ಬೆಂಗಳೂರು : ಲಕ್ನೋ ಸೂಪರ್ ಜೈಂಟ್ಸ್ ಹಾಗೂ ರಾಜಸ್ಥಾನ್ ರಾಯಲ್ಸ್ ನಡುವೆ ನಡೆದ ಐಪಿಎಲ್ 2026ರ ಪಂದ್ಯ ಕೇವಲ ಲಕ್ನೋದ ಕಳಪೆ ಬ್ಯಾಟಿಂಗ್ಗೆ ಮಾತ್ರವಲ್ಲ, ನಾಯಕ ರಿಷಬ್ ಪಂತ್ ಅವರ ವಿಕೆಟ್ ಕೀಪಿಂಗ್ ವಿಭಾಗದ ಒಂದು ದೊಡ್ಡ ಎಡವಟ್ಟಿಗೂ ಸಾಕ್ಷಿಯಾಯಿತು.
ರಾಜಸ್ಥಾನ್ ರಾಯಲ್ಸ್ ವಿರುದ್ಧ 40 ರನ್ಗಳ ಹೀನಾಯ ಸೋಲು ಕಂಡಿರುವ ಲಕ್ನೋ ತಂಡ, ಈ ಪಂದ್ಯದಲ್ಲಿ ಮಾಡಬಾರದ ತಪ್ಪುಗಳನ್ನು ಮಾಡಿ ಸಾಮಾಜಿಕ ಜಾಲತಾಣಗಳಲ್ಲಿ ತೀವ್ರ ಟ್ರೋಲ್ಗೆ ಗುರಿಯಾಗುತ್ತಿದೆ. ಅದರಲ್ಲೂ ಸುಲಭವಾಗಿ ಆಗಬೇಕಿದ್ದ ರನೌಟ್ ಅವಕಾಶವೊಂದನ್ನು ಕೈಚೆಲ್ಲುವಾಗ ಪಂತ್ ಮತ್ತು ಮುಕುಲ್ ಚೌಧರಿ ಅವರ ನಡುವಿನ ಹೊಂದಾಣಿಕೆಯ ಕೊರತೆ ಪಾಕಿಸ್ತಾನ ಕ್ರಿಕೆಟ್ ತಂಡದ ಹಾಸ್ಯಾಸ್ಪದ ಫೀಲ್ಡಿಂಗ್ ಅನ್ನು ನೆನಪಿಸುವಂತಿತ್ತು.
ರನೌಟ್ ಕೈಚೆಲ್ಲಿದ ಆ ಹಾಸ್ಯಾಸ್ಪದ ಕ್ಷಣ
ರಾಜಸ್ಥಾನ್ ರಾಯಲ್ಸ್ ತಂಡದ ಇನ್ನಿಂಗ್ಸ್ ವೇಳೆ ಈ ತಮಾಷೆಯ ಪ್ರಸಂಗ ನಡೆಯಿತು. ಕ್ರೀಸ್ನಲ್ಲಿದ್ದ ರವೀಂದ್ರ ಜಡೇಜಾ ಚೆಂಡನ್ನು ಬಾರಿಸಿ ಎರಡನೇ ರನ್ಗಾಗಿ ಓಡಲು ಮುಂದಾದರು. ಆದರೆ, ಡೀಪ್ನಲ್ಲಿದ್ದ ನಿಕೋಲಸ್ ಪೂರನ್ ಮಿಂಚಿನ ವೇಗದಲ್ಲಿ ಚೆಂಡಿನತ್ತ ನುಗ್ಗಿ ಬರುತ್ತಿದ್ದನ್ನು ಕಂಡ ಜಡೇಜಾ, ನಾನ್-ಸ್ಟ್ರೈಕರ್ ತುದಿಯಲ್ಲಿದ್ದ ಡೊನಾವನ್ ಫೆರೇರಾ ಅವರಿಗೆ ರನ್ ನಿರಾಕರಿಸಿದರು. ಅಷ್ಟರಲ್ಲಾಗಲೇ ಫೆರೇರಾ ಕ್ರೀಸ್ನಿಂದ ಸಾಕಷ್ಟು ಮುಂದೆ ಬಂದಿದ್ದರು ಹಾಗೂ ರನೌಟ್ ಆಗುವುದು ಬಹುತೇಕ ಖಚಿತವಾಗಿತ್ತು.
ಆದರೆ, ಇಲ್ಲಿಯೇ ಅಸಲಿ ನಾಟಕ ಶುರುವಾಗಿದ್ದು. ಪೂರನ್ ಅವರ ಅದ್ಭುತ ಥ್ರೋವನ್ನು ಹಿಡಿಯಲು ವಿಕೆಟ್ಗಳ ಬಳಿ ಓಡಿಬಂದ ಪಂತ್, ಆತುರದಲ್ಲಿ ಚೆಂಡನ್ನು ಹಿಡಿಯುವ ಮೊದಲೇ ಸ್ಟಂಪ್ಗಳಿಗೆ ತಾಗಿ ಬೇಲ್ಸ್ ಹಾರಿಸಿದರು. ನಿಯಮದ ಪ್ರಕಾರ, ಈ ರೀತಿ ಮೊದಲೇ ಬೇಲ್ಸ್ ಬಿದ್ದಾಗ ರನೌಟ್ ಮಾಡಲು ಸ್ಟಂಪ್ ಅನ್ನು ಕಿತ್ತು ಹಾಕಬೇಕಾಗುತ್ತದೆ. ಆದರೆ ಪಂತ್, ಪೂರನ್ ಎಸೆದಿದ್ದ ಚೆಂಡನ್ನು ಹಿಡಿದು ತಕ್ಷಣವೇ ಸ್ಟಂಪ್ಸ್ ಬಳಿಯಿದ್ದ ಮುಕುಲ್ ಚೌಧರಿ ಅವರತ್ತ ಎಸೆದರು. ಚೆಂಡನ್ನು ಹಿಡಿದ ಮುಕುಲ್ ಅವರಿಗೆ ಸ್ಟಂಪ್ಸ್ ಕೀಳಬೇಕು ಎಂಬ ನಿಯಮ ನೆನಪಾಗುವಷ್ಟರಲ್ಲಿ, ಬ್ಯಾಟರ್ ಡೊನಾವನ್ ಫೆರೇರಾ ಆರಾಮಾಗಿ ಕ್ರೀಸ್ ಸೇರಿಕೊಂಡಿದ್ದರು. ಲಕ್ನೋ ಆಟಗಾರರ ಈ ಗೊಂದಲಮಯ ಮತ್ತು ವಿಲಕ್ಷಣ ಫೀಲ್ಡಿಂಗ್ ನೋಡುಗರಿಗೆ ಭಾರೀ ಮನರಂಜನೆ ನೀಡಿದರೆ, ಲಕ್ನೋ ಅಭಿಮಾನಿಗಳಿಗೆ ಮಾತ್ರ ತೀವ್ರ ನಿರಾಸೆ ಮೂಡಿಸಿತು.
ಮಿಂಚಿನ ಕ್ಯಾಚ್ ಮೂಲಕ ಗಮನ ಸೆಳೆದಿದ್ದ ಪಂತ್
ಈ ಕಾಮಿಡಿ ರನೌಟ್ ಪ್ರಸಂಗಕ್ಕೂ ಮುನ್ನ ಇದೇ ಪಂದ್ಯದಲ್ಲಿ ರಿಷಬ್ ಪಂತ್ ತಮ್ಮ ಅದ್ಭುತ ವಿಕೆಟ್ ಕೀಪಿಂಗ್ ಮೂಲಕ ಅಚ್ಚರಿ ಮೂಡಿಸಿದ್ದರು. ಪವರ್ಪ್ಲೇನ ಮೂರನೇ ಓವರ್ನಲ್ಲಿ ಮೊಹಮ್ಮದ್ ಶಮಿ ಬೌಲಿಂಗ್ನಲ್ಲಿ ಯಶಸ್ವಿ ಜೈಸ್ವಾಲ್ ಅಪಾಯಕಾರಿಯಾಗಿ ಕಾಣುತ್ತಿದ್ದರು. ಈ ವೇಳೆ ಶಮಿ ಎಸೆದ ಶಾರ್ಟ್ ಪಿಚ್ ಬೌನ್ಸರ್ ಅನ್ನು ಹುಕ್ ಮಾಡುವ ಪ್ರಯತ್ನದಲ್ಲಿ ಜೈಸ್ವಾಲ್ ವಿಫಲರಾದರು. ಚೆಂಡು ಬ್ಯಾಟ್ನ ಅಂಚಿಗೆ ತಾಗಿ ಗಾಳಿಯಲ್ಲಿ ಹಾರಿತು. ವಿಕೆಟ್ ಕೀಪರ್ ಪಂತ್ ಗಾಳಿಯಲ್ಲಿ ಜಿಗಿದು ಅದ್ಭುತವಾಗಿ ಒಂಟಿ ಕೈಯಲ್ಲಿ ಕ್ಯಾಚ್ ಹಿಡಿಯುವ ಮೂಲಕ ಜೈಸ್ವಾಲ್ ಅವರನ್ನು ಪೆವಿಲಿಯನ್ ಸೇರಿಸಿದ್ದರು. ಈ ಕ್ಯಾಚ್ ಪ್ರಸಕ್ತ ಐಪಿಎಲ್ ಸೀಸನ್ನ ಅತ್ಯುತ್ತಮ ಕ್ಯಾಚ್ಗಳಲ್ಲಿ ಒಂದು ಎಂದು ಗುಣಗಾನ ಮಾಡಲಾಗಿತ್ತು. ಆದರೆ, ಆ ನಂತರ ನಡೆದ ರನೌಟ್ ಎಡವಟ್ಟು ಅವರ ಈ ಅದ್ಭುತ ಕ್ಯಾಚ್ನ ಶ್ರೇಯಸ್ಸನ್ನು ಮರೆಮಾಚುವಂತೆ ಮಾಡಿತು.
ರಾಜಸ್ಥಾನ್ ರಾಯಲ್ಸ್ ತಂಡಕ್ಕೆ ಭರ್ಜರಿ ಗೆಲುವಿನ ಹಳಿ
ಸತತ ಎರಡು ಸೋಲುಗಳಿಂದ ಕಂಗೆಟ್ಟಿದ್ದ ರಿಯಾನ್ ಪರಾಗ್ ನೇತೃತ್ವದ ರಾಜಸ್ಥಾನ್ ರಾಯಲ್ಸ್ ತಂಡ, ಈ ಪಂದ್ಯದಲ್ಲಿ ಲಕ್ನೋವನ್ನು ಬಗ್ಗುಬಡಿಯುವ ಮೂಲಕ ಮತ್ತೆ ಗೆಲುವಿನ ಹಳಿಗೆ ಮರಳಿದೆ. ಬ್ಯಾಟಿಂಗ್ನಲ್ಲಿ ಸಾಧಾರಣ ಮೊತ್ತ ಕಲೆಹಾಕಿದರೂ, ರಾಜಸ್ಥಾನ್ ಬೌಲರ್ಗಳು ಅದ್ಭುತ ಪ್ರದರ್ಶನ ನೀಡಿದರು. ರವೀಂದ್ರ ಜಡೇಜಾ ಬ್ಯಾಟಿಂಗ್ನಲ್ಲಿ ಅಜೇಯ 43 ರನ್ ಗಳಿಸಿ ತಂಡಕ್ಕೆ ಆಸರೆಯಾದರೆ, ಬೌಲಿಂಗ್ನಲ್ಲಿ ವೇಗಿಗಳು ಲಕ್ನೋ ಬ್ಯಾಟರ್ಗಳಿಗೆ ಆರಂಭದಲ್ಲೇ ಪೆಟ್ಟು ನೀಡಿ ನಿಯಮಿತವಾಗಿ ವಿಕೆಟ್ ಕಬಳಿಸಿದರು. ಅಂತಿಮವಾಗಿ 40 ರನ್ಗಳ ಭರ್ಜರಿ ಅಂತರದೊಂದಿಗೆ ಪಂದ್ಯವನ್ನು ಮುಡಿಗೇರಿಸಿಕೊಂಡ ರಾಜಸ್ಥಾನ್ ರಾಯಲ್ಸ್ ತಂಡ ಅಂಕಪಟ್ಟಿಯಲ್ಲಿ ತನ್ನ ಸ್ಥಾನವನ್ನು ಭದ್ರಪಡಿಸಿಕೊಂಡಿದೆ.
ಇದನ್ನೂ ಓದಿ : ಫಿಟ್ನೆಸ್ ಪರೀಕ್ಷೆ ಎದುರಿಸಲಿರುವ ದಿಗ್ಗಜ ಕ್ರಿಕೆಟರ್ ಧೋನಿ, ರೋಹಿತ್ ಶರ್ಮಾ!
