ಬೀಜಿಂಗ್ : ಅಸಾಧ್ಯವಾದುದನ್ನು ಸಾಧ್ಯವಾಗಿಸುವ ಮೂಲಕ ಚೀನಾ ಮತ್ತೊಮ್ಮೆ ತನ್ನ ಪ್ರಚಂಡ ಎಂಜಿನಿಯರಿಂಗ್ ಸಾಮರ್ಥ್ಯವನ್ನು ಜಗತ್ತಿಗೆ ತೋರಿಸಿದೆ. ಚೀನಾದ ನೈಋತ್ಯ ಭಾಗದಲ್ಲಿರುವ ಪ್ರಮುಖ ಕೈಗಾರಿಕಾ ಮಹಾನಗರವಾದ ಚಾಂಗ್ಕಿಂಗ್ನಲ್ಲಿ ವಿಶ್ವದ ಅತಿ ದೊಡ್ಡ ರೈಲ್ವೆ ನಿಲ್ದಾಣವಾದ ‘ಚಾಂಗ್ಕಿಂಗ್ ಈಸ್ಟ್ ರೈಲ್ವೆ ಸ್ಟೇಷನ್‘ ಅನ್ನು ಕೇವಲ 38 ತಿಂಗಳ ದಾಖಲೆಯ ಅವಧಿಯಲ್ಲಿ ನಿರ್ಮಿಸಲಾಗಿದೆ.
ಇತ್ತೀಚೆಗೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರೊಂದಿಗೆ ಚೀನಾ ಪ್ರವಾಸ ಕೈಗೊಂಡಿದ್ದ ಪ್ರಮುಖ ಉದ್ಯಮಿ ಎಲಾನ್ ಮಸ್ಕ್, ಈ ನಿಲ್ದಾಣದ ಅದ್ಭುತ ನಿರ್ಮಾಣದ ವಿಡಿಯೋವನ್ನು ಸಾಮಾಜಿಕ ಜಾಲತಾಣ ‘ಎಕ್ಸ್’ನಲ್ಲಿ ಹಂಚಿಕೊಳ್ಳುವ ಮೂಲಕ ಚೀನಾದ ವೇಗಕ್ಕೆ ಬೆರಗಾಗಿದ್ದಾರೆ. ಸಾಮಾನ್ಯವಾಗಿ ಇಂತಹ ಬೃಹತ್ ಮೂಲಸೌಕರ್ಯ ಯೋಜನೆಗಳನ್ನು ಪೂರ್ಣಗೊಳಿಸಲು ಪ್ರಪಂಚದ ಇತರ ದೇಶಗಳು ದಶಕಗಳ ಕಾಲ ಪರದಾಡುತ್ತವೆ. ಆದರೆ ಚೀನಾ ತಂತ್ರಜ್ಞಾನ ಲೋಕದಲ್ಲಿ ಕ್ರಾಂತಿ ಸೃಷ್ಟಿಸಿ, ರೊಬೋಟ್ಗಳ ಸೈನ್ಯವನ್ನು ಬಳಸಿಕೊಂಡು 1.22 ಮಿಲಿಯನ್ ಚದರ ಮೀಟರ್ ವಿಸ್ತೀರ್ಣದ ಈ ಬೃಹತ್ ನಿಲ್ದಾಣವನ್ನು ಕಣ್ಣುಮುಚ್ಚಿ ತೆರೆಯುವುದರೊಳಗೆ ಕಟ್ಟಿ ಮುಗಿಸಿದೆ.
1960ರ ದಶಕದಲ್ಲಿ ಚೀನಾದ ಕಮ್ಯುನಿಸ್ಟ್ ನಾಯಕ ಮಾವೋ ಝೆಡಾಂಗ್ ಅವರು ‘ಥರ್ಡ್ ಫ್ರಂಟ್ ಕ್ಯಾಂಪೇನ್’ ಎಂಬ ಬೃಹತ್ ಕೈಗಾರಿಕೀಕರಣ ಯೋಜನೆಯನ್ನು ರೂಪಿಸಿದ್ದರು. ಅಮೆರಿಕದ ವೈಮಾನಿಕ ದಾಳಿ ಅಥವಾ ಸೋವಿಯತ್ ಒಕ್ಕೂಟದ ಆಕ್ರಮಣದಿಂದ ದೇಶದ ರಕ್ಷಣಾ ಮತ್ತು ಕೈಗಾರಿಕಾ ಮೂಲಸೌಕರ್ಯಗಳನ್ನು ರಕ್ಷಿಸಲು, ಕರಾವಳಿ ಪ್ರದೇಶಗಳಲ್ಲಿದ್ದ ಉದ್ಯಮಗಳನ್ನು ದೇಶದ ಒಳಭಾಗದ ಸುರಕ್ಷಿತ ಪ್ರದೇಶಗಳಿಗೆ ಸ್ಥಳಾಂತರಿಸುವುದು ಈ ಯೋಜನೆಯ ಉದ್ದೇಶವಾಗಿತ್ತು. ಇದರ ನೇರ ಲಾಭ ಪಡೆದ ಚಾಂಗ್ಕಿಂಗ್, ಇಂದು 440 ಬಿಲಿಯನ್ ಡಾಲರ್ಗಿಂತಲೂ ಹೆಚ್ಚಿನ ಜಿಡಿಪಿ ಹೊಂದಿರುವ ಚೀನಾದ ಅತ್ಯಂತ ಶಕ್ತಿಶಾಲಿ ಆರ್ಥಿಕ ಮತ್ತು ಕೈಗಾರಿಕಾ ಕೇಂದ್ರವಾಗಿ ಬೆಳೆದಿದೆ. ಅಪಾರ್ಟ್ಮೆಂಟ್ಗಳ ಮಧ್ಯದಿಂದಲೇ ಮೆಟ್ರೋ ರೈಲುಗಳು ಹಾದುಹೋಗುವ ಈ ರೋಮಾಂಚಕ ನಗರದಲ್ಲಿ, ಹಳೆಯ ನಿಲ್ದಾಣಗಳ ಮೇಲಿನ ದಟ್ಟಣೆಯನ್ನು ಕಡಿಮೆ ಮಾಡಲು ಈ ಹೊಸ ಬೃಹತ್ ನಿಲ್ದಾಣವನ್ನು ಮೇ 2025 ರಲ್ಲಿ ಸಾರ್ವಜನಿಕ ಬಳಕೆಗೆ ಮುಕ್ತಗೊಳಿಸಲಾಗಿದೆ.
ಹೊಸ ಇತಿಹಾಸ ಸೃಷ್ಟಿಸಿದ ರೊಬೋಟ್ಗಳ ಮಹಾಸೈನ್ಯ
ಚೀನಾದ ಸರ್ಕಾರಿ ಮಾಧ್ಯಮಗಳು ವರದಿ ಮಾಡಿರುವ ಪ್ರಕಾರ, ಮೇ 2022 ರಲ್ಲಿ ನೀಲನಕ್ಷೆ ಸಿದ್ಧವಾದ ನಂತರ ಕೇವಲ 38 ತಿಂಗಳಲ್ಲಿ ಈ ಯೋಜನೆ ಪೂರ್ಣಗೊಳ್ಳಲು ಕಾರಣ ಅಲ್ಲಿ ನಡೆದ ‘ರೊಬೋಟ್ ಕ್ರಾಂತಿ’. ತೀವ್ರ ಗುಡ್ಡಗಾಡು ಪ್ರದೇಶ ಹಾಗೂ 40 ಡಿಗ್ರಿ ಸೆಲ್ಸಿಯಸ್ಗಿಂತಲೂ ಅಧಿಕವಿರುವ ತಾಪಮಾನದ ಕಠಿಣ ಪರಿಸ್ಥಿತಿಯಲ್ಲಿ ಮನುಷ್ಯರಿಗಿಂತ ಹೆಚ್ಚಾಗಿ ಸುಧಾರಿತ ರೊಬೋಟ್ಗಳನ್ನು ಕೆಲಸಕ್ಕೆ ನಿಯೋಜಿಸಲಾಗಿತ್ತು.
ಕೃತಕ ಬುದ್ಧಿಮತ್ತೆ (AI), 5ಜಿ ತಂತ್ರಜ್ಞಾನ ಮತ್ತು ಲಿಡಾರ್ (LiDAR) ವ್ಯವಸ್ಥೆ ಹೊಂದಿರುವ ಲೇಸರ್-ನಿರ್ದೇಶಿತ ರೊಬೋಟ್ಗಳು ಮನುಷ್ಯರಿಗಿಂತ ಮೂರು ಪಟ್ಟು ವೇಗವಾಗಿ ಮತ್ತು ಮಿಲಿಮೀಟರ್ ನಿಖರತೆಯೊಂದಿಗೆ ಕಾಂಕ್ರೀಟ್ ಸಮತಟ್ಟುಗೊಳಿಸುವ ಕೆಲಸ ಮಾಡಿವೆ. ಇದರೊಂದಿಗೆ 800 ಕೆಜಿ ತೂಕದ ಬೃಹತ್ ಗಾಜಿನ ಫಲಕಗಳನ್ನು ಅತಿ ಹೆಚ್ಚು ಸುರಕ್ಷತೆಯಿಂದ ಅಳವಡಿಸುವ ರೊಬೋಟ್ಗಳು, 24 ಗಂಟೆಯೂ ಸ್ವಯಂಚಾಲಿತವಾಗಿ ವೆಲ್ಡಿಂಗ್ ಮಾಡುವ, ಕಾವಲು ಕಾಯುವ ರೊಬೋಟ್ಗಳು ಇಲ್ಲಿ ಕಾರ್ಯನಿರ್ವಹಿಸಿವೆ. ಈ ರೊಬೋಟ್ಗಳ ಬಳಕೆಯಿಂದಾಗಿ ಕಾರ್ಮಿಕರ ವೆಚ್ಚ ಅರ್ಧದಷ್ಟು ಕಡಿಮೆಯಾಗಿದ್ದು, ಕೆಲಸದ ದಕ್ಷತೆ 3 ಪಟ್ಟು ಹೆಚ್ಚಾಗಿದೆ. ನಿರ್ಮಾಣದ ವೇಳೆ ಸಂಭವಿಸುವ ಅಪಘಾತಗಳು ಶೇ.90ರಷ್ಟು ನಿಯಂತ್ರಣಕ್ಕೆ ಬಂದಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಜಗತ್ತನ್ನೇ ಜೋಡಿಸುವ ಬೃಹತ್ ಸಾರಿಗೆಯ ಕೊಂಡಿ
ಒಟ್ಟು 8 ಮಹಡಿಗಳ ಈ ಬಹುಮಾದರಿ ಸಾರಿಗೆ ಸಂಕೀರ್ಣವು 15 ಪ್ಲಾಟ್ಫಾರ್ಮ್ಗಳು ಮತ್ತು 29 ರೈಲ್ವೆ ಟ್ರ್ಯಾಕ್ಗಳನ್ನು ಹೊಂದಿದೆ. ಅತ್ಯಂತ ಜನದಟ್ಟಣೆಯ ಸಮಯದಲ್ಲಿ ಗಂಟೆಗೆ ಸುಮಾರು 16,000 ಪ್ರಯಾಣಿಕರನ್ನು ನಿಭಾಯಿಸುವ ಸಾಮರ್ಥ್ಯವನ್ನು ಇದು ಹೊಂದಿದ್ದು, ಹೈಸ್ಪೀಡ್ ರೈಲುಗಳು, ಮೊನೊರೈಲ್, ಬಸ್ಗಳು ಮತ್ತು ಟ್ಯಾಕ್ಸಿ ವ್ಯವಸ್ಥೆಯನ್ನು ಒಂದೇ ಸೂರಿನಡಿ ಸಂಯೋಜಿಸಿದೆ. ಈ ನಿಲ್ದಾಣವು ಚೀನಾದ ಪ್ರಮುಖ 14 ನಗರಗಳಿಗೆ ನೇರ ಸಂಪರ್ಕ ಕಲ್ಪಿಸುತ್ತದೆ. ಇಲ್ಲಿಂದ ಪ್ರಯಾಣಿಕರು ಕೇವಲ ಒಂದು ಗಂಟೆಯಲ್ಲಿ ಚೆಂಗ್ಡು ನಗರವನ್ನು ಹಾಗೂ ಸರಿಸುಮಾರು ಆರೇ ಗಂಟೆಗಳಲ್ಲಿ ಚೀನಾದ ರಾಜಧಾನಿ ಬೀಜಿಂಗ್, ಶಾಂಘೈ ಅಥವಾ ಗುವಾಂಗ್ಝೌ ನಗರಗಳನ್ನು ತಲುಪಬಹುದಾಗಿದೆ. ಕೈಗಾರಿಕಾ ಮಹತ್ವಾಕಾಂಕ್ಷೆಯನ್ನು ಅತ್ಯಂತ ಕಡಿಮೆ ಅವಧಿಯಲ್ಲಿ ವಾಸ್ತವಕ್ಕೆ ತರಬಲ್ಲ ಚೀನಾದ ಈ ಅಭೂತಪೂರ್ವ ತಾಂತ್ರಿಕ ಬೆಳವಣಿಗೆ ಇಡೀ ಜಗತ್ತನ್ನೇ ಮೂಗಿನ ಮೇಲೆ ಬೆರಳಿಡುವಂತೆ ಮಾಡಿದೆ.
ಇದನ್ನೂ ಓದಿ : ಪುಲ್ವಾಮಾ ದಾಳಿಯ ಮಾಸ್ಟರ್ಮೈಂಡ್ ಫಿನಿಶ್ – ಉಗ್ರ ಹಮ್ಜಾ ಬುರ್ಹಾನ್ಗೆ ಗುಂಡು ಹಾರಿಸಿದ್ದು ಯಾರು?
