ರಷ್ಯಾ, ಇರಾನ್ ತೈಲ ಆಮದಿನ ಮೇಲಿನ ನಿರ್ಬಂಧ ವಿನಾಯಿತಿ ರದ್ದುಗೊಳಿಸಿದ ಅಮೆರಿಕ : ಭಾರತಕ್ಕೆ ತಟ್ಟಲಿದೆಯೇ ಬಿಸಿ?

ವಾಷಿಂಗ್ಟನ್ : ರಷ್ಯಾ ಮತ್ತು ಇರಾನ್‌ನಿಂದ ಸೀಮಿತ ಪ್ರಮಾಣದಲ್ಲಿ ಕಚ್ಚಾ ತೈಲ ಖರೀದಿಸಲು ಭಾರತ ಸೇರಿದಂತೆ ಹಲವು ದೇಶಗಳಿಗೆ ನೀಡಲಾಗಿದ್ದ ತಾತ್ಕಾಲಿಕ ನಿರ್ಬಂಧ ವಿನಾಯಿತಿಯನ್ನು ಮುಂದುವರಿಸದೇ ಇರಲು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಆಡಳಿತ ನಿರ್ಧರಿಸಿದೆ. ಜಾಗತಿಕ ಭೌಗೋಳಿಕ ರಾಜಕೀಯ ಉದ್ವಿಗ್ನತೆಯ ನಡುವೆ ಕಠಿಣ ನಿರ್ಬಂಧಗಳನ್ನು ಮರಳಿ ಜಾರಿಗೊಳಿಸುವ ಸ್ಪಷ್ಟ ಮುನ್ಸೂಚನೆಯನ್ನು ಅಮೆರಿಕ ರವಾನಿಸಿದೆ. ಇದು ಭಾರತ ಸೇರಿದಂತೆ ಹಲವು ದೇಶಗಳಿಗೆ ಮತ್ತೆ ಆತಂಕ ಮೂಡಿಸಿದೆ.

ಅಮೆರಿಕದ ವಿತ್ತ ಸಚಿವ ಸ್ಕಾಟ್ ಬೆಸ್ಸೆನ್ಟ್ ಈ ಕುರಿತು ಮಾಧ್ಯಮಗಳಿಗೆ ಸ್ಪಷ್ಟನೆ ನೀಡಿದ್ದು, ಮಾರ್ಚ್ 11ಕ್ಕೂ ಮುನ್ನ ಸಮುದ್ರ ಮಾರ್ಗದಲ್ಲಿದ್ದ ತೈಲ ಸಾಗಣೆಗೆ ಮಾತ್ರ ಸಾಮಾನ್ಯ ಪರವಾನಗಿಯ ವಿನಾಯಿತಿ ನೀಡಲಾಗಿತ್ತು. ಆ ಅವಧಿ ಮುಕ್ತಾಯಗೊಂಡಿದ್ದು, ಯಾವುದೇ ಕಾರಣಕ್ಕೂ ಅದನ್ನು ಮತ್ತೆ ವಿಸ್ತರಿಸುವುದಿಲ್ಲ ಎಂದು ತಿಳಿಸಿದ್ದಾರೆ.

ಇದರ ಜೊತೆಗೆ, ಇರಾನ್‌ನಿಂದ ತೈಲ ಖರೀದಿಸುವ ಅಥವಾ ಇರಾನ್‌ನ ಹಣವನ್ನು ತಮ್ಮ ದೇಶದ ಬ್ಯಾಂಕುಗಳಲ್ಲಿ ಹೊಂದಿರುವ ರಾಷ್ಟ್ರಗಳ ಮೇಲೆ ‘ದ್ವಿತೀಯ ಹಂತದ ನಿರ್ಬಂಧ’ (Secondary Sanctions) ಹೇರಲು ಅಮೆರಿಕ ಸಿದ್ಧವಾಗಿದೆ ಎಂದು ಅವರು ಕಟ್ಟುನಿಟ್ಟಿನ ಎಚ್ಚರಿಕೆ ನೀಡಿದ್ದಾರೆ. ಇರಾನ್ ಮೇಲೆ ಕಡಲ ದಿಗ್ಬಂಧನವನ್ನು ಅಮೆರಿಕ ಜಾರಿಗೊಳಿಸುತ್ತಿರುವ ಬೆನ್ನಲ್ಲೇ, ಚೀನಾ ಕೂಡ ಇರಾನ್‌ನಿಂದ ತೈಲ ಖರೀದಿಸುವುದನ್ನು ತಡೆಹಿಡಿಯುವ ವಿಶ್ವಾಸವನ್ನು ವಾಷಿಂಗ್ಟನ್ ವ್ಯಕ್ತಪಡಿಸಿದೆ.

ಇರಾನ್ ವಿರುದ್ಧ ‘ಆರ್ಥಿಕ ಪ್ರಹಾರ’ದ ರಣತಂತ್ರ

ಪಶ್ಚಿಮ ಏಷ್ಯಾದಲ್ಲಿ ಸಂಘರ್ಷ ಭುಗಿಲೆದ್ದಾಗಿನಿಂದ ಇರಾನ್ ಹೊರ್ಮುಜ್ ಜಲಸಂಧಿಯನ್ನು (Strait of Hormuz) ನಿರ್ಬಂಧಿಸಿದ್ದು, ಇದು ಜಾಗತಿಕ ತೈಲ ಪೂರೈಕೆ ಸರಪಳಿಯ ಮೇಲೆ ಭಾರೀ ಹೊಡೆತ ನೀಡಿದೆ. ಕೇವಲ ಸೇನಾ ಕಾರ್ಯಾಚರಣೆಯನ್ನಷ್ಟೇ ನೆಚ್ಚಿಕೊಳ್ಳದೆ, ಇರಾನ್ ಅನ್ನು ಆರ್ಥಿಕವಾಗಿ ಹತ್ತಿಕ್ಕುವ ಟ್ರಂಪ್ ಆಡಳಿತದ ಹೊಸ ಕಾರ್ಯತಂತ್ರವನ್ನು ಈ ನಿರ್ಧಾರ ಬಿಂಬಿಸುತ್ತಿದೆ. ಸೇನಾ ಕಾರ್ಯಾಚರಣೆಯಿಂದ ಎದುರಾಗುವಷ್ಟೇ ತೀವ್ರವಾದ ಆರ್ಥಿಕ ಪೆಟ್ಟನ್ನು ಇರಾನ್ ಅನುಭವಿಸಲಿದೆ ಎಂದು ಬೆಸ್ಸೆನ್ಟ್ ಎಚ್ಚರಿಸಿದ್ದಾರೆ. ಅಮೆರಿಕ ನೇತೃತ್ವದ ಸೇನಾ ಕಾರ್ಯಾಚರಣೆ ‘ಆಪರೇಷನ್ ಎಪಿಕ್ ಫ್ಯೂರಿ’ಯ ಮಾದರಿಯಲ್ಲೇ ಇದೀಗ ಆಡಳಿತವು ಇರಾನ್ ವಿರುದ್ಧ ಸಂಪೂರ್ಣ ಶಕ್ತಿಯೊಂದಿಗೆ ‘ಆರ್ಥಿಕ ಪ್ರಹಾರ’ ನಡೆಸಲು ಮುಂದಾಗಿದೆ ಎಂದು ಅಮೆರಿಕದ ಉನ್ನತ ಅಧಿಕಾರಿಯೊಬ್ಬರು ರಾಯಿಟರ್ಸ್ ಸುದ್ದಿ ಸಂಸ್ಥೆಗೆ ತಿಳಿಸಿದ್ದಾರೆ.

ಶಾಂತಿ ಮಾತುಕತೆ

ಅಮೆರಿಕ ಮತ್ತು ಇರಾನ್ ನಡುವಿನ ಉದ್ವಿಗ್ನತೆ ಶಮನಗೊಳ್ಳುವ ಆಶಯದೊಂದಿಗೆ ಗುರುವಾರ ಆರಂಭಿಕ ವಹಿವಾಟಿನಲ್ಲಿ ಜಾಗತಿಕ ತೈಲ ಬೆಲೆಗಳಲ್ಲಿ ಕೊಂಚ ಇಳಿಕೆ ಕಂಡುಬಂದಿದೆ. ಒಮಾನ್‌ನಲ್ಲಿ ಉಭಯ ದೇಶಗಳ ನಡುವೆ ಎರಡನೇ ಸುತ್ತಿನ ಶಾಂತಿ ಮಾತುಕತೆ ನಡೆಯಲಿದ್ದು, ಹೊರ್ಮುಜ್ ಜಲಸಂಧಿಯ ಒಮಾನ್ ಭಾಗದಲ್ಲಿ ವಾಣಿಜ್ಯ ಹಡಗುಗಳ ಸಂಚಾರಕ್ಕೆ ಇರಾನ್ ಅವಕಾಶ ನೀಡುವ ಸಾಧ್ಯತೆಯಿದೆ ಎಂಬ ವರದಿಗಳು ಮಾರುಕಟ್ಟೆಗೆ ಸಕಾರಾತ್ಮಕ ಸಂದೇಶ ರವಾನಿಸಿವೆ. ಒಪ್ಪಂದಕ್ಕೆ ಬಂದರೆ ಸಂಘರ್ಷ ಅಂತ್ಯಗೊಳ್ಳಲಿದೆ, ಇಲ್ಲದಿದ್ದರೆ ಆರ್ಥಿಕ ದಿಗ್ಬಂಧನ ಮತ್ತಷ್ಟು ಬಿಗಿಯಾಗಲಿದೆ ಎಂದು ಶ್ವೇತಭವನ ಸ್ಪಷ್ಟಪಡಿಸಿದೆ.

ಭಾರತದ ಮೇಲಾಗುವ ಪರಿಣಾಮವೇನು?

ವಿಶ್ವದ ಅತಿದೊಡ್ಡ ಕಚ್ಚಾ ತೈಲ ಆಮದುದಾರ ರಾಷ್ಟ್ರಗಳಲ್ಲಿ ಒಂದಾದ ಭಾರತಕ್ಕೆ ಅಮೆರಿಕದ ಈ ಕಠಿಣ ನಿರ್ಬಂಧಗಳು ತೈಲ ಮಾರುಕಟ್ಟೆಯಲ್ಲಿ ಸವಾಲೊಡ್ಡುವ ಸಾಧ್ಯತೆಯಿದೆ. ಮಾರ್ಚ್ ತಿಂಗಳಲ್ಲಿ ನೀಡಲಾಗಿದ್ದ ತಾತ್ಕಾಲಿಕ ವಿನಾಯಿತಿಯ ಲಾಭ ಪಡೆದಿದ್ದ ಭಾರತ, ಕಳೆದ ವಾರವಷ್ಟೇ ಬರೋಬ್ಬರಿ ಏಳು ವರ್ಷಗಳ ಬಳಿಕ ಇರಾನ್‌ನಿಂದ ಸುಮಾರು 4 ದಶಲಕ್ಷ ಬ್ಯಾರೆಲ್ ತೈಲವನ್ನು ಎರಡು ಹಡಗುಗಳ ಮೂಲಕ ಸ್ವೀಕರಿಸಿತ್ತು. ಇದೀಗ ವಿನಾಯಿತಿ ರದ್ದಾಗಿರುವುದರಿಂದ ಇರಾನ್ ತೈಲ ಆಮದು ಕಷ್ಟಸಾಧ್ಯವಾಗಲಿದೆ. ಆದಾಗ್ಯೂ, ರಷ್ಯಾ ತೈಲದ ಪ್ರಮುಖ ಖರೀದಿದಾರನಾಗಿ ಮುಂದುವರಿದಿರುವ ಭಾರತ, ತನ್ನ ಬಳಿ ಸಾಕಷ್ಟು ತೈಲ ನಿಕ್ಷೇಪಗಳಿದ್ದು, ವಿವಿಧ ದೇಶಗಳಿಂದ ತೈಲ ಖರೀದಿಸುವ ಸುಭದ್ರ ಕಾರ್ಯತಂತ್ರವನ್ನು ಹೊಂದಿರುವುದರಿಂದ ಆತಂಕಪಡುವ ಅಗತ್ಯವಿಲ್ಲ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ.

ಇದನ್ನೂ ಓದಿ : “ಬದುಕುಳಿದದ್ದೇ ನನ್ನ ಪುಣ್ಯ” : ಮತಾಂತರ ಜಾಲದ ಆರೋಪ ಹೊತ್ತಿರುವ TCS ಉದ್ಯೋಗಿ ನಿಟ್ಟುಸಿರು!