ಬೆಂಗಳೂರು : ತಿಂಗಳ ಕೊನೆಯಲ್ಲಿ, ಆಪತ್ಕಾಲದಲ್ಲಿ ಕ್ರೆಡಿಟ್ ಕಾರ್ಡ್ ಆಪತ್ಬಾಂಧವ ಎಂಬುದರಲ್ಲಿ ಎರಡು ಮಾತಿಲ್ಲ. ಆದರೆ, ಎಲ್ಲೆಂದರಲ್ಲಿ ಕ್ರೆಡಿಟ್ ಕಾರ್ಡ್ ಸ್ವೈಪ್ ಮಾಡುವುದು ಇತ್ತೀಚೆಗೆ ಅಪಾಯಕಾರಿಯಾಗಿ ಪರಿಣಮಿಸುತ್ತಿದೆ. ಇದು ಆನ್ಲೈನ್ ವಂಚನೆಗೆ ಕಾರಣವಾಗುತ್ತಿದೆ. ಹಾಗಾಗಿ, ಕ್ರೆಡಿಟ್ ಕಾರ್ಡ್ ಸ್ವೈಪ್ ಮಾಡುವ ಮುನ್ನ ಬಳಕೆದಾರರು ಕೆಲವು ಮುಂಜಾಗ್ರತಾ ಕ್ರಮ ಅನುಸರಿಸಬೇಕು. ಇಲ್ಲವೇ, ಯುಪಿಐ ಮೂಲಕ ಪೇ ಮಾಡಬೇಕು. ಯಾಕೆ ಎಂಬುದರ ಸಂಕ್ಷಿಪ್ತ ವಿವರಣೆ ಇಲ್ಲಿದೆ.
ಅನುಮಾನಾಸ್ಪದ ವೆಬ್ಸೈಟ್ಗಳು :
ಅಧಿಕೃತವಲ್ಲದ ಅಥವಾ ಸುರಕ್ಷಿತವಲ್ಲದ (HTTPS ಇಲ್ಲದ) ಆನ್ ಲೈನ್ ಶಾಪಿಂಗ್ ಸೈಟ್ ಗಳಲ್ಲಿ ಕಾರ್ಡ್ ವಿವರಗಳನ್ನು ನಮೂದಿಸಬೇಡಿ.
ಸಾರ್ವಜನಿಕ ವೈ-ಫೈ :
ಕೆಫೆಗಳು, ವಿಮಾನ ನಿಲ್ದಾಣಗಳು ಅಥವಾ ಇತರ ಸಾರ್ವಜನಿಕ ಸ್ಥಳಗಳಲ್ಲಿನ ಉಚಿತ ವೈ-ಫೈ ಬಳಸಿಕೊಂಡು ಆನ್ ಲೈನ್ ಪಾವತಿಗಳನ್ನು ಮಾಡಬೇಡಿ. ಹ್ಯಾಕರ್ ಗಳು ಇಂತಹ ನೆಟ್ ವರ್ಕ್ ಗಳನ್ನು ಸುಲಭವಾಗಿ ಹ್ಯಾಕ್ ಮಾಡಬಹುದು.
ಸಣ್ಣ ಅಥವಾ ಅಪರಿಚಿತ ಅಂಗಡಿಗಳು :
ಪಿಒಎಸ್ (POS) ಮೆಷಿನ್ ಸುರಕ್ಷಿತವಾಗಿ ಕಾಣದಿದ್ದರೆ ಅಥವಾ ಅಂಗಡಿಯ ಸಿಬ್ಬಂದಿ ನಿಮ್ಮ ಕಾರ್ಡ್ ಅನ್ನು ನಿಮ್ಮ ಕಣ್ಣೆದುರೇ ಸ್ವೈಪ್ ಮಾಡದೆ ಬೇರೆ ಕಡೆ ತೆಗೆದುಕೊಂಡು ಹೋದರೆ ಅಂತಹ ಕಡೆ ಕಾರ್ಡ್ ಬಳಸಬೇಡಿ.
ಅಪರಿಚಿತ ಪೇಮೆಂಟ್ ಲಿಂಕ್ ಗಳು :
ಇಮೇಲ್, ಎಸ್ಎಂಎಸ್ ಅಥವಾ ವಾಟ್ಸ್ ಆ್ಯಪ್ ಮೂಲಕ ಬರುವ ಅನುಮಾನಾಸ್ಪದ ಲಿಂಕ್ ಗಳನ್ನು ಕ್ಲಿಕ್ ಮಾಡಿ ಕ್ರೆಡಿಟ್ ಕಾರ್ಡ್ ವಿವರಗಳನ್ನು ನೀಡಬೇಡಿ. ಇವು ಫಿಶಿಂಗ್ ವಂಚನೆಗಳಾಗಿರಬಹುದು.
ಸಾರ್ವಜನಿಕ ಕಂಪ್ಯೂಟರ್ ಗಳು:
ಸೈಬರ್ ಕೆಫೆಗಳು ಅಥವಾ ಬೇರೆಯವರ ಕಂಪ್ಯೂಟರ್ ಗಳಲ್ಲಿ ಕ್ರೆಡಿಟ್ ಕಾರ್ಡ್ ವಿವರಗಳನ್ನು ಸೇವ್ ಮಾಡಬೇಡಿ ಅಥವಾ ಆನ್ ಲೈನ್ ಪಾವತಿಗಳನ್ನು ಮಾಡಬೇಡಿ.
ಕಾರ್ಡ್ ವಿವರ ಸೇವ್ ಮಾಡುವುದು :
ಶಾಪಿಂಗ್ ಸೈಟ್ ಗಳಲ್ಲಿ ‘Remember Card’ ಅಥವಾ ‘Save Card’ ಎಂಬ ಆಯ್ಕೆಯನ್ನು ಬಳಸುವುದನ್ನು ಆದಷ್ಟು ತಪ್ಪಿಸಿ. ಅಗತ್ಯವಿದ್ದಾಗ ಮಾತ್ರ ವಿವರ ನಮೂದಿಸಿ.
ಇದನ್ನೂ ಓದಿ : ಬ್ಯಾಂಕ್ ಗ್ರಾಹಕರಿಗೆ ಗುಡ್ ನ್ಯೂಸ್ : ಇನ್ಮುಂದೆ ಇರಲ್ಲ ಈ ಶುಲ್ಕದ ಹೊರೆ!
