ಚೆನ್ನೈ : ಎಂಎಸ್ ಧೋನಿ ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್‌ಕೆ) ಫ್ರಾಂಚೈಸಿ ನಡುವಿನ ಬಾಂಧವ್ಯ ಕೇವಲ ಆಟಗಾರ ಮತ್ತು ತಂಡಕ್ಕೆ ಸೀಮಿತವಾಗಿಲ್ಲ. ಧೋನಿ ಎಂದರೆ ಸಿಎಸ್‌ಕೆ, ಸಿಎಸ್‌ಕೆ ಎಂದರೆ ಧೋನಿ ಎನ್ನುವಷ್ಟರ ಮಟ್ಟಿಗೆ ಇವರಿಬ್ಬರ ಸಂಬಂಧ ಬೆಸೆದುಕೊಂಡಿದೆ. ಆದರೆ, ಇದೀಗ ಐಪಿಎಲ್ 2027ರ ಸೀಸನ್‌ಗೂ ಮುನ್ನ ಧೋನಿ ಅವರ ಭವಿಷ್ಯದ ಬಗ್ಗೆ ಭಾರೀ ಊಹಾಪೋಹಗಳು ಎದ್ದಿವೆ.
ಭಾರತ ತಂಡದ ಮಾಜಿ ನಾಯಕ ಕ್ರಿಸ್ ಶ್ರೀಕಾಂತ್ ಹಾಗೂ ಅವರ ಪುತ್ರ, ಮಾಜಿ ಸಿಎಸ್‌ಕೆ ಆಟಗಾರ ಅನಿರುದ್ಧ ಶ್ರೀಕಾಂತ್ ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಈ ಬಗ್ಗೆ ಸ್ಫೋಟಕ ಮಾಹಿತಿಯೊಂದನ್ನು ಬಿಚ್ಚಿಟ್ಟಿದ್ದಾರೆ. ಕ್ರಿಕೆಟ್ ವಲಯದ ಮೂಲಗಳಿಂದ ತಮಗೆ ಲಭ್ಯವಾಗಿರುವ ಮಾಹಿತಿ ಪ್ರಕಾರ, ಭವಿಷ್ಯದಲ್ಲಿ (ನಿವೃತ್ತಿಯ ಬಳಿಕ) ಸಿಎಸ್‌ಕೆ ಫ್ರಾಂಚೈಸಿಯಲ್ಲಿ ಧೋನಿ ಗಣನೀಯ ಪ್ರಮಾಣದ ಒಡೆತನದ ಪಾಲನ್ನು ಹೊಂದಲು ಬಯಸಿದ್ದಾರೆ ಎನ್ನುವ ಅಚ್ಚರಿಯ ವಿಚಾರವನ್ನು ಅನಿರುದ್ಧ ಹೊರಹಾಕಿದ್ದಾರೆ.
ಬೇಡಿಕೆ ಮತ್ತು ಪ್ರಸ್ತಾವನೆ ನಡುವೆ ಭಾರೀ ಅಂತರ
ಅನಿರುದ್ಧ ಶ್ರೀಕಾಂತ್ ನೀಡಿರುವ ಮಾಹಿತಿ ಪ್ರಕಾರ, ಈ ಮಾತುಕತೆ ಕಳೆದ ಒಂದು-ಎರಡು ವರ್ಷಗಳಿಂದಲೇ ತೆರೆಮರೆಯಲ್ಲಿ ನಡೆಯುತ್ತಿದೆ. ಕಳೆದ ವರ್ಷ ಉಭಯ ಕಡೆಯಿಂದಲೂ ಒಪ್ಪಂದ ಅಂತಿಮಗೊಳ್ಳುವ ಹಂತಕ್ಕೆ ಬಂದಿತ್ತು ಎನ್ನಲಾಗಿತ್ತು. ಆದರೆ, ಇತ್ತೀಚಿನ ವರದಿಗಳ ಪ್ರಕಾರ ಧೋನಿ ಅವರು ಫ್ರಾಂಚೈಸಿಯಲ್ಲಿ ಶೇಕಡಾ 18ರಿಂದ 25ರಷ್ಟು ಒಡೆತನದ ಪಾಲನ್ನು ಕೇಳುತ್ತಿದ್ದಾರೆ. ಇದಕ್ಕೆ ಪ್ರತಿಯಾಗಿ, ಸಿಎಸ್‌ಕೆ ಆಡಳಿತ ಮಂಡಳಿಯು ತಮ್ಮ ನೆಚ್ಚಿನ ಮಾಜಿ ನಾಯಕನಿಗೆ ಕೇವಲ ಶೇಕಡಾ 3ರಿಂದ 5ರಷ್ಟು ಪಾಲನ್ನು ಮಾತ್ರ ನೀಡಲು ಮುಂದಾಗಿದೆ ಎನ್ನಲಾಗಿದೆ. ಫ್ರಾಂಚೈಸಿಯ ಈ ಪ್ರಸ್ತಾವನೆಗೆ ಧೋನಿ ಕಡೆಯಿಂದ ಸಮ್ಮತಿ ಸಿಕ್ಕಿಲ್ಲ ಎಂಬ ಮಾತುಗಳು ಕೇಳಿಬರುತ್ತಿವೆ.
ಸಿಎಸ್‌ಕೆಯಲ್ಲಿ ಧೋನಿ ಭವಿಷ್ಯ ಅಂತ್ಯಗೊಳ್ಳಲಿದೆಯೇ?
ಫ್ರಾಂಚೈಸಿ ನೀಡಲು ಮುಂದಾಗಿರುವ ಪಾಲು ಹಾಗೂ ಧೋನಿ ಅವರ ಬೇಡಿಕೆಯ ನಡುವೆ ಇರುವ ಈ ಬೃಹತ್ ಅಂತರದಿಂದಾಗಿ ಸದ್ಯ ಬಿಕ್ಕಟ್ಟು ನಿರ್ಮಾಣವಾಗಿದೆ. ಆಟಗಾರ ಹಾಗೂ ಆಡಳಿತ ಮಂಡಳಿ ನಡುವಿನ ಈ ಅಸಮಾಧಾನ ಶೀಘ್ರದಲ್ಲೇ ಬಗೆಹರಿಯದಿದ್ದರೆ, ಮುಂದಿನ ದಿನಗಳಲ್ಲಿ ಇವರ ಸುದೀರ್ಘ ಹಾಗೂ ಯಶಸ್ವಿ ಸಂಬಂಧದ ಮೇಲೆ ಗಂಭೀರ ಪರಿಣಾಮ ಬೀರುವ ಸಾಧ್ಯತೆಯಿದೆ.
ಅನಿರುದ್ಧ ಅವರ ಹೇಳಿಕೆಯನ್ನು ಗಮನಿಸಿದರೆ, ಒಂದು ವೇಳೆ ಈ ಒಡೆತನದ ಸಮಸ್ಯೆ ಸುಖಾಂತ್ಯ ಕಾಣದಿದ್ದರೆ, ಸಿಎಸ್‌ಕೆಯಲ್ಲಿ ಎಂಎಸ್ ಧೋನಿ ಅವರ ಅದ್ಭುತ ಶಕೆ ಬಹುತೇಕ ಅಂತ್ಯಗೊಳ್ಳುವ ಸಾಧ್ಯತೆಯನ್ನೂ ತಳ್ಳಿಹಾಕುವಂತಿಲ್ಲ. ಐಪಿಎಲ್ ಇತಿಹಾಸದಲ್ಲೇ ಅತ್ಯಂತ ಯಶಸ್ವಿ ನಾಯಕನಾಗಿರುವ ಧೋನಿ ಕುರಿತಾದ ಈ ಬೆಳವಣಿಗೆಗಳು ಇದೀಗ ಕ್ರಿಕೆಟ್ ವಲಯದಲ್ಲಿ ತೀವ್ರ ಸಂಚಲನ ಮೂಡಿಸಿದ್ದು, ಮುಂದಿನ ದಿನಗಳಲ್ಲಿ ಇದು ಯಾವ ತಿರುವು ಪಡೆಯಲಿದೆ ಕಾದು ನೋಡಬೇಕಿದೆ.
ಇದನ್ನೂ ಓದಿ : ಕೆನರಾ ಬ್ಯಾಂಕ್‌ನಲ್ಲಿ 10 ಹುದ್ದೆಗಳ ನೇಮಕಾತಿಗೆ ಅಧಿಸೂಚನೆ : ಬೆಂಗಳೂರಿನಲ್ಲೂ ಇವೆ ಓಪನಿಂಗ್ಸ್‌!
