ಬೆಂಗಳೂರು : ಟಾಟಾ ಮೋಟಾರ್ಸ್‌ ತನ್ನ ಹೊಸ ಕಾಂಪ್ಯಾಕ್ಟ್ ಸೆಡಾನ್‌ ಟಾಟಾ ಏರಿಸ್‌ನ ಮತ್ತೊಂದು ಟೀಸರ್ ಬಿಡುಗಡೆ ಮಾಡಿದ್ದು, ಕಾರಿನ ಹೊರಾಂಗಣ ವಿನ್ಯಾಸದ ಹಲವು ಪ್ರಮುಖ ವಿವರಗಳು ಬಹಿರಂಗವಾಗಿವೆ. ಸೆಪ್ಟೆಂಬರ್ 25ರಂದು ಅಧಿಕೃತವಾಗಿ ಅನಾವರಣಗೊಳ್ಳಲಿರುವ ಏರಿಸ್‌, ಸದ್ಯದ ಟಾಟಾ ಟಿಗೋರ್‌ಗೆ ಬದಲಿಯಾಗಿ ಮಾರುಕಟ್ಟೆಗೆ ಬರಲಿದೆ. ಹೊಸ ಹೆಸರಿನೊಂದಿಗೆ ಹೆಚ್ಚು ಆಧುನಿಕ ವಿನ್ಯಾಸ ಮತ್ತು ಹಲವು ವೈಶಿಷ್ಟ್ಯಗಳನ್ನು ಪರಿಚಯಿಸಲು ಟಾಟಾ ಸಿದ್ಧತೆ ನಡೆಸಿದೆ.
ಹೊಸ ಟೀಸರ್‌ನಲ್ಲಿ ಏರಿಸ್‌ನ ಮುಂಭಾಗ ಹಾಗೂ ಹಿಂಭಾಗದ ವಿನ್ಯಾಸದ ಕೆಲವು ಅಂಶಗಳನ್ನು ಸ್ಪಷ್ಟವಾಗಿ ನೋಡಬಹುದಾಗಿದೆ. ಟಿಗೋರ್‌ಗೆ ಹೋಲಿಸಿದರೆ ಏರಿಸ್‌ನ ಮುಂಭಾಗ ಹೆಚ್ಚು ಸ್ಲಿಮ್ ಮತ್ತು ಆಧುನಿಕವಾಗಿ ಕಾಣುವಂತೆ ರೂಪಿಸಲಾಗಿದೆ. ಕಾರಿನಲ್ಲಿ ಸಣ್ಣ ಗಾತ್ರದ ಎಲ್‌ಇಡಿ ಹೆಡ್‌ಲ್ಯಾಂಪ್‌ಗಳಿದ್ದು, ಅವುಗಳ ಮೇಲ್ಭಾಗದಲ್ಲಿ ತೆಳುವಾದ ಎಲ್‌ಇಡಿ ಡಿಆರ್‌ಎಲ್‌ ಪಟ್ಟಿಯಿದೆ. ಮುಂಭಾಗದಲ್ಲಿ ಎಲ್‌ಇಡಿ ಫಾಗ್‌ ಲ್ಯಾಂಪ್‌ಗಳನ್ನೂ ನೀಡಲಾಗಿದೆ.
ಮುಂಭಾಗದ ವಿನ್ಯಾಸದಲ್ಲಿ ದಪ್ಪ ಗ್ಲಾಸ್‌-ಬ್ಲ್ಯಾಕ್‌ ಅಂಶ ಗಮನ ಸೆಳೆಯುತ್ತದೆ. ಬಂಪರ್‌ ವಿನ್ಯಾಸದಲ್ಲೂ ಬದಲಾವಣೆ ಮಾಡಲಾಗಿದ್ದು, ಕಾರಿಗೆ ಹೆಚ್ಚು ಆಕರ್ಷಕವಾದ ನೋಟ ನೀಡಲಾಗಿದೆ. ವಿನ್ಯಾಸ ಪೇಟೆಂಟ್‌ ಚಿತ್ರಗಳ ಆಧಾರದಲ್ಲಿ ಹೊಸ ಬಂಪರ್‌, ವಿಶಾಲವಾದ ಗಾಳಿಯ ಒಳಹರಿವು ಮತ್ತು ‘ಸಿ’ ಆಕಾರದ ವಿನ್ಯಾಸ ಅಂಶಗಳು ಇರಲಿವೆ ಎಂದು ವರದಿಗಳು ತಿಳಿಸಿವೆ.
ಹಿಂಭಾಗದಲ್ಲೂ ಪ್ರಮುಖ ಬದಲಾವಣೆ
ಏರಿಸ್‌ನ ಹಿಂಭಾಗಕ್ಕೂ ಹೊಸ ವಿನ್ಯಾಸ ನೀಡಲಾಗಿದೆ. ಟೀಸರ್‌ನಲ್ಲಿ ಮರುವಿನ್ಯಾಸಗೊಳಿಸಲಾದ ಎಲ್‌ಇಡಿ ಟೇಲ್‌ಲ್ಯಾಂಪ್‌ಗಳ ಸುಳಿವು ಸಿಕ್ಕಿದೆ. ಹಿಂಭಾಗದ ವಿನ್ಯಾಸವು ಟಿಗೋರ್‌ನಿಂದ ವಿಭಿನ್ನವಾಗಿದ್ದು, ಹೊಸ ಬಂಪರ್‌ ಮತ್ತು ಇತರ ಬದಲಾವಣೆಗಳನ್ನು ಹೊಂದುವ ನಿರೀಕ್ಷೆಯಿದೆ. ಕಾರಿನ ಬದಿಯ ವಿನ್ಯಾಸದಲ್ಲಿ ಟಿಗೋರ್‌ನ ಕೂಪೆ ಮಾದರಿಯ ಛಾವಣಿ ವಿನ್ಯಾಸವನ್ನು ಮುಂದುವರಿಸುವ ಸಾಧ್ಯತೆಯಿದೆ. ಹೊಸ ಅಲಾಯ್‌ ಚಕ್ರಗಳ ವಿನ್ಯಾಸವೂ ಏರಿಸ್‌ಗೆ ಹೊಸ ರೂಪ ನೀಡಲಿದೆ.
ಟೀಸರ್‌ನಲ್ಲಿ ನೇರಳೆ ಬಣ್ಣದ ಹೊರಾಂಗಣ ಬಣ್ಣವೂ ಗಮನ ಸೆಳೆದಿದೆ. ಟಾಟಾ ತನ್ನ ಹೊಸ ಕಾರುಗಳಲ್ಲಿ ವಿಭಿನ್ನ ಬಣ್ಣಗಳ ಬಳಕೆಗೆ ಒತ್ತು ನೀಡುತ್ತಿದ್ದು, ಏರಿಸ್‌ ಕೂಡ ಅದೇ ರೀತಿಯ ವಿಶಿಷ್ಟ ಬಣ್ಣ ಆಯ್ಕೆಯೊಂದಿಗೆ ಬರಲಿದೆ.
ಟ್ರೋಲ್‌, ಸಿಎನ್‌ಜಿ ಆಯ್ಕೆ
ಯಾಂತ್ರಿಕವಾಗಿ ಏರಿಸ್‌ ಟಿಗೋರ್‌ನ ಮೂಲ ಎಂಜಿನ್‌ ವ್ಯವಸ್ಥೆಯನ್ನು ಮುಂದುವರಿಸುವ ನಿರೀಕ್ಷೆಯಿದೆ. 1.2 ಲೀಟರ್‌, ಮೂರು ಸಿಲಿಂಡರ್ ನ್ಯಾಚುರಲ್ ಆಸ್ಪಿರೇಟೆಡ್ ಪೆಟ್ರೋಲ್‌ ಎಂಜಿನ್‌ ಅನ್ನು 5-ಸ್ಪೀಡ್‌ ಮ್ಯಾನುವಲ್‌ ಮತ್ತು ಎಎಂಟಿ ಗೇರ್‌ಬಾಕ್ಸ್‌ ಆಯ್ಕೆಗಳೊಂದಿಗೆ ನೀಡುವ ಸಾಧ್ಯತೆಯಿದೆ. ಸಿಎನ್‌ಜಿ ಆವೃತ್ತಿಯೂ ಬರಲಿದ್ದು, ಅದಕ್ಕೂ ಮ್ಯಾನುವಲ್‌ ಮತ್ತು ಎಎಂಟಿ ಆಯ್ಕೆಗಳು ದೊರೆಯುವ ನಿರೀಕ್ಷೆಯಿದೆ.
ಹೆಚ್ಚಿನ ಫೀಚರ್ಗಳ ನಿರೀಕ್ಷೆ
ಹೊರಾಂಗಣದ ಜತೆಗೆ ಕಾರಿನ ಒಳಾಂಗಣದಲ್ಲೂ ಸಾಕಷ್ಟು ಬದಲಾವಣೆ ನಿರೀಕ್ಷಿಸಲಾಗಿದೆ. 10.25 ಇಂಚಿನ ಟಚ್‌ಸ್ಕ್ರೀನ್‌, ಡಿಜಿಟಲ್‌ ಚಾಲಕ ಮಾಹಿತಿ ಪರದೆ, ವೈರ್‌ಲೆಸ್‌ ಆಂಡ್ರಾಯ್ಡ್‌ ಆಟೋ ಮತ್ತು ಆಪಲ್‌ ಕಾರ್‌ಪ್ಲೇ, ವೈರ್‌ಲೆಸ್‌ ಚಾರ್ಜಿಂಗ್‌, ಹಿಂಭಾಗದ ಎಸಿ ವೆಂಟ್‌ಗಳು ಹಾಗೂ 360 ಡಿಗ್ರಿ ಕ್ಯಾಮೆರಾದಂತಹ ವೈಶಿಷ್ಟ್ಯಗಳು ದೊರೆಯುವ ಸಾಧ್ಯತೆಯಿದೆ. ಸುರಕ್ಷತೆಗಾಗಿ ಆರು ಏರ್‌ಬ್ಯಾಗ್‌ಗಳನ್ನು ನೀಡುವ ನಿರೀಕ್ಷೆಯೂ ಇದೆ.
ಸೆಪ್ಟೆಂಬರ್ 25ರಂದು ಕಾರಿನ ಸಂಪೂರ್ಣ ವಿವರ, ಬೆಲೆ ಮತ್ತು ರೂಪಾಂತರಗಳ ಅಧಿಕೃತ ಮಾಹಿತಿ ಹೊರಬೀಳಲಿದೆ. ಏರಿಸ್‌ ಮಾರುತಿ ಸುಜುಕಿ ಡಿಜೈರ್‌, ಹುಂಡೈ ಔರಾ ಮತ್ತು ಹೋಂಡಾ ಅಮೇಜ್‌ ಸೇರಿದಂತೆ ಕಾಂಪ್ಯಾಕ್ಟ್ ಸೆಡಾನ್‌ಗಳೊಂದಿಗೆ ಸ್ಪರ್ಧಿಸಲಿದೆ.
ಇದನ್ನೂ ಓದಿ : ಅಂಚೆ ಇಲಾಖೆಯಲ್ಲಿ 11 ಚಾಲಕ ಹುದ್ದೆಗಳ ನೇಮಕಾತಿಗೆ ಅರ್ಜಿ ಆಹ್ವಾನ : 63 ಸಾವಿರ ರೂ. ಸ್ಯಾಲರಿ
