ದುಬೈ : ಕದನ ವಿರಾಮ ಒಪ್ಪಂದ ಚಾಲ್ತಿಯಲ್ಲಿರುವಂತೆಯೇ ಹೊರ್ಮುಜ್ ಜಲಸಂಧಿಯಲ್ಲಿ ಇರಾನ್ನ ರೆವಲ್ಯೂಷನರಿ ಗಾರ್ಡ್ಸ್ ವಾಣಿಜ್ಯ ಹಡಗುಗಳ ಮೇಲೆ ಕನಿಷ್ಠ ಎರಡು ಕ್ಷಿಪಣಿಗಳನ್ನು ಉಡಾಯಿಸಿದ್ದು, ಎರಡು ನೌಕೆಗಳು ಜಖಂಗೊಂಡಿವೆ. ಈ ಮೂಲಕ ಮೂರು ವಾರಗಳ ಹಿಂದಷ್ಟೇ ಸಹಿ ಮಾಡಲಾದ ಒಪ್ಪಂದವನ್ನು ಇರಾನ್ ಗಾಳಿಗೆ ತೂರಿದಂತಾಗಿದೆ. ಇರಾನ್ನ ಈ ಕ್ರಮಕ್ಕೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು, ಇರಾನ್ ವಿರುದ್ಧ ಕಠಿಣ ಪ್ರತೀಕಾರ ತೀರಿಸಿಕೊಳ್ಳುವ ಮುನ್ಸೂಚನೆ ನೀಡಿದ್ದಾರೆ.
ಟ್ರಂಪ್ ಹೇಳಿಕೆಯೇ ಕಾರಣ?
ಕತಾರ್ ಮಧ್ಯಸ್ಥಿಕೆಯಲ್ಲಿ ಅಮೆರಿಕ ಮತ್ತು ಇರಾನ್ ನಡುವೆ ಜಲಸಂಧಿಯಲ್ಲಿ ದಾಳಿ ನಡೆಸದೇ ಇರುವ ಕುರಿತು ತಾತ್ಕಾಲಿಕ ಒಪ್ಪಂದ ನಡೆದಿತ್ತು. ಈ ಒಪ್ಪಂದದ ಅವಧಿ ಮುಗಿದ ಬೆನ್ನಲ್ಲೇ ಈ ದಾಳಿ ನಡೆದಿದೆ. ಅಮೆರಿಕ ಮತ್ತು ಇಸ್ರೇಲ್ ಜಂಟಿ ದಾಳಿಯಲ್ಲಿ ಮೃತರಾಗಿದ್ದ ಇರಾನ್ ಸರ್ವೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ ಅವರ ಅಂತ್ಯಕ್ರಿಯೆ ನಡೆಯುತ್ತಿರುವಾಗಲೇ ಈ ದಾಳಿ ನಡೆದಿರುವುದು ಅಚ್ಚರಿಕೆ ಕಾರಣವಾಗಿದೆ. ಆದರೆ, ನಾವು ಇರಾನ್ ಮೇಲೆ ಈಗಲೂ ದಾಳಿ ಮಾಡಿ, ಆ ದೇಶವನ್ನು ನಿರ್ನಾಮ ಮಾಡಬಹುದು. ಆದರೆ ನಾವು ತುಂಬಾ ಒಳ್ಳೆಯವರಾಗಿರುವ ಕಾರಣ, ಅಂತ್ಯಕ್ರಿಯೆ ಮುಗಿಯಲಿ ಎಂಬ ಕಾರಣಕ್ಕೆ ಇರಾನ್ಗೆ ಒಂದು ವಾರ ರಜೆ ನೀಡಿದ್ದೇವೆ ಎಂದು ಡೊನಾಲ್ಡ್ ಟ್ರಂಪ್ ವ್ಯಂಗ್ಯವಾಡಿದ್ದರು. ಟ್ರಂಪ್ ಅವರ ಈ ಲೇವಡಿಯ ಬೆನ್ನಲ್ಲೇ ಇರಾನ್ ಈ ದಾಳಿ ನಡೆಸಿರುವುದು ರಾಜತಾಂತ್ರಿಕ ವಲಯದಲ್ಲಿ ಸಂಚಲನ ಮೂಡಿಸಿದೆ.
ಒಮಾನ್ ಕರಾವಳಿಯಲ್ಲಿ ತೈಲ ನೌಕೆಗೆ ಹೊತ್ತಿದ ಬೆಂಕಿ
ಇರಾನ್ ಕ್ಷಿಪಣಿ ದಾಳಿಯ ಬೆನ್ನಲ್ಲೇ, ಇಂದು ಮುಂಜಾನೆ ಒಮಾನ್ ಕರಾವಳಿಯ ಲಿಮಾ ಬಳಿ ಚಲಿಸುತ್ತಿದ್ದ ಮತ್ತೊಂದು ತೈಲ ನೌಕೆಯ ಮೇಲೆ ಅಪರಿಚಿತ ಕ್ಷಿಪಣಿಯೊಂದು ಅಪ್ಪಳಿಸಿದೆ. ಪರಿಣಾಮವಾಗಿ ಹಡಗಿನಲ್ಲಿ ಭಾರಿ ಬೆಂಕಿ ಕಾಣಿಸಿಕೊಂಡಿದೆ ಎಂದು ಬ್ರಿಟಿಷ್ ಮಿಲಿಟರಿ ಸಂಸ್ಥೆಯಾದ ಯುನೈಟೆಡ್ ಕಿಂಗ್ಡಮ್ ಮಾರಿಟೈಮ್ ಟ್ರೇಡ್ ಆಪರೇಷನ್ಸ್ ದೃಢಪಡಿಸಿದೆ. ಇರಾನ್ನ ಸರ್ಕಾರಿ ಮಾಧ್ಯಮವು ಅನಾಮಧೇಯ ಮೂಲಗಳನ್ನು ಉಲ್ಲೇಖಿಸಿ, ಪದೇ ಪದೇ ನೀಡಿದ ಎಚ್ಚರಿಕೆಗಳನ್ನು ನಿರ್ಲಕ್ಷಿಸಿದ ಕಾರಣಕ್ಕೆ ಕತಾರ್ನ ದ್ರವೀಕೃತ ನೈಸರ್ಗಿಕ ಅನಿಲ (LNG) ಸಾಗಿಸುತ್ತಿದ್ದ ನೌಕೆಯನ್ನು ಗುರಿಯಾಗಿಸಲಾಗಿದೆ ಎಂದು ವರದಿ ಮಾಡಿದೆ.
ಒಂದೇ ಗಂಟೆಯಲ್ಲಿ ಸೇತುವೆಗಳನ್ನು ಉಡಾಯಿಸುತ್ತೇವೆ: ಟ್ರಂಪ್ ವಾರ್ನಿಂಗ್
ಇರಾನ್ನ ಈ ದಾಳಿಗಳಿಗೆ ಅಮೆರಿಕ ಶೀಘ್ರದಲ್ಲೇ ತಕ್ಕ ಪ್ರತ್ಯುತ್ತರ ನೀಡುವ ಸಾಧ್ಯತೆಯಿದೆ ಎಂದು ರಕ್ಷಣಾ ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಈ ಕುರಿತು ಖಾರವಾಗಿ ಪ್ರತಿಕ್ರಿಯಿಸಿರುವ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, “ನಾವು ಯಾವುದೇ ರೀತಿಯಲ್ಲಾದರೂ ಗೆದ್ದೇ ಗೆಲ್ಲುತ್ತೇವೆ. ನಮಗೆ ಮಾತುಕತೆಯ ಮೂಲಕ ಶಾಂತಿ ಸ್ಥಾಪಿಸುವುದು ಇಷ್ಟ, ಆದರೆ ಇರಾನ್ ಹೀಗೆಯೇ ಮುಂದುವರಿದರೆ ಕೇವಲ ಒಂದು ಗಂಟೆಯೊಳಗೆ ಅವರ ದೇಶದ ಎಲ್ಲಾ ಪ್ರಮುಖ ಸೇತುವೆಗಳನ್ನು ನಾವು ಧ್ವಂಸಗೊಳಿಸಬಲ್ಲೆವು,” ಎಂದು ನೇರ ಎಚ್ಚರಿಕೆ ನೀಡಿದ್ದಾರೆ.
ಇದನ್ನೂ ಓದಿ : ರಾಮಮಂದಿರ ಪ್ರಾಣಪ್ರತಿಷ್ಠೆ ಸೇರಿ 124 ಕೋಟಿ ರೂ. ವೆಚ್ಚದ ಮೇಲೆ ಈಗ SIT ಕಣ್ಣು : ತನಿಖೆ ಚುರುಕು!
