ಬೆಂಗಳೂರು : ಉದ್ಯೋಗಿಗಳ ಭವಿಷ್ಯ ನಿಧಿ ಸಂಘಟನೆಯು (ಇಪಿಎಫ್ಒ) ಹೊಸ “ಇಪಿಎಫ್ ಸ್ಕೀಮ್ 2026’’ ಜಾರಿಗೊಳಿಸಿದೆ. ಇದರ ಪ್ರಕಾರ, PF ಮೊತ್ತ ವಿತ್ ಡ್ರಾ ನಿಯಮಗಳನ್ನು ಸಡಿಲಗೊಳಿಸುವ ಜತೆಗೆ ಪಿಎಫ್ ಹಿಂಪಡೆಯುವಿಕೆಯ 13 ನಿಯಮಗಳ ಬದಲಾಗಿ, 3 ಕೆಟಗರಿಗಳನ್ನು ಮಾಡಲಾಗಿದೆ. ಹಾಗೆಯೇ, ಒಂದು ಕೆಟಗರಿಯಲ್ಲಿ ಸದಸ್ಯರು ಎಷ್ಟು ಬಾರಿ ಪಿಎಫ್ ಹಣವನ್ನು ವಿತ್ ಡ್ರಾ ಮಾಡಬಹುದು ಎಂಬುದನ್ನು ಕೂಡ ತಿಳಿಸಲಾಗಿದೆ. ಹೊಸ ವಿತ್ ಡ್ರಾ ಮಿತಿಗಳ ಕುರಿತ ಮಾಹಿತಿ ಇಲ್ಲಿದೆ.
ಇಪಿಎಫ್ ವಿತ್ ಡ್ರಾಗೆ ಇರುವ 3 ಕೆಟಗರಿಗಳು
ಕೆಟಗರಿ 1: ಅಗತ್ಯ ಸಂದರ್ಭಗಳು –
ಇದು ಅನಾರೋಗ್ಯ, ಶಿಕ್ಷಣ ಮತ್ತು ಮದುವೆಗೆ ಸಂಬಂಧಿಸಿದ ಖರ್ಚುಗಳನ್ನು ಒಳಗೊಂಡಿದೆ. ವೈದ್ಯಕೀಯ ಚಿಕಿತ್ಸೆಗಾಗಿ ಹಣ ಪಡೆಯಬಹುದು. ಇದಕ್ಕೆ ಯಾವುದೇ ಹಿಂಪಡೆಯುವಿಕೆಯ ಮಿತಿ ಇಲ್ಲ (ಎಷ್ಟು ಬಾರಿ ಬೇಕಾದರೂ ಪಡೆಯಬಹುದು). ಇಪಿಎಫ್ ಸದಸ್ಯರು ಅಥವಾ ಅವರ ಕುಟುಂಬದವರ ಶಿಕ್ಷಣಕ್ಕಾಗಿ ಹಣ ಪಡೆಯಬಹುದು. ಸದಸ್ಯತ್ವದ ಅವಧಿಯಲ್ಲಿ ಒಟ್ಟು 10 ಬಾರಿ ಹಿಂಪಡೆಯಬಹುದು. ಸದಸ್ಯರ ಮದುವೆ ಅಥವಾ ಕುಟುಂಬದವರ ಮದುವೆಗಾಗಿ ಹಣ ಪಡೆಯಬಹುದು. ಸದಸ್ಯತ್ವದ ಅವಧಿಯಲ್ಲಿ ಒಟ್ಟು 5 ಬಾರಿ ಹಿಂಪಡೆಯಬಹುದು.
ಕೆಟಗರಿ 2 : ವಸತಿ ಸಂಬಂಧಿತ ಅಗತ್ಯಗಳು –
ಮನೆ ಖರೀದಿಸುವುದು, ಕಟ್ಟಿಸುವುದು, ನವೀಕರಣ ಅಥವಾ ಗೃಹ ಸಾಲ ಮರುಪಾವತಿಗೆ ಈ ಕೆಟಗರಿ ಅನ್ವಯಿಸುತ್ತದೆ. ಸದಸ್ಯತ್ವದ ಅವಧಿಯಲ್ಲಿ ಗರಿಷ್ಠ 5 ಬಾರಿ ಈ ಸೌಲಭ್ಯವನ್ನು ಪಡೆಯಬಹುದು.
ಕೆಟಗರಿ 3: ವಿಶೇಷ ಸಂದರ್ಭಗಳು –
ಇಪಿಎಫ್ಒನ ಸೆಂಟ್ರಲ್ ಬೋರ್ಡ್ ಸೂಚಿಸುವ ವಿಶೇಷ ಸಂದರ್ಭಗಳಲ್ಲಿ ಮಾತ್ರ ಈ ಸೌಲಭ್ಯ ಸಿಗುತ್ತದೆ. ಪ್ರತಿ ಹಣಕಾಸು ವರ್ಷದಲ್ಲಿ ಗರಿಷ್ಠ 2 ಬಾರಿ ಹಣ ಹಿಂಪಡೆಯಲು ಅವಕಾಶವಿದೆ. ಪಿಎಫ್ ಮೊತ್ತದಲ್ಲಿ ಭಾಗಶಃ ಹಿಂಪಡೆಯುವಿಕೆಯ ನಂತರವೂ, ಸದಸ್ಯರು ತಮ್ಮ ಖಾತೆಯಲ್ಲಿ ಉಳಿದಿರುವ ಇಪಿಎಫ್ ಮೊತ್ತದ ಕನಿಷ್ಠ 25% ಅನ್ನು ಕಡ್ಡಾಯವಾಗಿ ಉಳಿಸಿಕೊಳ್ಳಬೇಕು. ಇದು ನಿವೃತ್ತಿಯ ನಂತರದ ಭದ್ರತೆಯನ್ನು ಖಚಿತಪಡಿಸಿಕೊಳ್ಳಲು ಮಾಡಲಾದ ನಿಯಮವಾಗಿದೆ.
ಇದನ್ನೂ ಓದಿ : ಎಂಜಿನಿಯರಿಂಗ್, ಡಿಪ್ಲೋಮಾ ಓದುವವರಿಗೆ ಬಡ್ಡಿರಹಿತ ಸಾಲ : ಯಾವುದಿದು ಯೋಜನೆ?
