್ಧ ಐಫೆಲ್ ಟವರ್‌ನ ಮಹಿಳಾ ಉದ್ಯೋಗಿಗಳಿಗೆ ತಾರತಮ್ಯ ಎಸಗಲಾಗಿದೆ ಹಾಗೂ ಅವರನ್ನು ಕೆಲಸದ ಸ್ಥಳದಿಂದ ಬಲವಂತವಾಗಿ ದೂರವಿಡಲಾಗಿದೆ ಎಂದು ಆರೋಪಿಸಿ ಸಿಬ್ಬಂದಿ ನಡೆಸಿದ ದಿಢೀರ್ ಮುಷ್ಕರದಿಂದಾಗಿ ಪ್ರವಾಸಿ ತಾಣವಾದ ಐಫೆಲ್ ಟವರ್ ಇಡೀ ದಿನ ಬಂದ್ ಆಗಿದ್ದ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಭಾರತ ಮೂಲದ ಹಿಂದೂ ಧಾರ್ಮಿಕ ಸಂಘಟನೆಯೊಂದರ ನಿಯೋಗವು ಭೇಟಿ ನೀಡಿದ್ದ ಸಂದರ್ಭದಲ್ಲಿ ಮಹಿಳಾ ಸಿಬ್ಬಂದಿಗೆ ಪ್ರವೇಶ ನಿರಾಕರಿಸಿ, ಪುರುಷ ಸಿಬ್ಬಂದಿಯನ್ನು ನೇಮಿಸಲಾಗಿತ್ತು ಎಂಬ ಆರೋಪ ಫ್ರಾನ್ಸ್‌ನಲ್ಲಿ ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.

ಲಿಂಗ ತಾರತಮ್ಯದ ಗಂಭೀರ ಆರೋಪ

ಬೋಚಾಸನವಾಸಿ ಅಕ್ಷರ ಪುರುಷೋತ್ತಮ ಸ್ವಾಮಿನಾರಾಯಣ್ ಸಂಸ್ಥೆ (BAPS) ಸಂಘಟನೆಯ ಸುಮಾರು 100 ಜನರ ನಿಯೋಗವು ಐಫೆಲ್ ಟವರ್‌ಗೆ ಖಾಸಗಿ ಭೇಟಿ ನೀಡಿತ್ತು. ಈ ಸಂದರ್ಭದಲ್ಲಿ ಸಂಘಟನೆಯ ನಿಯೋಗದೊಂದಿಗಿನ ‘ಮಹಿಳೆಯರ ಸಂಪರ್ಕವನ್ನು ನಿಯಂತ್ರಿಸುವ’ ಉದ್ದೇಶದಿಂದ, ಮಹಿಳಾ ನೌಕರರು ಕಾರ್ಯನಿರ್ವಹಿಸುವ ಸ್ಥಳವನ್ನು ಬದಲಾಯಿಸಿ, ಅವರನ್ನು ಪುರುಷ ಸಿಬ್ಬಂದಿಯಿಂದ ಬದಲಾಯಿಸುವಂತೆ ಆಡಳಿತ ಮಂಡಳಿ ಸೂಚನೆ ನೀಡಿತ್ತು ಎಂದು ಸಿಬ್ಬಂದಿ ಒಕ್ಕೂಟ ಖಂಡಿಸಿದೆ.

ಮಹಿಳಾ ನೌಕರರು ಆ ಪ್ರದೇಶದಲ್ಲಿ ಓಡಾಡದಂತೆ ಹಾಗೂ ತಮ್ಮ ಅಸ್ತಿತ್ವವನ್ನು ಮರೆಮಾಚುವಂತೆ ಸೂಚಿಸಲಾಗಿತ್ತು ಎಂಬ ವಿಷಯ ಹೊರಬರುತ್ತಿದ್ದಂತೆ ಸಿಬ್ಬಂದಿ ಕೆರಳಿ ಕೆಂಡವಾಗಿದ್ದಾರೆ. ಐಫೆಲ್ ಟವರ್‌ನ ನಿರ್ವಹಣಾ ಸಂಸ್ಥೆಯಾದ ಸೆಟೆ(SETE) ಅಧ್ಯಕ್ಷ ಆರಿಯಲ್ ವೈಲ್ ಈ ಘಟನೆಯನ್ನು ತೀವ್ರವಾಗಿ ಖಂಡಿಸಿದ್ದು, ಇದು ಸಂಸ್ಥೆಯ ಮೌಲ್ಯಗಳಿಗೆ ಮತ್ತು ಸಮಾನತೆಯ ತತ್ವಗಳಿಗೆ ವಿರುದ್ಧವಾದದ್ದು ಎಂದು ಒಪ್ಪಿಕೊಂಡಿದ್ದಾರೆ.

ಫ್ರಾನ್ಸ್ ರಾಜಕೀಯ ವಲಯದಲ್ಲಿ ತೀವ್ರ ಆಕ್ರೋಶ

ಈ ಘಟನೆ ಫ್ರಾನ್ಸ್ ರಾಜಕೀಯದಲ್ಲೂ ದೊಡ್ಡ ಸಂಚಲನ ಮೂಡಿಸಿದೆ. ಫ್ರಾನ್ಸ್ ಸಮಾನತೆ ಸಚಿವೆ ಅರೋರೆ ಬರ್ಗೆ ಪ್ರತಿಕ್ರಿಯಿಸಿ, “ಫ್ರಾನ್ಸ್‌ನಲ್ಲಿ ಮಹಿಳೆಯರನ್ನು ಮರೆಮಾಚುವಂತೆ ಅಥವಾ ಹಿಂದೆ ಸರಿಯುವಂತೆ ಮಾಡಲು ಸಾಧ್ಯವಿಲ್ಲ. ಯಾವುದೇ ಧರ್ಮ ಅಥವಾ ಸಿದ್ಧಾಂತವು ದೇಶದ ಕಾನೂನಿಗಿಂತ ಮಿಗಿಲಲ್ಲ” ಎಂದು ಕಿಡಿಕಾರಿದ್ದಾರೆ. ಪ್ಯಾರಿಸ್ ಮೇಯರ್ ಎಮ್ಯಾನುಯೆಲ್ ಗ್ರೆಗೊಯಿರ್ ಈ ಕುರಿತು ತಕ್ಷಣವೇ ಸಮಗ್ರ ತನಿಖೆಗೆ ಆದೇಶಿಸಿದ್ದು, ನೌಕರರ ಆಕ್ರೋಶ ಸಮಂಜಸವಾಗಿದೆ ಎಂದಿದ್ದಾರೆ. ಫ್ರಾನ್ಸ್‌ನ ಪ್ರಮುಖ ರಾಜಕಾರಣಿಗಳಾದ ಗೇಬ್ರಿಯಲ್ ಅಟ್ಟಾಲ್ ಮತ್ತು ಮರೀನ್ ಲೀ ಪೆನ್ ಕೂಡ ಈ ಘಟನೆಯನ್ನು ತೀವ್ರವಾಗಿ ಖಂಡಿಸಿದ್ದಾರೆ.

BAPS ಸಂಸ್ಥೆಯಿಂದ ಕ್ಷಮೆಯಾಚನೆ

ಈ ವಿವಾದದ ಬೆನ್ನಲ್ಲೇ BAPS ಸಂಸ್ಥೆಯು ಅಧಿಕೃತ ಹೇಳಿಕೆ ಬಿಡುಗಡೆ ಮಾಡಿದ್ದು, ಎದ್ದಿರುವ ಕಳವಳಗಳನ್ನು ಗಂಭೀರವಾಗಿ ಪರಿಗಣಿಸುವುದಾಗಿ ತಿಳಿಸಿದೆ. “ನಮ್ಮ ನಿಯೋಗದ ಗಾತ್ರ ದೊಡ್ಡದಾಗಿದ್ದರಿಂದ ಇತರ ಪ್ರವಾಸಿಗರಿಗೆ ತೊಂದರೆಯಾಗದಂತೆ ಐಫೆಲ್ ಟವರ್ ಆಡಳಿತ ಮಂಡಳಿಯ ಜೊತೆಗೂಡಿ ಭೇಟಿಯನ್ನು ಆಯೋಜಿಸಲಾಗಿತ್ತು. ಯಾರಿಗೂ ಪ್ರವೇಶ ನಿರಾಕರಿಸುವ ಉದ್ದೇಶ ನಮಗಿರಲಿಲ್ಲ. ಆದಾಗ್ಯೂ, ಈ ಘಟನೆಯಿಂದ ಯಾರಿಗಾದರೂ ಮನಸ್ಸಿಗೆ ನೋವಾಗಿದ್ದರೆ ನಾವು ಕ್ಷಮೆ ಯಾಚಿಸುತ್ತೇವೆ. ನಾವು ಪರಸ್ಪರ ಗೌರವ ಮತ್ತು ಸೇವೆಯ ಸಾರ್ವತ್ರಿಕ ಮೌಲ್ಯಗಳಿಗೆ ಬದ್ಧರಾಗಿದ್ದೇವೆ” ಎಂದು ಸ್ಪಷ್ಟಪಡಿಸಿದೆ. ಸೋಮವಾರ ಪೂರ್ತಿ ಮುಚ್ಚಲ್ಪಟ್ಟಿದ್ದ ಐಫೆಲ್ ಟವರ್, ಮಂಗಳವಾರದಿಂದ ಎಂದಿನಂತೆ ಸಾರ್ವಜನಿಕರಿಗೆ ಮುಕ್ತವಾಗಲಿದೆ ಎಂದು ಆಡಳಿತ ಮಂಡಳಿ ತಿಳಿಸಿದೆ.

ಇದನ್ನೂ ಓದಿ : ಸಾಲಗಾರರಿಗೆ ಗುಡ್ ನ್ಯೂಸ್ : ಈ ಬ್ಯಾಂಕ್ ನಿರ್ಧಾರದಿಂದ ಹಗುರಾಗಿದೆ ಇಎಂಐ ಹೊರೆ