ದೋಹಾ/ದುಬೈ: ಪರ್ಷಿಯನ್ ಕೊಲ್ಲಿಯ ರಾಷ್ಟ್ರಗಳ ಇಂಧನ ಮೂಲಸೌಕರ್ಯಗಳ ಮೇಲೆ ನಡೆಯುತ್ತಿರುವ ದಾಳಿಗಳ ಸರಣಿ ಈಗ ತಾರಕಕ್ಕೇರಿದೆ. ವಿಶ್ವದ ಅತಿದೊಡ್ಡ ದ್ರವೀಕೃತ ನೈಸರ್ಗಿಕ ಅನಿಲ (LNG) ರಫ್ತು ಕೇಂದ್ರವಾದ ಕತಾರ್ನ ‘ರಸ್ ಲಫ್ಫಾನ್’ ಕೈಗಾರಿಕಾ ನಗರದ ಮೇಲೆ ಇರಾನ್ ಕ್ಷಿಪಣಿ ದಾಳಿ ನಡೆಸಿದ್ದು, ಘಟಕಕ್ಕೆ ವ್ಯಾಪಕ ಹಾನಿಯಾಗಿದೆ. ಈ ಘಟನೆಯು ಜಾಗತಿಕ ಇಂಧನ ಪೂರೈಕೆಯ ಮೇಲೆ ಬೀರಲಿರುವ ಗಂಭೀರ ಪರಿಣಾಮಗಳ ಭೀತಿಯಿಂದಾಗಿ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ತೈಲ ಮತ್ತು ಅನಿಲ ದರಗಳು ದಿಢೀರ್ ಏರಿಕೆ ಕಂಡಿವೆ.
ಬುಧವಾರ ತಡರಾತ್ರಿ ಇರಾನ್ ಉಡಾಯಿಸಿದ ಐದು ಕ್ಷಿಪಣಿಗಳಲ್ಲಿ ನಾಲ್ಕನ್ನು ಕತಾರ್ನ ರಕ್ಷಣಾ ವ್ಯವಸ್ಥೆಯು ಯಶಸ್ವಿಯಾಗಿ ತಡೆದಿದೆಯಾದರೂ, ಒಂದು ಕ್ಷಿಪಣಿ ರಸ್ ಲಫ್ಫಾನ್ ಸಂಕೀರ್ಣಕ್ಕೆ ಅಪ್ಪಳಿಸಿದೆ. ಸುಮಾರು 295 ಚದರ ಕಿಲೋಮೀಟರ್ ವ್ಯಾಪ್ತಿಯಲ್ಲಿ ಹರಡಿರುವ ಈ ಬೃಹತ್ ಕೈಗಾರಿಕಾ ನಗರದಲ್ಲಿ ದಾಳಿಯ ನಂತರ ಭೀಕರ ಬೆಂಕಿ ಕಾಣಿಸಿಕೊಂಡಿದ್ದು, ಸದ್ಯ ಅದನ್ನು ನಿಯಂತ್ರಣಕ್ಕೆ ತರಲಾಗಿದೆ ಎಂದು ಕತಾರ್ ಗೃಹ ಸಚಿವಾಲಯ ತಿಳಿಸಿದೆ. ಈ ಘಟಕವು ಜಾಗತಿಕ ಎಲ್ಎನ್ಜಿ ಪೂರೈಕೆಯ ಶೇ.20ರಷ್ಟನ್ನು ಹೊಂದಿದೆ ಎಂಬುದು ವಿಶೇಷ.
ಇಸ್ರೇಲ್ ಇತ್ತೀಚೆಗೆ ಇರಾನ್ನ ಸೌತ್ ಪಾರ್ಸ್ ಗ್ಯಾಸ್ ಫೀಲ್ಡ್ ಮೇಲೆ ನಡೆಸಿದ ದಾಳಿಗೆ ಪ್ರತೀಕಾರವಾಗಿ ಇರಾನ್ ಈ ಕೃತ್ಯ ಎಸಗಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ. ಕತಾರ್ ಮಾತ್ರವಲ್ಲದೆ ಯುಎಇ ಮತ್ತು ಸೌದಿ ಅರೇಬಿಯಾದ ಇಂಧನ ಕೇಂದ್ರಗಳೂ ನಮ್ಮ ಗುರಿ ಎಂದು ಟೆಹ್ರಾನ್ ಈಗಾಗಲೇ ಎಚ್ಚರಿಕೆ ನೀಡಿತ್ತು. ಇದೇ ಸಂದರ್ಭದಲ್ಲಿ ಅಬುಧಾಬಿಯ ಹಬ್ಶಾನ್ ಗ್ಯಾಸ್ ಘಟಕದ ಮೇಲೂ ದಾಳಿ ನಡೆದಿದ್ದು, ಮುನ್ನೆಚ್ಚರಿಕಾ ಕ್ರಮವಾಗಿ ಅಲ್ಲಿನ ಉತ್ಪಾದನೆಯನ್ನು ಸ್ಥಗಿತಗೊಳಿಸಲಾಗಿದೆ. ಇತ್ತ ಸೌದಿ ಅರೇಬಿಯಾ ಕೂಡ ತನ್ನ ಪೂರ್ವ ವಲಯದಲ್ಲಿ ನಡೆದ ಡ್ರೋನ್ ದಾಳಿಯನ್ನು ತಡೆದಿರುವುದಾಗಿ ಘೋಷಿಸಿದೆ.
ಗಗನಕ್ಕೇರಿದ ಇಂಧನ ದರಗಳು
ದಾಳಿಯ ಸುದ್ದಿ ಹರಡುತ್ತಿದ್ದಂತೆ ಜಾಗತಿಕ ತೈಲ ಮಾರುಕಟ್ಟೆಯಲ್ಲಿ ಬ್ರೆಂಟ್ ಕ್ರೂಡ್ ಫ್ಯೂಚರ್ಸ್ ಬೆಲೆಯು ಬುಧವಾರ ಶೇ.8ರಷ್ಟು ಏರಿಕೆಯಾಗಿ ಪ್ರತಿ ಬ್ಯಾರೆಲ್ಗೆ 111.90 ಡಾಲರ್ಗೆ ತಲುಪಿದೆ. ಜಗತ್ತಿನ ಪ್ರಮುಖ ಭಾಗಗಳಿಗೆ ಅನಿಲ ಪೂರೈಸುವ ಕತಾರ್ನ ಘಟಕಕ್ಕೆ ಹಾನಿಯಾಗಿರುವುದರಿಂದ, ಏಷ್ಯಾ ಮತ್ತು ಯುರೋಪ್ ರಾಷ್ಟ್ರಗಳಲ್ಲಿ ವಿದ್ಯುತ್ ಉತ್ಪಾದನೆಗೆ ಅಗತ್ಯವಿರುವ ಅನಿಲದ ಕೊರತೆ ಉಂಟಾಗುವ ಆತಂಕ ಎದುರಾಗಿದೆ. ತಜ್ಞರ ಪ್ರಕಾರ, ಈ ಘಟಕವು ಪೂರ್ಣ ಪ್ರಮಾಣದ ಉತ್ಪಾದನೆಗೆ ಮರಳಲು ಕನಿಷ್ಠ ವರ್ಷದ ಮಧ್ಯಭಾಗದವರೆಗೆ ಕಾಯಬೇಕಾಗಬಹುದು.
ಕತಾರ್ನ ಕಠಿಣ ರಾಜತಾಂತ್ರಿಕ ಹೆಜ್ಜೆ
ತನ್ನ ಸಾರ್ವಭೌಮತ್ವದ ಮೇಲೆ ನಡೆದ ಈ ದಾಳಿಯನ್ನು ಕತಾರ್ ತೀವ್ರವಾಗಿ ಖಂಡಿಸಿದೆ. ಇದನ್ನು “ರಾಷ್ಟ್ರೀಯ ಭದ್ರತೆಗೆ ನೇರ ಬೆದರಿಕೆ” ಎಂದು ಕರೆದಿರುವ ಕತಾರ್ ವಿದೇಶಾಂಗ ಸಚಿವಾಲಯ, ದೇಶದಲ್ಲಿರುವ ಇರಾನ್ನ ಮಿಲಿಟರಿ ಮತ್ತು ಭದ್ರತಾ ಅಧಿಕಾರಿಗಳು 24 ಗಂಟೆಗಳ ಒಳಗಾಗಿ ದೇಶ ಬಿಟ್ಟು ತೆರಳುವಂತೆ ಆದೇಶಿಸಿದೆ. ಹೊರ್ಮುಜ್ ಜಲಸಂಧಿಯ ಮೂಲಕ ಸರಕು ಸಾಗಣೆ ಈಗಾಗಲೇ ಸ್ಥಗಿತಗೊಂಡಿರುವುದರಿಂದ, ಈ ದಾಳಿಯು ಪರ್ಷಿಯನ್ ಕೊಲ್ಲಿಯ ಪರಿಸ್ಥಿತಿಯನ್ನು ಮತ್ತಷ್ಟು ಉದ್ವಿಗ್ನಗೊಳಿಸಿದೆ.
ಇದನ್ನೂ ಓದಿ : ಚೀನಾಕ್ಕೆ ಹೋಗಬೇಕಿದ್ದ ರಷ್ಯಾದ ತೈಲ ಟ್ಯಾಂಕರ್ಸ್ ಭಾರತದತ್ತ ಪ್ರಯಾಣ!
