ವಾಷಿಂಗ್ಟನ್: ಅಮೆರಿಕದಲ್ಲಿ ನೆಲೆಸಿ ಟ್ರಕ್ಕಿಂಗ್ ಉದ್ಯಮದಲ್ಲಿ ತೊಡಗಿಸಿಕೊಂಡಿರುವ ಲಕ್ಷಾಂತರ ವಲಸಿಗರಿಗೆ, ವಿಶೇಷವಾಗಿ ಭಾರತೀಯ ಮೂಲದ ಚಾಲಕರಿಗೆ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೇತೃತ್ವದ ಆಡಳಿತವು ಭಾರಿ ಶಾಕ್ ನೀಡಿದೆ. ದೇಶದಲ್ಲಿರುವ ವಲಸಿಗ ಟ್ರಕ್ ಚಾಲಕರ ಬದಲಿಗೆ ಮುಂಬರುವ ದಿನಗಳಲ್ಲಿ ಅಮೆರಿಕದ ನಿವೃತ್ತ ಸೇನಾ ಸಿಬ್ಬಂದಿಯನ್ನು ನೇಮಕ ಮಾಡಿಕೊಳ್ಳಲಾಗುವುದು ಎಂದು ಟ್ರಂಪ್ ಘೋಷಿಸಿದ್ದಾರೆ. ವಲಸಿಗ ಚಾಲಕರಲ್ಲಿ ಹಲವರು ಮಾದಕ ದ್ರವ್ಯ ಮತ್ತು ಮದ್ಯದ ಅಮಲಿನಲ್ಲಿ ವಾಹನ ಚಾಲನೆ ಮಾಡಿ ಅಮೆರಿಕದ ನಾಗರಿಕರ ಸಾವಿಗೆ ಕಾರಣರಾಗುತ್ತಿದ್ದಾರೆ ಎಂದು ಟ್ರಂಪ್ ಗಂಭೀರವಾಗಿ ಆಪಾದಿಸಿದ್ದು, ಈ ಹೊಸ ಪ್ರಸ್ತಾವನೆಯು ಅಮೆರಿಕದಲ್ಲಿರುವ ಸುಮಾರು 1.5 ಲಕ್ಷಕ್ಕೂ ಹೆಚ್ಚು ಭಾರತೀಯ ಟ್ರಕ್ ಚಾಲಕರ ಮೇಲೆ ತೂಗುಗತ್ತಿಯಾಗಿ ಪರಿಣಮಿಸಿದೆ.
ಪೆನ್ಸಿಲ್ವೇನಿಯಾದಲ್ಲಿ ನಡೆದ ಮಿಲಿಟರಿ ಹೂಡಿಕೆ ಶೃಂಗಸಭೆಯಲ್ಲಿ ಮಾತನಾಡಿದ ಡೊನಾಲ್ಡ್ ಟ್ರಂಪ್, ಅಕ್ರಮ ವಲಸಿಗ ಟ್ರಕ್ ಚಾಲಕರ ವಿರುದ್ಧ ತಮ್ಮ ಆಡಳಿತವು ಈಗಾಗಲೇ ದೇಶಾದ್ಯಂತ ವ್ಯಾಪಕ ಕಾರ್ಯಾಚರಣೆ ಆರಂಭಿಸಿದೆ ಎಂದು ತಿಳಿಸಿದ್ದಾರೆ. ಅಮೆರಿಕಕ್ಕೆ ಅಕ್ರಮವಾಗಿ ನುಸುಳಿರುವ ಹಲವು ಚಾಲಕರಿಗೆ ರಸ್ತೆ ಸಂಕೇತಗಳನ್ನು (ಸೈನ್ ಬೋರ್ಡ್) ಓದಲು ಬರುವುದಿಲ್ಲ. ಇವರಲ್ಲಿ ಗಣನೀಯ ಪ್ರಮಾಣದ ಜನ ಮಾದಕ ವ್ಯಸನಿಗಳಾಗಿದ್ದು, ಅಮೆರಿಕದ ರಸ್ತೆಗಳಲ್ಲಿ ಸಾರ್ವಜನಿಕರ ಪ್ರಾಣಕ್ಕೆ ಕುತ್ತು ತರುತ್ತಿದ್ದಾರೆ ಎಂದು ಅವರು ಕಿಡಿಕಾರಿದ್ದಾರೆ. ಈ ಹಿನ್ನೆಲೆಯಲ್ಲಿ, ಮಿಲಿಟರಿಯಲ್ಲಿ ಭಾರೀ ವಾಹನಗಳನ್ನು ಚಾಲನೆ ಮಾಡಿದ ಅನುಭವವಿರುವ ಅಮೆರಿಕದ ಹೆಮ್ಮೆಯ ಮಾಜಿ ಸೈನಿಕರಿಗೆ ನೇರವಾಗಿ ಕಮರ್ಷಿಯಲ್ ಡ್ರೈವಿಂಗ್ ಲೈಸೆನ್ಸ್ ನೀಡಿ, ವಲಸಿಗರ ಜಾಗಕ್ಕೆ ಇವರನ್ನು ತರಲಾಗುವುದು ಎಂದು ಟ್ರಂಪ್ ಸ್ಪಷ್ಟಪಡಿಸಿದ್ದಾರೆ.
ಭಾರತೀಯರು ವಿಶೇಷವಾಗಿ ಪಂಜಾಬಿ ಸಮುದಾಯಕ್ಕೆ ಹೊಡೆತ
ಅಮೆರಿಕದ ಟ್ರಕ್ಕಿಂಗ್ ರಂಗದಲ್ಲಿ ಉದ್ಯೋಗಿಗಳ ಕೊರತೆ ಇದ್ದಿದ್ದರಿಂದ ಹಾಗೂ ಆರಂಭದಲ್ಲೇ ಉತ್ತಮ ವೇತನ ದೊರೆಯುತ್ತಿದ್ದ ಕಾರಣ ಭಾರತದಿಂದ ಹೋದ ಲಕ್ಷಾಂತರ ವಲಸಿಗರು ಇತ್ತೀಚಿನ ವರ್ಷಗಳಲ್ಲಿ ಈ ಉದ್ಯಮವನ್ನು ನೆಚ್ಚಿಕೊಂಡಿದ್ದರು. ಉತ್ತರ ಅಮೆರಿಕನ್ ಪಂಜಾಬಿ ಟ್ರಕ್ಕರ್ಸ್ ಅಸೋಸಿಯೇಷನ್ ನೀಡಿರುವ ಮಾಹಿತಿಯ ಪ್ರಕಾರ, ಅಮೆರಿಕದಲ್ಲಿ ಸದ್ಯ ಪಂಜಾಬ್ ಮತ್ತು ಹರ್ಯಾಣ ಮೂಲದ ಸುಮಾರು 1.30 ಲಕ್ಷದಿಂದ 1.50 ಲಕ್ಷ ಟ್ರಕ್ ಚಾಲಕರು ಕೆಲಸ ಮಾಡುತ್ತಿದ್ದಾರೆ. ಈಗಾಗಲೇ ಕಡ್ಡಾಯ ಇಂಗ್ಲಿಷ್ ಭಾಷಾ ಪ್ರಾವೀಣ್ಯತೆ ಪರೀಕ್ಷೆ ಹಾಗೂ ವಲಸಿಗರಿಗೆ ಪರವಾನಗಿ ನೀಡುವುದನ್ನು ತಡೆದಿರುವ ಇತ್ತೀಚಿನ ‘ಕಾನೂನು’ಗಳಿಂದಾಗಿ ಈ ಸಮುದಾಯ ತತ್ತರಿಸಿದೆ. ಇದರ ಬೆನ್ನಲ್ಲೇ ಬಂದಿರುವ ಟ್ರಂಪ್ ಅವರ ಈ ಹೊಸ ಪ್ರಸ್ತಾವನೆಯು ಭಾರತೀಯರನ್ನು ಮತ್ತಷ್ಟು ಸಂಕಷ್ಟಕ್ಕೆ ತಳ್ಳಿದೆ.
ಹೆಚ್ಚಿದ ಅಪರಾಧ ಪ್ರಕರಣಗಳು ಕಾರಣ
ಇತ್ತೀಚಿನ ದಿನಗಳಲ್ಲಿ ಭಾರತೀಯ ಮೂಲದ ಟ್ರಕ್ ಚಾಲಕರು ಅಮೆರಿಕದಲ್ಲಿ ಸರಣಿ ಅಪಘಾತಗಳು ಹಾಗೂ ಮಾದಕ ದ್ರವ್ಯ ದಂಧೆಯಲ್ಲಿ ಸಿಲುಕಿಕೊಳ್ಳುತ್ತಿರುವುದು ಕೂಡ ಈ ಬಿಗಿ ಕ್ರಮಕ್ಕೆ ಪ್ರಮುಖ ಕಾರಣವಾಗಿದೆ. ಕಳೆದ ವರ್ಷ ಒರೆಗಾನ್‌ನಲ್ಲಿ ಭಾರತೀಯ ಚಾಲಕನೊಬ್ಬನ ಬೇಜವಾಬ್ದಾರಿತನದಿಂದಾಗಿ ನವವಿವಾಹಿತ ದಂಪತಿ ಸಾವನ್ನಪ್ಪಿದ್ದರು. ಹಾಗೆಯೇ ಕ್ಯಾಲಿಫೋರ್ನಿಯಾದಲ್ಲಿ ಮಾದಕ ದ್ರವ್ಯ ಸೇವಿಸಿ ಟ್ರಕ್ ಚಾಲನೆ ಮಾಡಿ ಮೂವರ ಸಾವಿಗೆ ಕಾರಣನಾಗಿದ್ದ ಭಾರತ ಮೂಲದ ಚಾಲಕನನ್ನು ಬಂಧಿಸಲಾಗಿತ್ತು. ಇದಲ್ಲದೆ, ಇತ್ತೀಚೆಗಷ್ಟೇ ಇಂಡಿಯಾನಾ ಪೊಲೀಸರು ಇಬ್ಬರು ಭಾರತೀಯ ಟ್ರಕ್ ಚಾಲಕರಿಂದ ಬರೋಬ್ಬರಿ 7 ಮಿಲಿಯನ್ ಡಾಲರ್ ಮೌಲ್ಯದ ಕೊಕೇನ್ ವಶಪಡಿಸಿಕೊಂಡಿದ್ದರು. ಈ ಎಲ್ಲಾ ಬೆಳವಣಿಗೆಗಳ ಹಿನ್ನೆಲೆಯಲ್ಲಿ, ಈ ಪ್ರಸ್ತಾವನೆ ಅಧಿಕೃತವಾಗಿ ಜಾರಿಯಾಗಲು ಸಮಯ ಹಿಡಿದರೂ, ಟ್ರಂಪ್ ಆಡಳಿತದ ವಲಸೆ ವಿರೋಧಿ ನೀತಿಯಡಿಯಲ್ಲಿ ಭಾರತೀಯ ಟ್ರಕ್ ಚಾಲಕರು ಮುಂದಿನ ದಿನಗಳಲ್ಲಿ ತೀವ್ರ ನಿಗಾ ಮತ್ತು ತಪಾಸಣೆಗೆ ಒಳಗಾಗುವುದು ನಿಶ್ಚಿತವಾಗಿದೆ.
