ಮೊಜ್ತಬಾ ಖಮೇನಿ ಹತ್ಯೆ ಸಂಚು, ರಾಸಾಯನಿಕ ಅಸ್ತ್ರ : ಸ್ಫೋಟಕ ರಹಸ್ಯ ಬಿಚ್ಚಿಟ್ಟ ಅಮೆರಿಕ ವಿಜ್ಞಾನಿ!

ವಾಷಿಂಗ್ಟನ್ : ಅಮೆರಿಕ ಮತ್ತು ಇರಾನ್ ಸಂಘರ್ಷದ ನಡುವೆಯೇ ಅಮೆರಿಕದ ರಕ್ಷಣಾ ಇಲಾಖೆಯ ಉನ್ನತ ಅಧಿಕಾರಿಯೊಬ್ಬರು ಆಘಾತಕಾರಿ ರಹಸ್ಯಗಳನ್ನು ಬಿಚ್ಚಿಟ್ಟಿರುವ ವಿಡಿಯೋವೊಂದು ಸಂಚಲನ ಸೃಷ್ಟಿಸಿದೆ. ಅಮೆರಿಕ ಸೇನೆಯ ‘ನ್ಯೂಕ್ಲಿಯರ್ ಆಂಡ್ ಕೆಮಿಕಲ್ ಶ್ಯೂರಿಟಿ’ ವಿಭಾಗದ ಮುಖ್ಯಸ್ಥ ಆಂಡ್ರ್ಯೂ ಹಗ್, ಇರಾನ್‌ನ ಉನ್ನತ ನಾಯಕರ ಹತ್ಯೆಯ ಯೋಜನೆ ಮತ್ತು ಅಮೆರಿಕದ ಅಘೋಷಿತ ರಾಸಾಯನಿಕ ಅಸ್ತ್ರಗಳ ಬಗ್ಗೆ ಅಪರಿಚಿತ ವ್ಯಕ್ತಿಯೊಬ್ಬರ ಮುಂದೆ ಮಾತನಾಡಿರುವುದು ಈಗ ಜಾಗತಿಕ ಮಟ್ಟದಲ್ಲಿ ವಿವಾದಕ್ಕೆ ಕಾರಣವಾಗಿದೆ.

ಕನ್ಸರ್ವೇಟಿವ್ ಕಾರ್ಯಕರ್ತ ಜೇಮ್ಸ್ ಓ’ಕೀಫ್ ನೇತೃತ್ವದ ‘ಓ’ಕೀಫ್ ಮೀಡಿಯಾ ಗ್ರೂಪ್’ (OMG) ನಡೆಸಿದ ಗುಪ್ತ ಕಾರ್ಯಾಚರಣೆಯಲ್ಲಿ ಈ ಸತ್ಯ ಹೊರಬಿದ್ದಿದೆ. ಹೋಟೆಲ್ ಒಂದರಲ್ಲಿ ಪತ್ರಕರ್ತನನ್ನು ಸಾಮಾನ್ಯ ವ್ಯಕ್ತಿ ಎಂದು ಭಾವಿಸಿದ ಆಂಡ್ರ್ಯೂ ಹಗ್, ಅಮೆರಿಕದ ಪರಮಾಣು ಭದ್ರತೆ ಮತ್ತು ರಹಸ್ಯ ಸೇನಾ ಕಾರ್ಯಾಚರಣೆಗಳ ಬಗ್ಗೆ ಸುದೀರ್ಘವಾಗಿ ಚರ್ಚಿಸಿದ್ದಾರೆ. ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆಯೇ ಎಚ್ಚೆತ್ತುಕೊಂಡ ಅಮೆರಿಕ ಸೇನೆಯು ಹಗ್ ಅವರನ್ನು ತಕ್ಷಣವೇ ಕಡ್ಡಾಯ ರಜೆಯ ಮೇಲೆ ಕಳುಹಿಸಿ ತನಿಖೆಗೆ ಆದೇಶಿಸಿದೆ. ವರದಿಗಳ ಪ್ರಕಾರ, ವಿಡಿಯೋ ಬಿಡುಗಡೆಯಾದ ಬೆನ್ನಲ್ಲೇ ಅವರನ್ನು ಪೆಂಟಗನ್‌ನಿಂದ ಹೊರಹಾಕಲಾಗಿದೆ.

ಇರಾನ್ ನಾಯಕನ ಹತ್ಯೆಯ ಸುಳಿವು

ಇರಾನ್‌ನ ಹೊಸ ಸರ್ವೋಚ್ಚ ನಾಯಕ ಮೊಜ್ತಬಾ ಖಮೇನಿ ಅವರು ತಮ್ಮ ಹಾದಿಯನ್ನು ಬದಲಿಸಿಕೊಳ್ಳದಿದ್ದರೆ ಅವರು ಅಮೆರಿಕದ ಸೇನೆಯಿಂದ ಹತರಾಗಲಿದ್ದಾರೆ ಎಂದು ಹಗ್ ಸುಳಿವು ನೀಡಿದ್ದಾರೆ. ಅಷ್ಟೇ ಅಲ್ಲದೆ, ಇರಾನ್ ಮೇಲೆ ಅಮೆರಿಕ ನಡೆಸಿದ ವೈಮಾನಿಕ ದಾಳಿಗಳಲ್ಲಿ ಮಕ್ಕಳು ಸೇರಿದಂತೆ ನಾಗರಿಕರು ಸಾವನ್ನಪ್ಪಿರುವುದನ್ನು ಅವರು ಒಪ್ಪಿಕೊಂಡಿದ್ದಾರೆ. ಇದನ್ನು ಅವರು ಯುದ್ಧದಲ್ಲಿ ಸಂಭವಿಸುವ ಸಾಮಾನ್ಯ ‘ಕೊಲ್ಯಾಟರಲ್ ಡ್ಯಾಮೇಜ್’ (ಪಾರ್ಶ್ವ ಹಾನಿ) ಎಂದು ಬಣ್ಣಿಸಿರುವುದು ತೀವ್ರ ಆಕ್ರೋಶಕ್ಕೆ ಕಾರಣವಾಗಿದೆ.

ಮಾರಕ ‘ನರ್ವ್ ಏಜೆಂಟ್’, ರಾಸಾಯನಿಕ ಅಸ್ತ್ರಗಳ ರಹಸ್ಯ

ಅಮೆರಿಕವು ಇಂದಿಗೂ ಅತ್ಯಂತ ಅಪಾಯಕಾರಿ ‘ನರ್ವ್ ಏಜೆಂಟ್’ (ನರಮಂಡಲದ ಮೇಲೆ ದಾಳಿ ಮಾಡುವ ರಾಸಾಯನಿಕ) ಗಳನ್ನು ಹೊಂದಿದೆ ಎಂದು ಹಗ್ ಬಹಿರಂಗಪಡಿಸಿದ್ದಾರೆ. ಮೇರಿಲ್ಯಾಂಡ್‌ನ ಪ್ರಯೋಗಾಲಯಗಳಲ್ಲಿ ಸರಿನ್‌ನಂತಹ ಮಾರಕ ರಾಸಾಯನಿಕಗಳನ್ನು ಸಂಗ್ರಹಿಸಿಡಲಾಗಿದೆ ಎಂದು ಅವರು ಹೇಳಿದ್ದಾರೆ. ಇದೇ ಸಂದರ್ಭದಲ್ಲಿ, ಸುರಕ್ಷತಾ ನಿಯಮಗಳನ್ನು ಪಾಲಿಸದ ಮಹಿಳಾ ವಿಜ್ಞಾನಿಯೊಬ್ಬರು ಈ ರಾಸಾಯನಿಕದ ಸಂಪರ್ಕಕ್ಕೆ ಬಂದು ಸಾವನ್ನಪ್ಪಿದ ಘಟನೆಯನ್ನು ಅವರು ವಿವರಿಸಿದ್ದಾರೆ. ಈ ರಾಸಾಯನಿಕಗಳು ಮನುಷ್ಯನ ಶ್ವಾಸಕೋಶ ಮತ್ತು ಮೆದುಳನ್ನು ತಕ್ಷಣವೇ ಸ್ತಬ್ಧಗೊಳಿಸುವ ಶಕ್ತಿ ಹೊಂದಿವೆ ಎಂಬ ಭಯಾನಕ ಸತ್ಯವನ್ನು ಅವರು ಬಿಚ್ಚಿಟ್ಟಿದ್ದಾರೆ.

ಅಮೆರಿಕದ ಕ್ಷಿಪಣಿ ಉಡಾವಣಾ ಪತ್ತೆ ಹಚ್ಚುವ ವ್ಯವಸ್ಥೆಯ ಬಗ್ಗೆಯೂ ಹಗ್ ಮಾಹಿತಿ ನೀಡಿದ್ದಾರೆ. ಬಾಹ್ಯಾಕಾಶದಲ್ಲಿರುವ ಸಂವೇದಕಗಳು (Sensors) ಮತ್ತು ರಾಡಾರ್‌ಗಳ ಮೂಲಕ ಶತ್ರುಗಳ ಕ್ಷಿಪಣಿಯ ವೇಗ, ಗಾತ್ರ ಮತ್ತು ದಿಕ್ಕನ್ನು ನಿಖರವಾಗಿ ಪತ್ತೆಹಚ್ಚಬಹುದು ಎಂದು ಅವರು ಹೇಳಿದ್ದಾರೆ. ಪರಮಾಣು ಅಸ್ತ್ರಗಳ ನಿರ್ವಹಣೆಗೆ ಮಾನಸಿಕವಾಗಿ ಸದೃಢರಾದವರನ್ನು ಮಾತ್ರ ನೇಮಕ ಮಾಡಲಾಗುತ್ತದೆ ಎಂದು ಹೇಳಿದ ಅವರು, ಉಡಾವಣಾ ಸಂದೇಶಗಳು ಬಂದಾಗ ಅದನ್ನು ಕಟ್ಟುನಿಟ್ಟಾಗಿ ಪಾಲಿಸುವ ತರಬೇತಿಯ ಬಗ್ಗೆಯೂ ವಿವರಿಸಿದ್ದಾರೆ. ಈ ರಹಸ್ಯ ಮಾಹಿತಿಗಳ ಸೋರಿಕೆ ಈಗ ಅಮೆರಿಕದ ರಾಷ್ಟ್ರೀಯ ಭದ್ರತೆಗೆ ದೊಡ್ಡ ತಲೆನೋವಾಗಿ ಪರಿಣಮಿಸಿದೆ.

ಇದನ್ನೂ ಓದಿ : ಪೋಷಕರೇ ಗಮನಿಸಿ ; 5-17 ವರ್ಷದ ಮಕ್ಕಳ ಆಧಾರ್ ಅಪ್ಡೇಟ್ ಈಗ ಕಡ್ಡಾಯ – ಇಲ್ಲದಿದ್ದರೆ ಸೌಲಭ್ಯ ರದ್ದು