ಅಲಾಸ್ಕಾ : 15 ವರ್ಷದ ಬಾಲಕ ಡೆರೆಕ್ ಪಾರ್ಕರ್ ಅಘ್ನಾಂಗ ಎಂಬಾತ ಕೊರೆಯುವ ಚಳಿಯಿರುವ ಸಾಗರದಲ್ಲಿ ಭೀಕರ ಅಲೆಗಳ ನಡುವೆ ಬರೋಬ್ಬರಿ 62 ಗಂಟೆಗಳ ಕಾಲ ಹೋರಾಡಿ ಪವಾಡಸದೃಶವಾಗಿ ಬದುಕುಳಿದು ಬಂದ ಮನಕಲಕುವ ಘಟನೆಯೊಂದು ಅಲಾಸ್ಕಾದ ಕರಾವಳಿ ತೀರದಲ್ಲಿ ನಡೆದಿದೆ.
ಸೆಪ್ಟೆಂಬರ್ 5ರಂದು ಈತ ತನ್ನ ಅಣ್ಣ ಹಾಗೂ ಸೋದರಸಂಬಂಧಿಯೊಂದಿಗೆ ಸಣ್ಣ ದೋಣಿಯಲ್ಲಿ ಮೀನುಗಾರಿಕೆಗೆ ತೆರಳಿದ್ದಾಗ, ದೋಣಿಯ ಯಂತ್ರಕ್ಕೆ ಮೀನುಗಾರಿಕೆಯ ಬಲೆ ಸಿಲುಕಿಕೊಂಡಿದೆ. ಅದನ್ನು ಬಿಡಿಸಲು ಯತ್ನಿಸುತ್ತಿರುವಾಗಲೇ ಹವಾಮಾನ ವೈಪರೀತ್ಯಗೊಂಡು ದೋಣಿ ಏಕಾಏಕಿ ಸಮುದ್ರದಲ್ಲಿ ಮಗುಚಿ ಬಿದ್ದಿದೆ.
ಮೃತ ಅಣ್ಣಂದಿರನ್ನು ಗಟ್ಟಿಯಾಗಿ ಅಪ್ಪಿಕೊಂಡಿದ್ದ ಬಾಲಕ
ದೋಣಿ ಮಗುಚಿದ ತಕ್ಷಣ ಮೂವರೂ ಕೊರೆಯುವ ಹಿಮದಂತಿದ್ದ ಬೇರಿಂಗ್ ಸಮುದ್ರದ ನೀರಿಗೆ ಬಿದ್ದಿದ್ದಾರೆ. ಗಂಟೆಗಳು ಕಳೆದಂತೆ ಶೀತ ಗಾಳಿ ಹಾಗೂ ಮೈಕೊರೆಯುವ ಚಳಿಯನ್ನು ತಾಳಲಾಗದೇ ಬಾಲಕನ ಅಣ್ಣ ಮತ್ತು ಸೋದರಸಂಬಂಧಿ ನೀರಿನಲ್ಲೇ ಉಸಿರುಚೆಲ್ಲಿದ್ದಾರೆ. ಆದರೆ, ಅಪಾರ ಧೈರ್ಯ ಪ್ರದರ್ಶಿಸಿದ 15 ವರ್ಷದ ಡೆರೆಕ್, ರಕ್ಷಣೆಗೆ ಯಾರಾದರೂ ಬರಬಹುದು ಎಂಬ ಭರವಸೆಯಿಂದ ಮೃತಪಟ್ಟ ಸಹೋದರರ ಮೃತದೇಹಗಳು ಕೊಚ್ಚಿಹೋಗದಂತೆ ಗಟ್ಟಿಯಾಗಿ ಹಿಡಿದುಕೊಂಡಿದ್ದ. ಆದರೆ, ಅಂತಿಮವಾಗಿ ಸಮುದ್ರದ ಬಲವಾದ ಅಲೆಗಳ ಭೋರ್ಗರೆತದ ಎದುರು ಈತ ಸೋತು ಹೋದ. ಮೃತದೇಹಗಳನ್ನು ಹಿಡಿದಿಡಲಾಗದೆ ಕೈಬಿಟ್ಟು ಹತಾಶನಾದ ಎಂದು ಆತನ ಅತ್ತೆ ಕಾಲಿನ್ ವಾಕರ್ ಕಣ್ಣೀರಿಡುತ್ತಾ ನೆನಪಿಸಿಕೊಂಡಿದ್ದಾರೆ.
ಪವಾಡಸದೃಶ ರಕ್ಷಣೆ
ಸಮುದ್ರದಲ್ಲಿ ನಡುಗುತ್ತಲೇ ಮೂರು ದಿನ ಕಾಲ ಕಳೆದ ಬಾಲಕನನ್ನು ಸೆಪ್ಟೆಂಬರ್ 7 ರಂದು ಅಮೆರಿಕದ ಕರಾವಳಿ ರಕ್ಷಕ ಪಡೆ ಹಾಗೂ ‘ನಾರ್ತ್ವೆಸ್ಟ್ ಎಕ್ಸ್ಪ್ಲೋರರ್’ ಹಡಗಿನ ಸಿಬ್ಬಂದಿ ಪತ್ತೆಹಚ್ಚಿ ರಕ್ಷಿಸಿದ್ದಾರೆ. ಬಾಲಕ ಪತ್ತೆಯಾದಾಗ ಆತೀವ ನಿರ್ಜಲೀಕರಣ, ತೀವ್ರ ಹೈಪೋಥರ್ಮಿಯಾ (ದೇಹದ ಉಷ್ಣಾಂಶ ಗಣನೀಯವಾಗಿ ಕಡಿಮೆಯಾಗುವ ಸ್ಥಿತಿ) ಹಾಗೂ ಸಾವುಬದುಕಿನ ನಡುವೆ ಹೋರಾಡುತ್ತಿದ್ದರೂ ಆತನ ಉಸಿರಾಟ ಜೀವಂತವಾಗಿತ್ತು. ಕೂಡಲೇ ಆತನನ್ನು ಏರ್ಲಿಫ್ಟ್ ಮಾಡಿ ತುರ್ತು ವೈದ್ಯಕೀಯ ಚಿಕಿತ್ಸೆಗೆ ಒಳಪಡಿಸಲಾಗಿದೆ. ನಂತರ ಕಾರ್ಯಾಚರಣೆ ನಡೆಸಿ ಮೃತಪಟ್ಟ ಇನ್ನಿಬ್ಬರ ದೇಹಗಳನ್ನು ಸಮುದ್ರದೊಳಗಿಂದ ಹೊರತೆಗೆಯಲಾಗಿದೆ.
ಇದನ್ನೂ ಓದಿ : ಒಂದೇ ಪಂದ್ಯ ಆಡಿದ ಬೆನ್ನಲ್ಲೇ ಗಾಯ ; ವರುಣ್ ಚಕ್ರವರ್ತಿ ಸರಣಿಯಿಂದ ಔಟ್.. BCCI ವೈದ್ಯಕೀಯ ನಿರ್ವಹಣೆ ಬಗ್ಗೆ ಪ್ರಶ್ನೆ!
