ಬೀಜಿಂಗ್: ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಇರಾನ್ ಮೇಲೆ ವೈಮಾನಿಕ ದಾಳಿಗಳನ್ನು ಪ್ರಾರಂಭಿಸಿದ ಬಳಿಕ ಅಂದರೆ ಫೆ.28ರಿಂದ ಜಾಗತಿಕ ತೈಲ ಮಾರುಕಟ್ಟೆ ತೀವ್ರ ತಲ್ಲಣಗೊಂಡಿದೆ. ಕಚ್ಚಾ ತೈಲದ ಬೆಲೆಯು ರಷ್ಯಾ-ಉಕ್ರೇನ್ ಯುದ್ಧದ (2022) ಬಳಿಕ ಕಂಡುಬರದಷ್ಟು ತ್ವರಿತಗತಿಯಲ್ಲಿ ಏರಿಕೆಯಾಗುತ್ತಿದೆ.
ಕೇವಲ ಎಂಟು ದಿನಗಳಲ್ಲಿ ಬ್ರೆಂಟ್ (Brent) ಕಚ್ಚಾ ತೈಲದ ಬೆಲೆ ಶೇ.50ರಷ್ಟು ಜಿಗಿದಿದ್ದು, ಪ್ರತಿ ಬ್ಯಾರೆಲ್ಗೆ 119.50 ಡಾಲರ್ಗೆ ತಲುಪಿದೆ. ಇದು ಕಳೆದ ನಾಲ್ಕು ವರ್ಷಗಳಲ್ಲೇ ಗರಿಷ್ಠ ಮಟ್ಟದ್ದು. ಈ ದಿಢೀರ್ ಬೆಳವಣಿಗೆಯಿಂದಾಗಿ ಜಗತ್ತಿನ ಮೂರು ಖಂಡಗಳ ಷೇರು ಮಾರುಕಟ್ಟೆಗಳು ಕುಸಿದಿದ್ದು, ಜಾಗತಿಕ ಮಟ್ಟದಲ್ಲಿ ಸರ್ಕಾರಗಳು ತಮ್ಮ ತುರ್ತು ತೈಲ ನಿಕ್ಷೇಪಗಳನ್ನು (Emergency reserves) ಬಳಸುವ ಅನಿವಾರ್ಯತೆಗೆ ಸಿಲುಕಿವೆ. ಆದರೆ, ಈ ‘ಗಲ್ಫ್ ತೈಲ ಬಿಕ್ಕಟ್ಟನ್ನು’ ಎದುರಿಸಲು ಸಜ್ಜಾಗಿರುವ ಏಕೈಕ ಆರ್ಥಿಕತೆಯಾಗಿ ಚೀನಾ ಮಾತ್ರ ಹೊರಹೊಮ್ಮುವ ಸಾಧ್ಯತೆಗಳಿವೆ ಎಂದು ವಿಶ್ಲೇಷಿಸಲಾಗುತ್ತಿದೆ.
ಸುರಕ್ಷಿತವಾಗಿರುವ ‘ಖಾರ್ಗ್ ಐಲ್ಯಾಂಡ್’
ಯುದ್ಧದ ತೀವ್ರತೆಯ ನಡುವೆಯೂ ಇರಾನ್ನ ಪ್ರಮುಖ ತೈಲ ರಫ್ತು ಕೇಂದ್ರವಾದ ‘ಖಾರ್ಗ್ ಐಲ್ಯಾಂಡ್’ (Kharg Island) ಸುರಕ್ಷಿತವಾಗಿದೆ. ದಿನಕ್ಕೆ ಬರೋಬ್ಬರಿ 7 ದಶಲಕ್ಷ ಬ್ಯಾರೆಲ್ ತೈಲವನ್ನು ಹಡಗುಗಳಿಗೆ ತುಂಬುವ ಸಾಮರ್ಥ್ಯ ಹೊಂದಿರುವ ಈ ನಿಲ್ದಾಣದ ಮೇಲೆ ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ತಮ್ಮದೇ ಆದ ವ್ಯೂಹಾತ್ಮಕ ಕಾರಣಗಳಿಗಾಗಿ ಉದ್ದೇಶಪೂರ್ವಕವಾಗಿಯೇ ಯಾವುದೇ ದಾಳಿ ನಡೆಸಿಲ್ಲ. ಇದರ ಪರಿಣಾಮವಾಗಿ, ಈಗಲೂ ಬೃಹತ್ ತೈಲ ಹಡಗುಗಳು ಇಲ್ಲಿಂದ ತೈಲವನ್ನು ನಿರಂತರವಾಗಿ ಹೊತ್ತೊಯ್ಯುತ್ತಿದ್ದು, ಇದರ ಬಹುಪಾಲು ಪೂರೈಕೆಯಾಗುತ್ತಿರುವುದು ಚೀನಾಕ್ಕೆ. ಪಾಶ್ಚಿಮಾತ್ಯ ದೇಶಗಳ ಕಠಿಣ ನಿರ್ಬಂಧಗಳ ಹೊರತಾಗಿಯೂ ಕಳೆದ ಒಂದು ದಶಕದಿಂದ ಚೀನಾ ಇರಾನ್ನಿಂದ ಭಾರೀ ರಿಯಾಯಿತಿ ದರದಲ್ಲಿ ಕಚ್ಚಾ ತೈಲವನ್ನು ಖರೀದಿಸುತ್ತಿದೆ. ಅಂತಾರಾಷ್ಟ್ರೀಯ ತಪಾಸಣೆಯಿಂದ ತಪ್ಪಿಸಿಕೊಳ್ಳಲು ಈ ತೈಲವನ್ನು “ಮಲೇಷಿಯನ್ ಬ್ಲೆಂಡೆಡ್ ಆಯಿಲ್” ಎಂದು ಮರುನಾಮಕರಣ ಮಾಡಿ ಚೀನಾಕ್ಕೆ ಸಾಗಿಸಲಾಗುತ್ತಿದೆ. 2025ರ ಅಂಕಿಅಂಶಗಳ ಪ್ರಕಾರ, ಚೀನಾದ ಒಟ್ಟು ಸಮುದ್ರ ಮಾರ್ಗದ ಕಚ್ಚಾ ತೈಲ ಆಮದಿನಲ್ಲಿ ಶೇ. 13ರಷ್ಟು ಪಾಲು ಇರಾನ್ನದ್ದಾಗಿತ್ತು.
ಜಾಗತಿಕ ಇಂಧನ ಪೂರೈಕೆಯ ಅತ್ಯಂತ ಪ್ರಮುಖ ಕೊಂಡಿಯಾಗಿರುವ ‘ಹೊರ್ಮುಜ್ ಜಲಸಂಧಿ’ (Strait of Hormuz) ಒಂದು ವೇಳೆ ಬಂದ್ ಆದರೆ ಏನಾಗಬಹುದು ಎಂಬ ಬಹುದೊಡ್ಡ ಪ್ರಶ್ನೆ ಎಲ್ಲರಿಗೂ ಎದುರಾಗಿತ್ತು. ಆದರೆ ಕಳೆದ ಎರಡು ದಶಕಗಳಿಂದಲೂ ಬೀಜಿಂಗ್ ಈ ಸಂಭವನೀಯ ಬಿಕ್ಕಟ್ಟನ್ನು ಎದುರಿಸಲು ತನ್ನದೇ ಆದ ಸಿದ್ಧತೆಗಳನ್ನು ನಡೆಸುತ್ತಲೇ ಬಂದಿದೆ. ಪ್ರಸ್ತುತ ತೈಲ ಮಾರುಕಟ್ಟೆಯಲ್ಲಿ ಉಂಟಾಗಿರುವ ಸಂಚಲನವು ಚೀನಾದ ಮುನ್ನೆಚ್ಚರಿಕಾ ಲೆಕ್ಕಾಚಾರಗಳನ್ನು ಮತ್ತಷ್ಟು ಪ್ರಸ್ತುತವಾಗಿಸಿದೆ.
ಈಗ ರಷ್ಯಾ-ಚೀನಾ ಭಾಯಿ ಭಾಯಿ
ಇರಾನ್ ಮೇಲಿನ ದಾಳಿಗಳು ಮತ್ತು ಮಧ್ಯಪ್ರಾಚ್ಯದ ಅಸ್ಥಿರತೆಯು ಚೀನಾದ ಇಂಧನ ಭದ್ರತೆಗೆ ಪರೋಕ್ಷ ಬೆದರಿಕೆಯೊಡ್ಡಿದೆ. ಹೀಗಾಗಿ, ಯಾವುದೇ ಅಡೆತಡೆಗಳಿಲ್ಲದ, ಭರವಸೆಯ ತೈಲ ಪೂರೈಕೆಗಾಗಿ ಚೀನಾವು ರಷ್ಯಾದ ಮೇಲೆ ತನ್ನ ಅವಲಂಬನೆಯನ್ನು ಮತ್ತಷ್ಟು ಹೆಚ್ಚಿಸಿಕೊಳ್ಳುವುದು ಅನಿವಾರ್ಯವಾಗಲಿದೆ. ರಷ್ಯಾ-ಉಕ್ರೇನ್ ಸಂಘರ್ಷದ ಬಳಿಕ ಪಾಶ್ಚಿಮಾತ್ಯರ ನಿರ್ಬಂಧಕ್ಕೆ ಒಳಗಾಗಿರುವ ರಷ್ಯಾದಿಂದ ಈಗಾಗಲೇ ಅಗ್ಗದ ದರದಲ್ಲಿ ತೈಲವನ್ನು ಖರೀದಿಸುತ್ತಿರುವ ಚೀನಾ, ಈಗ ಗಲ್ಫ್ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಮಾಸ್ಕೋ ಜೊತೆಗಿನ ತನ್ನ ಆರ್ಥಿಕ ಮತ್ತು ವ್ಯೂಹಾತ್ಮಕ ಸಂಬಂಧವನ್ನು ಮತ್ತಷ್ಟು ಗಟ್ಟಿಗೊಳಿಸಲಿದೆ. ಒಟ್ಟಾರೆಯಾಗಿ, ಇರಾನ್-ಇಸ್ರೇಲ್ ಯುದ್ಧವು ಜಾಗತಿಕ ತೈಲ ಮಾರುಕಟ್ಟೆಯನ್ನು ಅಲ್ಲೋಲಕಲ್ಲೋಲ ಮಾಡಿದ್ದರೂ, ಇದು ಪರೋಕ್ಷವಾಗಿ ಚೀನಾ ಮತ್ತು ರಷ್ಯಾವನ್ನು ಇನ್ನಷ್ಟು ಹತ್ತಿರ ತರುವ ವೇಗವರ್ಧಕವಾಗಿ ಕೆಲಸ ಮಾಡುವುದು ನಿಶ್ಚಿತ ಎನ್ನುತ್ತಾರೆ ತಜ್ಞರು.
ಇದನ್ನೂ ಓದಿ : ಯುದ್ಧದ ಬಿಸಿ.. ಬೆಂಗಳೂರು ಮಾತ್ರವಲ್ಲ, ಮುಂಬೈ, ಚೆನ್ನೈ ಹೋಟೆಲ್ಗಳಲ್ಲೂ LPG ಸಿಲಿಂಡರ್ ಕೊರತೆ!
