ಚಂಡಿಗಢ: ಹರಿಯಾಣದ ರೇವಾರಿ ಜಿಲ್ಲೆಯಲ್ಲಿ ಮನುಷ್ಯತ್ವವೇ ತಲೆತಗ್ಗಿಸುವಂತಹ, ಕೇವಲ 80 ರೂಪಾಯಿಗಾಗಿ ಸ್ನೇಹಿತನನ್ನು ಬರ್ಬರವಾಗಿ ಕೊಲೆ ಮಾಡಿದ ಆಘಾತಕಾರಿ ಘಟನೆಯೊಂದು ಬೆಳಕಿಗೆ ಬಂದಿದೆ. ಹಣದ ದುರಾಸೆ ಎಷ್ಟರ ಮಟ್ಟಿಗೆ ಗೆಳೆತನವನ್ನು ಬಲಿ ತೆಗೆದುಕೊಳ್ಳುತ್ತದೆ ಎಂಬುದಕ್ಕೆ ಈ ಪ್ರಕರಣವೇ ತಾಜಾ ಉದಾಹರಣೆಯಾಗಿದೆ. ಹಿಮಾಂಶು, ರಾಜಾ ಮತ್ತು ಜಸ್ವಿಂದರ್ ಅಲಿಯಾಸ್ ಹರ್ಷ್ ಅಲಿಯಾಸ್ ಅಂಗಾ ಎಂಬ ಮೂವರು ಪಾಪಿಗಳು ಸೇರಿ ತಮ್ಮ ಪರಿಚಿತ ಸ್ನೇಹಿತ ಅನೀಸ್ ಎಂಬಾತನನ್ನು ಕೇವಲ ಹಣದಾಸೆಗಾಗಿ ಪ್ಲಾನ್ ಮಾಡಿ ಹತ್ಯೆ ಮಾಡಿದ್ದಾರೆ.
ಈ ಭೀಕರ ಹತ್ಯೆಯ ಹಿಂದಿನ ಪ್ರಮುಖ ಕಾರಣ ಹಣ. ಮೃತ ಅನೀಸ್ ಬಳಿ ಭಾರೀ ಹಣವಿದೆ, ಆತನನ್ನು ಕೊಂದರೆ ತಮಗೆ ಸಾಕಷ್ಟು ಹಣ ಸಿಗುತ್ತದೆ ಎಂದು ಈ ಮೂವರು ಆರೋಪಿಗಳು ಭ್ರಮಿಸಿದ್ದರು. ಇದೇ ತಪ್ಪು ಕಲ್ಪನೆ ಮತ್ತು ದುರಾಸೆಯಿಂದ ಆತನನ್ನು ಕೊಲೆ ಮಾಡಿದ್ದಾರೆ. ಆದರೆ, ಆತನ ಪ್ರಾಣ ತೆಗೆದ ನಂತರ ಆರೋಪಿಗಳು ಆತನ ಜೇಬು ತಡಕಾಡಿದಾಗ ಅವರಿಗೆ ಸಿಕ್ಕಿದ್ದು ಬರೋಬ್ಬರಿ ಕೇವಲ 80 ರೂಪಾಯಿ ಮಾತ್ರ. ಕೇವಲ ಇಷ್ಟು ಸಣ್ಣ ಮೊತ್ತಕ್ಕಾಗಿ ಒಬ್ಬ ಅಮಾಯಕ ಸ್ನೇಹಿತನ ಪ್ರಾಣ ತೆಗೆದಿರುವುದು ಇಡೀ ಪ್ರಕರಣದ ಅತ್ಯಂತ ಆಘಾತಕಾರಿ ಮತ್ತು ದುರಂತದ ಸಂಗತಿಯಾಗಿದೆ.
ಟರ್ಬನ್ ಪಿನ್ ಮತ್ತು ಬೆಲ್ಟ್‌ನಿಂದ ಭೀಕರ ಕೊಲೆ
ಅನೀಸ್‌ನನ್ನು ಹತ್ಯೆ ಮಾಡಲು ಆರೋಪಿಗಳು ಬಳಸಿದ ವಿಧಾನ ಅತ್ಯಂತ ಕ್ರೂರವಾಗಿತ್ತು. ಘಟನೆಯ ದಿನ ಹಿಮಾಂಶು ಮತ್ತು ರಾಜಾ ಸೇರಿಕೊಂಡು ಅನೀಸ್‌ನ ಕೈ ಮತ್ತು ಕಾಲುಗಳನ್ನು ಬಿಗಿಯಾಗಿ ಹಿಡಿದುಕೊಂಡಿದ್ದರು. ತಪ್ಪಿಸಿಕೊಳ್ಳಲು ಸಾಧ್ಯವಾಗದ ಸ್ಥಿತಿಯಲ್ಲಿದ್ದ ಆತನ ಕುತ್ತಿಗೆಗೆ ಮೂರನೇ ಆರೋಪಿ ಜಸ್ವಿಂದರ್ ಬೆಲ್ಟ್ ಬಿಗಿದು ಉಸಿರುಗಟ್ಟಿಸಿದ್ದಾನೆ. ಅಷ್ಟಕ್ಕೇ ಬಿಡದೆ, ಸಿಖ್ ಸಮುದಾಯದಲ್ಲಿ ಟರ್ಬನ್ ಸರಿಪಡಿಸಲು ಹಾಗೂ ಕೂದಲನ್ನು ಒಳಕ್ಕೆ ಸೇರಿಸಲು ಬಳಸುವ ಅತ್ಯಂತ ಚೂಪಾದ ಲೋಹದ ಪಿನ್‌ನಿಂದ ಆತನ ಕುತ್ತಿಗೆಗೆ ಮನಬಂದಂತೆ ಹಲವು ಬಾರಿ ಇರಿದು ಬರ್ಬರವಾಗಿ ಕೊಲೆ ಮಾಡಿದ್ದಾರೆ. ಹತ್ಯೆಯ ನಂತರ ಸಾಕ್ಷ್ಯ ನಾಶಪಡಿಸುವ ದುರುದ್ದೇಶದಿಂದ ಮೃತದೇಹವನ್ನು ಕಾಲುವೆಯ ದಂಡೆಯ ಸಮೀಪವಿರುವ ಕಬ್ಬಿನ ಗದ್ದೆಯೊಂದರಲ್ಲಿ ಬಿಸಾಡಿ ಪರಾರಿಯಾಗಿದ್ದರು.
ಮೂವರು ಆರೋಪಿಗಳು ಪೊಲೀಸರ ಬಲೆಗೆ
ಪ್ರಕರಣ ದಾಖಲಿಸಿಕೊಂಡು ತನಿಖೆ ಆರಂಭಿಸಿದ ಪೊಲೀಸರು, ಭೀಕರ ಹತ್ಯೆಯ ಜಾಡು ಹಿಡಿದು ಹೊರಟಾಗ ಸತ್ಯಾಸತ್ಯತೆಗಳು ಬಯಲಾಗಿವೆ. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ಹಿಮಾಂಶು ಮತ್ತು ರಾಜಾ ಎಂಬ ಇಬ್ಬರು ಆರೋಪಿಗಳನ್ನು ಪೊಲೀಸರು ಈ ಹಿಂದೆಯೇ ಬಂಧಿಸಿದ್ದರು. ಇದೀಗ ತಲೆಮರೆಸಿಕೊಂಡಿದ್ದ ಮೂರನೇ ಆರೋಪಿಯನ್ನೂ ಸೆರೆಹಿಡಿಯುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದಾರೆ. ಆರಂಭದಲ್ಲಿ ಈತನ ಹೆಸರನ್ನು ಹರಪ್ರೀತ್ ಎಂದು ಭಾವಿಸಲಾಗಿತ್ತಾದರೂ, ವಿಚಾರಣೆ ವೇಳೆ ಆತ ತನ್ನ ನೈಜ ಹೆಸರು ಜಸ್ವಿಂದರ್ ಅಲಿಯಾಸ್ ಹರ್ಷ್ ಅಲಿಯಾಸ್ ಅಂಗಾ ಎಂದು ಬಾಯ್ಬಿಟ್ಟಿದ್ದಾನೆ. ಸದ್ಯ ಮೂವರೂ ಆರೋಪಿಗಳು ಕಂಬಿ ಎಣಿಸುತ್ತಿದ್ದು, ಬಂಧಿತರು ನೀಡಿದ ಮಾಹಿತಿ ಮೇರೆಗೆ ಕೊಲೆಗೆ ಬಳಸಲಾದ ಚೂಪಾದ ಲೋಹದ ಪಿನ್, ಉಸಿರುಗಟ್ಟಿಸಲು ಬಳಸಿದ ಬೆಲ್ಟ್ ಹಾಗೂ ಮೃತ ಅನೀಸ್‌ಗೆ ಸೇರಿದ ಹೀರೋ ಸ್ಪ್ಲೆಂಡರ್ ಬೈಕ್ ಅನ್ನು ಪೊಲೀಸರು ವಶಪಡಿಸಿಕೊಂಡಿದ್ದಾರೆ. ಪೊಲೀಸರ ತನಿಖೆ ಚುರುಕಾಗಿ ಮುಂದುವರಿದಿದೆ.
ಇದನ್ನೂ ಓದಿ :ರಾಹುಲ್ ಗಾಂಧಿ ಬಂಧನ ವೇಳೆ ಕಚ್ಚಿ, ಪರಚಿ ಪೊಲೀಸ್ ಪೇದೆ ಮೇಲೆ ಬರ್ಬರ ಹಲ್ಲೆ!
