ಬೆಂಗಳೂರು : ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯು (EPFO) ತನ್ನ ಸೇವೆಗಳನ್ನು ಡಿಜಿಟಲೀಕರಣಗೊಳಿಸುವ ನಿಟ್ಟಿನಲ್ಲಿ ಜುಲೈ 2026ರಲ್ಲಿ ಹಲವಾರು ಮಹತ್ವದ ಬದಲಾವಣೆಗಳನ್ನು ಜಾರಿಗೆ ತಂದಿದೆ. EPF ಮತ್ತು EPS ಚಂದಾದಾರರಿಗೆ ಅನುಕೂಲವಾಗುವಂತೆ ಪ್ರಮುಖ ಬದಲಾವಣೆ ಮಾಡಲಾಗಿದೆ. ಇವುಗಳಲ್ಲಿಯೇ ಜುಲೈ 15ರಿಂದ ಪ್ರಮುಖ ನಿಯಮಗಳು ಜಾರಿಗೆ ಬರುತ್ತಿವೆ. ಹೊಸ ನಿಯಮಗಳು, ಬದಲಾವಣೆಗಳ ಕುರಿತ ಮಾಹಿತಿ ಇಲ್ಲಿದೆ.
ಬಡ್ಡಿ ಜಮೆ :
ಆರ್ಥಿಕ ವರ್ಷ 2025-26ರ ಸಾಲಿನ ಶೇ. 8.25ರಷ್ಟು ಬಡ್ಡಿದರವನ್ನು ಜುಲೈ 15ರ ಒಳಗಾಗಿ ಸುಮಾರು 34 ಕೋಟಿ ಖಾತೆಗಳಿಗೆ ಜಮೆ ಮಾಡಲಾಗುವುದು ಎಂದು ಕೇಂದ್ರ ಕಾರ್ಮಿಕ ಸಚಿವಾಲಯ ತಿಳಿಸಿದೆ.
5 ಲಕ್ಷ ರೂ.ವರೆಗೆ ಆಟೋ-ಕ್ಲೇಮ್ :
PF ಹಣವನ್ನು ಹಿಂಪಡೆಯುವ ಪ್ರಕ್ರಿಯೆಯನ್ನು ಸರಳಗೊಳಿಸಲಾಗಿದೆ. ಈಗ 5 ಲಕ್ಷ ರೂಪಾಯಿವರೆಗಿನ ಕ್ಲೇಮ್ ಗಳು ಸ್ವಯಂಚಾಲಿತವಾಗಿ (Auto-settlement) ಇತ್ಯರ್ಥವಾಗಲಿವೆ. ಇದರಿಂದ ಕ್ಲೇಮ್ ವಿಲೇವಾರಿ ವೇಗ ಹೆಚ್ಚಾಗಲಿದೆ.
3 ದಿನಗಳಲ್ಲಿ ಕ್ಲೇಮ್ ವಿಲೇವಾರಿ:
ನೂತನ ವ್ಯವಸ್ಥೆಯ ಅಡಿಯಲ್ಲಿ, ಅರ್ಹವಾದ PF ಕ್ಲೇಮ್ ಗಳನ್ನು ಕೇವಲ 3 ದಿನಗಳಲ್ಲಿ ಇತ್ಯರ್ಥಪಡಿಸುವ ಗುರಿಯನ್ನು EPFO ಹೊಂದಿದೆ.
ಹೊಸ EPF ಯೋಜನೆ 2026:
ಹಳೆಯ 1952ರ ಯೋಜನೆಯ ಬದಲಿಗೆ ‘EPF ಯೋಜನೆ 2026’ ಜಾರಿಗೆ ಬಂದಿದೆ. ಇದು ಡಿಜಿಟಲ್ ಸೇವೆಗಳನ್ನು ಉತ್ತೇಜಿಸುತ್ತದೆ ಮತ್ತು ಕ್ಲೇಮ್ ಪ್ರಕ್ರಿಯೆಯಲ್ಲಿ ಅಧಿಕಾರಿಗಳ ಹಸ್ತಕ್ಷೇಪವನ್ನು ಕಡಿಮೆ ಮಾಡುತ್ತದೆ.
ಸುಲಭ ಹಿಂಪಡೆಯುವಿಕೆ :
ಹಿಂದೆ ಇದ್ದ 13 ರೀತಿಯ ಹಿಂಪಡೆಯುವಿಕೆ ವರ್ಗಗಳನ್ನು ಮೂರು ಪ್ರಮುಖ ವಿಭಾಗಗಳಿಗೆ (ಅಗತ್ಯ ಅಗತ್ಯಗಳು, ವಸತಿ ಮತ್ತು ವಿಶೇಷ ಸನ್ನಿವೇಶಗಳು) ಸೀಮಿತಗೊಳಿಸಲಾಗಿದೆ.
ಉದ್ಯೋಗ ಬದಲಾವಣೆ ಸುಲಭ:
ಆಧಾರ್ ಆಧಾರಿತ ಡಿಜಿಟಲ್ ಪೋರ್ಟಲ್ ಮೂಲಕ ಉದ್ಯೋಗ ಬದಲಾಯಿಸಿದಾಗ PF ಹಣವನ್ನು ವರ್ಗಾಯಿಸುವುದು ಈಗ ತುಂಬಾ ಸುಲಭವಾಗಿದೆ.
ಗುತ್ತಿಗೆ ನೌಕರರಿಗೆ ರಕ್ಷಣೆ :
ಗುತ್ತಿಗೆ ಆಧಾರಿತ ಉದ್ಯೋಗಿಗಳಿಗೆ PF ಹಣ ಜಮೆಯಾಗದಿದ್ದರೆ, ಅದಕ್ಕೆ ನೇರ ಹೊಣೆಗಾರಿಕೆಯನ್ನು ಮುಖ್ಯ ಉದ್ಯೋಗದಾತರು (ಕಂಪನಿಗಳು) ಹೊರಬೇಕಾಗುತ್ತದೆ ಎಂಬ ನಿಯಮವನ್ನು ಕಟ್ಟುನಿಟ್ಟಾಗಿಸಲಾಗಿದೆ.
PF ಬ್ಯಾಲೆನ್ಸ್ ಮಾಹಿತಿ :
ಚಂದಾದಾರರು UMANG ಆ್ಯಪ್, ಅಧಿಕೃತ ಪೋರ್ಟಲ್ ಅಥವಾ SMS ಮೂಲಕ ತಮ್ಮ ಖಾತೆಗೆ ಬಡ್ಡಿ ಜಮೆಯಾಗಿರುವುದನ್ನು ಸುಲಭವಾಗಿ ಪರಿಶೀಲಿಸಬಹುದು.
ಇದನ್ನೂ ಓದಿ : ರೀನಾ, ಕಿರಣ್, ಗೌರಿ ಯಾರೂ ಮತಾಂತರಗೊಂಡಿಲ್ಲ – ‘ಲವ್ ಜಿಹಾದ್’ ಆರೋಪ ತಿರಸ್ಕರಿಸಿದ ಅಮೀರ್ ಖಾನ್!
