ಬೆಂಗಳೂರು : ಟಾಟಾ ಮೋಟಾರ್ಸ್ ಭಾರತೀಯ ವಾಹನ ಮಾರುಕಟ್ಟೆಯಲ್ಲಿ ಹೊಸ ಸಂಚಲನ ಸೃಷ್ಟಿಸಲು ಸಜ್ಜಾಗಿದ್ದು, ದಶಕಗಳ ಹಿಂದೆ ಕಾರು ಪ್ರಿಯರ ಮನಗೆದ್ದಿದ್ದ ಐಕಾನಿಕ್ ‘ಸಿಯೆರಾ’ ವಿನ್ಯಾಸವನ್ನು ಇದೀಗ ಎಲೆಕ್ಟ್ರಿಕ್ ಅವತಾರದಲ್ಲಿ ಮರಳಿ ತರುತ್ತಿದೆ.
ಕಾರು ಪ್ರಿಯರು ಅತಿ ಹೆಚ್ಚು ನಿರೀಕ್ಷೆಯಿಂದ ಕಾಯುತ್ತಿರುವ ಟಾಟಾ ಸಿಯೆರಾ ಇವಿ (Sierra EV) ಜೂನ್ 30 ರಂದು ಅಧಿಕೃತವಾಗಿ ಅನಾವರಣಗೊಳ್ಳಲಿದೆ. ಸುಮಾರು 6 ವರ್ಷಗಳ ನಿರಂತರ ಅಭಿವೃದ್ಧಿಯ ನಂತರ ಈ ಎಲೆಕ್ಟ್ರಿಕ್ ಎಸ್ಯುವಿ ರಸ್ತೆಗಿಳಿಯಲು ಸಿದ್ಧವಾಗಿದೆ. 2020 ರಲ್ಲೇ ಇದರ ಕಾನ್ಸೆಪ್ಟ್ ಮಾದರಿಯನ್ನು ಪ್ರದರ್ಶಿಸಲಾಗಿದ್ದರೂ, ಇದೀಗ ಬಿಡುಗಡೆಗೂ ಮುನ್ನವೇ ಈ ನೂತನ ವಾಹನವು ತನ್ನ ಅದ್ಭುತ ವಿನ್ಯಾಸ ಹಾಗೂ ಅತ್ಯಾಧುನಿಕ ರೇಂಜ್ ಮತ್ತು ತಂತ್ರಜ್ಞಾನಗಳಿಂದ ಉದ್ಯಮದಲ್ಲಿ ಭಾರಿ ಕುತೂಹಲ ಮೂಡಿಸಿದೆ.
ಈ ನೂತನ ಸಿಯೆರಾ ಇವಿ ವಿನ್ಯಾಸವು ಹಳೆಯ ಗ್ರಾಹಕರ ನಾಸ್ಟಾಲ್ಜಿಯಾ ಹಾಗೂ ಆಧುನಿಕ ಇವಿ ತಂತ್ರಜ್ಞಾನದ ಸುಂದರ ಸಮ್ಮಿಲನವಾಗಿದೆ. ವಾಹನದ ಮುಂಭಾಗದಲ್ಲಿ ಇವಿಗೆ ತಕ್ಕಂತೆ ಬಾಡಿ-ಕಲರ್ಡ್ ಗ್ರಿಲ್ ಪ್ಯಾನೆಲ್ ಹಾಗೂ ಮಧ್ಯದಲ್ಲಿ ಟಾಟಾ ಲೋಗೋ ನೀಡಲಾಗಿದ್ದು, ಪೂರ್ಣ ಅಗಲದ ಕನೆಕ್ಟೆಡ್ ಎಲ್ಇಡಿ ಡಿಆರ್ಎಲ್ ಗಮನ ಸೆಳೆಯುತ್ತದೆ.
ಬಂಪರ್ನಲ್ಲಿ ಅಳವಡಿಸಲಾದ ಆಯತಾಕಾರದ ಎಲ್ಇಡಿ ಹೆಡ್ಲ್ಯಾಂಪ್ಗಳು ಹಾಗೂ ಲಂಬವಾಗಿ ಜೋಡಿಸಲಾದ ಫಾಗ್ ಲ್ಯಾಂಪ್ಗಳು ವಾಹನಕ್ಕೆ ಆಕರ್ಷಕ ಲುಕ್ ನೀಡಿವೆ. ಸಿಯೆರಾದ ಐಕಾನಿಕ್ ಹಾಗೂ ಅತಿ ಹೆಚ್ಚು ಜನಪ್ರಿಯವಾಗಿದ್ದ ಆಲ್ಫೈನ್ ಶೈಲಿಯ ರಿಯರ್ ಕ್ವಾರ್ಟರ್ ಗ್ಲಾಸ್ ಅನ್ನು ಈ ಇವಿಯಲ್ಲೂ ಉಳಿಸಿಕೊಳ್ಳಲಾಗಿದೆ. ಇದರೊಂದಿಗೆ 19 ಇಂಚಿನ ಏರೋಡೈನಾಮಿಕ್ ಡ್ಯುಯಲ್-ಟೋನ್ ಅಲಾಯ್ ವೀಲ್ಗಳು ಹಾಗೂ ಫ್ಲಶ್-ಫಿಟ್ಟಿಂಗ್ ಡೋರ್ ಹ್ಯಾಂಡಲ್ಗಳು ವಾಹನಕ್ಕೆ ಬಲವಾದ ಮತ್ತು ಸ್ಪೋರ್ಟಿ ಎಸ್ಯುವಿ ಲುಕ್ ನೀಡುತ್ತವೆ.
ಪ್ರೀಮಿಯಂ ಲುಕ್
ಕಾರಿನ ಒಳಾಂಗಣವು ಸಂಪೂರ್ಣವಾಗಿ ಪ್ರೀಮಿಯಂ ಹಾಗೂ ಭವಿಷ್ಯದ ತಂತ್ರಜ್ಞಾನಗಳಿಂದ ಕೂಡಿದೆ. ಟಾಪ್-ಎಂಡ್ ವೇರಿಯೆಂಟ್ಗಳಲ್ಲಿ ಟ್ರಿಪಲ್-ಸ್ಕ್ರೀನ್ ಸೆಟಪ್ ಇರಲಿದ್ದು, 10.25 ಇಂಚಿನ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್, 12.3 ಇಂಚಿನ ಟಚ್ಸ್ಕ್ರೀನ್ ಇನ್ಫೋಟೈನ್ಮೆಂಟ್ ಸಿಸ್ಟಮ್ ಮತ್ತು ಮುಂಭಾಗದ ಪ್ರಯಾಣಿಕರಿಗಾಗಿ ಪ್ರತ್ಯೇಕ 12.3 ಇಂಚಿನ ಡಿಸ್ಪ್ಲೇ ಅಳವಡಿಸಲಾಗಿದೆ. ಇದರೊಂದಿಗೆ ಪ್ಯಾನೊರಮಿಕ್ ಸನ್ರೂಫ್, ವೆಂಟಿಲೇಟೆಡ್ ಸೀಟ್ಗಳು, ಡ್ಯುಯಲ್-ಝೋನ್ ಕ್ಲೈಮೇಟ್ ಕಂಟ್ರೋಲ್, ಮತ್ತು ಡಾಲ್ಬಿ ಅಟ್ಮಾಸ್ ತಂತ್ರಜ್ಞಾನವನ್ನು ಬೆಂಬಲಿಸುವ 12 ಸ್ಪೀಕರ್ಗಳ ಅತ್ಯುನ್ನತ ಗುಣಮಟ್ಟದ ಜೆಬಿಎಲ್ (JBL) ಆಡಿಯೋ ಸಿಸ್ಟಮ್ ಪ್ರಯಾಣಿಕರಿಗೆ ಐಷಾರಾಮಿ ಅನುಭವ ಒದಗಿಸಲಿವೆ. ಸುರಕ್ಷತೆಯ ವಿಷಯದಲ್ಲೂ ಟಾಟಾ ಯಾವುದೇ ರಾಜಿಯಾಗದೆ, 6 ಏರ್ಬ್ಯಾಗ್ಗಳು, 360-ಡಿಗ್ರಿ ಕ್ಯಾಮೆರಾ ಹಾಗೂ ಕೃತಕ ಬುದ್ಧಿಮತ್ತೆ ಆಧಾರಿತ ಲೆವೆಲ್ 2 ಎಡಿಎಎಸ್ (ADAS) ಸೇರಿದಂತೆ ಅತ್ಯಾಧುನಿಕ ಸುರಕ್ಷತಾ ಫೀಚರ್ಗಳನ್ನು ಒದಗಿಸಲಿದೆ.
ಟಾಟಾದ ಅತ್ಯಾಧುನಿಕ ಆಕ್ಟಿ.ಇವಿ+ (Acti.ev+) ಪ್ಲಾಟ್ಫಾರ್ಮ್ ಆಧಾರದ ಮೇಲೆ ಸಿಯೆರಾ ಇವಿ ನಿರ್ಮಾಣವಾಗುತ್ತಿರುವುದು ಇದರ ಪ್ರಮುಖ ಆಕರ್ಷಣೆಯಾಗಿದೆ. ಕಂಪನಿಯು ಹ್ಯಾರಿಯರ್ ಇವಿಯಂತೆಯೇ ಈ ವಾಹನಕ್ಕೂ 65 kWh ಮತ್ತು 75 kWh ಸಾಮರ್ಥ್ಯದ ಎರಡು ಬ್ಯಾಟರಿ ಪ್ಯಾಕ್ ಆಯ್ಕೆಗಳನ್ನು ಒದಗಿಸುವ ನಿರೀಕ್ಷೆಯಿದೆ. 65 kWh ಬ್ಯಾಟರಿಯು ಒಮ್ಮೆ ಪೂರ್ಣ ಚಾರ್ಜ್ ಮಾಡಿದರೆ ಸುಮಾರು 538 ಕಿಲೋಮೀಟರ್ ಮೈಲೇಜ್ ನೀಡಲಿದ್ದರೆ, ದೊಡ್ಡದಾದ 75 kWh ಬ್ಯಾಟರಿಯು 627 ಕಿಲೋಮೀಟರ್ಗಳವರೆಗೆ ಭರ್ಜರಿ ರೇಂಜ್ ನೀಡುವ ಸಾಮರ್ಥ್ಯ ಹೊಂದಿದೆ ಎನ್ನಲಾಗಿದೆ. ರಿಯರ್-ವೀಲ್ ಡ್ರೈವ್ (RWD) ಮಾದರಿಯು 238 PS ಪವರ್ ಉತ್ಪಾದಿಸಿದರೆ, ಡ್ಯುಯಲ್-ಮೋಟರ್ ಹೊಂದಿರುವ ಆಲ್-ವೀಲ್ ಡ್ರೈವ್ (AWD) ಮಾದರಿಯು ಒಟ್ಟು 504 Nm ಟಾರ್ಕ್ ಒದಗಿಸಲಿದ್ದು, ಭರ್ಜರಿ ಪರ್ಫಾರ್ಮೆನ್ಸ್ ನೀಡಲು ಸಿದ್ಧವಾಗಿದೆ.
ಭಾರತೀಯ ಎಲೆಕ್ಟ್ರಿಕ್ ವಾಹನ ಮಾರುಕಟ್ಟೆಯಲ್ಲಿ ಕರ್ವ್ ಇವಿ ಹಾಗೂ ಹ್ಯಾರಿಯರ್ ಇವಿ ನಡುವಿನ ಸ್ಥಾನವನ್ನು ಈ ಸಿಯೆರಾ ಇವಿ ಬಲವಾಗಿ ತುಂಬಲಿದೆ ಎನ್ನುವುದು ಮಾರುಕಟ್ಟೆ ತಜ್ಞರ ಲೆಕ್ಕಾಚಾರವಾಗಿದೆ. ಅತ್ಯುತ್ತಮ ವೈಶಿಷ್ಟ್ಯಗಳ ಹೊರತಾಗಿಯೂ ಬೆಲೆಯ ವಿಚಾರದಲ್ಲಿ ಟಾಟಾ ಮೋಟಾರ್ಸ್ ತನ್ನ ಹಿಂದಿನ ಯಶಸ್ವಿ ಆಕ್ರಮಣಕಾರಿ ತಂತ್ರವನ್ನೇ ಅನುಸರಿಸುವ ಸಾಧ್ಯತೆಯಿದೆ. ವರದಿಗಳ ಪ್ರಕಾರ, ಇದರ ಬೆಲೆ ಅಂದಾಜು 15 ಲಕ್ಷ ರೂಪಾಯಿಗಳಿಂದ ಆರಂಭವಾಗಿ, ಎಲ್ಲಾ ಫೀಚರ್ಗಳನ್ನು ಒಳಗೊಂಡಿರುವ ಟಾಪ್ ವೇರಿಯೆಂಟ್ಗೆ 25 ಲಕ್ಷ ರೂಪಾಯಿಗಳವರೆಗೆ ಇರಬಹುದೆಂದು ನಿರೀಕ್ಷಿಸಲಾಗಿದೆ. ಮಾರುಕಟ್ಟೆಗೆ ಬಿಡುಗಡೆಯಾದ ತಕ್ಷಣ ಈ ಬಹುನಿರೀಕ್ಷಿತ ಟಾಟಾ ಸಿಯೆರಾ ಇವಿ, ಮುಂಬರುವ ದಿನಗಳಲ್ಲಿ ಬಿಡುಗಡೆಗೆ ಸಿದ್ಧವಾಗಿರುವ ಹ್ಯುಂಡೈ ಕ್ರೆಟಾ ಎಲೆಕ್ಟ್ರಿಕ್, ಮಾರುತಿ ಇ-ವಿಟಾರಾ ಮತ್ತು ಮಹೀಂದ್ರಾ ಬಿಇ 6 (Mahindra BE 6) ವಾಹನಗಳಿಗೆ ಅತ್ಯಂತ ಪ್ರಬಲ ಪೈಪೋಟಿ ನೀಡಲಿದೆ.
ಇದನ್ನೂ ಓದಿ : ಬೆಲ್ಫಾಸ್ಟ್ನಲ್ಲಿ ಸ್ಯಾಮ್ಸನ್ ವೈಫಲ್ಯ : ಸೂರ್ಯವಂಶಿ ಒತ್ತಡದ ನಡುವೆ ಆಯ್ಕೆ ಸಮೀಕರಣ ಗೊಂದಲ!
