ಬೆಂಗಳೂರು : ದೇಶದಲ್ಲಿ ಸುರಕ್ಷಿತ ಹೂಡಿಕೆಗಳಿಗೆ ಅಂಚೆ ಕಚೇರಿಯ ಯೋಜನೆಗಳು ಭಾರಿ ಖ್ಯಾತಿ ಗಳಿಸಿವೆ. ಅದರಲ್ಲೂ, ದೇಶದ ಅಂಚೆ ಕಚೇರಿಯ ಟೈಮ್ ಡೆಪಾಸಿಟ್ (TD) ಯೋಜನೆಯು ಕಡಿಮೆ ಅಪಾಯದೊಂದಿಗೆ ಸುರಕ್ಷಿತ ಹಾಗೂ ಖಚಿತ ಆದಾಯವನ್ನು ಬಯಸುವ ಹೂಡಿಕೆದಾರರಿಗೆ ಅತ್ಯುತ್ತಮ ಸರ್ಕಾರಿ ಬೆಂಬಲಿತ ಯೋಜನೆಯಾಗಿದೆ. ಇದರಲ್ಲಿ 1, 2, 3 ಮತ್ತು 5 ವರ್ಷಗಳ ಅವಧಿಯ ಠೇವಣಿಗಳ ಮೇಲೆ ವಿವಿಧ ಬಡ್ಡಿ ದರಗಳನ್ನು ನೀಡಲಾಗುತ್ತದೆ. ಇದು ರಾಷ್ಟ್ರೀಕೃತ ಬ್ಯಾಂಕ್ ಗಳ ಎಫ್ ಡಿಗಿಂತ ಜಾಸ್ತಿ ಎಂಬುದು ಗಮನಾರ್ಹ.
ನಿಮ್ಮ ಬಳಿ 5 ಲಕ್ಷ ರೂಪಾಯಿ ಇದ್ದು, ಅದನ್ನು ಹೂಡಿಕೆ ಮಾಡಲು ಬಯಸುತ್ತಿದ್ದರೆ, ಪೋಸ್ಟ್ ಆಫೀಸಿನ ಟಿಡಿ ಸುರಕ್ಷಿತವಾಗಿದೆ. ಹಾಗಾದರೆ, 5 ಲಕ್ಷ ರೂಪಾಯಿಯನ್ನು ಹೂಡಿಕೆ ಮಾಡಿದರೆ ಎಷ್ಟು ಬಡ್ಡಿ ಲಭಿಸುತ್ತದೆ? ಒಂದರಿಂದ ಐದು ವರ್ಷಗಳಿಗೆ ಹೂಡಿಕೆ ಮಾಡಿದರೆ ಎಷ್ಟು ಲಾಭವಾಗುತ್ತದೆ? ಇಲ್ಲಿದೆ ನೋಡಿ ಸಂಪೂರ್ಣ ಮಾಹಿತಿ.
• 1 ವರ್ಷದ ಠೇವಣಿ: ಶೇ. 6.9ರ ಬಡ್ಡಿ ದರ ಲಭ್ಯವಿದ್ದು, 5 ಲಕ್ಷ ರೂ. ಹೂಡಿಕೆಗೆ ಸುಮಾರು 35,403 ರೂ. ಬಡ್ಡಿ ಲಭಿಸುತ್ತದೆ. ಅಲ್ಲಿಗೆ ಒಟ್ಟು ಮೊತ್ತವು ಅಂದಾಜು 5,35,403 ರೂ. ಆಗುತ್ತದೆ.
• 2 ವರ್ಷದ ಠೇವಣಿ: ಶೇ. 7ರ ಬಡ್ಡಿ ದರವಿರುತ್ತದೆ. 5 ಲಕ್ಷ ರೂ. ಹೂಡಿಕೆ ಮಾಡಿದರೆ ಸುಮಾರು 74,441 ರೂ. ಬಡ್ಡಿ ದೊರೆತು, ಒಟ್ಟು 5,74,441 ರೂ. ಸಿಗುತ್ತದೆ.
• 3 ವರ್ಷದ ಠೇವಣಿ: ಇದರ ಬಡ್ಡಿ ದರವು ಶೇ. 7 ಅಥವಾ ಶೇ. 7.1ರಷ್ಟಿದ್ದು, 5 ಲಕ್ಷ ರೂ. ಹೂಡಿಕೆಗೆ ಸುಮಾರು 1.17 ಲಕ್ಷ ರೂ. ವರೆಗೆ ಬಡ್ಡಿ ಗಳಿಸಬಹುದು.
• 5 ವರ್ಷದ ಠೇವಣಿ: ಅತ್ಯಧಿಕವಾಗಿ ಶೇ. 7.5ರ ಬಡ್ಡಿ ದರ ನೀಡಲಾಗುತ್ತದೆ. ಇದರಲ್ಲಿ 5 ಲಕ್ಷ ರೂ. ಹೂಡಿಕೆ ಮಾಡಿದರೆ 5 ವರ್ಷಗಳಲ್ಲಿ ಅಂದಾಜು 2,24,974 ರೂ. ಬಡ್ಡಿ ದೊರೆಯುತ್ತದೆ. ಇದರ ಒಟ್ಟು ಮೆಚ್ಯೂರಿಟಿ ಮೊತ್ತವು ಸರಿಸುಮಾರು 7,24,974 ರೂ. ತಲುಪುತ್ತದೆ.
ಯೋಜನೆಯ ವಿಶೇಷತೆಗಳು:
• ಕನಿಷ್ಠ 1,000 ರೂ.ಗಳಿಂದ ಹೂಡಿಕೆ ಆರಂಭಿಸಬಹುದು. ಹೂಡಿಕೆಗೆ ಗರಿಷ್ಠ ಮಿತಿಯಿಲ್ಲ.
• 5 ವರ್ಷದ ಪೋಸ್ಟ್ ಆಫೀಸ್ ಟೈಮ್ ಡೆಪಾಸಿಟ್ ಹೂಡಿಕೆಯು ಹಳೆಯ ಆದಾಯ ತೆರಿಗೆ ಪದ್ಧತಿಯಡಿ ಸೆಕ್ಷನ್ 80ಸಿ ಅಡಿಯಲ್ಲಿ ತೆರಿಗೆ ವಿನಾಯಿತಿಗೆ ಅರ್ಹವಾಗಿದೆ.
• ಸುರಕ್ಷಿತ ಹೂಡಿಕೆಯನ್ನು ಬಯಸುವವರಿಗೆ ಈ ಯೋಜನೆ ಅತ್ಯಂತ ಲಾಭದಾಯಕವಾಗಿದೆ.
ಗಮನಿಸಿ :
ಪೋಸ್ಟ್ ಆಫೀಸ್ ಟೈಮ್ ಡೆಪಾಸಿಟ್ ಹೂಡಿಕೆ ಬಗ್ಗೆ ಮಾಹಿತಿ ನೀಡುವ ದೃಷ್ಟಿಯಿಂದ ಮಾತ್ರ ಲೇಖನವನ್ನು ಪ್ರಕಟಿಸಲಾಗಿದೆ. ಹೂಡಿಕೆಗೆ ನಾವು ಶಿಫಾರಸು ಮಾಡುತ್ತಿಲ್ಲ. ಮಾಹಿತಿ ನೀಡುವುದಷ್ಟೇ ನಮ್ಮ ಉದ್ದೇಶ.
ಇದನ್ನೂ ಓದಿ : ಬ್ರೆಜಿಲ್ ಮಾರುಕಟ್ಟೆಗೆ ಲಗ್ಗೆ ಇಟ್ಟ ರೆನಾಲ್ಟ್ ಕ್ವಿಡ್ ಫೇಸ್ಲಿಫ್ಟ್ : ಹೊಸ ವಿನ್ಯಾಸ, ಆಕರ್ಷಕ ಫೀಚರ್ಸ್ಗಳ ಅನಾವರಣ!
