ನವದೆಹಲಿ: ಭಾರತೀಯ ಮಾರುಕಟ್ಟೆಯಲ್ಲಿ ಏಕಸ್ವಾಮ್ಯ ಹಾಗೂ ಅನಾರೋಗ್ಯಕರ ಸ್ಪರ್ಧೆಗೆ ಕಡಿವಾಣ ಹಾಕುವ ‘ಭಾರತೀಯ ಸ್ಪರ್ಧಾ ಆಯೋಗ’ (CCI) ಇತ್ತೀಚಿನ ವರ್ಷಗಳಲ್ಲಿ ದೇಶದ ಕಾರ್ಪೊರೇಟ್ ಕಂಪನಿಗಳ ಪಾಲಿಗೆ ಅತ್ಯಂತ ಪ್ರಬಲ ನಿಯಂತ್ರಕವಾಗಿ ಹೊರಹೊಮ್ಮಿದೆ. ಕೇವಲ ಕಾನೂನು ಇಲಾಖೆಗಳಿಗೆ ಸೀಮಿತವಾಗಿದ್ದ ಸಿಸಿಐ ನಿಯಮಗಳು, ಈಗ ಪ್ರಮುಖ ಕಂಪನಿಗಳ ಆಡಳಿತ ಮಂಡಳಿಗಳ ಗಂಭೀರ ಚರ್ಚೆಯ ವಿಷಯವಾಗಿ ಮಾರ್ಪಟ್ಟಿವೆ. ಸ್ಪರ್ಧಾತ್ಮಕ ಕಾನೂನು ತಜ್ಞರ ಅಂಕಿ-ಅಂಶಗಳ ಪ್ರಕಾರ, ಕಳೆದ ಐದು ಹಣಕಾಸು ವರ್ಷಗಳಲ್ಲಿ ಸಿಸಿಐ ವಿವಿಧ 54 ಪ್ರಕರಣಗಳಲ್ಲಿ ಒಟ್ಟು 4,225.83 ಕೋಟಿ ರೂ.ಗಳ ಭಾರಿ ಮೊತ್ತದ ದಂಡವನ್ನು ವಿಧಿಸುವ ಮೂಲಕ ಕಾರ್ಪೊರೇಟ್ ಸಂಸ್ಥೆಗಳಿಗೆ ಬಿಸಿ ಮುಟ್ಟಿಸಿದೆ.
ವರ್ಷದಿಂದ ವರ್ಷಕ್ಕೆ ದಂಡದ ಪ್ರಮಾಣ ಹೆಚ್ಚಳ
2021ರ ಹಣಕಾಸು ವರ್ಷದಲ್ಲಿ ಕೇವಲ 1.34 ಕೋಟಿ ರೂ. ದಂಡ ವಿಧಿಸಿದ್ದ ಆಯೋಗ, 2022ರ ಹಣಕಾಸು ವರ್ಷದಲ್ಲಿ ಬರೋಬ್ಬರಿ 1,335.77 ಕೋಟಿ ರೂ. ದಂಡ ವಿಧಿಸಿತ್ತು. ಇನ್ನು 2023ರ ಹಣಕಾಸು ವರ್ಷದಲ್ಲಂತೂ ಗೂಗಲ್, ಮೇಕ್ಮೈಟ್ರಿಪ್ ಮತ್ತು ಓಯೋನಂತಹ ಪ್ರಮುಖ ಡಿಜಿಟಲ್ ಸಂಸ್ಥೆಗಳ ಮೇಲಿನ ಕ್ರಮದಿಂದಾಗಿ ದಾಖಲೆಯ 2,672.48 ಕೋಟಿ ರೂ. ದಂಡ ಸಂಗ್ರಹಿಸಿತ್ತು. ತದನಂತರ, 2024ರಲ್ಲಿ 2.55 ಕೋಟಿ ರೂ.ಗೆ ಇಳಿಕೆಯಾಗಿದ್ದ ದಂಡದ ಪ್ರಮಾಣ, 2025ರ ಹಣಕಾಸು ವರ್ಷದಲ್ಲಿ ವಾಟ್ಸಾಪ್ ಗೌಪ್ಯತಾ ನೀತಿ ಹಿನ್ನೆಲೆಯಲ್ಲಿ ಮೆಟಾ (Meta) ಸಂಸ್ಥೆಗೆ ವಿಧಿಸಿದ ದಂಡವೂ ಸೇರಿದಂತೆ ಒಟ್ಟು 213.69 ಕೋಟಿಗೆ ಏರಿಕೆಯಾಗಿದೆ.
ಡಿಜಿಟಲ್ ಮಾರುಕಟ್ಟೆ ಮತ್ತು ಪ್ರಮುಖ ವಲಯಗಳ ಮೇಲೆ ಕಣ್ಣು
ಸಿಸಿಐ ಇತ್ತೀಚಿನ ದಿನಗಳಲ್ಲಿ ಕೇವಲ ಸಿಮೆಂಟ್ ಅಥವಾ ಆಟೋಮೊಬೈಲ್ನಂತಹ ಸಾಂಪ್ರದಾಯಿಕ ಉದ್ಯಮಗಳ ಒಕ್ಕೂಟಗಳ ಮೇಲಷ್ಟೇ ಅಲ್ಲದೆ, ಡಿಜಿಟಲ್ ಮಾರುಕಟ್ಟೆ ಹಾಗೂ ಆನ್ಲೈನ್ ಜಾಹೀರಾತು ಕ್ಷೇತ್ರಗಳ ಮೇಲೆಯೂ ತೀವ್ರ ನಿಗಾ ಇರಿಸಿದೆ. ಮಾಹಿತಿ ತಂತ್ರಜ್ಞಾನ, ಹಣಕಾಸು ಸೇವೆಗಳು, ಆರೋಗ್ಯ ಮತ್ತು ಫಾರ್ಮಾಸ್ಯುಟಿಕಲ್ಸ್ ವಲಯಗಳು ಸಿಸಿಐನ ಪ್ರಮುಖ ತನಿಖಾ ವ್ಯಾಪ್ತಿಗೆ ಒಳಪಟ್ಟಿವೆ. ಕಂಪನಿಗಳ ಜಾಗತಿಕ ವಹಿವಾಟನ್ನು ಆಧರಿಸಿ ದಂಡದ ಗರಿಷ್ಠ ಮಿತಿಯನ್ನು ನಿರ್ಧರಿಸುವ ಹೊಸ ನಿಯಮಗಳು ಜಾರಿಗೆ ಬಂದಿರುವುದರಿಂದ, ಸಿಸಿಐನ ಈ ಕಠಿಣ ಕ್ರಮಗಳು ಕಂಪನಿಗಳ ವ್ಯಾಪಾರ ತಂತ್ರಗಳ ಮೇಲೆಯೇ ನೇರ ಪರಿಣಾಮ ಬೀರುತ್ತಿವೆ.
ಕಡ್ಡಾಯವಾದ ನಿಯಮ ಪಾಲನೆ ಮತ್ತು ಉದ್ಯಮ ವಲಯದ ಆತಂಕಗಳು
ಸಿಸಿಐನ ಈ ಆಕ್ರಮಣಕಾರಿ ನಡೆಗಳಿಂದಾಗಿ ಈಗ ಕಾರ್ಪೊರೇಟ್ ಕಂಪನಿಗಳು ತಮ್ಮ ವಿತರಕರ ಒಪ್ಪಂದಗಳು, ಬೆಲೆ ನಿಗದಿ ಪ್ರಕ್ರಿಯೆ ಹಾಗೂ ದತ್ತಾಂಶ ನಿರ್ವಹಣಾ ಪದ್ಧತಿಗಳನ್ನು ಮರುಪರಿಶೀಲಿಸುತ್ತಿವೆ. ಕೇವಲ ಆರ್ಥಿಕ ನಷ್ಟ ಮಾತ್ರವಲ್ಲದೆ, ಕಾನೂನು ಹೋರಾಟದ ವೆಚ್ಚ, ಮಾರುಕಟ್ಟೆಯಲ್ಲಿನ ಸಾಂಸ್ಥಿಕ ಗೌರವಕ್ಕೆ ಧಕ್ಕೆ ಮತ್ತು ವ್ಯವಹಾರದ ಮೇಲಾಗುವ ನಕಾರಾತ್ಮಕ ಪರಿಣಾಮಗಳಿಗೆ ಕಂಪನಿಗಳು ಹೆದರುತ್ತಿವೆ. ಹೀಗಾಗಿ, ಹಲವು ಸಂಸ್ಥೆಗಳು ಮುಂಜಾಗ್ರತಾ ಕ್ರಮವಾಗಿ ಆಂತರಿಕ ತಪಾಸಣೆ ಹಾಗೂ ‘ಡಾನ್ ರೈಡ್ಸ್’ ಎದುರಿಸಲು ಸಿದ್ಧತೆ ಮಾಡಿಕೊಳ್ಳುತ್ತಿವೆ.
ಆದಾಗ್ಯೂ, ಸಿಸಿಐ ವಿಧಿಸುವ ಬಹುಪಾಲು ದೊಡ್ಡ ಮೊತ್ತದ ದಂಡಗಳು ಮೇಲ್ಮನವಿ ನ್ಯಾಯಾಧಿಕರಣಗಳಲ್ಲಿ ಕಾನೂನು ಸಂಘರ್ಷಕ್ಕೆ ಸಿಲುಕಿ ತಡೆಯಾಜ್ಞೆ ಪಡೆಯುತ್ತಿರುವುದರಿಂದ, ಅಂತಿಮವಾಗಿ ಎಷ್ಟು ದಂಡ ವಸೂಲಿಯಾಗುತ್ತದೆ ಎಂಬ ಗೊಂದಲವೂ ಉದ್ಯಮ ವಲಯದಲ್ಲಿದೆ. ಸಿಸಿಐನ ಈ ಕಠಿಣ ನಿಲುವು ಮಾರುಕಟ್ಟೆಯಲ್ಲಿ ನ್ಯಾಯೋಚಿತ ಸ್ಪರ್ಧೆಯನ್ನು ಉತ್ತೇಜಿಸುತ್ತಿದ್ದರೂ, ಕಂಪನಿಗಳ ವಿಲೀನ ಮತ್ತು ಸ್ವಾಧೀನ ಪ್ರಕ್ರಿಯೆಗಳ ಅನುಮೋದನೆಗೆ ತೆಗೆದುಕೊಳ್ಳುವ ದೀರ್ಘಾವಧಿ ಉದ್ಯಮ ವಲಯದಲ್ಲಿ ಹೊಸ ಅನಿಶ್ಚಿತತೆಯನ್ನು ಮೂಡಿಸಿದೆ.
ಇದನ್ನೂ ಓದಿ : ಸುಹ್ರಾವರ್ದಿ ಅವೆನ್ಯೂ ಮರುನಾಮಕರಣ : ಕೊಲ್ಕತ್ತಾ ದಂಗೆಯ ಇತಿಹಾಸ ಕೆದಕಿದ ಬಿಜೆಪಿ, ತಪ್ಪು ಸರಿಪಡಿಸಿದ ಟಿಎಂಸಿ
