ವಾಷಿಂಗ್ಟನ್ : ಅಮೆರಿಕ-ಇರಾನ್ ನಡುವೆ ಪಾಕಿಸ್ತಾನದಲ್ಲಿ ನಡೆಯಬೇಕಿದ್ದ 2ನೇ ಸುತ್ತಿನ ಶಾಂತಿ ಮಾತುಕತೆಯ ಭವಿಷ್ಯ ಇದೀಗ ಅತಂತ್ರವಾಗಿದೆ. ಹೊರ್ಮುಜ್ ಜಲಸಂಧಿ ಬಳಿ ಇರಾನ್ ಧ್ವಜವಿದ್ದ ಹಡಗನ್ನು ಅಮೆರಿಕ ಸೇನೆ ವಶಪಡಿಸಿಕೊಂಡ ಬೆನ್ನಲ್ಲೇ ಮಾತುಕತೆಯಲ್ಲಿ ಪಾಲ್ಗೊಳ್ಳುವುದಿಲ್ಲ ಎಂದು ಇರಾನ್ ಕಡ್ಡಿಮುರಿದಂತೆ ಹೇಳಿದೆ. ಇದರ ನಡುವೆಯೇ ವಾಷಿಂಗ್ಟನ್ ಮತ್ತು ಟೆಹ್ರಾನ್ ನಡುವಿನ ಎರಡು ವಾರಗಳ ಕದನ ವಿರಾಮ ಬುಧವಾರ ಮುಕ್ತಾಯಗೊಳ್ಳಲಿದ್ದು, ಇದನ್ನು ವಿಸ್ತರಿಸುವ ಸಾಧ್ಯತೆ ತೀರಾ ಕಡಿಮೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಹೇಳಿದ್ದಾರೆ.
‘ಒಪ್ಪಂದವಿಲ್ಲದಿದ್ದರೆ ಬಾಂಬ್ ದಾಳಿ ಖಚಿತ’
ಶಾಂತಿ ಮಾತುಕತೆ ಕುರಿತ ಅನಿಶ್ಚಿತತೆಯ ನಡುವೆಯೂ ಅಮೆರಿಕದ ನಿಯೋಗ ಪಾಕಿಸ್ತಾನಕ್ಕೆ ತೆರಳಿದೆ. ಉಪಾಧ್ಯಕ್ಷ ಜೆ.ಡಿ. ವ್ಯಾನ್ಸ್ ನೇತೃತ್ವದಲ್ಲಿ, ಮಧ್ಯಪ್ರಾಚ್ಯದ ವಿಶೇಷ ರಾಯಭಾರಿ ಸ್ಟೀವ್ ವಿಟ್ಕಾಫ್ ಮತ್ತು ಟ್ರಂಪ್ ಅಳಿಯ ಜೇರೆಡ್ ಕುಶ್ನರ್ ಅವರನ್ನೊಳಗೊಂಡ ತಂಡವನ್ನು ವಾಷಿಂಗ್ಟನ್ ಕಳುಹಿಸುತ್ತಿದೆ. ಆದರೆ, ಈ ಸೂಕ್ಷ್ಮ ಕದನ ವಿರಾಮವು ಯಾವುದೇ ಮಹತ್ವದ ಒಪ್ಪಂದವಿಲ್ಲದೆ ಮುಕ್ತಾಯಗೊಂಡರೆ, “ಇರಾನ್ ಮೇಲೆ ಬಾಂಬ್ಗಳ ಮಳೆ ಸುರಿಯಲಿವೆ” ಎಂದು ಟ್ರಂಪ್ ಕಟು ಎಚ್ಚರಿಕೆ ನೀಡಿದ್ದಾರೆ. ತಾವು ಮಾತುಕತೆಗೆ ಸಿದ್ಧರಿದ್ದು, ಇರಾನ್ ನಿಯೋಗ ಬಾರದೆ ಇದ್ದರೂ ತಮಗೆ ಯಾವುದೇ ಸಮಸ್ಯೆಯಿಲ್ಲ ಎಂಬ ಸಂದೇಶವನ್ನೂ ಅವರು ರವಾನಿಸಿದ್ದಾರೆ.
‘ಹೊಸ ಅಸ್ತ್ರ’ ರೆಡಿಯಿದೆ ಎಂದ ಇರಾನ್
ಟ್ರಂಪ್ ಅವರ ಹೇಳಿಕೆಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಇರಾನ್, ಹೊರ್ಮುಜ್ ನಲ್ಲಿ ಅಮೆರಿಕದ ದಿಗ್ಬಂಧನ ಹಾಗೂ ಕದನ ವಿರಾಮ ಉಲ್ಲಂಘನೆಯು, ಟ್ರಂಪ್ ಅವರು ಮಾತುಕತೆಯ ಮೇಜನ್ನು ಶರಣಾಗತಿಯ ಮೇಜನ್ನಾಗಿ ಪರಿವರ್ತಿಸಲು ಅಥವಾ ಮತ್ತೊಂದು ಯುದ್ಧವನ್ನು ಸಮರ್ಥಿಸಿಕೊಳ್ಳಲು ಮಾಡುತ್ತಿರುವ ಹುನ್ನಾರವಾಗಿದೆ ಎಂದು ಆರೋಪಿಸಿದೆ. ಇರಾನ್ ಸಂಸತ್ ಸ್ಪೀಕರ್ ಹಾಗೂ ಅಮೆರಿಕದೊಂದಿಗಿನ ಮಾತುಕತೆಯ ಪ್ರಮುಖ ಸಂಧಾನಕಾರ ಮೊಹಮ್ಮದ್ ಬಘೇರ್ ಘಾಲಿಬಾಫ್ ಈ ಬಗ್ಗೆ ಪ್ರತಿಕ್ರಿಯಿಸಿ, “ಬೆದರಿಕೆಯ ನೆರಳಿನಲ್ಲಿ ನಡೆಯುವ ಮಾತುಕತೆಗಳನ್ನು ನಾವು ಒಪ್ಪುವುದಿಲ್ಲ. ಯುದ್ಧಭೂಮಿಯಲ್ಲಿ ಹೊಸ ಅಸ್ತ್ರಗಳನ್ನು (ಹೊಸ ಕಾರ್ಡ್ಗಳನ್ನು) ಪ್ರದರ್ಶಿಸಲು ನಾವು ಸಿದ್ಧತೆ ನಡೆಸಿದ್ದೇವೆ” ಎಂದು ‘ಎಕ್ಸ್’ ಜಾಲತಾಣದಲ್ಲಿ ಎಚ್ಚರಿಸಿದ್ದಾರೆ. ಅಮೆರಿಕ ಮತ್ತು ಇಸ್ರೇಲ್ ವಿರುದ್ಧ ಯುದ್ಧ ಮರುಕಳಿಸಿದರೆ ತಮ್ಮ ಬಳಿ ಹೊಸ ಅಸ್ತ್ರಗಳಿವೆ ಎಂಬುದನ್ನು ಅವರು ಸ್ಪಷ್ಟಪಡಿಸಿದ್ದಾರೆ.
ಯುದ್ಧವನ್ನು ಅಂತ್ಯಗೊಳಿಸುವ ನಿಟ್ಟಿನಲ್ಲಿ ಎರಡೂ ರಾಷ್ಟ್ರಗಳು ಆಶಾವಾದ ವ್ಯಕ್ತಪಡಿಸಿದ್ದರೂ, ಪ್ರಮುಖ ಜಲಮಾರ್ಗವಾದ ಹೊರ್ಮುಜ್ ಜಲಸಂಧಿಯ ಸುತ್ತಮುತ್ತಲಿನ ಬಿಕ್ಕಟ್ಟು ಶಾಂತಿ ಮಾತುಕತೆಗೆ ತೊಡಕಾಗಿ ಪರಿಣಮಿಸಿದೆ. ವಾಷಿಂಗ್ಟನ್ ಪೋಸ್ಟ್ ವರದಿಯ ಪ್ರಕಾರ, ಎರಡೂ ದೇಶಗಳು ಒಪ್ಪಂದದ ರೂಪುರೇಷೆಗಳಿಗೆ ಬಹುಪಾಲು ಸಮ್ಮತಿಸಿವೆ. ಆದರೆ ಟ್ರಂಪ್ ಅವರ ಬದಲಾಗುತ್ತಿರುವ ನಿಲುವು, ಸಾರ್ವಜನಿಕ ಹೇಳಿಕೆಗಳು ಮತ್ತು ಅಮೆರಿಕದ ನಿರಂತರ ದಿಗ್ಬಂಧನವು ಮಾತುಕತೆಗೆ ಪ್ರಮುಖ ತೊಡಕಾಗಿದೆ ಎಂದು ಅನಾಮಧೇಯ ಇರಾನ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಮತ್ತೊಂದೆಡೆ, ಪಾಕಿಸ್ತಾನದಲ್ಲಿರುವ ಮಧ್ಯಸ್ಥಿಕೆದಾರರು ಕೂಡ ಟ್ರಂಪ್ ಆಡಳಿತಕ್ಕೆ ಇಂತಹುದೇ ಸಂದೇಶವನ್ನು ರವಾನಿಸಿದ್ದು, ಪ್ರಚೋದನಕಾರಿ ಸಾರ್ವಜನಿಕ ಹೇಳಿಕೆಗಳನ್ನು ನೀಡದಂತೆ ಎಚ್ಚರಿಸಿದ್ದಾರೆ. ಇಸ್ಲಾಮಾಬಾದ್ನಲ್ಲಿ ನಡೆಯುವ ಮಾತುಕತೆಯನ್ನು ಅಮೆರಿಕ ಮತ್ತು ಇರಾನ್ ಎರಡಕ್ಕೂ ‘ಗೆಲುವು’ (ವಿನ್-ವಿನ್) ಎಂಬ ನಿರೂಪಣೆಗೆ ಅವಕಾಶ ನೀಡುವಂತೆ ಮಧ್ಯಸ್ಥಿಕೆದಾರರು ಅಮೆರಿಕ ಅಧ್ಯಕ್ಷರನ್ನು ಒತ್ತಾಯಿಸಿದ್ದಾರೆ ಎಂದು ಹೇಳಲಾಗಿದೆ.
ಇದನ್ನೂ ಓದಿ : ಸ್ಥಳೀಯ ಸ್ವರಾಜ್ಯ ಸಂಸ್ಥೆಗಳ ಚುನಾವಣೆ ವಿಳಂಬ : ರಾಜ್ಯ ಸರ್ಕಾರದ ವಿರುದ್ಧ ರಾಷ್ಟ್ರಪತಿಗೆ ದಿನೇಶ್ ಕಲ್ಲಹಳ್ಳಿ ದೂರು!
