ಕಾಸರಗೋಡು (ಕೇರಳ): ಉಕ್ರೇನ್ನ ಒಡೆಸ್ಸಾ ಬಂದರಿನಿಂದ ಹೊರಡುತ್ತಿದ್ದ ಸರಕು ನೌಕೆಯ ಮೇಲೆ ರಷ್ಯಾ ನಡೆಸಿದ ಭೀಕರ ದಾಳಿಯಲ್ಲಿ ಭಾರತದ ನಾಲ್ವರು ನಾವಿಕರು ದುರಂತ ಅಂತ್ಯ ಕಂಡಿದ್ದು, ಅವರಲ್ಲಿ ಕೇರಳದ 26 ವರ್ಷದ ಅಖಿಲ್ ಜೋಯನ್ ಕೂಡ ಸೇರಿದ್ದಾರೆ. ಗಿನಿಯಾ-ಬಿಸ್ಸಾವ್ ಧ್ವಜ ಹೊಂದಿದ್ದ ‘ಎಮ್ವಿ ಗೋಲ್ಡನ್ ಲಿಯೋ’ ನೌಕೆಯ ಮೇಲಿನ ಈ ದಾಳಿಯಲ್ಲಿ ಒಟ್ಟು ಐದು ಮಂದಿ ಭಾರತೀಯರಿದ್ದು, ನಾಲ್ವರು ಮೃತಪಟ್ಟು ಇನ್ನೊಬ್ಬರು ಗಂಭೀರ ಸ್ಥಿತಿಯಲ್ಲಿ ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಕಾಸರಗೋಡು ಜಿಲ್ಲೆಯ ವೆಳ್ಳರಿಕ್ಕುಂಡು ಮೂಲದ ಅಖಿಲ್, ತಮ್ಮ ಹೆತ್ತವರ ಏಕೈಕ ಪುತ್ರನಾಗಿದ್ದು ಇಡೀ ಕುಟುಂಬವೇ ಈಗ ಶೋಕಸಾಗರದಲ್ಲಿ ಮುಳುಗಿದೆ.
ಮುಂದಿನ ಏಪ್ರಿಲ್ನಲ್ಲಿ ನಡೆಯಬೇಕಿತ್ತು ವಿವಾಹ
ಕೇವಲ 3 ತಿಂಗಳ ಹಿಂದಷ್ಟೇ ಹುಟ್ಟೂರಿನಲ್ಲಿ ಅಖಿಲ್ ಅವರ ನಿಶ್ಚಿತಾರ್ಥ ವಿಜೃಂಭಣೆಯಿಂದ ನಡೆದಿತ್ತು. ಮುಂದಿನ ವರ್ಷ ಏಪ್ರಿಲ್ನಲ್ಲಿ ಮದುವೆ ನಿಗದಿಯಾಗಿದ್ದು, ಒಂದು ತಿಂಗಳ ಹಿಂದಷ್ಟೇ ಅವರು ರಜೆಯಿಂದ ವಾಪಸಾಗಿ ಕೆಲಸಕ್ಕೆ ವರದಿ ಮಾಡಿಕೊಂಡಿದ್ದರು. “ನನ್ನ ಮಗ ಹೆಚ್ಚಾಗಿ ಮಿಸ್ಡ್ ಕಾಲ್ ಕೊಡುತ್ತಿದ್ದ, ನಾವು ಮತ್ತೆ ಕರೆ ಮಾಡುತ್ತಿದ್ದೆವು. ಭಾನುವಾರ ಸಂಜೆಯೂ ಮಿಸ್ಡ್ ಕಾಲ್ ಬಂದಿತ್ತು, ಆದರೆ ನಾವು ಮರಳಿ ಕರೆ ಮಾಡಿದಾಗ ಆತನ ಫೋನ್ ಸ್ವಿಚ್ ಆಫ್ ಆಗಿತ್ತು,” ಎಂದು ತಂದೆ ಜೋಯನ್ ಕಣ್ಣೀರಿಡುತ್ತಾ ತಮ್ಮ ಮಗನ ಕೊನೆಯ ಸಂಪರ್ಕವನ್ನು ನೆನಪಿಸಿಕೊಂಡಿದ್ದಾರೆ. ನಂತರ ಶಿಪ್ಪಿಂಗ್ ಕಂಪನಿಯಿಂದ ಇಮೇಲ್ ಮೂಲಕ ದಾಳಿಯ ಮತ್ತು ಅಖಿಲ್ ಸಾವಿನ ಸುದ್ದಿ ತಲುಪಿದೆ.
ರಷ್ಯಾ ರಾಯಭಾರಿಗೆ ಭಾರತ ಸಮನ್ಸ್
ಅಖಿಲ್ ಅವರ ತಂದೆ ಎಲೆಕ್ಟ್ರಿಕಲ್ ಅಂಗಡಿಯಲ್ಲಿ ಕೆಲಸ ಮಾಡುತ್ತಿದ್ದರೆ, ತಾಯಿ ಇನ್ಶೂರೆನ್ಸ್ ಏಜೆಂಟ್ ಆಗಿದ್ದಾರೆ. 19ನೇ ವಯಸ್ಸಿನಲ್ಲೇ ಮರ್ಚೆಂಟ್ ನೇವಿಗೆ ಸೇರಿದ್ದ ಅಖಿಲ್, ಇಡೀ ಕುಟುಂಬದ ಏಕೈಕ ಆಧಾರ ಸ್ತಂಭವಾಗಿದ್ದರು. ಇದೀಗ ಯುವಕನ ಪಾರ್ಥಿವ ಶರೀರವನ್ನು ಶೀಘ್ರವಾಗಿ ಭಾರತಕ್ಕೆ ತರಲು ಕೇರಳ ಸರ್ಕಾರ ತೀವ್ರ ಯತ್ನ ನಡೆಸುತ್ತಿದೆ. ಸಂಸದ ರಾಜ್ಮೋಹನ್ ಉಣ್ಣಿತ್ತಾನ್ ಹಾಗೂ ಸ್ಥಳೀಯ ಶಾಸಕರ ಮೂಲಕ ಕುಟುಂಬಸ್ಥರು ಕೇಂದ್ರ ವಿದೇಶಾಂಗ ಸಚಿವಾಲಯದ ನೆರವು ಕೋರಿದ್ದಾರೆ. ಕೇರಳದ ‘ನೋರ್ಕಾ’ (NORKA) ಇಲಾಖೆಯು ರಷ್ಯನ್ ಕನ್ಸುಲೇಟ್ ಜೊತೆ ನಿರಂತರ ಸಂಪರ್ಕದಲ್ಲಿದೆ.
ಇನ್ನೊಂದೆಡೆ, ಉಕ್ರೇನ್ ಗಡಿಯಲ್ಲಿ ಭಾರತೀಯರಿದ್ದ ನೌಕೆಯ ಮೇಲೆ ನಡೆದ ಈ ಭೀಕರ ದಾಳಿಯನ್ನು ಭಾರತ ಸರ್ಕಾರ ತೀವ್ರವಾಗಿ ಖಂಡಿಸಿದೆ. ನವದೆಹಲಿಯಲ್ಲಿರುವ ರಷ್ಯಾದ ರಾಯಭಾರಿ ವ್ಲಾಡಿಮಿರ್ ಲಾಡನೋವ್ ಅವರಿಗೆ ಕರೆಯೋಲೆ (ಸಮನ್ಸ್) ನೀಡಲಾಗಿದ್ದು, ಘಟನೆಗೆ ಸಂಬಂಧಿಸಿದಂತೆ ಭಾರತ ತನ್ನ ಕಠಿಣ ಪ್ರತಿಭಟನೆಯನ್ನು ದಾಖಲಿಸಿದೆ.
ಇದನ್ನೂ ಓದಿ : ಪ್ರತಿಭಟನಾನಿರತ ವಿದ್ಯಾರ್ಥಿಗಳಿಗೆ ಸಿನಿ ತಾರೆಯರ ಬಲ : ‘ಜನರ ದನಿಯೇ ದೇವರ ದನಿ’ ಎಂದ ನಟ-ನಟಿಯರು!
