ಬೆಂಗಳೂರು : ಹ್ಯುಂಡೈ ಮೋಟಾರ್ಸ್ ತನ್ನ ನೂತನ 7 ಸೀಟರ್ ಎಲೆಕ್ಟ್ರಿಕ್ ಎಸ್ಯುವಿ ವಿನ್ಯಾಸದ ‘ನೈರಾ’ (Neira) ಪ್ರೊಟೊಟೈಪ್ ಅನ್ನು 2026 ರ ಗೈಕಿಂಡೋ ಇಂಡೋನೇಷ್ಯಾ ಇಂಟರ್ನ್ಯಾಷನಲ್ ಆಟೋ ಶೋ (GIIAS) ನಲ್ಲಿ ಅನಾವರಣಗೊಳಿಸಿದೆ. ಈ ಹೊಸ ಎಲೆಕ್ಟ್ರಿಕ್ ವಾಹನವು ಭಾರತದ ಬಿರುಸಿನಿಂದ ಬೆಳೆಯುತ್ತಿರುವ 3 ರೋ (ಮೂರು ಸಾಲು) ಎಂಪಿವಿ (MPV) ವಿಭಾಗದಲ್ಲಿ ಹೊಸ ಸಂಚಲನ ಮೂಡಿಸುವ ನಿರೀಕ್ಷೆಯಿದೆ. ಆಕರ್ಷಕ ವಿನ್ಯಾಸ ಹಾಗೂ ಕುಟುಂಬದ ಪ್ರಯಾಣಕ್ಕೆ ಪೂರಕವಾದ ವಿಶಾಲವಾದ ಸ್ಥಳಾವಕಾಶವನ್ನು ಹೊಂದಿರುವ ಈ ಪ್ರೊಟೊಟೈಪ್, ಭವಿಷ್ಯದಲ್ಲಿ ಭಾರತೀಯ ಮಾರುಕಟ್ಟೆಯನ್ನು ಪ್ರವೇಶಿಸುವ ಸಾಧ್ಯತೆಗಳು ದಟ್ಟವಾಗಿವೆ.
ಭಾರತೀಯ ಮಾರುಕಟ್ಟೆಯಲ್ಲಿ ಹ್ಯುಂಡೈನ ಹೊಸ ಹೆಜ್ಜೆ
ಸಾಮಾನ್ಯವಾಗಿ ಭಾರತದಲ್ಲಿ ಎಸ್ಯುವಿ ಮಾದರಿಯ ವಾಹನಗಳಿಗೆ ಹೆಚ್ಚು ಒತ್ತು ನೀಡುತ್ತಿದ್ದ ಹ್ಯುಂಡೈ, ಎಕ್ಸ್ಟರ್ನಿಂದ ಹಿಡಿದು ಅಲ್ಕಾಜರ್ವರೆಗಿನ ಜನಪ್ರಿಯ ಎಸ್ಯುವಿ ವಾಹನಗಳನ್ನು ಯಶಸ್ವಿಯಾಗಿ ಮಾರಾಟ ಮಾಡುತ್ತಿದೆ. ಇದುವರೆಗೂ ಎಂಪಿವಿಗಳ ಬಿಡುಗಡೆಯಿಂದ ಕೊಂಚ ದೂರವೇ ಉಳಿದಿದ್ದ ಸಂಸ್ಥೆಯು, ಇದೀಗ ‘ನೈರಾ’ ಮೂಲಕ ಹೊಸ ಮಾರುಕಟ್ಟೆಗೆ ಕಾಲಿಡುವ ದೃಢವಾದ ಮುನ್ಸೂಚನೆ ನೀಡಿದೆ. ಕಿಯಾ ಮೋಟಾರ್ಸ್ನ ಜನಪ್ರಿಯ ಸೊನೆಟ್, ಸೆಲ್ಟೋಸ್ ವಾಹನಗಳಿಗೆ ಪ್ರತಿಯಾಗಿ ಹ್ಯುಂಡೈ ಬಳಿ ವೆನ್ಯೂ ಹಾಗೂ ಕ್ರೆಟಾ ಇವೆ. ಅದೇ ರೀತಿ, ಕಿಯಾ ಕಾರೆನ್ಸ್ ಕ್ಲಾವಿಸ್ ಇವಿ (Carens Clavis EV) ಮಾದರಿಗೆ ಪ್ರಬಲ ಪ್ರತಿಸ್ಪರ್ಧಿಯಾಗಿ ನೈರಾ ಮಾರುಕಟ್ಟೆಗೆ ಪ್ರವೇಶಿಸಬಹುದಾಗಿದೆ. ಇದು ಕ್ರೆಟಾ ಎಲೆಕ್ಟ್ರಿಕ್ ವಾಹನಕ್ಕಿಂತ ಮೇಲಿನ ಶ್ರೇಣಿಯಲ್ಲಿ ಸ್ಥಾನ ಪಡೆಯಲಿದ್ದು, 20 ಲಕ್ಷ ರೂಪಾಯಿಗಿಂತ ಕಡಿಮೆ ಬೆಲೆಯಲ್ಲಿ ಮಾರುಕಟ್ಟೆಗೆ ಬಂದರೆ ವಿನ್ಫಾಸ್ಟ್ ವಿಎಫ್ ಎಂಪಿವಿ7 ಹಾಗೂ ಮಹೀಂದ್ರಾ ಎಕ್ಸ್ಇವಿ 9ಎಸ್ ವಾಹನಗಳಿಗೆ ತೀವ್ರ ಪೈಪೋಟಿ ನೀಡಲಿದೆ.
ಹ್ಯುಂಡೈ ನೈರಾ ವಾಹನದ ಆಕರ್ಷಕ ವಿನ್ಯಾಸ
ಹ್ಯುಂಡೈ ಸಂಸ್ಥೆಯು ನೈರಾವನ್ನು ಕುಟುಂಬಗಳ ಅಗತ್ಯಕ್ಕೆ ತಕ್ಕಂತೆ ವಿನ್ಯಾಸಗೊಳಿಸಲಾದ ಸುಸಜ್ಜಿತ 7 ಸೀಟರ್ ಎಲೆಕ್ಟ್ರಿಕ್ ವಾಹನ ಎಂದು ಬಣ್ಣಿಸಿದೆ. ವಾಹನದ ಉದ್ದವಾದ ರೂಫ್ಲೈನ್, ವಿಶಾಲವಾದ ಗಾಜಿನ ಕಿಟಕಿಗಳು ಹಾಗೂ ಮೂರು ಸಾಲಿನ ಆಸನಗಳ ವಿನ್ಯಾಸವು ಬಹುತೇಕ ಕಿಯಾ ಕಾರೆನ್ಸ್ ಕ್ಲಾವಿಸ್ ಇವಿ ಪ್ಲಾಟ್ಫಾರ್ಮ್ ಅನ್ನೇ ಹೋಲುತ್ತದೆ. ಆದರೂ, ಮುಂಭಾಗದಲ್ಲಿ ಮುಚ್ಚಿದ ಗ್ರಿಲ್, ಲಂಬವಾಗಿ ಜೋಡಿಸಲಾದ ಕನೆಕ್ಟೆಡ್ ಎಲ್ಇಡಿ ಹೆಡ್ಲ್ಯಾಂಪ್ಗಳು ಹಾಗೂ ಟೈಲ್ಲ್ಯಾಂಪ್ಗಳು ಹ್ಯುಂಡೈನ ಹೊಚ್ಚ ಹೊಸ ವಿನ್ಯಾಸದ ಶೈಲಿಯನ್ನು ಪ್ರತಿಬಿಂಬಿಸುತ್ತವೆ. ಡ್ಯುಯಲ್-ಟೋನ್ ಅಲಾಯ್ ವೀಲ್ಗಳು, ಕಪ್ಪು ಬಣ್ಣದ ವೀಲ್-ಆರ್ಚ್ ಕ್ಲಾಡಿಂಗ್, ರೂಫ್ ರೈಲ್ಗಳು ಹಾಗೂ ಹಿಂಭಾಗದ ಬಂಪರ್ನಲ್ಲಿರುವ ಬೆಳ್ಳಿ ಬಣ್ಣದ ದೊಡ್ಡ ವಿನ್ಯಾಸವು ನೈರಾಗೆ ಅಪ್ಪಟ ಎಸ್ಯುವಿ ಲುಕ್ ನೀಡಿದೆ. ಕಿಯಾ ಕಾರೆನ್ಸ್ ಕ್ಲಾವಿಸ್ ಒಟ್ಟಾರೆಯಾಗಿ ಎಂಪಿವಿಯಂತೆ ಗೋಚರಿಸಿದರೆ, ನೈರಾ ಹೆಚ್ಚು ಎಸ್ಯುವಿ ಶೈಲಿಯತ್ತ ವಾಲಿರುವುದನ್ನು ಕಾಣಬಹುದು.
ತಾಂತ್ರಿಕ ವೈಶಿಷ್ಟ್ಯಗಳು ಹಾಗೂ ನಿರೀಕ್ಷಿತ ಸಾಮರ್ಥ್ಯ
ಹ್ಯುಂಡೈ ಸಂಸ್ಥೆಯು ನೈರಾ ಇವಿಯ ಬ್ಯಾಟರಿ ಸಾಮರ್ಥ್ಯ ಹಾಗೂ ಮೈಲೇಜ್ ರೇಂಜ್ ಕುರಿತು ಯಾವುದೇ ಅಧಿಕೃತ ಮಾಹಿತಿಯನ್ನು ಇನ್ನೂ ಬಿಟ್ಟುಕೊಟ್ಟಿಲ್ಲ. ಆದಾಗ್ಯೂ, ಇದು ಕಿಯಾ ಕಾರೆನ್ಸ್ ಕ್ಲಾವಿಸ್ ಇವಿಯೊಂದಿಗೆ ಪವರ್ಟ್ರೇನ್ ಅನ್ನು ಹಂಚಿಕೊಳ್ಳುವುದು ಬಹುತೇಕ ಖಚಿತ ಎನ್ನಲಾಗಿದೆ. ಕಿಯಾ ಎಲೆಕ್ಟ್ರಿಕ್ ವಾಹನವು ಪ್ರಸ್ತುತ 42 kWh ಮತ್ತು 51.4 kWh ಬ್ಯಾಟರಿ ಆಯ್ಕೆಗಳಲ್ಲಿ ಲಭ್ಯವಿದ್ದು, ಕ್ರಮವಾಗಿ 404 ಕಿಲೋಮೀಟರ್ ಹಾಗೂ 490 ಕಿಲೋಮೀಟರ್ ರೇಂಜ್ (ARAI ಪ್ರಮಾಣಿತ) ಒದಗಿಸುತ್ತದೆ. ಇದೇ ತಂತ್ರಜ್ಞಾನ ನೈರಾಗೂ ಅನ್ವಯವಾದರೆ, ದೊಡ್ಡ ಬ್ಯಾಟರಿಯು 171 hp ಪವರ್ ಹಾಗೂ ಸಣ್ಣ ಬ್ಯಾಟರಿಯು 135 hp ಪವರ್ ಉತ್ಪಾದಿಸಬಲ್ಲದು. ಎರಡೂ ಮಾದರಿಗಳು 255 Nm ಟಾರ್ಕ್ ನೀಡುವ ನಿರೀಕ್ಷೆಯಿದೆ. ಪವರ್ಫುಲ್ ಆದ ದೊಡ್ಡ ಬ್ಯಾಟರಿ ಪ್ಯಾಕ್ ಹೊಂದಿರುವ ವಾಹನವು ಕೇವಲ 8.4 ಸೆಕೆಂಡುಗಳಲ್ಲಿ 0 ಯಿಂದ 100 ಕಿಲೋಮೀಟರ್ ವೇಗವನ್ನು ತಲುಪುವ ಸಾಮರ್ಥ್ಯ ಹೊಂದಿದೆ. ಇದಲ್ಲದೇ, ವಾಹನವು 4 ಹಂತದ ರಿಜೆನೆರೇಟಿವ್ ಬ್ರೇಕಿಂಗ್ ವ್ಯವಸ್ಥೆಯನ್ನು ಕೂಡ ಹೊಂದಿರಲಿದೆ ಎನ್ನಲಾಗಿದೆ.
ಚಾರ್ಜಿಂಗ್ ಆಯ್ಕೆಗಳು ಮತ್ತು ಭವಿಷ್ಯದ ನಿರೀಕ್ಷೆ
ಚಾರ್ಜಿಂಗ್ ವಿಷಯದಲ್ಲಿ ಈ ಎಲೆಕ್ಟ್ರಿಕ್ ವಾಹನವು 7.4 kW ಹಾಗೂ 11 kW ಸಾಮರ್ಥ್ಯದ ಎಸಿ ಚಾರ್ಜಿಂಗ್ ಆಯ್ಕೆಗಳೊಂದಿಗೆ ಒದಗಿಬರುವ ಸಾಧ್ಯತೆಯಿದೆ. 11 kW ಚಾರ್ಜರ್ ಬಳಸಿದಾಗ ಕೇವಲ 4 ಗಂಟೆ 45 ನಿಮಿಷಗಳಲ್ಲಿ ಶೇಕಡಾ 10 ರಿಂದ 100 ರಷ್ಟು ಚಾರ್ಜ್ ಆಗುವ ನಿರೀಕ್ಷೆಯಿದೆ. ಹ್ಯುಂಡೈ ಮತ್ತು ಕಿಯಾ ಸಂಸ್ಥೆಗಳು ಈ ಹಿಂದೆಯೂ ವಾಹನಗಳ ಬಿಡಿಭಾಗಗಳು ಹಾಗೂ ಪ್ಲಾಟ್ಫಾರ್ಮ್ ಅನ್ನು ಹಂಚಿಕೊಳ್ಳುವ ಮೂಲಕ ಮಾರುಕಟ್ಟೆಯಲ್ಲಿ ಯಶಸ್ಸು ಸಾಧಿಸಿವೆ. ಇದೀಗ ತ್ರೀ-ರೋ ಎಲೆಕ್ಟ್ರಿಕ್ ವಿಭಾಗದಲ್ಲೂ ಇದೇ ಮಾದರಿಯಲ್ಲಿ ನೈರಾ ಭಾರತೀಯ ರಸ್ತೆಗಿಳಿಯುವ ಮುನ್ಸೂಚನೆ ಇದೆ. ಇತ್ತೀಚಿನ ದಿನಗಳಲ್ಲಿ ಪರಿಸರ ಸ್ನೇಹಿ ಹಾಗೂ ಹೆಚ್ಚು ಆಸನಗಳಿರುವ ಕೌಟುಂಬಿಕ ವಾಹನಗಳಿಗೆ ಬೇಡಿಕೆ ಹೆಚ್ಚುತ್ತಿದ್ದು, ಹ್ಯುಂಡೈ ನೈರಾ ಬಿಡುಗಡೆಗೊಂಡರೆ ವಾಹನ ಪ್ರಿಯರ ನಿರೀಕ್ಷೆಗಳನ್ನು ಖಂಡಿತವಾಗಿಯೂ ತಲುಪಲಿದೆ.
ಇದನ್ನೂ ಓದಿ : ಭಾರತದ ಮಾರುಕಟ್ಟೆಗೆ ಲಗ್ಗೆಯಿಟ್ಟ iQOO Z11 Lite ; ಆಕರ್ಷಕ ರಿಯಾಯಿತಿ ಲಭ್ಯ!
