ಬಾಂಗ್ಲಾದಲ್ಲೀಗ ಇಸ್ಲಾಮಿಕ್ ಸಂಘಟನೆಗಳ ನಡುವೆ ಮಹಾ ಸಮರ | ಜಮಾತ್ ವಿರುದ್ಧ ‘ಜಿಹಾದ್’ ಸಾರಿದ ಹೆಫಾಜತ್!

ಢಾಕಾ : ಬಾಂಗ್ಲಾದೇಶದ ಸಂಸತ್ ಚುನಾವಣೆಗೆ ಕೆಲವೇ ದಿನಗಳು ಬಾಕಿ ಇರುವಂತೆಯೇ ದೇಶದ ಪ್ರಬಲ ಇಸ್ಲಾಮಿಕ್ ಸಂಘಟನೆಗಳ ನಡುವಿನ ಸೈದ್ಧಾಂತಿಕ ಸಂಘರ್ಷ ಬೀದಿಗೆ ಬಂದಿದೆ. ಪ್ರಭಾವಿ ಇಸ್ಲಾಮಿಕ್ ಸಂಘಟನೆ ‘ಹೆಫಾಜತ್-ಎ-ಇಸ್ಲಾಂ’, ರಾಜಕೀಯ ಪಕ್ಷವಾದ ‘ಜಮಾತ್-ಎ-ಇಸ್ಲಾಮಿ’ ವಿರುದ್ಧ ಬಹಿರಂಗವಾಗಿಯೇ ಸಮರ ಸಾರಿದೆ. ಜಮಾತ್‌ಗೆ ಮತ ನೀಡುವುದು ಇಸ್ಲಾಂ ಧರ್ಮದ ಪ್ರಕಾರ ‘ಹರಾಮ್’ (ನಿಷಿದ್ಧ) ಎಂದು ಘೋಷಿಸಿರುವ ಹೆಫಾಜತ್ ಮುಖ್ಯಸ್ಥ ಅಲ್ಲಾಮಾ ಶಾ ಮುಹಿಬುಲ್ಲಾ ಬಾಬುನಗರಿ, ಇದು ಕೇವಲ ಚುನಾವಣೆಯಲ್ಲ, ಜಮಾತ್ ವಿರುದ್ಧದ ‘ಜಿಹಾದ್’ ಎಂದು ಕರೆ ನೀಡಿದ್ದಾರೆ.

ಹೆಫಾಜತ್ ಮತ್ತು ಜಮಾತ್ ನಡುವಿನ ಈ ಕಿತ್ತಾಟಕ್ಕೆ ಮುಖ್ಯ ಕಾರಣ ಇಸ್ಲಾಂ ಧರ್ಮವನ್ನು ವ್ಯಾಖ್ಯಾನಿಸುವ ರೀತಿ. ಜಮಾತ್-ಎ-ಇಸ್ಲಾಮಿ ಸಂಘಟನೆಯು ಅಬುಲ್ ಅಲಾ ಮೌದೂದಿ ಅವರ ಸಿದ್ಧಾಂತವನ್ನು ಪಾಲಿಸುತ್ತದೆ, ಇದು ಧರ್ಮವನ್ನು ರಾಜಕೀಯ ಅಧಿಕಾರ ಪಡೆಯುವ ಸಾಧನವನ್ನಾಗಿ ನೋಡುತ್ತದೆ. ಆದರೆ ಹೆಫಾಜತ್ ಇದನ್ನು ತೀವ್ರವಾಗಿ ವಿರೋಧಿಸುತ್ತದೆ. “ಜಮಾತ್ ಅನುಸರಿಸುತ್ತಿರುವುದು ಬೂಟಾಟಿಕೆಯ ಇಸ್ಲಾಂ. ನಾವು ಮದೀನಾದ ನೈಜ ಇಸ್ಲಾಂ ಅನ್ನು ಪಾಲಿಸುತ್ತೇವೆ. ಮೌದೂದಿ ಸಿದ್ಧಾಂತವನ್ನು ಅನುಸರಿಸುವುದು ಮುಸ್ಲಿಮರ ನಂಬಿಕೆಗೆ ಅಪಾಯಕಾರಿ” ಎಂದು ಬಾಬುನಗರಿ ಕಿಡಿಕಾರಿದ್ದಾರೆ. ಜಮಾತ್ ಇಸ್ಲಾಂ ಧರ್ಮಕ್ಕೆ ತಪ್ಪು ವ್ಯಾಖ್ಯಾನ ನೀಡುತ್ತಿದೆ ಎಂಬುದು ಹೆಫಾಜತ್ ಸಂಘಟನೆಯ ಪ್ರಬಲ ಆರೋಪವಾಗಿದೆ.

ರಾಜಕೀಯ ಧ್ರುವೀಕರಣ

ಫೆ.12ರಂದು ನಡೆಯಲಿರುವ ಈ ಚುನಾವಣೆಯಲ್ಲಿ ಹೆಫಾಜತ್-ಎ-ಇಸ್ಲಾಂ ಈಗ ತಾರಿಕ್ ರೆಹಮಾನ್ ನೇತೃತ್ವದ ಬಾಂಗ್ಲಾದೇಶ ನ್ಯಾಷನಲಿಸ್ಟ್ ಪಾರ್ಟಿಯನ್ನು (BNP) ಬೆಂಬಲಿಸಲು ನಿರ್ಧರಿಸಿದೆ. ಚಟ್ಟೋಗ್ರಾಮ್‌ನಲ್ಲಿ ಬಿಎನ್‌ಪಿ ಅಭ್ಯರ್ಥಿಯ ಪರ ಪ್ರಚಾರ ನಡೆಸುತ್ತಾ ಬಾಬುನಗರಿ ಈ ಸ್ಫೋಟಕ ಹೇಳಿಕೆಗಳನ್ನು ನೀಡಿದ್ದಾರೆ. ಈ ಹಿಂದೆ ಜಮಾತ್ ಮತ್ತು ಹೆಫಾಜತ್ ಒಂದೇ ಮೈತ್ರಿಯಲ್ಲಿದ್ದರೂ, ಇತ್ತೀಚಿನ ವರ್ಷಗಳಲ್ಲಿ ಜಮಾತ್ ಪ್ರಬಲವಾಗಿ ಬೆಳೆಯುತ್ತಿರುವುದು ಬಿಎನ್‌ಪಿ ಮತ್ತು ಹೆಫಾಜತ್ ಎರಡಕ್ಕೂ ನಡುಕ ಹುಟ್ಟಿಸಿದೆ. ಜಮಾತ್ ಅನ್ನು ತಡೆಯಲು ಈಗ ‘ಧರ್ಮ’ವನ್ನೇ ಅಸ್ತ್ರವನ್ನಾಗಿ ಬಳಸಲಾಗುತ್ತಿದೆ.

ಭಾರತ ವಿರೋಧಿ ಧೋರಣೆ

ಹೆಫಾಜತ್-ಎ-ಇಸ್ಲಾಂ ಸಂಘಟನೆಯು ತನ್ನ ತೀವ್ರಗಾಮಿ ಮತ್ತು ಭಾರತ ವಿರೋಧಿ ನಿಲುವುಗಳಿಗೆ ಹೆಸರಾಗಿದೆ. 2021 ರಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರು ಬಾಂಗ್ಲಾದೇಶಕ್ಕೆ ಭೇಟಿ ನೀಡಿದ್ದಾಗ ಈ ಸಂಘಟನೆಯು ಭಾರೀ ಹಿಂಸಾಚಾರ ನಡೆಸಿತ್ತು. ಅಷ್ಟೇ ಅಲ್ಲದೆ, ಇತ್ತೀಚೆಗೆ ಹಿಂದೂ ಸನ್ಯಾಸಿ ಚಿನ್ಮಯ ಕೃಷ್ಣ ದಾಸ್ ಅವರ ವಿರುದ್ಧ ಕೇಸು ದಾಖಲಿಸುವುದು ಮತ್ತು ಇಸ್ಕಾನ್ ನಿಷೇಧಕ್ಕೆ ಆಗ್ರಹಿಸುವ ಮೂಲಕ ಅಲ್ಪಸಂಖ್ಯಾತರನ್ನು ಗುರಿಯಾಗಿಸಿಕೊಂಡಿದೆ. ಭಾರತದ ಕಾಶ್ಮೀರ ಮತ್ತು ಪೌರತ್ವ ತಿದ್ದುಪಡಿ ಕಾಯ್ದೆಯ (CAA) ವಿಚಾರದಲ್ಲೂ ಈ ಸಂಘಟನೆಯು ಬಾಂಗ್ಲಾದೇಶದಲ್ಲಿ ಭಾರತದ ವಿರುದ್ಧ ಜನರನ್ನು ಪ್ರಚೋದಿಸುತ್ತಾ ಬಂದಿದೆ.

ಬಾಂಗ್ಲಾ ಭವಿಷ್ಯ ನಿರ್ಧಾರ

ಫೆ.12ರಂದು ನಡೆಯುವ ಮತದಾನವು ಬಾಂಗ್ಲಾದೇಶದ ಮುಂದಿನ ಸರ್ಕಾರವನ್ನು ಆಯ್ಕೆ ಮಾಡುವುದು ಮಾತ್ರವಲ್ಲದೆ, ಮಹಮ್ಮದ್ ಯೂನುಸ್ ನೇತೃತ್ವದ ಮಧ್ಯಂತರ ಸರ್ಕಾರ ಮಂಡಿಸಿರುವ ‘ಜುಲೈ ಚಾರ್ಟರ್’ ಬಗ್ಗೆಯೂ ಜನರ ತೀರ್ಪನ್ನು ನಿರ್ಧರಿಸಲಿದೆ. ಒಂದು ಕಡೆ ಜಮಾತ್ ತನ್ನ ಶಕ್ತಿ ವೃದ್ಧಿಸಿಕೊಳ್ಳುತ್ತಿದ್ದರೆ, ಮತ್ತೊಂದೆಡೆ ಇಸ್ಲಾಂನ ಹೆಸರಿನಲ್ಲೇ ಅದನ್ನು ಕಟ್ಟಿಹಾಕಲು ಹೆಫಾಜತ್ ಯತ್ನಿಸುತ್ತಿದೆ. ಈ ಸೈದ್ಧಾಂತಿಕ ಸಂಘರ್ಷದ ನಡುವೆ ಬಾಂಗ್ಲಾದ ಜನರು ಯಾರನ್ನು ಆಯ್ಕೆ ಮಾಡುತ್ತಾರೆ ಎನ್ನುವುದೇ ಕುತೂಹಲಕ್ಕೆ ಕಾರಣವಾಗಿದೆ.

ಇದನ್ನೂ ಓದಿ : BMTC ಬಸ್‌ ಹರಿದು ಯುವತಿ ಸ್ಥಳದಲ್ಲೇ ಸಾವು!