ವೆನೆಜುವೆಲಾ ಭೂಕಂಪ : ವಾರದ ಬಳಿಕ ಅವಶೇಷಗಳಡಿಯಿಂದ ರಕ್ಷಿಸಲ್ಪಟ್ಟ ನಾಯಿಮರಿ ಮಾಡಿದ್ದೇನು ಗೊತ್ತಾ? ವಿಡಿಯೋ ವೈರಲ್!

ಕರಾಕಸ್ : ಸಾವಿರಕ್ಕೂ ಅಧಿಕ ಮಂದಿಯನ್ನು ಬಲಿಪಡೆದ ಭೀಕರ ಭೂಕಂಪದಿಂದ ತತ್ತರಿಸಿರುವ ವೆನೆಜುವೆಲಾದಲ್ಲಿ ದುರಂತದ ನಡುವೆಯೂ ಮಾನವೀಯತೆ ಮತ್ತು ಭರವಸೆಯನ್ನು ಮೂಡಿಸುವ ಪವಾಡ ಸದೃಶ ಘಟನೆಗಳು ನಡೆಯುತ್ತಿವೆ. ಭೂಕಂಪ ಸಂಭವಿಸಿ ವಾರ ಕಳೆದರೂ ಅವಶೇಷಗಳ ಅಡಿಯಲ್ಲಿ ಸಿಲುಕಿದ್ದ ‘ಗಿಸೆಲ್’ ಹೆಸರಿನ ಪುಟ್ಟ ನಾಯಿಮರಿಯನ್ನು ರಕ್ಷಣಾ ಸಿಬ್ಬಂದಿ ಯಶಸ್ವಿಯಾಗಿ ಬದುಕಿಸಿದ್ದಾರೆ.

ನ್ಯೂಯಾರ್ಕ್ ಪೋಸ್ಟ್ ವರದಿಯ ಪ್ರಕಾರ, ಕರಬಾಲೆಡಾ ಪ್ರದೇಶದಲ್ಲಿ ಕುಸಿದು ಬಿದ್ದಿದ್ದ ಕಟ್ಟಡದ ಅವಶೇಷಗಳ ಮಧ್ಯದಿಂದ ಈ ನಾಯಿಮರಿಯನ್ನು ಹೊರತೆಗೆಯಲಾಗಿದೆ. ರಕ್ಷಣೆ ಮಾಡಿದ ತಕ್ಷಣ ಆ ನಾಯಿಮರಿಯು ತನ್ನ ಜೀವ ಉಳಿಸಿದ ಅಗ್ನಿಶಾಮಕ ಸಿಬ್ಬಂದಿಯ ಮುಖವನ್ನು ನೆಕ್ಕುತ್ತಾ, ಬಾಲ ಅಲ್ಲಾಡಿಸುತ್ತಾ ಕೃತಜ್ಞತೆ ಮತ್ತು ಪ್ರೀತಿ ವ್ಯಕ್ತಪಡಿಸಿದ ಹೃದಯಸ್ಪರ್ಶಿ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದ್ದು, ಜನರ ಮನ ಗೆದ್ದಿದೆ.

5 ಗಂಟೆಗಳ ಸತತ ಕಾರ್ಯಾಚರಣೆ

ಕಳೆದ ಬುಧವಾರ ಸಂಜೆ ವೆನೆಜುವೆಲಾದಲ್ಲಿ ಕೇವಲ 39 ಸೆಕೆಂಡುಗಳ ಅಂತರದಲ್ಲಿ 7.2 ಮತ್ತು 7.5 ತೀವ್ರತೆಯ ಅವಳಿ ಭೂಕಂಪಗಳು ಸಂಭವಿಸಿ ಭಾರಿ ವಿನಾಶ ಸೃಷ್ಟಿಸಿದ್ದವು. ಈ ವೇಳೆ ಕರಬಾಲೆಡಾದ ಕಟ್ಟಡವೊಂದರ ಅವಶೇಷಗಳ ಅಡಿಯಲ್ಲಿ ಈ ನಾಯಿಮರಿ ಸಿಲುಕಿಕೊಂಡಿತ್ತು. ಸ್ಥಳದಲ್ಲಿ ರಕ್ಷಣಾ ಕಾರ್ಯದಲ್ಲಿ ತೊಡಗಿದ್ದ ಎಲ್ ಸಾಲ್ವಡಾರ್ ದೇಶದ ಶೋಧನಾ ತಂಡಕ್ಕೆ ಅವಶೇಷಗಳ ಒಳಗಿನಿಂದ ಕ್ಷೀಣವಾಗಿ ಕೇಳಿಸಿದ ನಾಯಿಯ ಧ್ವನಿ ಹೊಸ ಆಶಾಕಿರಣ ಮೂಡಿಸಿತು. ಮತ್ತಷ್ಟು ಕುಸಿತ ಉಂಟಾಗದಂತೆ ತಡೆಯಲು ಸಿಬ್ಬಂದಿ ಸುಮಾರು ಐದು ಗಂಟೆಗಳ ಕಾಲ ಅತ್ಯಂತ ಎಚ್ಚರಿಕೆಯಿಂದ ಸಿಮೆಂಟ್ ಚಪ್ಪಡಿಗಳನ್ನು ಕೈಯಿಂದಲೇ ತೆರವುಗೊಳಿಸಿದರು. ನಾಯಿಮರಿಯನ್ನು ತಲುಪುವ ಮೊದಲು, ಕಿರಿದಾದ ರಂಧ್ರದ ಮೂಲಕ ಕುಡಿಯುವ ನೀರಿನ ಬಾಟಲಿಯನ್ನು ಇಳಿಸಿ, ಸುಸ್ತಾಗಿದ್ದ ಜೀವಕ್ಕೆ ಆಸರೆಯಾದರು.

ಮಾಲೀಕರಿಗೆ ಕರೆ ನೀಡಿದ ಅಧ್ಯಕ್ಷ ಬುಕೆಲೆ

ಎಲ್ ಸಾಲ್ವಡಾರ್ ದೇಶದ ಅಧ್ಯಕ್ಷ ನಯಿಬ್ ಬುಕೆಲೆ ಅವರು ಈ ರಕ್ಷಣಾ ಕಾರ್ಯಾಚರಣೆಯ ಭಾವುಕ ವಿಡಿಯೋವನ್ನು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಐದು ಗಂಟೆಗಳ ಸತತ ಹೋರಾಟದ ನಂತರ ಗಿಸೆಲ್ ಎಂಬ ಈ ಪುಟ್ಟ ನಾಯಿಯನ್ನು ರಕ್ಷಿಸಲಾಗಿದೆ ಎಂದು ಅವರು ಹೆಮ್ಮೆಯಿಂದ ಹೇಳಿದ್ದಾರೆ. ಇದರೊಂದಿಗೆ, ಈ ನಾಯಿಮರಿಯ ನಿಜವಾದ ಮಾಲೀಕರು ಯಾರಾದರೂ ಇದ್ದರೆ, ಅವರು ಸೂಕ್ತ ಫೋಟೋ ಅಥವಾ ವಿಡಿಯೋ ಪುರಾವೆಗಳನ್ನು ಒದಗಿಸಿ ಸ್ಥಳದಲ್ಲಿರುವ ರಕ್ಷಣಾ ತಂಡದಿಂದ ತಮ್ಮ ಸಾಕುಪ್ರಾಣಿಯನ್ನು ಮರಳಿ ಪಡೆದುಕೊಳ್ಳಬಹುದು ಎಂದು ಅಧ್ಯಕ್ಷರು ಸಾರ್ವಜನಿಕರಲ್ಲಿ ಮನವಿ ಮಾಡಿದ್ದಾರೆ.

ಅವಶೇಷಗಳ ನಡುವೆಯೇ ಮಗುವಿಗೆ ಜನ್ಮ ನೀಡಿದ ಮಹಿಳೆ!

ಭೂಕಂಪ ಸಂಭವಿಸಿ ಇಷ್ಟು ದಿನಗಳಾದರೂ ಜೀವಗಳು ಪತ್ತೆಯಾಗುತ್ತಿರುವುದು ವೆನೆಜುವೆಲಾದಲ್ಲಿ ಚಮತ್ಕಾರದಂತೆ ಭಾಸವಾಗುತ್ತಿದೆ. ದುರಂತದ ಪ್ರದೇಶದಲ್ಲಿ ನಡೆದ ಮತ್ತೊಂದು ಪವಾಡವೆಂಬಂತೆ, ಲಾ ಗ್ವೈರಾ ನಗರದ ಕುಸಿದ ಕಟ್ಟಡದ ಪಕ್ಕದ ರಸ್ತೆಯಲ್ಲೇ ಡಾ. ಮರಿಯಾ ಫೆರ್ನಾಂಡಾ ಟೆರಾನ್ ಎಂಬ ವೈದ್ಯರ ಸಹಾಯದಿಂದ ಗರ್ಭಿಣಿಯೊಬ್ಬರು ಗಂಡು ಮಗುವಿಗೆ ಜನ್ಮ ನೀಡಿದ್ದಾರೆ. ಸ್ಥಳೀಯರು ಮತ್ತು ದಾರಿಹೋಕರ ಸಹಾಯದಿಂದ ರಸ್ತೆಯಲ್ಲೇ ಯಶಸ್ವಿಯಾಗಿ ಹೆರಿಗೆಯಾಗಿದ್ದು, ಸದ್ಯ ತಾಯಿ ಮತ್ತು ನವಜಾತ ಶಿಶು ಇಬ್ಬರೂ ಸುರಕ್ಷಿತವಾಗಿದ್ದಾರೆ.

ಇದನ್ನೂ ಓದಿ : ಕೇತನ್‌ನನ್ನು ತಳ್ಳಿದ್ದು ಯಾರು? ಸಾಕ್ಷ್ಯಾಧಾರ ಕೊರತೆ : ಸಿಯಾ ಸುಳ್ಳು ಪತ್ತೆ ಪರೀಕ್ಷೆಗೆ ಮುಂದಾದ್ರಾ ಪೊಲೀಸರು?