“ಕನ್ಯೆಯ ಮೌನವೇ ಮದುವೆಗೆ ಸಮ್ಮತಿ” : ಅಫ್ಘನ್ ತಾಲಿಬಾನ್ ಸರ್ಕಾರದಿಂದ ಬಾಲ್ಯವಿವಾಹ ಕಾನೂನುಬದ್ಧ!

ಕಾಬೂಲ್ : ಮಹಿಳೆಯರ ಹಕ್ಕುಗಳನ್ನು ಹತ್ತಿಕ್ಕುವ ದಿಸೆಯಲ್ಲಿ ಮತ್ತೊಂದು ವಿವಾದಾತ್ಮಕ ಕಾಯ್ದೆಯೊಂದನ್ನು ಅಫ್ಘಾನಿಸ್ತಾನದ ತಾಲಿಬಾನ್ ಸರ್ಕಾರ ಜಾರಿ ಮಾಡಿದೆ. ಮದುವೆ, ವಿಚ್ಛೇದನ ಮತ್ತು ಬಾಲ್ಯವಿವಾಹವನ್ನು ಒಳಗೊಂಡಿರುವ ಈ ನೂತನ ಕಾನೂನು ಜಾಗತಿಕ ಮಟ್ಟದಲ್ಲಿ ತೀವ್ರ ಕಳವಳ ಹಾಗೂ ಆಕ್ರೋಶಕ್ಕೆ ಕಾರಣವಾಗಿದೆ. “ದಂಪತಿಗಳ ನಡುವಿನ ಪ್ರತ್ಯೇಕತೆಯ ತತ್ವಗಳು” ಎಂಬ ಹೆಸರಿನ 31 ವಿಧಿಗಳ ಈ ಹೊಸ ನಿಯಮಾವಳಿಗೆ ತಾಲಿಬಾನ್‌ನ ಸರ್ವೋಚ್ಚ ನಾಯಕ ಹಿಬತುಲ್ಲಾ ಅಖುಂದ್ಜಾದಾ ಅನುಮೋದನೆ ನೀಡಿದ್ದು, ಇದನ್ನು ಇತ್ತೀಚೆಗೆ ತಾಲಿಬಾನ್ ಆಡಳಿತದ ಅಧಿಕೃತ ಗೆಜೆಟ್‌ನಲ್ಲಿ ಪ್ರಕಟಿಸಲಾಗಿದೆ ಎಂದು ಅಲ್ಲಿನ ಮಾಧ್ಯಮಗಳು ವರದಿ ಮಾಡಿವೆ.

ಈ ಹೊಸ ಕಾನೂನಿನಲ್ಲಿ ಅತ್ಯಂತ ತೀವ್ರ ಟೀಕೆಗೆ ಒಳಗಾಗಿರುವ ಅಂಶವೆಂದರೆ, ಪ್ರಾಯಕ್ಕೆ ಬಂದ “ಕನ್ಯೆ” (Virgin Girl) ಮದುವೆಯ ಪ್ರಸ್ತಾಪಕ್ಕೆ ಮೌನವಾಗಿದ್ದರೆ, ಅದನ್ನು ಆಕೆಯ ಅಧಿಕೃತ ‘ಸಮ್ಮತಿ’ ಎಂದು ಪರಿಗಣಿಸಲಾಗುತ್ತದೆ. ಆದರೆ, ಇದೇ ನಿಯಮವು ಹುಡುಗರಿಗೆ ಅಥವಾ ಈ ಹಿಂದೆ ಮದುವೆಯಾಗಿದ್ದ ಮಹಿಳೆಯರಿಗೆ ಅನ್ವಯಿಸುವುದಿಲ್ಲ; ಅವರ ಮೌನವನ್ನು ಮದುವೆಗೆ ಸಮ್ಮತಿ ಎಂದು ಸ್ವಯಂಚಾಲಿತವಾಗಿ ತೆಗೆದುಕೊಳ್ಳಲಾಗದು ಎಂದು ಕಾಯ್ದೆ ಹೇಳುತ್ತದೆ. ಇದು ಹೆಣ್ಣುಮಕ್ಕಳ ಮೂಲಭೂತ ಹಕ್ಕು ಮತ್ತು ಸ್ವಾಯತ್ತತೆಯನ್ನು ಸಂಪೂರ್ಣವಾಗಿ ಕಸಿದುಕೊಳ್ಳುವ ಕ್ರೂರ ನಿಯಮ ಎಂದು ಮಾನವ ಹಕ್ಕುಗಳ ಹೋರಾಟಗಾರರು ಆಕ್ಷೇಪಿಸಿದ್ದಾರೆ.

ಬಾಲ್ಯವಿವಾಹಕ್ಕೆ ಅಸ್ತು

ಈ ನಿಯಮಾವಳಿಯು ಇಸ್ಲಾಮಿಕ್ ಕಾನೂನು ಪರಿಕಲ್ಪನೆಯಾದ “ಖಿಯಾರ್ ಅಲ್-ಬುಲೂಗ್” (ಪ್ರಾಯಕ್ಕೆ ಬಂದಾಗ ನಿರ್ಧಾರ ತೆಗೆದುಕೊಳ್ಳುವ ಆಯ್ಕೆ) ಅನ್ನು ಉಲ್ಲೇಖಿಸುತ್ತದೆ. ಇದರ ಪ್ರಕಾರ ಬಾಲ್ಯದಲ್ಲಿ ವಿವಾಹವಾದವರು ವಯಸ್ಕರಾದ ನಂತರ ಮದುವೆಯನ್ನು ರದ್ದುಗೊಳಿಸಲು ವಿನಂತಿಸಬಹುದು. ಆದರೆ ಯಾವುದೇ ಮದುವೆಯ ರದ್ದತಿಗೂ ತಾಲಿಬಾನ್ ನ್ಯಾಯಾಲಯದ ಕಡ್ಡಾಯ ಅನುಮೋದನೆ ಅಗತ್ಯವಾಗಿರುತ್ತದೆ.
ಹೊಸ ನಿಯಮವು ತಂದೆ ಮತ್ತು ತಾತನಿಗೆ ಬಾಲ್ಯವಿವಾಹವನ್ನು ನಿಶ್ಚಯಿಸುವಲ್ಲಿ ವ್ಯಾಪಕ ಮತ್ತು ಸರ್ವಾಧಿಕಾರಿ ಅಧಿಕಾರವನ್ನು ನೀಡುತ್ತದೆ. ಕೇವಲ ಪೋಷಕರು ನಿರಂತರ ದೌರ್ಜನ್ಯ ಎಸಗಿದ್ದಾರೆ ಅಥವಾ ನೈತಿಕವಾಗಿ ಅಶಕ್ತರಾಗಿದ್ದಾರೆ ಎಂದು ಸಾಬೀತಾದಾಗ ಮಾತ್ರ ಇಂತಹ ವಿವಾಹಗಳನ್ನು ರದ್ದುಗೊಳಿಸಲು ಅವಕಾಶವಿರುತ್ತದೆ. ಇದರೊಂದಿಗೆ, ವ್ಯಭಿಚಾರದ ಆರೋಪಗಳು, ಧಾರ್ಮಿಕ ಮತಾಂತರ ಮತ್ತು ಪತಿಯು ದೀರ್ಘಕಾಲ ನಾಪತ್ತೆಯಾಗಿರುವ ಪ್ರಕರಣಗಳಲ್ಲಿ ಹಸ್ತಕ್ಷೇಪ ಮಾಡಲು ತಾಲಿಬಾನ್ ನ್ಯಾಯಾಧೀಶರಿಗೆ ಸಂಪೂರ್ಣ ಅಧಿಕಾರ ನೀಡಲಾಗಿದೆ.

ಜಾಗತಿಕ ಆಕ್ರೋಶ

2021ರಲ್ಲಿ ಅಫ್ಘಾನಿಸ್ತಾನದಲ್ಲಿ ತಾಲಿಬಾನ್ ಮತ್ತೆ ಅಧಿಕಾರಕ್ಕೆ ಬಂದಾಗಿನಿಂದ ಮಹಿಳೆಯರು ಮತ್ತು ಹೆಣ್ಣುಮಕ್ಕಳ ಮೇಲೆ ನಿರಂತರವಾಗಿ ನಿರ್ಬಂಧಗಳನ್ನು ಹೇರುತ್ತಲೇ ಬಂದಿದೆ. ಮಹಿಳೆಯರಿಗೆ ಉನ್ನತ ಶಿಕ್ಷಣ ನಿಷೇಧಿಸುವುದು, ಉದ್ಯೋಗಾವಕಾಶಗಳನ್ನು ಕಸಿದುಕೊಳ್ಳುವುದು ಮತ್ತು ಸಾರ್ವಜನಿಕ ಜೀವನದಲ್ಲಿ ಮಹಿಳೆಯರ ಭಾಗವಹಿಸುವಿಕೆಗೆ ಕಟ್ಟುನಿಟ್ಟಿನ ಬೇಲಿ ಹಾಕಿರುವುದರ ವಿರುದ್ಧ ಈಗಾಗಲೇ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ವ್ಯಾಪಕ ಆಕ್ರೋಶ ವ್ಯಕ್ತವಾಗಿದೆ.

ಇದೀಗ ಜಾರಿಗೆ ಬಂದಿರುವ ಹೊಸ ಕಾಯ್ದೆಯನ್ನು ಜಾಗತಿಕ ಹಕ್ಕುಗಳ ಹೋರಾಟಗಾರರು ಕಟುವಾಗಿ ಖಂಡಿಸಿದ್ದಾರೆ. ರಾಜಕೀಯ ವಿಶ್ಲೇಷಕಿ ಫಹೀಮಾ ಮಹಮದ್ ಈ ಕುರಿತು ಪ್ರತಿಕ್ರಿಯಿಸಿ, ಬಾಲ್ಯವಿವಾಹದಲ್ಲಿ ಯಾವುದೇ ರೀತಿಯ ಅರ್ಥಪೂರ್ಣ ಸಮ್ಮತಿ ಇರಲು ಸಾಧ್ಯವೇ ಇಲ್ಲ. ಹಾಗಿರುವಾಗ ಹೆಣ್ಣುಮಕ್ಕಳ ಮೌನವನ್ನೇ ಒಪ್ಪಿಗೆ ಎಂದು ಬಿಂಬಿಸುವುದು ಅವರ ಧ್ವನಿ ಮತ್ತು ಸ್ವಾತಂತ್ರ್ಯವನ್ನು ಸಂಪೂರ್ಣವಾಗಿ ಹತ್ತಿಕ್ಕುವ ಅಮಾನವೀಯ ಕ್ರಮ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಇದನ್ನೂ ಓದಿ : ಕೇವಲ 90 ದಿನದಲ್ಲಿ 3,700 ಷೇರು ವಹಿವಾಟು ನಡೆಸಿದ ಟ್ರಂಪ್ – ವಾಲ್ ಸ್ಟ್ರೀಟ್ ತಲ್ಲಣ!