ನವದೆಹಲಿ: ಮುಂಬೈ ತಂಡದಿಂದ ಹೊರಬಿದ್ದ ನಂತರ ಸಾಕಷ್ಟು ಟೀಕೆಗಳನ್ನು ಎದುರಿಸಿದ್ದ ಯುವ ಆರಂಭಿಕ ಬ್ಯಾಟರ್ ಪೃಥ್ವಿ ಶಾ ಇದೀಗ ಮಹಾರಾಷ್ಟ್ರ ತಂಡದ ಪರ ಕಣಕ್ಕಿಳಿದಿದ್ದು, ರಣಜಿ ಟ್ರೋಫಿ ಟೂರ್ನಿಯಲ್ಲಿ ಗಮನಾರ್ಹ ಪ್ರದರ್ಶನ ನೀಡುತ್ತಿದ್ದಾರೆ. ಇತ್ತೀಚೆಗಷ್ಟೇ ‘ಇಂಡಿಯಾ ಟುಡೇ’ ಜತೆಗಿನ ವಿಶೇಷ ಸಂದರ್ಶನದಲ್ಲಿ ಭಾಗಿಯಾಗಿದ್ದ ಪೃಥ್ವಿ ಶಾ, ತಮ್ಮ ಕ್ರಿಕೆಟ್ ಬದುಕು, ಬದಲಾದ ಜೀವನಶೈಲಿ ಹಾಗೂ ಟೀಂ ಇಂಡಿಯಾಗೆ ಮರಳುವ ಕನಸಿನ ಬಗ್ಗೆ ಅತ್ಯಂತ ಮುಕ್ತವಾಗಿ ಮಾತನಾಡಿದ್ದಾರೆ.ಸದ್ಯ ಮಹಾರಾಷ್ಟ್ರ ತಂಡವನ್ನು ಯಶಸ್ವಿಯಾಗಿ ಮುನ್ನಡೆಸುತ್ತಿರುವ ಶಾ, ನವದೆಹಲಿಯಲ್ಲಿ ನಡೆದ ಸರ್ವಿಸಸ್ ವಿರುದ್ಧದ ಪಂದ್ಯದಲ್ಲಿ ಬಿರುಸಿನ ಬ್ಯಾಟಿಂಗ್ ನಡೆಸಿ ಕೇವಲ 73 ಎಸೆತಗಳಲ್ಲಿ 70 ರನ್ ಚಚ್ಚುವ ಮೂಲಕ ತಮ್ಮಲ್ಲಿನ ಹಳೆಯ ಲಯವನ್ನು ಮರಳಿ ಪಡೆಯುವ ಸುಳಿವು ನೀಡಿದ್ದಾರೆ. ಮುಂಬೈ ಕ್ರಿಕೆಟ್ ಸಂಸ್ಥೆಯೊಂದಿಗಿನ ಭಿನ್ನಾಭಿಪ್ರಾಯದ ಬಳಿಕ ಮಹಾರಾಷ್ಟ್ರದತ್ತ ಮುಖ ಮಾಡಿದ ಅವರು ಇದೀಗ ನಾಯಕನಾಗಿಯೂ ಯಶಸ್ಸು ಕಾಣುತ್ತಿದ್ದಾರೆ.
ಸಾಮಾಜಿಕ ಜಾಲತಾಣಗಳಿಂದ ಸಂಪೂರ್ಣ ದೂರ
ಸೋಷಿಯಲ್ ಮೀಡಿಯಾ ಮತ್ತು ಅನಗತ್ಯ ವಿವಾದಗಳಿಂದ ದೂರ ಉಳಿದಿರುವ ಬಗ್ಗೆ ಮಾತನಾಡಿದ ಅವರು, ತಾವು ಈಗ ಹೊರಗಡೆ ಸುತ್ತಾಡುವುದನ್ನು ಸಂಪೂರ್ಣವಾಗಿ ನಿಲ್ಲಿಸಿರುವುದಾಗಿ ಸ್ಪಷ್ಟಪಡಿಸಿದ್ದಾರೆ. “ನಾನು ನನ್ನ ಆಟದ ಬಗ್ಗೆ ಹಿಂದೆಂದಿಗಿಂತಲೂ ಹೆಚ್ಚು ಶ್ರಮ ಹಾಕುತ್ತಿದ್ದೇನೆ. ಸಾಮಾಜಿಕ ಜಾಲತಾಣಗಳಿಂದ ದೂರವಿದ್ದು ಕೇವಲ ಮೂರು ವಿಚಾರಗಳತ್ತ ಮಾತ್ರ ಗಮನಹರಿಸಿದ್ದೇನೆ. ನನ್ನ ಕ್ರಿಕೆಟ್, ನನ್ನ ಕುಟುಂಬ ಹಾಗೂ ನಾನು. ಈ ಮೂರನ್ನು ಹೊರತುಪಡಿಸಿ ಉಳಿದೆಲ್ಲವನ್ನೂ ಬದಿಗೊತ್ತಿದ್ದೇನೆ,” ಎಂದು ಪೃಥ್ವಿ ಶಾ ಹೇಳಿದ್ದಾರೆ. ಈ ಹಿಂದೆ ತಮ್ಮ ಮೇಲೆ ಕೇಳಿಬರುತ್ತಿದ್ದ ಟೀಕೆಗಳು ಮತ್ತು ಹೊರಗಿನವರ ಮಾತುಗಳಿಗೆ ಈಗ ತಾವು ತಲೆಕೆಡಿಸಿಕೊಳ್ಳುವುದಿಲ್ಲ ಎಂದಿರುವ ಅವರು, ಖಾಸಗಿತನಕ್ಕೆ ಹೆಚ್ಚು ಬೆಲೆ ನೀಡುತ್ತಿರುವುದಾಗಿ ತಿಳಿಸಿದ್ದಾರೆ.
ತಪ್ಪುಗಳಿಂದ ಕಲಿತ ಪಾಠ
ಕಳೆದ ಕೆಲವು ವರ್ಷಗಳು ತಮಗೆ ಅತ್ಯಂತ ಕಠಿಣವಾಗಿದ್ದವು ಎಂಬುದನ್ನು ಒಪ್ಪಿಕೊಂಡ ಪೃಥ್ವಿ, ಪ್ರತಿಯೊಬ್ಬರೂ ಜೀವನದಲ್ಲಿ ತಪ್ಪು ಮಾಡುತ್ತಾರೆ, ಆದರೆ ಆ ತಪ್ಪುಗಳಿಂದ ಪಾಠ ಕಲಿಯುವುದು ಮುಖ್ಯ ಎಂದಿದ್ದಾರೆ. “ಯಾರೂ ನೂರಕ್ಕೆ ನೂರು ಪಾಲು ಪರಿಪೂರ್ಣರಾಗಿರುವುದಿಲ್ಲ. ನಾನು ಕೂಡ ಜೀವನದ ಹಾದಿಯಲ್ಲಿ ತಪ್ಪುಗಳನ್ನು ಮಾಡಿರಬಹುದು. ಆದರೆ, ಈಗ ನಾನು ಆ ದಿನಗಳನ್ನು ಹಿಂದಿರುಗಿ ನೋಡಲು ಇಷ್ಟಪಡುವುದಿಲ್ಲ. ನನ್ನ ದೃಷ್ಟಿ ಏನಿದ್ದರೂ ಭವಿಷ್ಯದ ಮೇಲಿದೆ. ನನ್ನ ಸಹ ಆಟಗಾರರೊಂದಿಗೆ ಬೆರೆಯುತ್ತಾ ಕ್ರಿಕೆಟ್ ಅನ್ನು ಆನಂದಿಸುತ್ತಿದ್ದೇನೆ. ಶಿಸ್ತು ಮತ್ತು ವೃತ್ತಿಪರತೆಗೆ ಹೆಚ್ಚು ಒತ್ತು ನೀಡುತ್ತಿದ್ದು, ನನ್ನ ಕುಟುಂಬದೊಂದಿಗೆ ಗುಣಮಟ್ಟದ ಸಮಯ ಕಳೆಯುತ್ತಿದ್ದೇನೆ. ಹೊರಗಿನವರ ಮಾತುಗಳಿಗಿಂತ, ನನ್ನ ಬಗ್ಗೆ ನನ್ನ ಕುಟುಂಬ ಏನಂದುಕೊಳ್ಳುತ್ತದೆ ಎನ್ನುವುದು ಮಾತ್ರ ನನಗೆ ಮುಖ್ಯ,” ಎಂದು ಅವರು ವಿವರಿಸಿದ್ದಾರೆ.
ಟೀಂ ಇಂಡಿಯಾಗೆ ಮರಳುವ ಅಚಲ ವಿಶ್ವಾಸ
2021ರಲ್ಲಿ ಕೊನೆಯ ಬಾರಿಗೆ ಟೀಂ ಇಂಡಿಯಾ ಪರ ಆಡಿದ್ದ ಪೃಥ್ವಿ ಶಾ, ಮತ್ತೆ ರಾಷ್ಟ್ರೀಯ ತಂಡವನ್ನು ಪ್ರತಿನಿಧಿಸುವ ದೊಡ್ಡ ಕನಸು ಹೊತ್ತಿದ್ದಾರೆ. “ನನ್ನೊಳಗೆ ಕ್ರಿಕೆಟ್ ಬಗ್ಗೆ ಆ ಹಸಿವು ಇಲ್ಲದಿದ್ದರೆ ನಾನು ಇಂದು ಮೈದಾನದಲ್ಲಿ ಆಡುತ್ತಲೇ ಇರಲಿಲ್ಲ. ಟೀಂ ಇಂಡಿಯಾ ಪರ ಮತ್ತೆ ಆಡುವುದು ನನ್ನ ಅಂತಿಮ ಗುರಿ. ಸದ್ಯ ಆರಂಭಿಕ ಸ್ಥಾನಕ್ಕಾಗಿ ಸಾಕಷ್ಟು ಪೈಪೋಟಿ ಇದೆ ಎಂಬುದು ನನಗೆ ತಿಳಿದಿದೆ. ಆದರೆ, ನಿರಂತರವಾಗಿ ಉತ್ತಮ ಪ್ರದರ್ಶನ ನೀಡುವ ಮೂಲಕ ನಾನು ಮತ್ತೆ ತಂಡಕ್ಕೆ ಮರಳುತ್ತೇನೆ,” ಎಂದು ಅವರು ಆತ್ಮವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಯುವ ಆಟಗಾರರೊಂದಿಗೆಮಹಾರಾಷ್ಟ್ರತಂಡವನ್ನು ಮುನ್ನಡೆಸುತ್ತಿರುವುದು ತಮಗೆ ಹೆಚ್ಚಿನ ಜವಾಬ್ದಾರಿ ಹಾಗೂ ಹೊಸ ಹುರುಪು ನೀಡಿದೆ ಎಂದು ಪೃಥ್ವಿ ಶಾ ಅಭಿಪ್ರಾಯಪಟ್ಟಿದ್ದಾರೆ.
ಇದನ್ನೂ ಓದಿ:ಟಾಟಾ ಟ್ರಸ್ಟ್ಸ್‌ನಲ್ಲಿ ಆಂತರಿಕ ಕಲಹ ತೀವ್ರ : ಬಾಂಬೆ ಹೈಕೋರ್ಟ್ ಮೊರೆ ಹೋದ ನೊವೆಲ್, ನೆವಿಲ್ಲೆ ಟಾಟಾ
