ಅಬುಧಾಬಿ : ಅಬುಧಾಬಿಯಲ್ಲಿ ನಡೆದ ಅಂತಾರಾಷ್ಟ್ರೀಯ ಬೇಟೆ ಮತ್ತು ಕುದುರೆ ಸವಾರಿ ಪ್ರದರ್ಶನ (ADIHEX 2026)ದಲ್ಲಿ ನಡೆದ ಹರಾಡು ಪ್ರಕ್ರಿಯೆಯಲ್ಲಿ ಅಪರೂಪದ ಶುಭ್ರ ಬಿಳಿ ಬಣ್ಣದ ಗಿಡುಗವೊಂದು (Ultra White Pure Gyr Garmousha Falcon) ಬರೋಬ್ಬರಿ 1.5 ಮಿಲಿಯನ್ ದಿರ್ಹಮ್ (ಸುಮಾರು 3.85 ಕೋಟಿ ರೂಪಾಯಿ) ಬೆಲೆಗೆ ಹರಾಜಾಗಿದೆ. ತನ್ನ ಪ್ರೀತಿಯ ಸೋದರಸೊಸೆಯ ಆಸೆಯಂತೆ ಮಾವನೊಬ್ಬ ಈ ದುಬಾರಿ ಹಕ್ಕಿಯನ್ನು ಖರೀದಿಸಿ ಆಕೆಗೆ ಉಡುಗೊರೆಯಾಗಿ ನೀಡಿದ್ದು, ಈ ಭಾವನಾತ್ಮಕ ಕ್ಷಣ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ವೈರಲ್ ಆಗಿದೆ.
ಮಾವನ ಪ್ರೀತಿ, ಸೋದರಸೊಸೆಯ ಪಕ್ಷಿಪ್ರೇಮ
ಶೈಖಾ ಅಲ್ ಮನ್ಸೂರಿ ಎಂಬ ಬಾಲಕಿ ತನ್ನ ಮಾವನೊಂದಿಗೆ ಈ ಹರಾಜು ಪ್ರಕ್ರಿಯೆಗೆ ಆಗಮಿಸಿದ್ದಳು. ಈ ವೇಳೆ ಮಾಧ್ಯಮದವರೊಂದಿಗೆ ಮಾತನಾಡಿದ ಶೈಖಾ, ನನಗೆ ಹಕ್ಕಿಗಳು ಮತ್ತು ಗಿಡುಗ(ಡೇಗೆ)ಗಳ ಬಗ್ಗೆ ಅಪಾರ ಆಸಕ್ತಿ ಇದೆ ಎಂದು ಹೇಳುತ್ತಾ ತನ್ನ ಮನದಾಸೆಯನ್ನು ಬಿಚ್ಚಿಟ್ಟಳು. “ನಿಮಗೆ ಈ ಪಕ್ಷಿಗಳ ಬಗ್ಗೆ ಯಾರು ಹೇಳಿಕೊಟ್ಟರು?” ಎಂದು ಕೇಳಿದಾಗ, ಆಕೆ ಹೆಮ್ಮೆಯಿಂದ “ನನ್ನ ಮಾವ” ಎಂದು ಉತ್ತರಿಸಿದ್ದಳು. ಬಾಲಕಿಯ ಪಕ್ಷಿಪ್ರೇಮ ಮತ್ತು ಆಕೆಯ ಬಯಕೆಯನ್ನು ಗೌರವಿಸಿದ ಮಾವ, ಬರೋಬ್ಬರಿ 3.85 ಕೋಟಿ ರೂ. ಮೌಲ್ಯದ ಅಪರೂಪದ ಬಿಳಿ ಡೇಗೆಯನ್ನು ಹರಾಜಿನಲ್ಲಿ ಗೆದ್ದು ಆಕೆಗೆ ನೀಡಿದ್ದಾರೆ.
ದಾಖಲೆ ಬೆಲೆಗೆ ಹರಾಜಾದ ಅಮೆರಿಕದ ಫಾಲ್ಕನ್
ಈ ಬಾರಿ ಹರಾಜಾದ ಈ ಅಪರೂಪದ ಹಕ್ಕಿಯು ಅಮೆರಿಕದ ‘ಮಾರ್ಕ್ ಮೊಗ್ಲಿಚ್ ಫಾಲ್ಕನ್ ಫಾರ್ಮ್’ಗೆ ಸೇರಿದ್ದಾಗಿದೆ. ಸಂಪೂರ್ಣ ಹಿಮದಂತಹ ಬಿಳಿ ಬಣ್ಣ ಹೊಂದಿರುವ ಈ ಗಿಡುಗ ಸುಮಾರು 1 ಕೆಜಿ ತೂಕವಿದ್ದು, 16.5 ಇಂಚು ಉದ್ದ ಮತ್ತು ಅಗಲವನ್ನು ಹೊಂದಿದೆ. ಪ್ರಸಕ್ತ ಆವೃತ್ತಿಯ ಪ್ರದರ್ಶನದಲ್ಲೇ ಅತ್ಯಂತ ದುಬಾರಿ ಬೆಲೆಗೆ ಮಾರಾಟವಾದ ಗಿಡುಗ ಎಂಬ ಹೆಗ್ಗಳಿಕೆಗೆ ಇದು ಪಾತ್ರವಾಗಿದೆ. ಪ್ರದರ್ಶನದಲ್ಲಿ ವಿಶ್ವದ ವಿವಿಧ ದೇಶಗಳ 55ಕ್ಕೂ ಹೆಚ್ಚು ಪ್ರಮುಖ ಫಾಲ್ಕನ್ ತಳಿ ಸಾಕಣೆ ಕೇಂದ್ರಗಳು ಭಾಗವಹಿಸಿದ್ದವು.
ಸಾಮಾಜಿಕ ಜಾಲತಾಣಗಳಲ್ಲಿ ಮೆಚ್ಚುಗೆಯ ಮಹಾಪೂರ
ಈ ಘಟನೆಯ ವಿಡಿಯೋಗಳು ಮತ್ತು ಚಿತ್ರಗಳು ಇಂಟರ್ನೆಟ್ನಲ್ಲಿ ಹರಿದಾಡುತ್ತಿದ್ದಂತೆ ನೆಟ್ಟಿಗರು ಮಾವ ಹಾಗೂ ಸೊಸೆಯ ನಡುವಿನ ಅಪರೂಪದ ಬಾಂಧವ್ಯವನ್ನು ಮುಕ್ತಕಂಠದಿಂದ ಶ್ಲಾಘಿಸುತ್ತಿದ್ದಾರೆ. ಅರಬ್ ಸಂಸ್ಕೃತಿಯಲ್ಲಿ ಗಿಡುಗ ಸಾಕಣೆ ಮತ್ತು ತರಬೇತಿಯು ಅತ್ಯಂತ ಗೌರವಪೂರ್ವಕ ಹಾಗೂ ಪರಂಪರಾಗತ ಕಲೆಯಾಗಿದ್ದು, ಸಣ್ಣ ವಯಸ್ಸಿನಲ್ಲೇ ಶೈಖಾ ತೋರಿಸಿದ ಆಸಕ್ತಿ ಮತ್ತು ಆಕೆಯ ಆಸೆಯನ್ನು ಈಡೇರಿಸಲು ಮಾವ ತೋರಿದ ಪ್ರೀತಿಗೆ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಮೆಚ್ಚುಗೆ ವ್ಯಕ್ತವಾಗುತ್ತಿದೆ.
ಇದನ್ನೂ ಓದಿ : ಶಿವಮೊಗ್ಗ ಜಿಲ್ಲಾ ಪಂಚಾಯಿತಿಯಲ್ಲಿ 52 ಹುದ್ದೆಗಳ ನೇಮಕಾತಿ : ಪಿಯುಸಿ ಪಾಸಾಗಿದ್ದರೆ ಸಾಕು
