ಫ್ಲೋರಿಡಾ: ಐಸ್ಕ್ರೀಂ ಎಂದರೆ ಹೆಣ್ಣುಮಕ್ಕಳಿಗೆ ಪಂಚಪ್ರಾಣ. ಆದರೆ ಅಮೆರಿಕದ ಫ್ಲೋರಿಡಾ ನಿವಾಸಿಯೊಬ್ಬರಿಗೆ ಇದೇ ಐಸ್ಕ್ರೀಂ ಜೀವನಪರ್ಯಂತ ಮರೆಯಲಾಗದ ಕಹಿ ನೆನಪನ್ನು ನೀಡಿದೆ. ಐಸ್ಕ್ರೀಂನಲ್ಲಿ ಕಬ್ಬಿಣದ ಮೊಳೆ ಮತ್ತು ಚೂರುಗಳಿದ್ದ ಕಾರಣ ಅದನ್ನು ಸೇವಿಸಿ ಗಂಭೀರ ಆರೋಗ್ಯ ಸಮಸ್ಯೆಗೆ ಒಳಗಾಗಿದ್ದ ಮಹಿಳೆಗೆ ಇದೀಗ ಬರೋಬ್ಬರಿ 132 ಕೋಟಿ ರೂಪಾಯಿ (14 ಮಿಲಿಯನ್ ಡಾಲರ್) ಪರಿಹಾರ ನೀಡುವಂತೆ ಅಮೆರಿಕದ ನ್ಯಾಯಾಲಯವೊಂದು ಐಸ್ಕ್ರೀಂ ಕಂಪನಿಗೆ ಆದೇಶಿಸಿದೆ.
ಈ ಘಟನೆ ನಡೆದಿದ್ದು 2018ರ ಸೆಪ್ಟೆಂಬರ್ 11 ರಂದು. ಬ್ರಾಂಡಿ ಬಕ್ಲಿ ಎಂಬ ಮಹಿಳೆ ಪಾಮ್ ಬೇನಲ್ಲಿರುವ ‘ಬ್ರಸ್ಟರ್ಸ್ ರಿಯಲ್ ಐಸ್ಕ್ರೀಂ’ ಮಳಿಗೆಗೆ ತಮ್ಮ ಇಬ್ಬರು ಮಕ್ಕಳೊಂದಿಗೆ ತೆರಳಿದ್ದರು. ಅಲ್ಲಿ ಅವರು ಬಟರ್ ಪೆಕನ್ ಫ್ಲೇವರ್ನ ಐಸ್ಕ್ರೀಂ ಕೋನ್ ಖರೀದಿಸಿ ಸವಿಯುತ್ತಿದ್ದರು. ಒಂದು ದೊಡ್ಡ ತುತ್ತು ಸೇವಿಸಿದಾಗ ಅವರಿಗೆ ಬಾಯಲ್ಲಿ ಏನೋ ಗಟ್ಟಿ ವಸ್ತು ಸಿಕ್ಕಂತಾಗಿದೆ. ಮೊದಲು ಅದು ಐಸ್ಕ್ರೀಂನಲ್ಲಿರುವ ಒಣಹಣ್ಣು ಇರಬಹುದು ಎಂದು ಭಾವಿಸಿ ಅವರು ನುಂಗಿದ್ದಾರೆ. ಆದರೆ ಅದು ಕಬ್ಬಿಣದ ಮೊಳೆ ಮತ್ತು ಲೋಹದ ತುಂಡುಗಳಾಗಿದ್ದವು ಎಂಬ ಆಘಾತಕಾರಿ ವಿಷಯ ನಂತರ ಬೆಳಕಿಗೆ ಬಂದಿದೆ.
ಕಾನೂನು ಹೋರಾಟ
ಲೋಹದ ಚೂರುಗಳನ್ನು ಸೇವಿಸಿದ ಬೆನ್ನಲ್ಲೇ ಬಕ್ಲಿ ಅವರ ಆರೋಗ್ಯ ಹದಗೆಟ್ಟಿದ್ದು, ತಕ್ಷಣ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಎಕ್ಸ್-ರೇ ಪರೀಕ್ಷೆಯಲ್ಲಿ ಅವರ ಹೊಟ್ಟೆಯೊಳಗೆ ಕಬ್ಬಿಣದ ಮೊಳೆ ಇರುವುದು ದೃಢಪಟ್ಟಿದೆ. ತುರ್ತು ಶಸ್ತ್ರಚಿಕಿತ್ಸೆಯ ಮೂಲಕ ಕೆಲವು ಲೋಹದ ತುಂಡುಗಳನ್ನು ಹೊರತೆಗೆಯಲಾಯಿತಾದರೂ, ಎಲ್ಲಾ ಚೂರುಗಳನ್ನು ತೆಗೆಯಲು ಸಾಧ್ಯವಾಗಲಿಲ್ಲ. ಇದರಿಂದಾಗಿ ಅವರು ಇಂದಿಗೂ ದೀರ್ಘಕಾಲದ ಆರೋಗ್ಯ ಸಮಸ್ಯೆಗಳನ್ನು ಎದುರಿಸುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ 2019ರಲ್ಲಿ ಅವರು ಐಸ್ಕ್ರೀಂ ಕಂಪನಿಯ ವಿರುದ್ಧ ದಾವೆ ಹೂಡಿದ್ದರು.
ನ್ಯಾಯಾಲಯದ ಐತಿಹಾಸಿಕ ತೀರ್ಪು
ಬ್ರೆವಾರ್ಡ್ ಕೌಂಟಿ ನ್ಯಾಯಾಲಯದಲ್ಲಿ ಈ ಪ್ರಕರಣದ ವಿಚಾರಣೆ ನಡೆದಿದ್ದು, ಮಹಿಳೆಯ ಪರ ವಕೀಲರು ಐಸ್ಕ್ರೀಂನಲ್ಲಿ ಸಿಕ್ಕ ಮೊಳೆಯ ಫೋಟೋಗಳು ಮತ್ತು ವೈದ್ಯಕೀಯ ದಾಖಲೆಗಳನ್ನು ಪುರಾವೆಯಾಗಿ ಮಂಡಿಸಿದರು. ಗ್ರಾಹಕರ ಸುರಕ್ಷತೆಯಲ್ಲಿ ವಿಫಲವಾದ ಐಸ್ಕ್ರೀಂ ಮಳಿಗೆಯ ನಿರ್ಲಕ್ಷ್ಯವನ್ನು ಗಂಭೀರವಾಗಿ ಪರಿಗಣಿಸಿದ ನ್ಯಾಯಪೀಠ, ಇದೀಗ ಸಂತ್ರಸ್ತೆಗೆ ಭಾರೀ ಮೊತ್ತದ ಪರಿಹಾರ ನೀಡುವಂತೆ ತೀರ್ಪು ನೀಡಿದೆ. “ಸ್ಥಳೀಯ ವ್ಯಾಪಾರಿಗಳಾಗಲಿ ಅಥವಾ ರಾಷ್ಟ್ರೀಯ ಬ್ರ್ಯಾಂಡ್ಗಳಾಗಲಿ, ಆಹಾರ ಸುರಕ್ಷತೆಯ ವಿಷಯದಲ್ಲಿ ಹೊಣೆಗಾರಿಕೆಯಿಂದ ನುಣುಚಿಕೊಳ್ಳುವಂತಿಲ್ಲ” ಎಂದು ಬಕ್ಲಿ ಪರ ವಕೀಲರು ವಾದಿಸಿದ್ದರು.
