ಸೋನಿಯಾ ಗಾಂಧಿ ಆತ್ಮಕಥೆ ಪ್ರಕಟಣೆಗೆ ‘ಪೆಂಗ್ವಿನ್ ಇಂಡಿಯಾ’ ನಕಾರ : ಕಾಂಗ್ರೆಸ್-ಬಿಜೆಪಿ ವಾಕ್ಸಮರ

ನವದೆಹಲಿ : ಕಾಂಗ್ರೆಸ್ ಸಂಸದೀಯ ಪಕ್ಷದ ನಾಯಕಿ ಸೋನಿಯಾ ಗಾಂಧಿ ಅವರ ಆತ್ಮಕಥೆ ‘ಬಿಲಾಂಗಿಂಗ್: ಎ ಜರ್ನಿ ಆಫ್ ಲವ್’ (Belonging: A Journey of Love) ಪ್ರಕಟಣೆಗೆ ಸಂಬಂಧಿಸಿ ಆಡಳಿತಾರೂಢ ಬಿಜೆಪಿ ಮತ್ತು ವಿಪಕ್ಷ ಕಾಂಗ್ರೆಸ್ ನಡುವೆ ಭಾರೀ ವಾಗ್ಯುದ್ಧ ಆರಂಭವಾಗಿದೆ. ಪೆಂಗ್ವಿನ್ ರಾಂಡಮ್ ಹೌಸ್ ಇಂಡಿಯಾ ಸಂಸ್ಥೆಯು ಭಾರತದಲ್ಲಿ ಈ ಪುಸ್ತಕವನ್ನು ಪ್ರಕಟಿಸುತ್ತಿಲ್ಲ ಎಂದು ಶುಕ್ರವಾರ ಘೋಷಿಸಿದ ಬೆನ್ನಲ್ಲೇ, ಕೇಂದ್ರ ಸರ್ಕಾರದ ಒತ್ತಡಕ್ಕೆ ಮಣಿದು ಪ್ರಕಾಶನ ಸಂಸ್ಥೆ ಈ ನಿರ್ಧಾರ ತಳೆದಿದೆ ಎಂದು ಕಾಂಗ್ರೆಸ್ ಗಂಭೀರ ಆರೋಪ ಮಾಡಿದೆ.

ಪೆಂಗ್ವಿನ್ ರಾಂಡಮ್ ಹೌಸ್‌ನ ಸಂಸ್ಥೆಯಾದ ಅಮೆರಿಕದ ‘ಆಲ್ಫ್ರೆಡ್ ಎ ಕ್ನಾಪ್ಫ್’ ನವೆಂಬರ್ 10 ರಂದು ಸೋನಿಯಾ ಗಾಂಧಿಯವರ ಆತ್ಮಕಥನವನ್ನು ಜಾಗತಿಕವಾಗಿ ಬಿಡುಗಡೆ ಮಾಡುವುದಾಗಿ ಇತ್ತೀಚೆಗೆ ಘೋಷಿಸಿತ್ತು. ಆದರೆ ಭಾರತದ ವಿಭಾಗವಾದ ಪೆಂಗ್ವಿನ್ ಇಂಡಿಯಾ, “ನಾವು ಈ ಪುಸ್ತಕದ ಪ್ರಕಾಶಕರಲ್ಲ. ಲೇಖಕರ ಬರವಣಿಗೆಯನ್ನು ಸತ್ಯಶೋಧನೆ (Fact-check) ಮಾಡುವುದು ನಮ್ಮ ಹಕ್ಕು ಮತ್ತು ಜವಾಬ್ದಾರಿಯಾಗಿದೆ” ಎಂದು ಹೇಳಿ ಪ್ರಕಟಣೆಯಿಂದ ಹಿಂದೆ ಸರಿದಿದೆ. ಸೋನಿಯಾ ಗಾಂಧಿಯವರು ಪ್ರಕಾಶನ ಸಂಸ್ಥೆ ಸೂಚಿಸಿದ ಸಂಪಾದಕೀಯ ಬದಲಾವಣೆಗಳಿಗೆ (Editorial changes) ಒಪ್ಪದ ಕಾರಣ ಈ ನಿರ್ಧಾರಕ್ಕೆ ಬರಲಾಗಿದೆ ಎಂದು ವರದಿಯಾಗಿದೆ.

ಇದರಿಂದ ಕಾಂಗ್ರೆಸ್ ಕೆಂಡಾಮಂಡಲವಾಗಿದ್ದು, ಲೋಕಸಭೆಯ ಕಾಂಗ್ರೆಸ್ ಉಪನಾಯಕ ಗೌರವ್ ಗೊಗೊಯ್ ಪ್ರತಿಕ್ರಿಯಿಸಿ, “ಪೆಂಗ್ವಿನ್ ಇಂಡಿಯಾ ಸಂಸ್ಥೆಯು ಆರ್‌ಎಸ್ಎಸ್ ಕುರಿತಾದ ಮತ್ತು ಪ್ರಧಾನಿ ನರೇಂದ್ರ ಮೋದಿ ಅವರ ‘ಎಕ್ಸಾಮ್ ವಾರಿಯರ್ಸ್’ ಪುಸ್ತಕಗಳನ್ನು ಪ್ರಕಟಿಸಲು ಅತ್ಯಂತ ಉತ್ಸುಕವಾಗಿರುತ್ತದೆ. ಆದರೆ, ದೇಶದ ಜನರು ನೈಜ ಸಂಗತಿಯನ್ನು ಓದುತ್ತಾರೆ ಎಂಬ ಭಯ ಬಿಜೆಪಿ ಸರ್ಕಾರಕ್ಕಿದೆ. ಹೀಗಾಗಿ ಸಂಸ್ಥೆಯ ಮೇಲೆ ಒತ್ತಡ ಹೇರಿ, ಈ ರೀತಿಯ ಪ್ರಕಟಣೆ ಕೊಡಿಸಲಾಗಿದೆ” ಎಂದು ಆರೋಪಿಸಿದ್ದಾರೆ. ರಾಜಸ್ಥಾನದ ಮಾಜಿ ಮುಖ್ಯಮಂತ್ರಿ ಅಶೋಕ್ ಗೆಹ್ಲೋಟ್ ಮಾತನಾಡಿ, ಜಾಗತಿಕವಾಗಿ ಈ ಪುಸ್ತಕ ಮೂಲ ರೂಪದಲ್ಲೇ ಪ್ರಕಟವಾಗುತ್ತಿರುವಾಗ, ಭಾರತದಲ್ಲಿ ಮಾತ್ರ ಬದಲಾವಣೆಗಳನ್ನು ಕೋರುತ್ತಿರುವುದು ಅಭಿವ್ಯಕ್ತಿ ಸ್ವಾತಂತ್ರ್ಯದ ಕಗ್ಗೊಲೆ ಎಂದು ದೂರಿದ್ದಾರೆ.

ಕಾಂಗ್ರೆಸ್ ಆರೋಪಕ್ಕೆ ಬಿಜೆಪಿ ತಿರುಗೇಟು

ಕಾಂಗ್ರೆಸ್‌ನ ಈ ಆರೋಪಗಳನ್ನು ಬಿಜೆಪಿ ಸಾರಾಸಗಟಾಗಿ ತಳ್ಳಿಹಾಕಿದ್ದು, ಕಾಂಗ್ರೆಸ್ ನಾಯಕರು ಇಲ್ಲದ ಭಯದ ವಾತಾವರಣವನ್ನು ಸೃಷ್ಟಿಸಲು ಸುಳ್ಳು ಕಥೆಗಳನ್ನು ಹೆಣೆಯುತ್ತಿದ್ದಾರೆ ಎಂದು ವಾಗ್ದಾಳಿ ನಡೆಸಿದೆ. ಬಿಜೆಪಿಯ ರಾಷ್ಟ್ರೀಯ ವಕ್ತಾರ ಸಿ.ಆರ್. ಕೇಶವನ್ ಮಾತನಾಡಿ, “ಸೋನಿಯಾ ಗಾಂಧಿಯವರ ಆತ್ಮಕಥೆಯ ಯಾವ ಭಾಗಗಳು ಸತ್ಯಶೋಧನೆಗೆ ಒಳಪಡಬೇಕಾಯಿತು ಮತ್ತು ಏಕೆ ಎಂಬ ಪ್ರಶ್ನೆಗೆ ಕಾಂಗ್ರೆಸ್ ಉತ್ತರಿಸಬೇಕು. ಸತ್ಯ ಮರೆಮಾಚುವ ಇವರ ಯತ್ನವು ಬೂಟಾಟಿಕೆಯಿಂದ ಕೂಡಿದೆ” ಎಂದಿದ್ದಾರೆ. ಮತ್ತೊಬ್ಬ ಬಿಜೆಪಿ ನಾಯಕ ಅಜಯ್ ಅಲೋಕ್ ಮಾತನಾಡಿ, “ಪುಸ್ತಕ ಬರೆಯುವಾಗಲೂ ಕಾಂಗ್ರೆಸ್ ಸತ್ಯ ಹಾಗೂ ದತ್ತಾಂಶಗಳನ್ನು ಸರಿಯಾಗಿ ಇಡದಿರುವುದು ನಾಚಿಕೆಗೇಡಿನ ಸಂಗತಿ. ಸತ್ಯಾಸತ್ಯತೆ ಮತ್ತು ವಿಶ್ವಾಸಾರ್ಹತೆ ಕೊರತೆ ಇರುವಾಗ ಪ್ರಕಾಶಕರು ಪ್ರಕಟಿಸಲು ಹೇಗೆ ಸಾಧ್ಯ?” ಎಂದು ಪ್ರಶ್ನಿಸಿದ್ದಾರೆ.

ಪ್ರಕಟಣೆಗೆ ಅಡ್ಡಿಯಾದ ಆ 3 ಪ್ರಮುಖ ವಿಚಾರಗಳು!

ಸೋನಿಯಾ ಗಾಂಧಿ ಮತ್ತು ಪೆಂಗ್ವಿನ್ ಇಂಡಿಯಾ ನಡುವಿನ ಮಾತುಕತೆ ಮುರಿಯಲು ಮತ್ತು ಪುಸ್ತಕ ಪ್ರಕಟಣೆಗೆ ಅಡ್ಡಿಯಾಗಲು ಪ್ರಮುಖವಾಗಿ ಮೂರು ವಿಷಯಗಳು ಕಾರಣ ಎಂದು ಕಾಂಗ್ರೆಸ್ ಮೂಲಗಳು ತಿಳಿಸಿವೆ. ಚೀನಾ ಗಡಿ ವಿವಾದ: ಭಾರತ-ಚೀನಾ ಗಡಿ ಬಿಕ್ಕಟ್ಟು ಮತ್ತು ಭಾರತೀಯ ಭೂಪ್ರದೇಶಕ್ಕೆ ಚೀನಾದ ಅತಿಕ್ರಮಣಕ್ಕೆ ಸಂಬಂಧಿಸಿದಂತೆ ಪುಸ್ತಕದಲ್ಲಿ ಪ್ರಸ್ತಾಪಿಸಲಾದ ವಿಚಾರಗಳು. ಪ್ರಧಾನಿ ನರೇಂದ್ರ ಮೋದಿ ಅವರ ಕಾರ್ಯವೈಖರಿ, ನಾಯಕತ್ವ ಹಾಗೂ ಪ್ರಮುಖ ಕೇಂದ್ರ ಸರ್ಕಾರದ ನೀತಿಗಳನ್ನು ಸೋನಿಯಾ ಗಾಂಧಿ ಪ್ರಶ್ನಿಸಿರುವ ಭಾಗಗಳು.

ಪ್ರಧಾನಿ ಮೋದಿ ನಾಯಕತ್ವ :

ಆರ್‌ಎಸ್‌ಎಸ್ ಪಾತ್ರ: ಬಿಜೆಪಿಯ ಮಾತೃಸಂಸ್ಥೆಯಾದ ರಾಷ್ಟ್ರೀಯ ಸ್ವಯಂಸೇವಕ ಸಂಘದ (RSS) ಪ್ರಭಾವ ಮತ್ತು ದೇಶದ ಸಾಮಾಜಿಕ ಚೌಕಟ್ಟಿನ ಮೇಲೆ ಅದರ ಪರಿಣಾಮಗಳ ಕುರಿತು ಸೋನಿಯಾ ಗಾಂಧಿ ಬರೆದಿರುವ ವಿಚಾರಗಳು. ಈ ವಿಷಯಗಳಿಗೆ ಸಂಬಂಧಿಸಿದಂತೆ ಕೆಲವು ಭಾಗಗಳನ್ನು ತಿದ್ದುಪಡಿ ಮಾಡಲು ಅಥವಾ ತೆಗೆದುಹಾಕಲು ಪ್ರಕಾಶನ ಸಂಸ್ಥೆ ಪ್ರಸ್ತಾಪಿಸಿತ್ತು. ಆದರೆ ತಮ್ಮ ಅನುಭವ ಹಾಗೂ ದೃಷ್ಟಿಕೋನದ ಆಧಾರದ ಮೇಲೆ ಬರೆದಿರುವ ಸತ್ಯಗಳನ್ನು ಬದಲಾಯಿಸಲು ಸೋನಿಯಾ ಗಾಂಧಿ ಸಂಪೂರ್ಣವಾಗಿ ನಿರಾಕರಿಸಿದ ಹಿನ್ನೆಲೆಯಲ್ಲಿ ಈ ವಿವಾದ ಸೃಷ್ಟಿಯಾಗಿದೆ ಎಂದು ಹೇಳಲಾಗಿದೆ.

ಇದನ್ನೂ ಓದಿ : ಕೇಂದ್ರದ BEML ಸಂಸ್ಥೆಯಲ್ಲಿ 5 ಹುದ್ದೆಗಳ ನೇಮಕ : ಬೆಂಗಳೂರಲ್ಲೇ 1.4 ಲಕ್ಷ ರೂ. ಸಂಬಳದ ಉದ್ಯೋಗ