ಟೆಹ್ರಾನ್: ಇಸ್ರೇಲ್ ಇತ್ತೀಚೆಗೆ ನಡೆಸಿದ ವೈಮಾನಿಕ ದಾಳಿಗೂ ಮುನ್ನ ಇರಾನ್ ಗುಪ್ತ ಕಾರ್ಯಕ್ರಮದಡಿಯಲ್ಲಿ ಪರಮಾಣು ಬಾಂಬ್ ತಯಾರಿಕೆಗೆ ತಯಾರಿ ನಡೆಸಿತ್ತು ಎಂದು ವರದಿಯೊಂದು ತಿಳಿಸಿದೆ. ಇಸ್ರೇಲ್ನ ಗುಪ್ತಚರ ವರದಿಗಳ ಪ್ರಕಾರ, ಇರಾನ್ ಕೇವಲ ಒಂದು ವಾರದಲ್ಲಿ ಪರಮಾಣು ಶಸ್ತ್ರಾಸ್ತ್ರ ತಯಾರಿಕೆಗೆ ಸಾಕಷ್ಟು ಯುರೇನಿಯಂ ಅನ್ನು ಶುದ್ಧೀಕರಿಸುವ ಸಾಮರ್ಥ್ಯವನ್ನು ಹೊಂದಿತ್ತು. ಇದರ ಮೂಲಕ ಒಟ್ಟು 15 ಪರಮಾಣು ಬಾಂಬ್ಗಳು ತಯಾರಾಗುವುದರಲ್ಲಿತ್ತು. ಈ ಬಗ್ಗೆ ಸುಳಿವು ಸಿಗುತ್ತಲೇ ಅದನ್ನು ತಪ್ಪಿಸಲೆಂದು ಇರಾನ್ ಮೇಲೆ ಇಸ್ರೇಲ್ ಏಕಾಏಕಿ ದಾಳಿ ನಡೆಸಿತು ಎಂದು ಹೇಳಲಾಗಿದೆ.
ಇಸ್ರೇಲ್ನ ಪ್ರಧಾನಮಂತ್ರಿ ಬೆಂಜಮಿನ್ ನೆತನ್ಯಾಹು ಅವರು ಈ ದಾಳಿಗಳನ್ನು “ಇರಾನ್ನ ಪರಮಾಣು ಯೋಜನೆಗಳನ್ನು ತಡೆಗಟ್ಟಲು ಅಗತ್ಯವಾದ ಕ್ರಮ” ಎಂದು ವಿವರಿಸಿದ್ದಾರೆ. ಶುಕ್ರವಾರದಿಂದ ಆರಂಭವಾದ ಈ ದಾಳಿಗಳು ಇರಾನ್ನ ಪ್ರಮುಖ ಪರಮಾಣು ಕೇಂದ್ರವಾದ ನತಾಂಜ್ನ ಮೇಲ್ಮೈಯಲ್ಲಿರುವ ಯುರೇನಿಯಂ ಶುದ್ಧೀಕರಣ ಘಟಕವನ್ನು ಧ್ವಂಸಗೊಳಿಸಿವೆ ಎಂದು ವಿಶ್ವಸಂಸ್ಥೆಯ ಪರಮಾಣು ತಪಾಸಣಾ ಸಂಸ್ಥೆಯ ಮುಖ್ಯಸ್ಥ ರಾಫೆಲ್ ಗ್ರಾಸ್ಸಿ ದೃಢಪಡಿಸಿದ್ದಾರೆ. ಈ ದಾಳಿಗಳಲ್ಲಿ ಇರಾನ್ನ ಹಲವಾರು ಉನ್ನತ ಮಿಲಿಟರಿ ಅಧಿಕಾರಿಗಳು ಮತ್ತು ಪರಮಾಣು ವಿಜ್ಞಾನಿಗಳು ಹತ್ಯೆಗೀಡಾಗಿದ್ದಾರೆ.
ಇರಾನ್ ತನ್ನ ಪರಮಾಣು ಕಾರ್ಯಕ್ರಮವು ಶಾಂತಿಯುತ ಉದ್ದೇಶಗಳಿಗಾಗಿ ಮಾತ್ರ ಎಂದು ಪದೇ ಪದೇ ಹೇಳಿಕೊಂಡಿದೆ. ಆದರೆ, ಪಾಶ್ಚಿಮಾತ್ಯ ರಾಷ್ಟ್ರಗಳು ಮತ್ತು ಇಸ್ರೇಲ್ ಇದನ್ನು ಅಣ್ವಸ್ತ್ರ ತಯಾರಿಕೆಯ ಸಂಚು ಎಂದು ಆರೋಪಿಸಿವೆ. ಈ ದಾಳಿಗಳಿಂದಾಗಿ ಇರಾನ್ ಮತ್ತು ಅಮೆರಿಕದ ನಡುವೆ ಯೋಜಿತವಾಗಿದ್ದ ಪರಮಾಣು ಮಾತುಕತೆಗಳು ರದ್ದಾಗಿವೆ. ಅಲ್ಲದೇ ಮಧ್ಯಪ್ರಾಚ್ಯದಲ್ಲಿ ಉದ್ವಿಗ್ನತೆ ಮತ್ತಷ್ಟು ಹೆಚ್ಚಾಗಿದೆ.
ಇಸ್ರೇಲ್ ದಾಳಿಗೆ ಇರಾನ್ ತಿರುಗೇಟು ನೀಡುತ್ತಿದ್ದು, ಶುಕ್ರವಾರ, ಶನಿವಾರ ಮತ್ತು ಭಾನುವಾರವೂ ಇಸ್ರೇಲ್ನ ಮೇಲೆ ಕ್ಷಿಪಣಿ ದಾಳಿಗಳನ್ನು ನಡೆಸಿದೆ. ಈ ದಾಳಿಗಳಲ್ಲಿ ಇಸ್ರೇಲ್ನಲ್ಲಿ ಕನಿಷ್ಠ ಮೂವರು ಕೊಲ್ಲಲ್ಪಟ್ಟಿದ್ದಾರೆ ಮತ್ತು ಹಲವರು ಗಾಯಗೊಂಡಿದ್ದಾರೆ. ಇರಾನ್ನ ಆರೋಗ್ಯ ಸಚಿವಾಲಯದ ಪ್ರಕಾರ, ಇಸ್ರೇಲ್ನ ದಾಳಿಗಳಿಂದ ಇರಾನ್ನಲ್ಲಿ 400ಕ್ಕೂ ಅಧಿಕ ಜನರು ಕೊಲ್ಲಲ್ಪಟ್ಟಿದ್ದಾರೆ.
ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಇರಾನ್ ತನ್ನ ಪರಮಾಣು ಕಾರ್ಯಕ್ರಮವನ್ನು ಕಡಿಮೆ ಮಾಡಬೇಕು, ಇಲ್ಲದಿದ್ದರೆ ಇಸ್ರೇಲ್ನ ದಾಳಿಗಳು ಮತ್ತಷ್ಟು ತೀವ್ರಗೊಳ್ಳಬಹುದು ಎಂದು ಎಚ್ಚರಿಕೆ ನೀಡಿದ್ದಾರೆ.
ಈ ಸಂಘರ್ಷದಿಂದ ಇರಾನ್ನ ಪರಮಾಣು ಸಾಮರ್ಥ್ಯಕ್ಕೆ ಕೆಲವು ವರ್ಷಗಳವರೆಗೆ ಹಿನ್ನಡೆಯಾಗಿದೆ ಎಂದು ಇಸ್ರೇಲ್ ವಿಶ್ಲೇಷಿಸಿದೆ. ಆದರೆ, ಇರಾನ್ನ ಗುಪ್ತ ಸೌಲಭ್ಯಗಳಾದ ಫೊರ್ಡೊವ್ನಂತಹವು ಇನ್ನೂ ಸುರಕ್ಷಿತವಾಗಿರಬಹುದು ಎಂದು ತಜ್ಞರು ಅಂದಾಜಿಸಿದ್ದಾರೆ.
