ವಾಷಿಂಗ್ಟನ್ : ಕೆನಡಾದಿಂದ ಅಮೆರಿಕಕ್ಕೆ ಅಕ್ರಮವಾಗಿ ಜನರನ್ನು ಸಾಗಿಸುತ್ತಿದ್ದ ಬೃಹತ್ ಮಾನವ ಕಳ್ಳಸಾಗಣೆ ಜಾಲವನ್ನು ಅಮೆರಿಕದ ನ್ಯಾಯಾಂಗ ಇಲಾಖೆ ಭೇದಿಸಿದೆ. ಈ ದಂಧೆಯ ನೇತೃತ್ವ ವಹಿಸಿದ್ದ 22 ವರ್ಷದ ಭಾರತೀಯ ಯುವಕ ಶಿವಮ್ ಎಂಬಾತ ಅಮೆರಿಕದ ಅಧಿಕಾರಿಗಳ ಮುಂದೆ ತಪ್ಪೊಪ್ಪಿಕೊಂಡಿದ್ದಾನೆ. 2024ರ ಅಕ್ಟೋಬರ್ನಿಂದ 2025ರ ಜೂನ್ವರೆಗೆ ಉತ್ತರ ಅಮೆರಿಕದ ಗಡಿ ಭಾಗದಲ್ಲಿ ಈತ ವ್ಯವಸ್ಥಿತವಾಗಿ ಈ ಅಕ್ರಮ ಚಟುವಟಿಕೆಯನ್ನು ನಡೆಸುತ್ತಿದ್ದ ಎನ್ನಲಾಗಿದೆ.
ನ್ಯಾಯಾಲಯಕ್ಕೆ ಸಲ್ಲಿಕೆಯಾಗಿರುವ ದಾಖಲೆಗಳ ಪ್ರಕಾರ, ಕೆನಡಾ ಗಡಿಗೆ ಬರುವ ಭಾರತೀಯ ಮೂಲದ ಅಕ್ರಮ ವಲಸಿಗರನ್ನು ವಾಹನಗಳ ಮೂಲಕ ಪಿಕಪ್ ಮಾಡುವುದು ಶಿವಮ್ನ ಪ್ರಮುಖ ಕೆಲಸವಾಗಿತ್ತು. ಹೀಗೆ ಕರೆತಂದವರನ್ನು ಉತ್ತರ ನ್ಯೂಯಾರ್ಕ್ನ ರಹಸ್ಯ ತಾಣಗಳಲ್ಲಿ ಅಥವಾ ಪ್ಲ್ಯಾಟ್ಸ್ಬರ್ಗ್ನ ಹೋಟೆಲ್ಗಳಲ್ಲಿ ಇರಿಸಲಾಗುತ್ತಿತ್ತು. ಇದಕ್ಕಾಗಿ ಈತ ಪ್ರತ್ಯೇಕ ಚಾಲಕರನ್ನು ನೇಮಿಸಿಕೊಂಡಿದ್ದಲ್ಲದೆ, ಯಶಸ್ವಿಯಾಗಿ ಗಡಿ ದಾಟಿಸಿದ ಪ್ರತಿ ವ್ಯಕ್ತಿಗೆ ಚಾಲಕರಿಗೆ ತಲಾ 100 ಡಾಲರ್ ಸಂಭಾವನೆ ನೀಡುತ್ತಿದ್ದ ಎಂಬ ಆಘಾತಕಾರಿ ವಿಷಯ ಬೆಳಕಿಗೆ ಬಂದಿದೆ.
ಸಿನಿಮೀಯ ಮಾದರಿಯಲ್ಲಿ ಬಂಧನ
2025ರ ಜನವರಿಯಲ್ಲಿ ನಡೆದ ಒಂದು ಘಟನೆಯು ಈ ದಂಧೆಯನ್ನು ಪತ್ತೆಹಚ್ಚಲು ಸಹಕಾರಿಯಾಯಿತು. ಕೆನಡಾದಿಂದ ಭಾರತ ಮತ್ತು ಬ್ರಿಟನ್ ಮೂಲದ 12 ಅಕ್ರಮ ವಲಸಿಗರನ್ನು ಅಮೆರಿಕಕ್ಕೆ ಸಾಗಿಸಲು ಶಿವಮ್ ಸಂಚು ರೂಪಿಸಿದ್ದ. ಅಮೆರಿಕದ ಗಡಿ ಭದ್ರತಾ ಪಡೆಗಳು ಅನುಮಾನಾಸ್ಪದವಾಗಿ ಚಲಿಸುತ್ತಿದ್ದ ಎರಡು ವಾಹನಗಳನ್ನು ತಡೆಯಲು ಪ್ರಯತ್ನಿಸಿದಾಗ, ವಾಹನಗಳು ಅತಿ ವೇಗವಾಗಿ ಪರಾರಿಯಾಗಲು ಯತ್ನಿಸಿದವು. ಈ ವೇಳೆ ಆ ವಾಹನಗಳನ್ನು ಪೊಲೀಸರು ರೋಚಕವಾಗಿ ಬೆನ್ನಟ್ಟಿದ್ದರು. ಆಗ ಒಂದು ವಾಹನ ರಸ್ತೆಯಿಂದ ಹೊರಬಿದ್ದು ನಿಂತರೆ, ಮತ್ತೊಂದನ್ನು ಮೂಯರ್ಸ್ ಎಂಬಲ್ಲಿ ತಡೆಹಿಡಿಯಲಾಯಿತು. ಈ ಕಾರ್ಯಾಚರಣೆಯಲ್ಲಿ ಅಕ್ರಮ ವಲಸೆ ಜಾಲ ಸಂಪೂರ್ಣವಾಗಿ ಬಯಲಾಯಿತು.
ಸೆಪ್ಟೆಂಬರ್ನಲ್ಲಿ ಶಿಕ್ಷೆಯ ಪ್ರಮಾಣ ಪ್ರಕಟ
ಆರ್ಥಿಕ ಲಾಭಕ್ಕಾಗಿ ಮಾನವ ಕಳ್ಳಸಾಗಣೆ ಮಾಡಿದ ಆರೋಪವನ್ನು ಶಿವಮ್ ಒಪ್ಪಿಕೊಂಡಿದ್ದಾನೆ. ಈ ಅಪರಾಧಕ್ಕಾಗಿ ಆತನಿಗೆ ಕನಿಷ್ಠ 5 ವರ್ಷದಿಂದ ಗರಿಷ್ಠ 15 ವರ್ಷಗಳವರೆಗೆ ಜೈಲು ಶಿಕ್ಷೆ ವಿಧಿಸುವ ಸಾಧ್ಯತೆಯಿದೆ. ಫೆಡರಲ್ ಜಿಲ್ಲಾ ನ್ಯಾಯಾಲಯದ ನ್ಯಾಯಾಧೀಶರು ಸೆಪ್ಟೆಂಬರ್ ತಿಂಗಳಲ್ಲಿ ಅಂತಿಮ ಶಿಕ್ಷೆಯ ಪ್ರಮಾಣವನ್ನು ಪ್ರಕಟಿಸಲಿದ್ದಾರೆ.
ಇದನ್ನೂ ಓದಿ : ಪತ್ನಿಯ ಪ್ರೇಮಿಯನ್ನು ಪಾರ್ಟಿಗೆ ಕರೆದು ಗಂಟಲು ಸೀಳಿ ಹತ್ಯೆ : ಬೆಚ್ಚಿಬಿದ್ದ ಮುಂಬೈ ಜನ!
