ಬೆಂಗಳೂರು : ತಂತ್ರಜ್ಞಾನ ದೈತ್ಯ ಮೈಕ್ರೋಸಾಫ್ಟ್ ತನ್ನ ವಿಂಡೋಸ್ 10 (Windows 10) ಆಪರೇಟಿಂಗ್ ಸಿಸ್ಟಮ್ ಬಳಕೆದಾರರಿಗೆ ಭರ್ಜರಿ ಸಿಹಿಸುದ್ದಿಯೊಂದನ್ನು ನೀಡಿದೆ. ಹೊಸ ವಿಂಡೋಸ್ 11 ಕಾರ್ಯಾಚರಣಾ ವ್ಯವಸ್ಥೆಗೆ ಅಪ್ಗ್ರೇಡ್ ಆಗುವಂತೆ ಕಂಪನಿಯು ಗ್ರಾಹಕರನ್ನು ನಿರಂತರವಾಗಿ ಒತ್ತಾಯಿಸುತ್ತಿದ್ದರೂ, ಹಳೆಯ ವಿಂಡೋಸ್ 10 ಬಳಕೆದಾರರಿಗೆ ಅನುಕೂಲವಾಗುವ ನಿಟ್ಟಿನಲ್ಲಿ ‘ವಿಸ್ತರಿತ ಭದ್ರತಾ ಅಪ್ಡೇಟ್’ (Extended Security Updates – ESU) ಪ್ರೋಗ್ರಾಂ ಅನ್ನು ಮೈಕ್ರೋಸಾಫ್ಟ್ ಸದ್ದಿಲ್ಲದೆ ಮತ್ತೊಂದು ವರ್ಷಕ್ಕೆ ವಿಸ್ತರಿಸಿದೆ. ಈ ನಡೆಯಿಂದಾಗಿ, ಹಳೆಯ ಕಂಪ್ಯೂಟರ್ಗಳನ್ನು ಹೊಂದಿರುವ ಹಾಗೂ ವಿಂಡೋಸ್ 11ರ ಹಾರ್ಡ್ವೇರ್ ಅಗತ್ಯತೆಗಳನ್ನು ಪೂರೈಸದ ಲಕ್ಷಾಂತರ ಬಳಕೆದಾರರು ನಿಟ್ಟುಸಿರು ಬಿಡುವಂತಾಗಿದೆ.
ವಾಸ್ತವದಲ್ಲಿ, ಮೈಕ್ರೋಸಾಫ್ಟ್ ತಂತ್ರಜ್ಞಾನ ಕಂಪನಿಯು ವಿಂಡೋಸ್ 10ರ ಅಧಿಕೃತ ಬೆಂಬಲವನ್ನು ಕಳೆದ ವರ್ಷವೇ ಕೊನೆಗೊಳಿಸಿತ್ತು. ಅಷ್ಟೇ ಅಲ್ಲದೆ, ಗ್ರಾಹಕರಿಗಾಗಿ ಪರಿಚಯಿಸಿದ್ದ ಇಎಸ್ಯು (ESU) ಪ್ರೋಗ್ರಾಂ ಕೂಡ ಇದೇ ವರ್ಷದ ಅಕ್ಟೋಬರ್ ತಿಂಗಳಿಗೆ ಶಾಶ್ವತವಾಗಿ ಮುಕ್ತಾಯಗೊಳ್ಳಬೇಕಿತ್ತು. ಆದರೆ, ಇತ್ತೀಚೆಗೆ ತನ್ನ ಅಧಿಕೃತ ಬೆಂಬಲ ದಾಖಲೆಯಲ್ಲಿ ಮಾರ್ಪಾಡು ಮಾಡಿರುವ ಕಂಪನಿಯು, ವಿಂಡೋಸ್ 10 ಬಳಕೆದಾರರು 2027ರ ಅಕ್ಟೋಬರ್ 12ರವರೆಗೆ ಈ ಭದ್ರತಾ ನವೀಕರಣಗಳನ್ನು ಪಡೆಯಬಹುದು ಎಂದು ಹೇಳಿದೆ.
ಆಸಕ್ತ ಗ್ರಾಹಕರು ಈ ಡೇಡುಲೈನ್ ಮುಕ್ತಾಯದವರೆಗೆ ಯಾವುದೇ ಸಮಯದಲ್ಲಿ ಇಎಸ್ಯು ಪ್ರೋಗ್ರಾಂಗೆ ನೋಂದಾಯಿಸಿಕೊಳ್ಳಲು ಮುಕ್ತ ಅವಕಾಶವನ್ನು ಕಲ್ಪಿಸಲಾಗಿದೆ. ವಿಶೇಷವೆಂದರೆ, ಈಗಾಗಲೇ ಈ ಯೋಜನೆಗೆ ಒಳಪಟ್ಟಿರುವ ಬಳಕೆದಾರರು ಯಾವುದೇ ಹೊಸ ಪ್ರಕ್ರಿಯೆಗಳನ್ನು ಮಾಡುವ ಅಗತ್ಯವಿಲ್ಲ. ಅವರ ಈ ಹಿಂದಿನ ಡೇಟಾಬೇಸ್ ಅಥವಾ ವ್ಯಾಪ್ತಿಯು 2027ರ ಅಕ್ಟೋಬರ್ 12ರವರೆಗೆ ತಾನಾಗಿಯೇ ವಿಸ್ತರಣೆಯಾಗಲಿದೆ ಎಂದು ಮೈಕ್ರೋಸಾಫ್ಟ್ ಸ್ಪಷ್ಟಪಡಿಸಿದೆ.
ಹೊಸ ಸಾಧನಗಳ ಖರೀದಿ
ಈ ನವೀಕೃತ ವಿಸ್ತರಣೆಯು ಹಳೆಯ ಪಿಸಿಗಳನ್ನು (Personal Computers) ಬಳಸುತ್ತಿರುವ ಗ್ರಾಹಕರಿಗೆ ಹೊಸ ವ್ಯವಸ್ಥೆಗೆ ಹೊಂದಿಕೊಳ್ಳಲು ಅಥವಾ ಹೊಸ ಸಾಧನಗಳನ್ನು ಖರೀದಿಸಲು ಸಾಕಷ್ಟು ಕಾಲಾವಕಾಶವನ್ನು ಒದಗಿಸಿದೆ. ವಿಂಡೋಸ್ 11ರ ಕಟ್ಟುನಿಟ್ಟಾದ ಹಾರ್ಡ್ವೇರ್ ಅಗತ್ಯತೆಗಳನ್ನು ಹೊಂದಿರದ ಕಂಪ್ಯೂಟರ್ಗಳು, ಈ ‘ಗ್ರಾಹಕ ಇಎಸ್ಯು’ (Consumer ESU) ಪ್ರೋಗ್ರಾಂಗೆ ಸೇರ್ಪಡೆಗೊಳ್ಳುವ ಮೂಲಕ ಮುಂದಿನ ದಿನಗಳಲ್ಲಿ ತಮ್ಮ ಸಿಸ್ಟಮ್ನ ಭದ್ರತೆಯನ್ನು ಕಾಪಾಡಿಕೊಳ್ಳಬಹುದು. ಈ ಸೇವೆಗೆ ಸೇರ್ಪಡೆಗೊಳ್ಳಲು ಗ್ರಾಹಕರು ತಮ್ಮ ಮೈಕ್ರೋಸಾಫ್ಟ್ ಖಾತೆಗೆ ಲಾಗಿನ್ ಆಗುವುದು ಕಡ್ಡಾಯವಾಗಿರುತ್ತದೆ.
ಪ್ರಸ್ತುತ ವಿಂಡೋಸ್ 10ರ 22H2 ಹೋಮ್ (Home), ಪ್ರೊಫೆಷನಲ್ (Professional), ಪ್ರೊ ಎಜುಕೇಶನ್ (Pro Education) ಅಥವಾ ವರ್ಕ್ಸ್ಟೇಷನ್ (Workstations) ಆವೃತ್ತಿಗಳನ್ನು ಬಳಸುತ್ತಿರುವ ಹಾಗೂ ತೀರಾ ಇತ್ತೀಚಿನ ವಿಂಡೋಸ್ ಅಪ್ಡೇಟ್ ಹೊಂದಿರುವ ಸಾಧನಗಳು ಮಾತ್ರ ಈ ಯೋಜನೆ ಪಡೆಯಲು ಅರ್ಹವಾಗಿರುತ್ತವೆ. ಅಲ್ಲದೆ, ಒಂದು ಬಾರಿಯ ಇಎಸ್ಯು ಲೈಸೆನ್ಸ್ ಅನ್ನು ಬಳಸಿಕೊಂಡು ಗ್ರಾಹಕರು ಗರಿಷ್ಠ 10 ಸಾಧನಗಳಿಗೆ ಭದ್ರತಾ ಕವಚವನ್ನು ಒದಗಿಸುವ ಅವಕಾಶವಿದೆ.
ಈ ಸಕಾರಾತ್ಮಕ ನಿರ್ಧಾರದ ನಡುವೆಯೂ, ಮೈಕ್ರೋಸಾಫ್ಟ್ ಬಹುಮುಖ್ಯವಾದ ಎಚ್ಚರಿಕೆಯೊಂದನ್ನು ಬಳಕೆದಾರರ ಮುಂದಿಟ್ಟಿದೆ. ಈ ವಿಸ್ತರಿತ ಭದ್ರತಾ ಅಪ್ಡೇಟ್ ಪ್ರೋಗ್ರಾಂಗೆ ನೋಂದಾಯಿಸಿಕೊಳ್ಳದೆ ಹಳೆಯ ಸಾಧನಗಳನ್ನು ಹಾಗೆಯೇ ಬಳಸುವುದರಿಂದ, ಆ ಕಂಪ್ಯೂಟರ್ಗಳು ಸೈಬರ್ ದಾಳಿಗೆ ಸುಲಭವಾಗಿ ತುತ್ತಾಗುವ ಅಪಾಯವಿರುತ್ತದೆ. ಅಧಿಕೃತ ಬೆಂಬಲ ಕೊನೆಗೊಂಡಿರುವ ಕಾರಣ, ಭದ್ರತಾ ಲೋಪಗಳು ಕಾಣಿಸಿಕೊಂಡು ವೈರಸ್ಗಳು ಮತ್ತು ಮಾಲ್ವೇರ್ಗಳ ದಾಳಿಗೆ ಸಿಸ್ಟಮ್ಗಳು ಹೆಚ್ಚು ದುರ್ಬಲವಾಗುತ್ತವೆ ಎಂದು ಕಂಪನಿ ಕಳವಳ ವ್ಯಕ್ತಪಡಿಸಿದೆ. ಒಟ್ಟಾರೆಯಾಗಿ ಹೇಳುವುದಾದರೆ, ವಿಂಡೋಸ್ 11ರ ಅಪ್ಗ್ರೇಡ್ಗೆ ಗ್ರಾಹಕರನ್ನು ತರಾತುರಿ ಮಾಡದೆ, ಆನ್ಲೈನ್ ಸುರಕ್ಷತೆಯೊಂದಿಗೆ ಹಳೆಯ ಸಾಧನಗಳನ್ನೇ ಬಳಸಲು ಮೈಕ್ರೋಸಾಫ್ಟ್ ಉತ್ತಮ ಹಾಗೂ ಅನಿವಾರ್ಯ ಆಯ್ಕೆಯನ್ನೇ ಒದಗಿಸಿದೆ.
ಇದನ್ನೂ ಓದಿ : ಸಂಚಲನ ಸೃಷ್ಟಿಸಲು ಸಜ್ಜಾದ ‘JSW ಮೋಟರ್ಸ್’ : ಮುಂದಿನ 4 ವರ್ಷದಲ್ಲಿ 14 ಹೊಸ ಕಾರುಗಳ ಬಿಡುಗಡೆ!
