ಬೆಂಗಳೂರು : ರೈಲುಗಳಲ್ಲಿ ಸಂಚರಿಸುವವರಿಗೆ ಊಟ-ತಿಂಡಿ ಬೇಕಾಗುತ್ತದೆ. ಅದರಲ್ಲೂ, ದೂರದ ಊರುಗಳಿಗೆ ತೆರಳುವವರಿಗೆ ಊಟ-ತಿಂಡಿ ಬೇಕೇಬೇಕು. ಆದರೆ, ತುಂಬ ಜನರಿಗೆ ರೈಲುಗಳಲ್ಲಿ ಮಾರಾಟಗಾರರು ನೀಡುವ ಊಟ-ತಿಂಡಿ ತುಂಬ ಜನರಿಗೆ ಇಷ್ಟವಾಗುವುದಿಲ್ಲ. ಆದರೆ, ರೈಲ್ವೆ ಪ್ರಯಾಣಿಕರಿಗೆ ಇನ್ಮುಂದೆ ಇಂತಹ ಸಮಸ್ಯೆ ಇರುವುದಿಲ್ಲ. ಏಕೆಂದರೆ, ನಿಮಗೆ ಇಷ್ಟವಾಗುವ ರೆಸ್ಟೋರೆಂಟ್ ಗಳಿಂದಲೇ ಈಗ ಆನ್ ಲೈನ್ ಮೂಲಕ ಊಟ-ತಿಂಡಿ ಆರ್ಡರ್ ಮಾಡಬಹುದಾಗಿದೆ.
ಹೌದು.. ರೈಲ್ವೆ ಟಿಕೆಟ್ ಬುಕ್ಕಿಂಗ್ ಪ್ಲಾಟ್ ಫಾರ್ಮ್ ಆಗಿರುವ ಇಕ್ಸಿಗೋ (Ixigo) ಹಾಗೂ ‘ಕನ್ಫರ್ಮ್ ಟಿಕೆಟ್’ (Confrim tkt) ಕಂಪನಿಗಳು ಸ್ವಿಗ್ಗಿ ಜತೆ ಒಪ್ಪಂದ ಮಾಡಿಕೊಂಡಿವೆ. ಈ ಎರಡೂ ಆ್ಯಪ್ ಗಳ ಮೂಲಕ ರೈಲು ಪ್ರಯಾಣಿಕರು ಇನ್ನುಮುಂದೆ ಆನ್ ಲೈನ್ ನಲ್ಲಿ ಊಟ-ತಿಂಡಿ ಆರ್ಡರ್ ಮಾಡಬಹುದಾಗಿದೆ.
ದೇಶದ ಸುಮಾರು 160 ರೈಲು ನಿಲ್ದಾಣಗಳಲ್ಲಿರುವ 40 ಸಾವಿರ ರೆಸ್ಟೋರೆಂಟ್ ಗಳ ಮೂಲಕ ಪ್ರಯಾಣಿಕರು ತಮಗೆ ಇಷ್ಟವಾದ ಊಟ-ತಿಂಡಿಯನ್ನು ಆರ್ಡರ್ ಮಾಡಬಹುದಾಗಿದೆ. ಇಕ್ಸಿಗೋ ಹಾಗೂ ಕನ್ಫರ್ಮ್ ಟಿಕೆಟ್ ಆ್ಯಪ್ ಗಳಲ್ಲಿರುವ “ಫುಡ್ ಆನ್ ಟ್ರೈನ್” ಆಪ್ಶನ್ ಮೇಲೆ ಕ್ಲಿಕ್ ಮಾಡಬೇಕು. ಅಲ್ಲಿ ನಿಮಗೆ ಇಷ್ಟವಾಗುವ ರೆಸ್ಟೋರೆಂಟ್ ಗಳಿಂದ ತಿನಿಸುಗಳನ್ನು ಆರ್ಡರ್ ಮಾಡಬಹುದಾಗಿದೆ.
ನೀವು ರೈಲುಗಳಲ್ಲಿ ಪ್ರಯಾಣಿಸುವಾಗ ಮುಂದಿನ ನಿಲ್ದಾಣ ತಲುಪುವ 30 ನಿಮಿಷಗಳ ಮೊದಲು ಊಟ-ತಿಂಡಿ ಆರ್ಡರ್ ಮಾಡಬಹುದು. ನೀವು ರೈಲು ನಿಲ್ದಾಣಕ್ಕೆ ತಲುಪಿದ ಕೂಡಲೇ ನೀವು ಕುಳಿತಿರುವ ಸೀಟ್ ಬಳಿಯೇ ಬಂದು ಡೆಲಿವರಿ ಬಾಯ್ ಗಳು ಊಟ-ತಿಂಡಿಯನ್ನು ಸರಬರಾಜು ಮಾಡುತ್ತಾರೆ. ಆರ್ಡರ್ ಮಾಡಿದವರಿಗೆ ನಿಖರವಾಗಿ ಡೆಲಿವರಿ ಮಾಡಲಾಗುತ್ತದೆ. ಡೆಲಿವರಿ ಮಾಡಲು ಆಗದಿದ್ದರೆ ಪೂರ್ತಿ ಹಣವನ್ನು ರಿಫಂಡ್ ಮಾಡಲಾಗುತ್ತದೆ.
ಇದನ್ನೂ ಓದಿ : ವಿಜಯಪುರದಲ್ಲಿ ಅಮಾನವೀಯ ಘಟನೆ.. ನೋಡಲು ತನ್ನಂತಿಲ್ಲ ಎಂದು ನದಿಗೆ ತಳ್ಳಿ ಮಗನನ್ನೇ ಹತ್ಯೆಗೈದ ತಂದೆ!
