ಅಮೆರಿಕ-ಇಸ್ರೇಲ್‌ಗೆ ಸವಾಲಾದ ಇರಾನ್‌ನ ನಿಗೂಢ ನೌಕಾಪಡೆ : ಟ್ರಂಪ್ ಕಣ್ಣಿಗೆ ಬೀಳದ ‘ಕ್ಯಾಸ್ಪಿಯನ್ ಪ್ರೆಸೆನ್ಸ್’!

ವಾಷಿಂಗ್ಟನ್/ಟೆಹ್ರಾನ್ : ಇರಾನ್ ಮೇಲಿನ ಯುದ್ಧದಲ್ಲಿ ಅಲ್ಲಿನ ಇಡೀ ನೌಕಾಪಡೆಯನ್ನು ಅಮೆರಿಕ ಮತ್ತು ಇಸ್ರೇಲ್ ಪಡೆಗಳು ಸಮುದ್ರದ ತಳ ಸೇರಿಸಿವೆ ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸಾಮಾಜಿಕ ಜಾಲತಾಣಗಳ ಸರಣಿ ಪೋಸ್ಟ್‌ಗಳ ಮೂಲಕ ಲೇವಡಿ ಮಾಡುತ್ತಿದ್ದಾರೆ. ಆದರೆ, ಇರಾನ್‌ನ ದಕ್ಷಿಣ ಕರಾವಳಿಯಾದ ಪರ್ಷಿಯನ್ ಗಲ್ಫ್‌ನಲ್ಲಿ ಅಮೆರಿಕದ ದಾಳಿಗೆ ಇರಾನ್ ನೌಕಾಪಡೆಗೆ ಭಾರಿ ಹಾನಿಯಾಗಿರುವುದು ನಿಜವಾದರೂ, ಟ್ರಂಪ್ ಪಡೆಗೆ ಮುಟ್ಟಲಾಗದ ಮತ್ತೊಂದು ಪ್ರಬಲ ನೌಕಾಪಡೆ ಇರಾನ್ ಬಳಿ ಜೀವಂತವಾಗಿದೆ. ಇರಾನ್‌ನ ಉತ್ತರ ಕರಾವಳಿಯ ‘ಕ್ಯಾಸ್ಪಿಯನ್ ಸಮುದ್ರ’ದಲ್ಲಿ (Caspian Sea) ಬೀಡುಬಿಟ್ಟಿರುವ ಇರಾನ್‌ನ ‘ಉತ್ತರ ನೌಕಾಪಡೆ’ (Northern Fleet) ಸದ್ಯ ಅಮೆರಿಕದ ಕಣ್ಣಿಗೆ ಬೀಳದ ಸುರಕ್ಷಿತ ವಲಯದಲ್ಲಿ ಕಾರ್ಯನಿರ್ವಹಿಸುತ್ತಿದೆ.

ಭೌಗೋಳಿಕ ರಕ್ಷಣಾ ಕವಚದಲ್ಲಿ ಉತ್ತರ ನೌಕಾಪಡೆ

ಇರಾನ್‌ನ ಈ ಉತ್ತರ ನೌಕಾಪಡೆಯು ಕ್ಯಾಸ್ಪಿಯನ್ ಸಮುದ್ರದ ವಿಶಿಷ್ಟ ಭೌಗೋಳಿಕ ಮತ್ತು ರಾಜತಾಂತ್ರಿಕ ಪರಿಸರದಿಂದಾಗಿ ರಕ್ಷಿಸಲ್ಪಟ್ಟಿದೆ. ಈ ಸಮುದ್ರದ ಸುತ್ತಲೂ ಇರಾನ್ ಸೇರಿದಂತೆ ರಷ್ಯಾ, ತಜಕಿಸ್ತಾನ್, ಅಜೆರ್ಬೈಜಾನ್ ಮತ್ತು ತುರ್ಕಮೆನಿಸ್ತಾನ್ ದೇಶಗಳಿವೆ. ಈ ಭಾಗದಲ್ಲಿ ರಷ್ಯಾ ಮತ್ತು ಚೀನಾದ ಪ್ರಭಾವ ಹೆಚ್ಚಿರುವುದರಿಂದ, ಅಮೆರಿಕ ಇಲ್ಲಿ ನೇರ ದಾಳಿ ನಡೆಸಲು ಹಿಂಜರಿಯುತ್ತಿದೆ. ಮುಂಚೆ ‘4ನೇ ನಾವಲ್ ರೀಜನ್’ ಎಂದು ಕರೆಯಲ್ಪಡುತ್ತಿದ್ದ ಈ ಪಡೆಗೆ ಗಿಲಾನ್ ಪ್ರಾಂತ್ಯದ ಬಂದರ್ ಅಂಜಲಿ ಬಂದರು ಮುಖ್ಯ ಕೇಂದ್ರವಾಗಿದೆ. ಸುಮಾರು 3,000 ಸಿಬ್ಬಂದಿ, ಯುದ್ಧನೌಕೆಗಳು ಹಾಗೂ ಕ್ಷಿಪಣಿ ಲಾಂಚರ್‌ಗಳನ್ನು ಹೊಂದಿರುವ ಈ ಪಡೆ ಸದ್ಯ ಇರಾನ್‌ಗೆ ಯುದ್ಧದ ಸಮಯದಲ್ಲಿ ದೊಡ್ಡ ಜೀವನಾಡಿಯಾಗಿ ಮಾರ್ಪಟ್ಟಿದೆ.

ರಷ್ಯಾ-ಚೀನಾ ಮೈತ್ರಿಯ ಬಲ

ಕ್ಯಾಸ್ಪಿಯನ್ ಸಮುದ್ರದಲ್ಲಿ ರಷ್ಯಾದ ಪ್ರಬಲ ನೌಕಾಪಡೆ ಇದ್ದು, ಇರಾನ್ ಮತ್ತು ರಷ್ಯಾ ಜಂಟಿಯಾಗಿ ಇಲ್ಲಿ ನಿಯಮಿತ ಯುದ್ಧಾಭ್ಯಾಸಗಳನ್ನು ನಡೆಸುತ್ತಿರುತ್ತವೆ. ಪಾಶ್ಚಿಮಾತ್ಯ ದೇಶಗಳ ಕಠಿಣ ನಿರ್ಬಂಧಗಳ ಮಧ್ಯೆಯೂ ರಷ್ಯಾ ಇದೇ ಮಾರ್ಗದ ಮೂಲಕ ಇರಾನ್‌ಗೆ ಡ್ರೋನ್ ತಯಾರಿಕೆಯ ಬಿಡಿಭಾಗಗಳು ಸೇರಿದಂತೆ ಪ್ರಮುಖ ಮಿಲಿಟರಿ ನೆರವನ್ನು ರವಾನಿಸುತ್ತಿದೆ. ಮತ್ತೊಂದೆಡೆ ಚೀನಾ ಕೂಡ ತನ್ನ ‘ಬೆಲ್ಟ್ ಅಂಡ್ ರೋಡ್’ ಯೋಜನೆಯಡಿ ಈ ಭಾಗದ ಬಂದರುಗಳಲ್ಲಿ ಹೂಡಿಕೆ ಮಾಡಿದ್ದು, ಇಲ್ಲಿನ ವ್ಯಾಪಾರ ಮಾರ್ಗಗಳಿಗೆ ಧಕ್ಕೆಯಾಗದಂತೆ ನೋಡಿಕೊಳ್ಳುತ್ತಿದೆ. ಹೀಗಾಗಿ ಈ ಪ್ರದೇಶದಲ್ಲಿ ಅಮೆರಿಕ ದಾಳಿ ನಡೆಸಿದರೆ ಅದು ರಷ್ಯಾ ಮತ್ತು ಚೀನಾವನ್ನು ನೇರವಾಗಿ ಕೆಣಕಿದಂತಾಗುತ್ತದೆ ಎಂಬ ಭಯ ವಾಷಿಂಗ್ಟನ್‌ಗೆ ಇದೆ.

ಯುದ್ಧದ ನಡುವೆಯೂ ಮುಂದುವರಿದ ಕಾರ್ಯಾಚರಣೆ

ಇತ್ತೀಚೆಗೆ ಇಸ್ರೇಲ್ ನಡೆಸಿದ ವೈಮಾನಿಕ ದಾಳಿಯಲ್ಲಿ ಬಂದರ್ ಅಂಜಲಿಯಲ್ಲಿರುವ ನೌಕಾಪಡೆಯ ಪ್ರಧಾನ ಕಚೇರಿಗೆ ಹಾನಿಯಾಗಿದೆ ಎಂದು ವರದಿಗಳಾಗಿದ್ದರೂ, ಇರಾನ್‌ನ ಉತ್ತರ ನೌಕಾಪಡೆಯ ಆಂತರಿಕ ಕಾರ್ಯಾಚರಣೆ ನಿಂತಿಲ್ಲ. ಇರಾನ್ ತನ್ನ ನೌಕಾಪಡೆಯನ್ನು ಅತ್ಯಂತ ವಿಕೇಂದ್ರೀಕೃತ ಮಾದರಿಯಲ್ಲಿ ವಿಂಗಡಿಸಿದ್ದು, ದಕ್ಷಿಣದ ಮುಂಚೂಣಿ ಪಡೆಗಳಿಗೆ ಬೇಕಾದ ತರಬೇತಿ ಮತ್ತು ಯುದ್ಧನೌಕೆಗಳ ಸ್ಥಳೀಯ ಉತ್ಪಾದನೆಯನ್ನು ಇದೇ ಉತ್ತರ ವಲಯದಲ್ಲಿ ರಹಸ್ಯವಾಗಿ ನಡೆಸುತ್ತಿದೆ. ಹೀಗಾಗಿ ಪರ್ಷಿಯನ್ ಗಲ್ಫ್‌ನಲ್ಲಿ 150ಕ್ಕೂ ಹೆಚ್ಚು ಇರಾನ್ ಹಡಗುಗಳನ್ನು ಧ್ವಂಸಗೊಳಿಸಿದ್ದೇವೆ ಎಂದು ಬೀಗುತ್ತಿರುವ ಡೊನಾಲ್ಡ್ ಟ್ರಂಪ್, ರಷ್ಯಾ ಮತ್ತು ಚೀನಾದ ರಕ್ಷಣಾ ಕವಚದಡಿ ಕಾರ್ಯಾಚರಿಸುತ್ತಿರುವ ಇರಾನ್‌ನ ಈ ಉತ್ತರದ ನೌಕಾ ನೆಲೆಯನ್ನು ಸಂಪೂರ್ಣವಾಗಿ ನಿರ್ಲಕ್ಷಿಸಿದ್ದಾರೆ ಎಂದು ರಕ್ಷಣಾ ತಜ್ಞರು ವಿಶ್ಲೇಷಿಸಿದ್ದಾರೆ.

ಇದನ್ನೂ ಓದಿ : ಅಮೆರಿಕ ಆಗಸದಲ್ಲಿ 300 ಟನ್ ಟಿಎನ್‌ಟಿ ತೀವ್ರತೆಯ ಉಲ್ಕೆ ಸ್ಫೋಟ : ನಡುಗಿದ ಮನೆಗಳು!