ಬೆಂಗಳೂರು: ರಾಜ್ಯದಲ್ಲಿ 501 ಅನಧಿಕೃತ ಶಾಲೆಗಳು ಪತ್ತೆಯಾಗಿದ್ದು, ಪೋಷಕರು ತಮ್ಮ ಮಕ್ಕಳನ್ನು ಶಾಲೆಗೆ ಕಳುಹಿಸುವ ಮುನ್ನ ಎಚ್ಚರ ವಹಿಸಬೇಕಿದೆ.
ಈಗಾಗಲೇ 2025-26ನೇ ಸಾಲಿನ ಶೈಕ್ಷಣಿಕ ವರ್ಷ ಪ್ರಾರಂಭವಾಗಿದೆ. ಈಗಾಗಲೇ ಪೋಷಕರು ಮಕ್ಕಳನ್ನು ಶಾಲೆಗಳಿಗೆ ದಾಖಲಿಸಿದ್ದಾರೆ. ಆದರೆ, ಸರ್ಕಾರ ಮಾತ್ರ ಮಕ್ಕಳ ದಾಖಲಾತಿ ಮುಗಿದ ಮೇಲೆ ಅನಧಿಕೃತ ಶಾಲೆಗಳ ಪಟ್ಟಿ ಬಿಡುಗಡೆ ಮಾಡಿದೆ.
ಕಾಟಚಾರಕ್ಕೆ ಎಂಬಂತೆ ಶಿಕ್ಷಣ ಇಲಾಖೆ ಅನಧಿಕೃತ ಶಾಲೆಗಳ ಪಟ್ಟಿ ಬಿಡುಗಡೆ ಮಾಡಿದೆ. ಮೂರ್ನಾಲ್ಕು ತಿಂಗಳ ಮುಂಚಿತವಾಗಿಯೇ ಅನಧಿಕೃತ ಶಾಲೆಗಳ ಮಾಹಿತಿ ನೀಡಬೇಕಿತ್ತು. ಆದರೆ, ದಾಖಲಾತಿ ಮುಗಿದ ಮೇಲೆ ಪಟ್ಟಿ ನೀಡಿದ್ದಕ್ಕೆ ಪೋಷಕರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ.
ಅಂಕಿ-ಸಂಖ್ಯೆ ಗಮನಿಸಿದರೆ ರಾಜ್ಯದಲ್ಲಿ ಅನಧಿಕೃತ ಶಾಲೆಗಳಿಗೆ ಕಡಿವಾಣ ಇಲ್ಲ ಎನ್ನಲಾಗುತ್ತಿದೆ. ಕೇವಲ ಅನಧಿಕೃತ ಪಟ್ಟಿಗಷ್ಟೇ ಶಿಕ್ಷಣ ಇಲಾಖೆ ಸೀಮಿತವಾದಂತಿದೆ.
ಜಿಲ್ಲಾವಾರು ಅನಧಿಕೃತ ಶಾಲೆಗಳ ಪಟ್ಟಿ
ಬೆಂಗಳೂರು ಉತ್ತರ-51
ಬಾಗಲಕೋಟೆ-38
ಬಳ್ಳಾರಿ-35
ಬೆಂಗಳೂರು ದಕ್ಷಿಣ- 34
ಬೆಳಗಾವಿ -35
ದಾವಣಗೆರೆ- 35
ಧಾರವಾಡ-23
ಹಾವೇರಿ-18
ಕಲಬುರಗಿ-22
ಮಂಡ್ಯ-17
ರಾಯಚೂರು-23
ರಾಮನಗರ-13
ಶಿವಮೊಗ್ಗ-29
ತುಮಕೂರು-11
ತುಮಕೂರು ಮಧುಗಿರಿ-29
ವಿಜಯಪುರ-11
ಬಳ್ಳಾರಿ-13
ಬೆಂಗಳೂರು ಗ್ರಾಮಾಂತರ-16
ಬೀದರ್- 27
ಇನ್ನುಳಿದ ಜಿಲ್ಲೆಗಳಲ್ಲಿ ಎರಡ್ಮೂರು ಶಾಲೆಗಳು ಅನಧಿಕೃತ ಪಟ್ಟಿಗೆ ಸೇರಿವೆ. ಒಟ್ಟಾರೆ 31 ಜಿಲ್ಲೆಗಳಿಂದ 501 ಅನಧಿಕೃತ ಶಾಲೆಗಳನ್ನು ಪಟ್ಟಿಗೆ ಸೇರಿಸಲಾಗಿದೆ. ಶಿಕ್ಷಣ ಇಲಾಖೆ ಅಧಿಕಾರಿಗಳು ಕೇವಲ ನಂಬರ್ಸ್ ಮಾತ್ರ ಬಿಟ್ಟಿದ್ದಾರೆ. ಆದರೆ, ಅನಧಿಕೃತ ಶಾಲೆಗಳ ಹೆಸರನ್ನು ಮಾತ್ರ ಬಿಡುಗಡೆ ಮಾಡಿಲ್ಲ. ಇದು ಕೂಡ ಹಲವಾರು ಅನುಮಾನಗಳಿಗೆ ದಾರಿ ಮಾಡಿಕೊಟ್ಟಿದೆ.
