ನ್ಯೂಯಾರ್ಕ್ : ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಆರ್ಥಿಕ ವ್ಯವಹಾರಗಳ ಮಾಹಿತಿ ಇದೀಗ ಜಾಗತಿಕ ಹಣಕಾಸು ವಲಯದಲ್ಲಿ ಭಾರೀ ಸಂಚಲನ ಮೂಡಿಸಿದೆ. ಈ ವರ್ಷದ ಮೊದಲ 3 ತಿಂಗಳಲ್ಲಿ ಅಂದರೆ ಕೇವಲ 90 ದಿನಗಳ ಅವಧಿಯಲ್ಲಿ ಟ್ರಂಪ್ ಹಾಗೂ ಅವರ ಆರ್ಥಿಕ ಸಲಹೆಗಾರರು ಬರೋಬ್ಬರಿ 3,700ಕ್ಕೂ ಹೆಚ್ಚು ಷೇರು ಮಾರುಕಟ್ಟೆ ವಹಿವಾಟುಗಳನ್ನು ನಡೆಸಿರುವುದು ಬಹಿರಂಗವಾಗಿದೆ. ಷೇರು ಮಾರುಕಟ್ಟೆಯ ಇತಿಹಾಸದಲ್ಲೇ ಅತ್ಯಂತ ಅತಿರೇಕ ಎನ್ನಬಹುದಾದ ಈ ವಹಿವಾಟಿನ ಪ್ರಮಾಣ, ಸಮಯ ಮತ್ತು ಅದರ ಹಿಂದಿರುವ ಹಿತಾಸಕ್ತಿ ಸಂಘರ್ಷದ ಸಾಧ್ಯತೆಗಳು ವಾಲ್ ಸ್ಟ್ರೀಟ್ನ ಆರ್ಥಿಕ ತಜ್ಞರನ್ನು ದಿಗ್ಭ್ರಮೆಗೊಳಿಸಿದ್ದು, ವಾಷಿಂಗ್ಟನ್ ರಾಜಕಾರಣದಲ್ಲಿ ಹೊಸ ವಿವಾದಕ್ಕೆ ಕಾರಣವಾಗಿದೆ.
ಈ ಕುರಿತು ಬ್ಲೂಮ್ಬರ್ಗ್ ಸಂಸ್ಥೆ ವರದಿ ಮಾಡಿದ್ದು, ಅದಕ್ಕೆ ಸಂಬಂಧಿಸಿದ ದಾಖಲೆಗಳನ್ನೂ ಬಿಡುಗಡೆ ಮಾಡಿದೆ. ಈ ದಾಖಲೆಗಳ ಪ್ರಕಾರ, ಟ್ರಂಪ್ ಸರಾಸರಿ ದಿನಕ್ಕೆ 40ಕ್ಕೂ ಹೆಚ್ಚು ಷೇರು ವಹಿವಾಟುಗಳನ್ನು ನಡೆಸಿದ್ದಾರೆ. ಕಳೆದ 2025ರ ಕೊನೆಯ 3 ತಿಂಗಳಿಗೆ ಹೋಲಿಸಿದರೆ ಈ ಪ್ರಮಾಣದಲ್ಲಿ ಭಾರೀ ಜಿಗಿತ ಕಂಡುಬಂದಿದೆ. ಏಕೆಂದರೆ ಆ ಅವಧಿಯಲ್ಲಿ ಕೇವಲ 380 ವಹಿವಾಟುಗಳು ಮಾತ್ರ ನಡೆದಿದ್ದವು. ಅಮೆರಿಕದ ಪ್ರಭಾವಿ ತಂತ್ರಜ್ಞಾನ, ರಕ್ಷಣೆ, ಹಣಕಾಸು ಮತ್ತು ಮಾಧ್ಯಮ ಸಂಸ್ಥೆಗಳಲ್ಲಿ ಕೋಟ್ಯಂತರ ಡಾಲರ್ ಮೌಲ್ಯದ ವಹಿವಾಟುಗಳು ನಡೆದಿರುವುದು ಹೂಡಿಕೆ ತಜ್ಞರ ಹುಬ್ಬೇರಿಸುವಂತೆ ಮಾಡಿದೆ. ಟಟಲ್ ಕ್ಯಾಪಿಟಲ್ ಮ್ಯಾನೇಜ್ಮೆಂಟ್ನ ಸಿಇಒ ಮ್ಯಾಥ್ಯೂ ಟಟಲ್ ಸೇರಿದಂತೆ ಹಲವು ತಜ್ಞರು ಇದನ್ನು ಸಾಮಾನ್ಯ ಹೂಡಿಕೆ ಎನ್ನುವುದಕ್ಕಿಂತ “ಹೆಡ್ಜ್ ಫಂಡ್” ಮಾದರಿಯ ಬೃಹತ್ ವಹಿವಾಟು ಎಂದು ಬಣ್ಣಿಸಿದ್ದಾರೆ.
ಎನ್ವಿಡಿಯಾ, ಮೈಕ್ರೋಸಾಫ್ಟ್, ಬೋಯಿಂಗ್ ಷೇರುಗಳ ಮೇಲೆ ಹೂಡಿಕೆ
ಬಹಿರಂಗಗೊಂಡಿರುವ ಮಾಹಿತಿಯ ಪ್ರಕಾರ, ಟ್ರಂಪ್ ಈ ಅವಧಿಯಲ್ಲಿ ಎನ್ವಿಡಿಯಾ, ಒರಾಕಲ್, ಮೈಕ್ರೋಸಾಫ್ಟ್, ಬೋಯಿಂಗ್ ಮತ್ತು ಕಾಸ್ಟ್ಕೋ ಸಂಸ್ಥೆಗಳಲ್ಲಿ ತಲಾ ಕನಿಷ್ಠ 10 ಲಕ್ಷ ಯುಎಸ್ ಡಾಲರ್ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದಾರೆ. ಇದರೊಂದಿಗೆ ಅಮೆಜಾನ್, ಮೆಟಾ, ಉಬರ್, ನೆಟ್ಫ್ಲಿಕ್ಸ್ ಮತ್ತು ವಾರ್ನರ್ ಬ್ರದರ್ಸ್ ಡಿಸ್ಕವರಿಯಂತಹ ದೈತ್ಯ ಕಂಪನಿಗಳ ಷೇರುಗಳೂ ಈ ವಹಿವಾಟಿನ ಪಟ್ಟಿಯಲ್ಲಿವೆ. ಇದರಲ್ಲಿ ಅತ್ಯಂತ ಪ್ರಮುಖವಾಗಿ ಫೆ.10ರಂದು ಒಂದೇ ದಿನ ಟ್ರಂಪ್ ಅವರು ಮೈಕ್ರೋಸಾಫ್ಟ್, ಮೆಟಾ ಮತ್ತು ಅಮೆಜಾನ್ ಕಂಪನಿಗಳಲ್ಲಿದ್ದ ತಮ್ಮ 50 ಲಕ್ಷದಿಂದ 2.5 ಕೋಟಿ ಡಾಲರ್ ಮೌಲ್ಯದ ಷೇರುಗಳನ್ನು ಒಮ್ಮೆಗೇ ಮಾರಾಟ ಮಾಡಿರುವುದು ಭಾರಿ ಕುತೂಹಲ ಮೂಡಿಸಿದೆ.
ಈ ಹೂಡಿಕೆಗಳು ಅಮೆರಿಕ ಸರ್ಕಾರದ ನೀತಿಗಳಿಂದ ನೇರ ಪ್ರಭಾವಕ್ಕೊಳಗಾಗುವ ವಲಯಗಳಿಗೆ ಸೇರಿರುವುದರಿಂದ ವಿವಾದ ತೀವ್ರ ಸ್ವರೂಪ ಪಡೆದುಕೊಂಡಿದೆ. ಉದಾಹರಣೆಗೆ, ಎನ್ವಿಡಿಯಾ ಕಂಪನಿಯು ಚೀನಾಕ್ಕೆ ಎಐ ಚಿಪ್ ರಫ್ತು ಮಾಡಲು ವಾಷಿಂಗ್ಟನ್ನ ಅನುಮತಿ ಬೇಕು, ಹಾಗೆಯೇ ಬೋಯಿಂಗ್ ಸಂಸ್ಥೆಯು ಸಂಪೂರ್ಣವಾಗಿ ಅಮೆರಿಕ ಸರ್ಕಾರದ ರಕ್ಷಣಾ ಒಪ್ಪಂದಗಳ ಮೇಲೆ ಅವಲಂಬಿತವಾಗಿದೆ. ಅಧಿಕಾರದಲ್ಲಿರುವ ಅಧ್ಯಕ್ಷರೊಬ್ಬರು ಇಂತಹ ಕಂಪನಿಗಳ ಷೇರು ವ್ಯವಹಾರ ನಡೆಸುವುದು ನೈತಿಕವಾಗಿ ತಪ್ಪು ಎಂದು ವಿಶ್ಲೇಷಕರು ವಾದಿಸುತ್ತಿದ್ದಾರೆ.
ಇದಕ್ಕೆ ಪುಷ್ಟಿ ನೀಡುವಂತೆ, ಕೆಲ ತಿಂಗಳ ಹಿಂದೆ ಇರಾನ್ ಜೊತೆಗಿನ ಮಾತುಕತೆಯ ಪ್ರಗತಿಯ ಬಗ್ಗೆ ಟ್ರಂಪ್ ಸಾರ್ವಜನಿಕವಾಗಿ ಹೇಳಿಕೆ ನೀಡುವ ಕೆಲವೇ ಕ್ಷಣಗಳ ಮುನ್ನ ಷೇರು ಮಾರುಕಟ್ಟೆಯಲ್ಲಿ ತೈಲ ಬೆಲೆ ಕುಸಿತ ಹಾಗೂ ಅಮೆರಿಕದ ಷೇರು ಮಾರುಕಟ್ಟೆ ಏರಿಕೆಯ ಪರವಾಗಿ ಬೃಹತ್ ಬೆಟ್ಟಿಂಗ್ಗಳು ನಡೆದಿದ್ದವು. ಟ್ರಂಪ್ ಹೇಳಿಕೆಯ ಬೆನ್ನಲ್ಲೇ ಮಾರುಕಟ್ಟೆಯಲ್ಲಿ ನಿರೀಕ್ಷಿತ ಬದಲಾವಣೆಗಳಾಗಿದ್ದವು. ಟ್ರಂಪ್ ಅವರಿಗೆ ನೇರ ಸಂಬಂಧ ಇರುವ ಬಗ್ಗೆ ಯಾವುದೇ ಸಾಕ್ಷಿ ಸಿಗದಿದ್ದರೂ, ಸೂಕ್ಷ್ಮ ರಾಜಕೀಯ ವಿದ್ಯಮಾನಗಳ ಮಾಹಿತಿ ಮೊದಲೇ ಸೋರಿಕೆಯಾಗಿತ್ತೇ ಎಂಬ ಸಂಶಯ ದಟ್ಟವಾಗಿದೆ. ಇದರೊಂದಿಗೆ ಟ್ರಂಪ್ ಅಳಿಯ ಜೇರ್ಡ್ ಕುಶ್ನರ್ ಅವರು ಗಲ್ಫ್ ರಾಷ್ಟ್ರಗಳ ಹೂಡಿಕೆ ನಿಧಿಗಳೊಂದಿಗೆ ಹೊಂದಿರುವ ಆರ್ಥಿಕ ನಂಟು ಕೂಡ ಈಗ ಜಾಗತಿಕ ಮಟ್ಟದಲ್ಲಿ ತೀವ್ರ ನಿಗಾಕ್ಕೆ ಒಳಗಾಗಿದೆ.
ಶ್ವೇತಭವನ ನೀಡಿದ ಸ್ಪಷ್ಟನೆ ಏನು?
ಈ ಎಲ್ಲಾ ಆರೋಪಗಳನ್ನು ಶ್ವೇತಭವನ ಹಾಗೂ ಟ್ರಂಪ್ ಆರ್ಗನೈಸೇಶನ್ ಕಟುವಾಗಿ ನಿರಾಕರಿಸಿವೆ. ಶ್ವೇತಭವನದ ವಕ್ತಾರರು ಪ್ರತಿಕ್ರಿಯಿಸಿ, “ಟ್ರಂಪ್ ಅವರು ಯಾವಾಗಲೂ ಅಮೆರಿಕದ ಸಾರ್ವಜನಿಕರ ಹಿತಾಸಕ್ತಿಯಿಂದ ಮಾತ್ರ ಕೆಲಸ ಮಾಡುತ್ತಾರೆ ಮತ್ತು ಇಲ್ಲಿ ಯಾವುದೇ ಹಿತಾಸಕ್ತಿ ಸಂಘರ್ಷ ನಡೆದಿಲ್ಲ” ಎಂದು ಸಮರ್ಥಿಸಿಕೊಂಡಿದ್ದಾರೆ. ಟ್ರಂಪ್ ಅವರ ವೈಯಕ್ತಿಕ ಹೂಡಿಕೆಗಳನ್ನು ಹೊರಗಿನ ಹಣಕಾಸು ಸಂಸ್ಥೆಗಳು ಸ್ವತಂತ್ರವಾಗಿ ನಿರ್ವಹಿಸುತ್ತವೆ ಮತ್ತು ಇದರಲ್ಲಿ ಟ್ರಂಪ್ ಕುಟುಂಬದ ಹಸ್ತಕ್ಷೇಪವಿಲ್ಲ ಎಂದು ಸಂಸ್ಥೆ ತಿಳಿಸಿದೆ. ಕೆಲವು ವರದಿಗಳು ನಿಗದಿತ ಸಮಯದ ನಂತರ ಸಲ್ಲಿಕೆಯಾಗಿದ್ದರೂ, ಅದಕ್ಕೆ ಕಾನೂನುಬದ್ಧ ಅತ್ಯಲ್ಪ ದಂಡವನ್ನು ಪಾವತಿಸಲಾಗಿದೆ ಎಂದು ಹೇಳಲಾಗಿದೆ.
ಆದಾಗ್ಯೂ, ಈ ಹಿಂದೆ ಜಾರ್ಜ್ ಹೆಚ್.ಡಬ್ಲ್ಯೂ. ಬುಷ್ ಮತ್ತು ಬಿಲ್ ಕ್ಲಿಂಟನ್ ಅವರಂತಹ ಮಾಜಿ ಅಧ್ಯಕ್ಷರು ಹಿತಾಸಕ್ತಿ ಸಂಘರ್ಷದ ಅಪವಾದ ಮುಚ್ಚಲು ತಮ್ಮ ಸಂಪತ್ತನ್ನು ‘ಬ್ಲೈಂಡ್ ಟ್ರಸ್ಟ್’ಗಳಿಗೆ ವಹಿಸುತ್ತಿದ್ದರು. ಆದರೆ ಟ್ರಂಪ್ ಆ ಮಾದರಿ ಅನುಸರಿಸದಿರುವುದು, ಅಮೆರಿಕದ ಅಧ್ಯಕ್ಷರೊಬ್ಬರು ಸರ್ಕಾರಿ ನೀತಿಗಳಿಂದ ಲಾಭ ಪಡೆಯುವ ಕಂಪನಿಗಳ ಷೇರು ವ್ಯವಹಾರದಲ್ಲಿ ತೊಡಗಬಹುದೇ ಎಂಬ ಹೊಸ ರಾಜಕೀಯ ಮತ್ತು ಕಾನೂನಾತ್ಮಕ ಚರ್ಚೆಯನ್ನು ವಾಷಿಂಗ್ಟನ್ನಲ್ಲಿ ಹುಟ್ಟುಹಾಕಿದೆ.
ಇದನ್ನೂ ಓದಿ : ಬಂಧಿತ ಉದ್ಯಮಿ ಕೃಪಲಾನಿ ವಿರುದ್ಧ ಮತ್ತೊಂದು FIR
