ನವದೆಹಲಿ : ಇನ್ನು ಮುಂದೆ ಇತರೆ ಆಹಾರ ಪದಾರ್ಥಗಳ ಮಾದರಿಯಲ್ಲೇ ನೀವು ಬಳಸುವಂತಹ ಸೋಪು, ಶಾಂಪೂ, ಟೂತ್‌ಪೇಸ್ಟ್ ಹಾಗೂ ಇತರ ಪ್ರಸಾದನ (ಕಾಸ್ಮೆಟಿಕ್ಸ್) ಸಾಮಾಗ್ರಿಗಳನ್ನು ಖರೀದಿಸುವಾಗಲೇ ಅವು ಶಾಕಾಹಾರವೋ, ಮಾಂಸಾಹಾರವೋ ಎಂಬುದನ್ನು ಸುಲಭವಾಗಿ ಪತ್ತೆಹಚ್ಚಬಹುದು.
ದೈನಂದಿನ ಬಳಕೆಯ ಸೌಂದರ್ಯವರ್ಧಕ ಹಾಗೂ ಶೌಚಾಲಯ ಸಾಮಗ್ರಿಗಳ (ಟಾಯ್ಲೆಟ್ರೀಸ್) ಪ್ಯಾಕೇಜಿಂಗ್ ಮೇಲೆ ಸಸ್ಯಾಹಾರಿ ಮತ್ತು ಮಾಂಸಾಹಾರಿ ಮೂಲವನ್ನು ಸೂಚಿಸುವ ಚಿಹ್ನೆಗಳನ್ನು ಕಡ್ಡಾಯಗೊಳಿಸಿ ಕೇಂದ್ರ ಸರ್ಕಾರ ಹೊಸ ನಿಯಮವನ್ನು ಜಾರಿಗೆ ತಂದಿದೆ. ಗ್ರಾಹಕರು ತಮಗೆ ಬೇಕಾದ ಉತ್ಪನ್ನಗಳ ಮೂಲವನ್ನು ಸುಲಭವಾಗಿ ಗುರುತಿಸಲು ನೆರವಾಗುವಂತೆ ಈ ಮಹತ್ವದ ನಿರ್ಧಾರ ಕೈಗೊಳ್ಳಲಾಗಿದೆ.
ಹಸಿರು ಮತ್ತು ಕೆಂಪು ಚುಕ್ಕಿ ಗುರುತು ಕಡ್ಡಾಯ
ಕೇಂದ್ರ ಗ್ರಾಹಕ ವ್ಯವಹಾರಗಳ ಸಚಿವಾಲಯವು ‘ಕಾನೂನು ಮಾಪನಶಾಸ್ತ್ರ (ಪ್ಯಾಕೇಜ್ಡ್ ಸರಕುಗಳು) ನಿಯಮಗಳು, 2011’ಕ್ಕೆ ತಿದ್ದುಪಡಿ ತರುವ ಮೂಲಕ ಈ ಹೊಸ ಮಾರ್ಗಸೂಚಿಯನ್ನು ಪ್ರಕಟಿಸಿದೆ. ಈ ತಿದ್ದುಪಡಿ ನಿಯಮಗಳು ಸೋಮವಾರದಿಂದಲೇ ಜಾರಿಗೆ ಬಂದಿವೆ. ಹೊಸ ನಿಯಮದ ಪ್ರಕಾರ, ಸಸ್ಯಾಹಾರಿ ಪದಾರ್ಥಗಳಿಂದ ತಯಾರಿಸಿದ ಉತ್ಪನ್ನಗಳ ಪ್ಯಾಕೆಟ್ ಮೇಲ್ಭಾಗದಲ್ಲಿ ‘ಹಸಿರು ಚುಕ್ಕಿ’ (Green Dot) ಹಾಗೂ ಮಾಂಸಾಹಾರಿ ಅಥವಾ ಪ್ರಾಣಿಜನ್ಯ ಪದಾರ್ಥಗಳನ್ನು ಒಳಗೊಂಡ ಉತ್ಪನ್ನಗಳ ಮೇಲೆ ‘ಕೆಂಪು ಅಥವಾ ಕಂದು ಚುಕ್ಕಿ’ (Red/Brown Dot) ಮುದ್ರಿಸುವುದು ಕಡ್ಡಾಯವಾಗಿದೆ.
ಪ್ಯಾಕೆಟ್‌ನ ಮೇಲ್ಭಾಗದಲ್ಲೇ ಎದ್ದು ಕಾಣಲಿದೆ ಚಿಹ್ನೆ
ಉತ್ಪನ್ನಗಳ ಪ್ರಮುಖ ಪ್ರದರ್ಶನ ಭಾಗದ (Principal Display Panel) ತುದಿಯಲ್ಲೇ ಅಂದರೆ ಪ್ಯಾಕೆಟ್‌ನ ಎದುರು ಭಾಗದಲ್ಲೇ ಈ ಚಿಹ್ನೆಗಳನ್ನು ಪ್ರಮುಖವಾಗಿ ಮುದ್ರಿಸಬೇಕು ಎಂದು ಸ್ಪಷ್ಟಪಡಿಸಲಾಗಿದೆ. ಇದರಿಂದಾಗಿ ಗ್ರಾಹಕರು ಅಂಗಡಿಗಳಲ್ಲಿ ವಸ್ತುಗಳನ್ನು ಖರೀದಿಸುವಾಗ ಶ್ರಮವಿಲ್ಲದೆ, ಕೇವಲ ಒಂದು ನೋಟದಲ್ಲಿಯೇ ಆ ಉತ್ಪನ್ನವು ವೆಜ್ ಅಥವಾ ನಾನ್-ವೆಜ್ ಎಂಬುದನ್ನು ಖಚಿತಪಡಿಸಿಕೊಳ್ಳಬಹುದು. ಸೋಪು, ಶಾಂಪೂ, ಟೂತ್‌ಪೇಸ್ಟ್, ಕ್ರೀಮ್‌ಗಳು ಹಾಗೂ ಇತರೆ ದಿನಬಳಕೆಯ ಪ್ರಸಾಧನ ಸಾಮಗ್ರಿಗಳು ಈ ನಿಯಮದ ವ್ಯಾಪ್ತಿಗೆ ಬರಲಿವೆ ಎಂದು ಸರ್ಕಾರ ತಿಳಿಸಿದೆ.
ಇದನ್ನೂ ಓದಿ : ಡಿಗ್ರಿ ಮುಗಿಸಿದವರಿಗೆ ಗುಡ್ ನ್ಯೂಸ್ : IIMBಯಲ್ಲಿ ಹಾಸ್ಟೆಲ್ ಹುದ್ದೆಗಳ ನೇಮಕಾತಿ
